Bɛhɔ Zo Bɛmia Bɛ Agɔnwolɛvalɛ Ne Anu

1. Duzu ati a agɔnwolɛma kpalɛ le ahyɛlɛdeɛ mɔɔ vi Gyihova ɛkɛ a?

AGƆNWOLƐMA kpalɛ le ahyɛlɛdeɛ mɔɔ vi Gyihova ɛkɛ. (Gye. 1:17) Bɛkulo Nyamenle yɛɛ bɛkulo yɛ. Yɛ nye die a, bɛ nye die, yɛ rɛle bɔ a, bɛkyekye yɛ rɛle yɛɛ bɛtu yɛ folɛ kpalɛ wɔ mekɛ mɔɔ yɛhyia nwo la. Bɛdi nɔhalɛ yɛɛ yɛkola yɛdie bɛ yɛdi. Amgba agɔnwolɛma zɛhae ‘maa ahonle ne di fɛlɛko’!—Mrɛ. 27:9.

2. Duzu ati a ɔhyia kɛ agyalɛma kɔ zo mia bɛ agɔnwolɛvalɛ ne anu a? (Mateyu 19:6)

² Ɔhyia kɛ nrenyia nee ɔ ye yɛ agɔnwolɛma kpalɛ. Ɔnle kɛ bɛbu bɛ agɔnwolɛvalɛ ne debie ekyi—ɔhyia kɛ bɛkɔ zo bɛbɔ mɔdenle bɛmia nu. Saa bɛbu bɛ nye bɛgua zo a, bɛ nwo bayɛ bɛ koonwu, bɛ nye ɛnrɛlie na bɛava ɛya bɔbɔ. Noko saa bɛkɔ zo bɛmia nu a, bɛbayɛ agɔnwolɛma kyengye. (Kenga Mateyu 19:6.) Wɔ edwɛkɛ ɛhye anu, yɛbanwu kɛzi agyalɛma bahola ahɔ zo amia bɛ agɔnwolɛvalɛ ne anu la. Noko mɔɔ limoa la, maa yɛzuzu kɛzi Kilisienema mɔɔ bɛtɛgyale la bahola akpa awie mɔɔ ɔbayɛ bɛ gɔnwo kpalɛ wɔ bɛ ngoane mekɛ kɔsɔɔti anu la anwo.

KƐ ƆKƐYƐ NA WƆAKPA AGƆNWOLƐ MƆƆ Ɔ NEE WƆ BADƐNLA DAHUU LA

3-4. Duzu a baboa awie yeamaa yeanyia awie kpalɛ mɔɔ ɔbagya ye la a? (Mrɛlɛbulɛ 18:22)

³ Kolaa na yɛazi kpɔkɛ biala mɔɔ anwo hyia la, ɔwɔ kɛ yɛdwenle ngyegyelɛ mɔɔ kpɔkɛzilɛ ne bamaa yɛayia nee nvasoɛ mɔɔ yɛbanyia la anwo. Kpɔkɛzilɛ mɔɔ hyia la kola ka yɛ ɛbɛlabɔlɛ wɔ yɛ ngoane mekɛ kɔsɔɔti anu, ɔti ɔhyia kɛ yɛdwenle nwolɛ kpalɛ kolaa na yɛasisi.

⁴ Saa yɛlɛkpa agɔnwolɛ mɔɔ yɛ nee ye badɛnla dahuu—awie mɔɔ yɛbagya ye la a, ɔle kpɔkɛzilɛ mɔɔ hyia kpalɛ la anu ko. Kɛmɔ Gyihova a yɛle agyalɛ ngyehyɛleɛ ne la ati, nrɛlɛbɛ wɔ nu kɛ yɛbakpondɛ adehilelɛ yeavi ye ɛkɛ wɔ mekɛ mɔɔ yɛlɛkpa awie mɔɔ yɛbagya ye la. Ɔkulo kɛ nrenyia nyia yelɛ kpalɛ na raalɛ noko nyia kunli kpalɛ. Gyihova ze mɔɔ le kpalɛ maa yɛ la dahuu. (Kenga Mrɛlɛbulɛ 18:22; Aye. 48:​17, 18) Ngyinlazo mɔɔ wɔ Nyamenle Edwɛkɛ ne anu la bahola aboa Kilisienenli bie yeamaa yeanyia awie mɔɔ ɔfɛta kɛ ɔgya ye la.

5. Duzu ati a ɔhyia kɛ yɛgya awie mɔɔ bɛzɔne ye la ɛ?

⁵ Saa bɛsɔne yɛ a, yɛbayɛ Nyamenle agɔnwo mɔ. (Edw. 25:14) Ɔti saa ɛkulo kɛ ɛgya a, kpa awie mɔɔ ɔdaye noko ɔle Gyihova agɔnwo la. (1 Kɔl. 7:39) Saa ɛyɛ zɔ a, ɔbahile kɛ ɛ nye sɔ Gyihova ngyinlazo ne mɔ na ɔbamaa wɔanwu ahenle mɔɔ ɛbagya ye la kɛ ɔle ahyɛlɛdeɛ mɔɔ vi Gyihova ɛkɛ. (Mrɛ. 19:14) Eza ɔbamaa wɔahoati ngyegyelɛ mɔɔ ɛ nee awie mɔɔ ɔnle diedinli la ‘tu’ a ɛbayia la. (2 Kɔl. 6:14) Nrɛlɛbɛ fee ɛnle nu kɛ ɛbanyia adwenle kɛ ɛnnyia awie mɔɔ ɔfɛta kɛ ɛgya ye la wɔ asafo ne anu la ati ɛ nee awie mɔɔ ɔnle diedinli la badu. Yɛɛ ɔnle kɛ ɛnyia adwenle kɛ saa ɛ nee awie mɔɔ ɛnle diedinli la tu a, bie a nzinlii ɔbara nɔhalɛ ne anu.

6-7. Kpuya boni mɔ a ɔwɔ kɛ ɛbiza ɛ nwo wɔ ahenle mɔɔ ɛkulo kɛ ɛgya ye la anwo a?

⁶ Nɔhalɛ nu, tɛ awie biala mɔɔ bɛzɔne ye la a ɛbahola wɔagya ye a. Saa ɛ nye die awie bie anwo a, dimoa biza ɛ nwo kpuya bie mɔ.a Biza ɛ nwo kɛ: ‘Kɛzi ɔ nee ye abusua ne di ɛ? Asoo ɔdwenle awie mɔ anwo yɛɛ ɔbu debie? Nwane mɔ a le ɔ gɔnwo mɔ a? Saa ɔ nee awie mɔ adwenle ɛnyia wɔ debie nwo a, kɛzi ɔdi nwolɛ gyima ɛ? Asoo ɔle kyengye, anzɛɛ saa edwɛkɛ bie ɛntia Baebolo nu ngyinlazo a ɔlɛ ɛhulolɛ kɛ ɔbalie awie mɔ nzuzulɛ yeado nu? Asoo ɔ nye bolo ezukoa ɔ?’

⁷ Eza ɛbahola wɔabiza ɛ nwo kɛ: ‘Asoo me gɔnwo ne kile kɛ ɔkulo Gyihova kpalɛ ɔ? Asoo ɔlɛwula “subane fofolɛ ne” ɔ? Asoo ɔbaboa me yeamaa meahɔ zo meazonle Gyihova kpalɛ ɔ? Asoo yɛlɛ sunsum nu bodane ko? Asoo menwu kɛ mekɛ ɛlɛkɔ la yɛ agɔnwolɛvalɛ ne anu bamia adɛla kɛkala ɔ?’ (Kɔl. 3:​9, 10) Saa ɛle adiema raalɛ a, asoo adiema nrenyia ne mɔɔ ɛ nee ye ɛlɛtu la bayɛ agɔnwolɛ nee abusua tile kpalɛ ɔ? (1 Kɔl. 11:3) Saa ɛle adiema nrenyia a, asoo adiema raalɛ ne mɔɔ ɛ nee ye ɛlɛtu la banyia ɛhulolɛ kɛ ɔbalie wɔ tileyɛlɛ yeado nu ɔnva nwo wɔ sinlidɔlɛ ne mɔ ɔ? Ɔdie mekɛ na yɛanyia kpuya zɛhae mɔ anwo mualɛ. Ɔti mekɛ mɔɔ bɛlɛtu la, fa nwolɛ adenle ne nwu ahenle kpalɛ.

8-9. Duzu a baboa awie mɔɔ ɔkulo kɛ ɔgya la yeamaa yeazi kpɔkɛ mɔɔ nrɛlɛbɛ wɔ nu la a? (Eza nea nvoninli ne.)

⁸ Saa ɛbɔ mɔdenle kɛ ɛbanwu ahenle kpalɛ wɔ mekɛ mɔɔ bɛlɛtu la a, ɔbamaa wɔazi kpɔkɛ mɔɔ nrɛlɛbɛ wɔ nu la. Nwu adwenle mɔɔ menli lɛ wɔ ɛ gɔnwo ne anwo la. Ɛbahola wɔabiza subane mɔɔ ahenle lɛ la anwo edwɛkɛ. Kɛ neazo la, asoo menli nwu ye kɛ ɔbɛlɛ ɔ nwo aze, ɔ ti akunlu le kɛnlɛma yɛɛ ɔlɛ ndelebɛbo ɔ? Sarah, adiema raalɛ bie mɔɔ wɔ French Guiana mɔɔ adiema nrenyia bie mɔɔ bɛfɛlɛ ye Daniel la gyale ye la hanle kɛ: “Membizale adiema nrenyia bie mɔɔ ɔ nee Daniel de awuke ko anu na bɛbɔ nu bɛyɛ adekpakyelɛ gyima ne la Daniel anwo edwɛkɛ. Eza membizale Daniel asafo nu kpanyinli bie, ɔ gɔnwo mɔ kpalɛ yɛɛ mediema mraalɛ mɔɔ wɔ ye asafo ne anu la.” Eza ɔhyia kɛ ɛdua adenle kɛnlɛma zo ɛbiza ahenle mɔɔ ɛ nee ye ɛlɛtu la kɛ saa debie bie zile ye ɛbɛlabɔlɛ nu dɛba ne anzɛɛ debie bie ɛlɛsi ye ɛbɛlabɔlɛ nu kɛkala mɔɔ ɔwɔ kɛ ɔka nwolɛ edwɛkɛ ɔkile wɔ a. Bie a ɔhyia kɛ ɛnwu ye ɔluakɛ ninyɛne bie mɔ wɔ ɛkɛ mɔɔ nzinlii bɛkola bɛfa ngyegyelɛ bɛba agyalɛ nu a. 

⁹ Saa wɔ adwenle nu ta yɛ wɔ kesee wɔ ahenle mɔɔ ɛkulo kɛ ɛgya ye la anwo anzɛɛ agɔnwolɛma mɔɔ bɛnyi sunsum nu la ka subane bie mɔɔ ɛnle kpalɛ mɔɔ bɛnwu ye la anwo edwɛkɛ bɛkile wɔ a, mmabu ɛ nye ɛgua zo. Wɔ adenle zɛhae azo, ɛbahola wɔazi kpɔkɛ kɛ saa nrɛlɛbɛ wɔ nu kɛ bɛbadoa bɛ ɛdulɛ ne azo anzɛɛ bɛbapɛ zo a.b Akee bɛmaa yɛzuzu menli mɔɔ bɛgya dɛba la anwo wɔ edwɛkɛ ɛhye mɔɔ ɛha la anu.

BƐBƆ NU BƐYƐ NINYƐNE BƐMIA BƐ AGƆNWOLƐVALƐ NE ANU

10. Duzu ati a ɔle kpalɛ kɛ agyalɛma nyia mekɛ maa bɛ nwo a?

¹⁰ Saa agyalɛma ɛnlɛ alagye bɔbɔ a, ɔwɔ kɛ bɛnyia mekɛ bɛmaa bɛ nwo amaa bɛamia bɛ agɔnwolɛvalɛ nee bɛ agyalɛ ne anu. Ɛhye maa bɛnyia nwolɛ adenle bɛka ninyɛne mɔɔ sisile alehyenlɛ ne anu nee ninyɛne mɔɔ bɛlɛdwenle nwo yɛɛ kɛzi bɛte nganeɛ la anwo edwɛkɛ, bɛda ɛlɔlɛ ali bɛkile bɛ nwo na bɛbɔ nu bɛyɛ ninyɛne mɔɔ maa bɛ nye die la.

11. Duzu a kola sɛkye agyalɛma agɔnwolɛvalɛ ne a?

¹¹ Agyalɛma mɔɔ bɛle agɔnwolɛma kpalɛ la ɛngulo kɛ bɛ avinli tete ɛlɛ. Nɔhalɛ nu, ɔyɛ a bɛ avinli batete ekyii. Noko esiane wɔ nu kɛ bɛ avinli batete mekɛ tendenle. Kɛ neazo la, bie mɔ ɛdu ɛhɔ maanle gyɛne zo kɛ bɛkayɛ gyima, na yemɔ ɛmaa bɛ nee bɛ abusua ne avinli ɛtete mekɛ tendenle. Bie a ɔbamaa bɛanyia ezukoa ɛdeɛ, noko saa bɛ avinli tete kyɛ a, ɔkola ɔsɛkye agyalɛ ne.

12-13. (a) Duzu a agyalɛma bie mɔ yɛ amaa bɛanyia mekɛ bɛamaa bɛ nwo a? (Eza nea nvoninli ne.) (b) Saa yɛgya a, nwane a ɔwɔ kɛ ɔ nwo kyia yɛ kpalɛ a? (Nea ɛlɛka, “Kɛzi Ɔwɔ Kɛ Yɛbu Yɛ Nee Yɛ Hu Anzɛɛ Yɛ Ye Agɔnwolɛvalɛ Ne Ɛ?”)

¹² Duzu a agyalɛma bie mɔ ɛyɛ amaa bɛanyia mekɛ bɛamaa bɛ nwo a? Leah mɔɔ wɔ Guam la hanle kɛ: “Me nee me hu anye die nwo kɛ yɛbabɔ nu yɛayɛ ninyɛne ngakyile. Ɔnda ɔnzi kɛ yɛ nuhua bie bagyakyi ɔ gɔnwo ɛkɛ avinde ahɔlielie ɔ nye.” Roxanne mɔɔ wɔ United States la hanle kɛ: “Kɛmɔ yɛlɛ ninyɛne dɔɔnwo yɛyɛ la ati, yɛranwu ye kɛ ɔhyia kɛ yɛyɛ ngyehyɛleɛ yɛbɔ nu yɛyɛ ninyɛne kɛ mɔɔ yɛyɛ ngyehyɛleɛ yɛyɛ ninyɛne gyɛne mɔɔ hyia la.” (Fa toto Emɔso 3:3 anwo.) Damien mɔɔ wɔ France la hanle kɛ: “Yɛzukoa kɛ yɛbamaa yɛ nye alie debie mɔɔ yɛ nuhua ko biala anye die nwolɛ la anwo, na nzinlii akee deɛ zɔhane bayɛ debie mɔɔ yɛkulo ye kpalɛ a.” (Mat. 7:12) Katie mɔɔ wɔ United States la noko hanle kɛ: “Yɛfa yɛ fonu ne mɔ yɛgua ahane amaa bɛandwehwe yɛ adwenle.”

¹³ Mɔɔ tɛla biala la, bɛbɔ nu bɛyɛ sunsum nu ninyɛne. Myriam mɔɔ wɔ France la hanle kɛ: “Kolaa na yɛahɔ ɛleka wɔ alehyenlɛ ne anu la, yɛ nuhua ko biala dimoa kenga Baebolo ne na akee yɛaha mɔɔ yɛ nye liele nwo nee kɛzi yɛbava yɛayɛ gyima la anwo edwɛkɛ. Me nye die mekɛ ɛhye mɔ anwo kpalɛ.” Akee ɔhanle kɛ: “Eza saa yɛbɔ nu yɛyɛ asɔne na menwu kɛzi me hu kulo Gyihova la a ɔmaa me nye die.” Katie, mɔɔ yɛhanle ɔ nwo edwɛkɛ la hanle kɛ: “Mekɛ mɔɔ yɛ nye die nwo kpalɛ la a le mekɛ mɔɔ yɛbabɔ nu yɛayɛ daselɛlilɛ gyima ne la. Saa yɛte kɛ yɛ nuhua ko biala ɛlɛka ye diedi ne anwo edwɛkɛ a ɔmaa yɛ nye die na yɛkɔ zo yɛsukoa ninyɛne fofolɛ yɛfi yɛ nuhua ko biala ɛkɛ.”—Mrɛ. 27:17.

BƐBƆ NU BƐLI NGYEGYELƐ NWO GYIMA

14-15. Duzu ati a ɔwɔ kɛ agyalɛma bɔ nu di ngyegyelɛ mɔɔ bara bɛ agyalɛ ne anu la anwo gyima a? Maa neazo.

¹⁴ Kɛmɔ agyalɛma ne ɛnli munli la ati bɛbayia ngyegyelɛ wɔ bɛ agyalɛ ne anu. Baebolo ne ka kɛ agyalɛma “anwo bahyele bɛ wɔ nwonane nu.” (1 Kɔl. 7:28) Edwɛkɛ zɔhane fale ngyegyelɛ mɔɔ agyalɛma kɔsɔɔti yia bie la anwo. Saa ngyegyelɛ ɛhye bie ba a, duzu ati a ɔwɔ kɛ bɛbɔ nu bɛyɛ biala mɔɔ bɛbahola la bɛdi nwolɛ gyima a?

¹⁵ Maa yɛyɛ neazo bie. Saa sua kpole kɛnlɛma bie anzɛɛ debie bie mɔɔ sonle bolɛ la sɛkye a, ye biala anu ɔ menle mɔ bɛazi kpɔkɛ kɛ bɛyɛ ye boɛ. Bie a bɛbabɔ nwolɛ kakɛ kpole yɛɛ bɛbava ɛvolɛ dɔɔnwo a bɛayɛ ye boɛ a. Duzu ati ɔ? Ɔluakɛ sua anzɛɛ deɛ zɔhane sonle bolɛ maa bɛ. Zɔhane ala a agyalɛ biala sonle bolɛ a. Agyalɛma mɔɔ bikye bɛ nwo kpalɛ bɔbɔ la ɔyɛ a akɛsakɛsa bara bɛ avinli. Noko kɛ mɔɔ bɛkola bɛyɛ sua mɔɔ ɛzɛkye la boɛ la, zɔhane ala a bɛbahola bɛaziezie akɛsakɛsa mɔɔ bara agyalɛ ne anu la a. Ɔbalie mekɛ nee mɔdenlebɔlɛ kolaa na bɛahola bɛayɛ zɔ, noko saa agyalɛma ne mia bɛ nye kɛ bɛmia bɛ agyalɛ ne anu na bɛabeta bɛ nwo a, Gyihova anye balie. (Mal. 2:16) Saa bɛyɛ zɔ a ɔbahile kɛ bɛkulo bɛ nwo nee Gyihova mɔɔ hyehyɛle agyalɛ ne la.

16. Kɛ mɔɔ 1 Kɔlentema 13:​4-8a kile la, duzu a baboa agyalɛma mɔɔ ɛlɛyia ngyegyelɛ kpole la a? (Eza nea nvoninli ne nee ɛlɛka, “Mɔɔ Baboa Yeamaa Bɛamia Bɛ Agɔnwolɛvalɛ Ne Anu La.”)

¹⁶ Saa ngyegyelɛ ba wɔ agyalɛ ne anu a mmapele ɛ nwo ɛtete nu. (1 Kɔl. 7:​10, 11) Emomu, biza ɛ nwo kɛ, ‘Asoo mebahola meayɛ dɔɔnwo meamia yɛ agɔnwolɛvalɛ ne anu ɔ?’ Sukoa mɔɔ Baebolo ne ka ye wɔ kɛzi bɛda ɛlɔlɛ ali anwo la, na biza ɛ nwo saa ɛbahola wɔanyia anyuhɔlɛ wɔ subane mɔɔ bɛdiedia wɔ 1 Kɔlentema 13:​4-8a la anu a. (Kenga.) Kɛ anrɛɛ bɛbakpondɛ nwolɛ adenle mɔɔ bɛbava bɛavi agyalɛ ne abo la, bɛyɛ biala mɔɔ bɛbahola la bɛhulo bɛ nwo bieko. Fa wɔ adwenle sie mɔɔ ɛbahola wɔayɛ amaa wɔ agyalɛ ne ayɛ kpalɛ bieko la azo. Sɛlɛ Gyihova ɛkɛ ne moalɛ. Kpondɛ moalɛ mɔɔ ɛhyia nwo la fi yɛ mbuluku nee vidio ne mɔ anu yɛɛ asafo nu mgbanyima nee mediema mɔɔ bɛnyi sunsum nu la ɛkɛ. Saa ɛfa ɛ nwo ɛto Gyihova, “nyɛma mɔɔ bɔ nwolɛ nsa” anu ko ne mɔɔ anwo yɛ se kpalɛ la anwo zo a, wɔ agyalɛ ne ‘anu ɛnrɛde ndɛndɛ.’—Nol. 4:12.

17. Kɛ ɔkɛyɛ na menli mɔɔ bɛlɛdwenle agyalɛ ɛhɔlɛ nwo nee menli mɔɔ bɛgya la anye alie ɛ?

¹⁷ Gyihova kulo kɛ ye azonvolɛ kɔsɔɔti mɔɔ bɛdabɛ mɔɔ bɛlɛdwenle agyalɛ ɛhɔlɛ nwo nee menli mɔɔ bɛgya dɛba la boka nwo la anye die. Ɔti saa ɛtɛgyale na ɛ ɛbahulo kɛ ɛbagya a, kpa awie mɔɔ ɛ nee ye badɛnla wɔ wɔ ngoane mekɛ kɔsɔɔti anu la nrɛlɛbɛ nu. Saa wɔgya noko a, kɔ zo miemia ɛ nee ɛ ye anzɛɛ ɛ hu agɔnwolɛvalɛ ne anu. Bɛva bɛ nwo bɛdo Gyihova anwo zo bɛmaa ɔboa bɛ na bɛziezie ngyegyelɛ biala mɔɔ bara bɛ agyalɛ ne anu la. Saa ɛyɛ ninyɛne ɛhye mɔ a, ɛ nee ɛ hu anzɛɛ ɛ ye ne mɔɔ ɛkulo ye la ‘anye balie.’!—Nol. 9:9.