Sukoa Debie Fi “Arɛlekyekyelɛ Muala Nyamenle Ne” Ɛkɛ

1. Duzu ati a ɔwɔ kɛ yɛkyekye awie mɔ arɛle a?

“SƆNEA ngakyile maa” yɛ muala yɛ “rɛle bɔ,” ɔti ɔyɛ a yɛhyia arɛlekyekyelɛ nee anwosesebɛmaanlɛ. (1 Pita 1:6) Kɛ mɔɔ awie mɔ kyekye yɛ rɛle a yɛ nye die nwo la, zɔhane ala a saa menli gyɛne ɛlɛyia ngyegyelɛ a ɔwɔ kɛ yɛyɛ ye ndɛ yɛkyekye bɛ rɛle a. (Mat. 7:12) Gyihova, “arɛlekyekyelɛ muala Nyamenle ne,” kilehile yɛ kɛzi yɛbakyekye “bɛdabɛ mɔɔ bɛwɔ sɔnea biala anu la arɛle la.” Yɛbahola ‘yɛakyekye yɛ rɛle ngoko’ yɛava yɛazukoa ye neazo ne. (2 Kɔl. 1:​3, 4; 1 Tɛs. 4:18) Tɛ kɛ ɔwɔ kɛ yɛkyekye yɛ mediema arɛle la ati a yɛyɛ zɔ a, emomu kɛmɔ yɛkulo bɛ la ati ɔ. Wɔ edwɛkɛ ɛhye anu, yɛbazuzu (1) kɛzi Baebolo ne kilehile arɛlekyekyelɛ nu, (2) kɛ ɔkɛyɛ na yɛakyekye awie mɔ arɛle yɛɛ (3) mɔɔ yɛbahola yɛayɛ wɔ mekɛ mɔɔ yɛhyia arɛlekyekyelɛ la anwo.

KƐZI BAEBOLO NE KILEHILE ARƐLEKYEKYELƐ NU LA

2. Wɔ Baebolo ne anu, duzu a edwɛkɛkpɔkɛ mɔɔ bɛhile ɔ bo “arɛlekyekyelɛ” la kola kile a?

² Wɔ Baebolo ne anu, Giliki edwɛkɛkpɔkɛ mɔɔ bɛhile ɔ bo “arɛlekyekyelɛ” la kola kile ninyɛne dɔɔnwo, ɔgyi debie mɔɔ bɛlɛka nwolɛ edwɛkɛ la azo. Ɔkola ɔkile kɛ “ɛmaa awie anwosesebɛ,” “ɛtu ye folɛ” anzɛɛ “ɛboa ye wɔamaa yeayɛ debie.” (Wlo. 12:8) Mɔɔ edwɛkɛkpɔkɛ mumua ne abo kile la a le kɛ “ɛtwe wɔabikye awie.” Ɔti yɛbahola yɛapɛ awie mɔɔ ɔlɛyɛ ye ndɛ yeahɔ ɔ gɔnwo bie mɔɔ ɛlɛnwu amaneɛ la anwo ɛkɛ na yeava moalɛ biala mɔɔ ɔhyia nwo la yeamaa ye la anwo nvoninli. Ɔnva nwo moalɛ biala mɔɔ ɔ gɔnwo ne bava amaa ye yeakyekye ɔ rɛle la, ɔbamaa ye anwosesebɛ na yeamaa ɔ nwo agyinla ye.

3. Kɛzi Baanabase yɛle awie mɔ mɔɔ yɛkyekye bɛ rɛle la anwo neazo ɛ? (Eza nea nvoninli ne.)

³ Nea Baebolo nu neazo ɛhye. Ɛnee Kilisienenli bie mɔɔ bɛfɛlɛ ye Dwosefi la kola maa awie mɔ anwosesebɛ na ɔkyekye bɛ rɛle kpalɛ, ɔti ɛzoanvolɛma ne donle ye duma Baanabase, ɔ bo kile, “Arɛlekyekyelɛ Ralɛ.” (Gyi. 4:36) Ɛnee zɔhane duma ne fɛta ye bɔkɔɔ ɔti Baebolo ne anva ɔdaye mumua ne ye duma anvɛlɛ ye bieko ɛlɛ. Wɔ mekɛ ngakyile nu, Baanabase bɔle ye duma ne anwo ɛbɛla na ɔboale ɔ mediema diedima mɔɔ hyia moalɛ la. Kɛ neazo la, mɔɔ Sɔɔlo mɔɔ bɔ zo mɔɔ ɛnee yehakyi yerayɛ Kilisienenli la hɔdwule Gyɛlusalɛm la, ɛnee ɔkulo kɛ ɔnwu ɛdoavolɛma ne. Noko ɛnee bɛsulo ye ɔluakɛ ɔliele duma kɛ ɔyɛ ɛdoavolɛma ne kpɔdekpɔde. Noko Baanabase liele Sɔɔlo lile na ɔvale ye ɔhɔhilele ɛzoanvolɛma ne.—Gyi. 9:​26-28.

KƐ ƆKƐYƐ NA YƐAKYEKYE AWIE MƆ ARƐLE LA

4. Adenle kpalɛ ko mɔɔ yɛbahola yɛalua zo yɛakyekye awie mɔ arɛle la a le boni? (Wulomuma 1:​11, 12)

⁴ Saa ɔbayɛ boɛ a, kɔkpɔla bɛ. Gyihova dua ye azonvolɛ nwo zo kyekye awie mɔ arɛle. Kɛ neazo la, mɔɔ ngapezonli Yilaegya arɛle bɔle la, Gyihova luale anwumabɔvolɛ nwo zo kyekyele ɔ rɛle. (1 Arl. 19:​4-7) Ɛzoanvolɛ Pɔɔlo noko nwunle kɛ saa ɔkɔ ɔ mediema ɛkɛ ɔkɔmaa bɛ anwosesebɛ a, ɔboa bɛ kpole kpalɛ. (Kenga Wulomuma 1:​11, 12.) Saa ɛkɔ awie ɛkɛ ne kɛ ɛkakyekye ɔ rɛle a, anrɛɛ nyia mekɛ maa ye; mmagyinlegyinla ɛkɛ ne ala ɛkɔ. (1 Kɔl. 16:7) Noko saa wɔangola wɔangɔkpɔla awie mɔɔ hyia moalɛ la a, ɛbahola wɔavɛlɛ ye, wɔahɛlɛ ye kɛlata, kaade anzɛɛ wɔasɛnde ye tɛkese mɛsegyi wɔava wɔamaa ye anwosesebɛ. Asoo ɛbamaa Gyihova adenle wɔamaa yealua ɛ nwo zo yeakyekye awie mɔ arɛle ɔ?

5. Ngyegyelɛ boni mɔ a yɛbahola yɛayia a?

⁵ Mekɛ mɔɔ awieleɛ mekɛ ɛhye anu ɛlɛyɛ se kpalɛ la, yɛ nye bahola ala kɛ yɛbayia ngyegyelɛ wɔ mekɛ mɔɔ yɛlɛbɔ mɔdenle kɛ yɛbahɔkpɔla yɛ mediema na yɛakyekye bɛ rɛle la. Mɔɔ Pɔɔlo la efiade wɔ Wulomu la, Onɛsefɔlɛse mɔɔ vi Ɛfɛsɛse la hɔkpondɛle ye ɔnva nwo kɛ ɛnee bɛkola bɛkye ɔdaye noko anzɛɛ bɛku ye bɔbɔ la. (2 Tim. 1:​16-18) Alasevolɛ mɔɔ wɔ Russia la noko ɛla subane zɔhane bie ali wɔ mekɛ mɔɔ bɛ mediema diedi ti bɛlɛyɛ bɛ kpɔdekpɔde la. Saa bɛlɛdi Gyihova Alasevolɛ edwɛkɛ a, bɛ mediema mrenyia nee mraalɛ kɔ kɔɔto ɛkɛ ne bie fa kile kɛ bɛgyi bɛ nzi ɔnva nwo kɛ bɛbahola bɛahye bɛdabɛ noko la. Kɛ ɔkɛyɛ na wɔaziezie ɛ nwo amaa ɛdawɔ noko wɔahola wɔakyekye ɛ mediema arɛle ɛ? Sukoa kɛzi Nyamenle menli ɛboa bɛ nwo ngoko wɔ tete ne nee ɛnɛ nee kɛzi bɛ nye liele ɔnva nwo kpɔdekpɔdeyɛlɛ la anwo debie.

6. Kɛ ɔkɛyɛ na yɛazukoa Gyihova wɔ mekɛ mɔɔ yɛlɛkyekye awie mɔ arɛle la ɛ? (Eza nea nvoninli ne.)

⁶ Tie bɛ edwɛkɛ. Mekɛ mɔɔ ngapezonli Yilaegya nwunle kɛ ye ngoane la esiane nu la, ɔhanle ye ahonle nu edwɛkɛ kɔsɔɔti ɔhilele Gyihova. Yɛ Nyamenle ne mɔɔ lɛ ɛlɔlɛ la diele Yilaegya kpalɛ ɔnva nwo kɛ ɛnee ɔze debie mɔɔ ɛlɛgyegye ye dɛba la. Mɔɔ Yilaegya ɛlɛka edwɛkɛ mɔɔ yeha ye dɛba bieko bɔbɔ la, Gyihova nyianle abotane diele ye. (1 Arl. 19:​9, 10, 14) Eza Gyihova maanle ngapezonli Habakɛke adenle maanle ɔhanle debie mɔɔ ɛlɛgyegye ye la anwo edwɛkɛ ɔhilele ye, na kɛzi Habakɛke dendɛle la maanle ɔyɛle kɛ asɛɛ ɔmbu Nyamenle la. (Hab. 1:​2, 3) Ɛnɛ noko, Gyihova tie yɛ asɔneyɛlɛ ne mɔ kpalɛ ɔnva nwo kɛ ɔze mɔɔ yɛhyia nwo dɛba la. Saa yɛ mediema ɛlɛka bɛ edwɛkɛ ahile yɛ a ɔwɔ kɛ yɛtie bɛ kpalɛ yɛfa yɛsukoa Gyihova. Saa bɛlɛtendɛ a, “yɛ ye ndɛ tie” bɛ, na saa bɛ edwɛkɛ wowɔ anzɛɛ bɛlɛka edwɛkɛ ko ne ala fane dɔɔnwo bɔbɔ a, mmapɛ bɛ nloa azo anzɛɛ mmafa bɛ nwo ɛya.—Gye. 1:19; Nol. 7:9.

7. Kɛ ɔkɛyɛ na yɛanwu debie mɔɔ awie mɔɔ ɔ rɛle ɛbɔ la hyia nwo la ɛ?

⁷ Nwu mɔɔ ahenle hyia nwo la. Gyihova nwu mɔɔ wɔ menli ahonle nu la, noko yɛmɛ yɛngola yɛnnwu ahonle nu, ɔti saa yɛtie ahenle edwɛkɛ kpalɛ a, yɛɛ yɛbanwu adenle mɔɔ yɛbalua zo yɛakyekye ɔ rɛle la. Mmanyia adwenle kɛ kɛmɔ ɛdawɔ a ɛwɔ tɛnlabelɛ zɔhane anu a anrɛɛ ɛze mɔɔ ɛbahyia nwo la ati, ɛze mɔɔ ahenle noko hyia nwo la. Asolo yɛ nuhua ko biala tɛnlabelɛ. Ɔti to ɛ rɛle aze, tie ye kpalɛ na biza ye kpuya mɔɔ ɔbaboa ye yeamaa yeaha kɛzi ɔte nganeɛ la anwo edwɛkɛ la.—Mrɛ. 20:5.

8. Kɛzi Gyisɛse kyekyele Maata nee Mɛle arɛle wɔ mekɛ mɔɔ Lazalɛse wule la ɛ? (Eza nea nvoninli ne mɔ.)

⁸ Nea ndenle mɔɔ Gyisɛse luale zo kyekyele Maata nee Mɛle arɛle wɔ mekɛ mɔɔ bɛ diema Lazalɛse wule la. Ɛnee bɛ mu nwiɔ bɛlɛdi nyane; noko Gyisɛse luale ndenle ngakyile zo kyekyele bɛ rɛle. Mɔɔ Maata nee Gyisɛse dendɛle la, Gyisɛse hanle ewudwazo ne anwo nɔhalɛ edwɛkɛ hilele ye na ɔboale ye ɔmaanle ɔnyianle diedi kpole wɔ nuhua. Noko mɔɔ Mɛle vale ɛzunlɛ rale Gyisɛse anwo ɛkɛ ne la, yeanga ewudwazo ne anwo edwɛkɛ yeangile ye. Emomu, ɔ nee Mɛle zunle na ɔbizale ye ɛleka mɔɔ bɛdole Lazalɛse la. (Dwɔn 11:​20-35) Duzu a yɛsukoa yɛfi nu a? Saa yɛlɛkyekye menli mɔɔ bɛlɛnwu amaneɛ la arɛle a, ɔwɔ kɛ yɛnwu mɔɔ bɛhyia nwo la, na ɔnle kɛ yɛdua adenle ko ne ala azo yɛkyekye bɛ rɛle.

9. Kɛzi yɛbahola yɛava Baebolo ne yɛakyekye awie mɔ arɛle ɛ? (Wulomuma 15:​4, 5)

⁹ Fa Baebolo ne di gyima. Saa ɛka “Ngɛlɛlera ne anu arɛlekyekyelɛ” ne anwo edwɛkɛ ɛkile awie a, ɛbahola wɔaboa ye wɔamaa yeanyia anyelazo. (Kenga Wulomuma 15:​4, 5.) Akee anyelazo zɔhane bakyekye ɔ rɛle na yeamaa ye anwosesebɛ. (Aye. 40:31) Kɛ ɔkɛyɛ na wɔanyia ngɛlɛlera mɔɔ ɛbava wɔakyekye awie arɛle la ɛ? Bie mɔ kɛlɛ ngɛlɛlera mɔɔ bɛhyia nwo a bɛbava bɛali gyima la to ɛkɛ. Ngɛlɛlera ɛhye mɔ bie wɔ Kilisiene Ɛbɛlabɔlɛ Nwo Ngɛlɛlera ne anu wɔ edwɛkɛtile “Arɛlekyekyelɛ” abo. Sɛlɛ Gyihova kɛ ɔboa wɔ ɔmaa ɛva ye Edwɛkɛ ne ɛli gyima kpalɛ amaa wɔahola wɔamaa awie mɔ anwosesebɛ. Ye sunsum ne bahola aboa wɔ yeamaa wɔahakye ngɛlɛlera mɔɔ fɛta wɔ mekɛ mɔɔ ɛhyia nwo la.—Dwɔn 14:26.

10. Saa yɛlɛbɔ mɔdenle kɛ yɛbakyekye awie arɛle a, duzu ati a ɔwɔ kɛ yɛtendɛ kɛnlɛma a?

¹⁰ Tendɛ kɛnlɛma. Giliki edwɛkɛkpɔkɛ mɔɔ bɛhile ɔ bo “arɛlekyekyelɛ” la eza kola kile kɛ “ɛtu awie folɛ” anzɛɛ “ɛboa awie wɔamaa yeayɛ debie.” Ɔdwu mekɛ bie a ɔbahyia kɛ ɛtu ahenle mɔɔ ɛlɛkyekye ɔ rɛle la folɛ anzɛɛ ɛboa ye ɛmaa ɔkakyi ye adwenle. Saa ɔhyia kɛ ɛyɛ zɔ a, dwenle mɔɔ ɛbaha la anwo kpalɛ amaa wɔ edwɛkɛ ne aboa ahenle na yeamboda ye. (Mrɛ. 12:18) Gyihova yɛle ɛhye anwo neazo mɔɔ tɛla biala la wɔ mekɛ mɔɔ ɔ nee Yilaegya dendɛle la. Ɔdele nganeɛ kɛ ye gyima ne ɛnzɔ ɛnyelɛ yɛɛ kɛzi Yizilayɛma kpɔkyele la gyegyele ye. Gyihova vile atiakunlukɛnlɛma nu boale Yilaegya ɔmaanle ɔhakyile ye adwenle noko yeanga ye nvonleɛ ne anwo edwɛkɛ. (1 Arl. 19:​15-18) Saa ɛdawɔ noko ɛda atiakunlukɛnlɛma ali na ɛdwenle mɔɔ ɛbaha la anwo kpalɛ a, ɛbahola wɔaboa ɛ mediema. Eza saa ɛlɛbɔ mɔdenle kɛ ɛbava gyimalilɛ bie mɔɔ ɛbayɛ ye wɔ debiezukoalɛ bo anzɛɛ mualɛ mɔɔ ɛbamaa la wɔamaa ɛ mediema anwosesebɛ a, anrɛɛ dahuu tendɛ kɛnlɛma.

11. Duzu a bɛdabɛ mɔɔ bɛwɔ anwongyelelɛ nu la hyia nwo a? (1 Dwɔn 3:18)

¹¹ Fa ninyɛne mɔɔ bɛhyia nwo la maa bɛ. Bɛdabɛ mɔɔ bɛwɔ anwongyelelɛ nu la ɛngyia arɛlekyekyelɛ ala. (Kenga 1 Dwɔn 3:18.) Baanabase yɛle neazo kɛnlɛma wɔ mekɛ mɔɔ ɔdɔnenle ye agyapadeɛ bie na ɔvale ezukoa ne ɔyele ndoboa ɔboale mediema mɔɔ ɛnee bɔ zo mɔɔ bɛzɔne bɛ mɔɔ ɛnee hyia moalɛ la. (Gyi. 4:​36, 37) Ɛnɛ, yɛ mediema Kilisienema dɔɔnwo di ye neazo ne anzi na bɛyɛ ninyɛne bɛboa bɛdabɛ mɔɔ bɛhyia moalɛ la. Mɔɔ azuyilɛ bie zɛkyele Gabriela mɔɔ vi Poland la sua ne bɔkɔɔ la, ɔ nye zo danle ye. Ɔhanle kɛ: “Me ahonle dule yɛɛ adwenleadwenle dɔle me nwo, na zɔhane ala a me awovolɛ, mɔɔ bɛ nee me de la noko dele nganeɛ a. Ɛnee mennwu kɛzi mebagyinla tɛnlabelɛ ne anloa a. Noko mediema mɔɔ wɔ asafo gyɛne mɔɔ zuozua yɛ anu la rale ɛkɛ na bɛvale kenle ko pɛ bɛyɛle gyima dɔɔnwo wɔ yɛ sua ne anwo. Mɔɔ zile la maanle diedi mɔɔ melɛ kɛ Gyihova ɛlɛkile ye menli adenle yeamaa bɛakyekye bɛdabɛ mɔɔ bɛlɛnwu amaneɛ la arɛle la yɛle kpole.”

12. Saa ɛfa nɔhalɛlilɛ ɛgyinla sɔnea ngakyile nloa a, kɛzi ɔboa ɛ mediema Kilisienema ɛ?

¹² Gyinla sɔnea nloa kpundii. Pɔɔlo hanle hilele Tɛsalonaekama ne kɛ mɔɔ ɔdele nɔhalɛlilɛ mɔɔ bɛvale bɛgyinlanle kpundii la anwo edwɛkɛ la, ɔkyekyele ɔ rɛle na ɔmaanle ye anwosesebɛ. Ɔnwunle kɛ gyima mɔɔ ɔyɛle ɔboale bɛ la anyɛ mgbane. (1 Tɛs. 3:​5-8) Na ɛnee Pɔɔlo noko kulo kɛ ɔdua amaneɛ mɔɔ ɔ mediema ti ɔlɛnwu ye la azo ɔkyekye bɛdabɛ noko nee mediema mɔɔ ɔtɛyiale bɛ bɔbɔ la arɛle. (Kɔl. 2:​1, 2) Zɔhane ala a saa yɛ mediema Kilisienema nwu kɛzi Gyihova ɛlɛboa yɛ yeamaa yɛagyinla yɛ sɔnea ngakyile ne mɔ anloa kpundii la a, ɔbamaa bɛ anwosesebɛ kpole a.

13. Saa yɛkulo kɛ yɛmaa awie mɔ anwosesebɛ a, duzu a ɔwɔ kɛ yɛkɔ zo yɛyɛ a?

¹³ Si abotane. Wɔannea a yɛbabɔ mɔdenle kɛ yɛkyekye mediema mɔɔ bɛ rɛle ɛbɔ la arɛle, noko bie a bɛ rɛle ɛnrɛkyekye ɛkɛ ne ala. Noko akee Baebolo ne tu yɛ folɛ kɛ ‘yɛhɔ zo yɛmaa yɛ nwo anwosesebɛ.’ (1 Tɛs. 5:11) Ɔti si abotane wɔ mekɛ mɔɔ ɛlɛkɔ zo wɔakyekye bɛdabɛ mɔɔ bɛhyia wɔ moalɛ la arɛle la. (1 Tɛs. 5:14) Nɔhalɛ nu, ɔyɛ a yɛ nuhua ko biala hyia arɛlekyekyelɛ. Saa ɔba ye zɔ a duzu a yɛbahola yɛayɛ a?

MEKƐ MƆƆ ƐHYIA ARƐLEKYEKYELƐ LA

14-15. Saa adwenleadwenle tɔ yɛ nwo anzɛɛ yɛ rɛle bɔ a, duzu a ɔwɔ kɛ yɛyɛ a?

¹⁴ Sɛlɛ Gyihova. Saa adwenleadwenle tɔ ɛ nwo anzɛɛ ɛ rɛle bɔ a, sɛlɛ Gyihova kɛ ɔkyekye ɛ rɛle. (Edw. 94:19) Fi wɔ ahonle nu ka wɔ ngyegyelɛ ne anwo edwɛkɛ fɔɔnwo kile ye. (Edw. 62:8) Nɔhalɛ nu, Gyihova ze kɛzi ɛte nganeɛ la kolaa na wɔayɛ asɔne bɔbɔ. Noko saa ɛfi wɔ ahonle nu ɛka wɔ ngyegyelɛ ne amuala anwo edwɛkɛ ɛkile ye wɔ asɔneyɛlɛ nu a, ɔkile kɛ ɛlɛ diedi. Na Gyihova bua bɛdabɛ mɔɔ bɛlɛ diedi wɔ ye nu la asɔneyɛlɛ dahuu wɔ ɔdaye Nyamenle ye adenle zo. (Maake 11:24) Felepaema 4:​6, 7 ka kile yɛ kɛ: ‘Bɛva bɛ nzɛlɛlɛ bɛdo Nyamenle anyunlu; na Nyamenle anzodwolɛ ne mɔɔ bo ndelebɛbo muala azo la babɔ bɛ ahonle nee bɛ adwenle nzuzulɛ nwo bane.’

¹⁵ Maa awie mɔ ɛboa wɔ. Ka kɛzi ɛte nganeɛ la anwo edwɛkɛ kile ɛ gɔnwo bie mɔɔ yenyi sunsum nu, anzɛɛ asafo nu kpanyinli bie mɔɔ ɛdie ye ɛdi kpalɛ la. Ɛ mediema bahola akyekye ɛ rɛle, noko saa wɔanga kɛzi ɛte nganeɛ anzɛɛ debie mɔɔ ɛhyia nwo la wɔangile bɛ a, bie a bɛnrɛnwu ye. (Mrɛ. 14:10) Ɛbahola wɔaha wɔahile bɛ kɛ bɛdie edwɛkɛ mɔɔ ɛka wɔahile bɛ la kpalɛ anzɛɛ bɛha ngɛlɛlera anzɛɛ edwɛkɛ bie mɔɔ bɛnwu kɛ ɔbakyekye ɛ rɛle la bɛhile wɔ.

16. Saa awie mɔ kulo kɛ bɛmaa yɛ anwosesebɛ a, duzu a bahola azi a, noko duzu a ɔwɔ kɛ ɛkakye a?

¹⁶ Si abotane na fa ɛtane kyɛ. Ɛ mediema bahola ayɛ nvonleɛ wɔ mekɛ mɔɔ bɛlɛbɔ mɔdenle kɛ bɛmaa wɔ anwosesebɛ la. Kɛ neazo la, bie a bɛbaha edwɛkɛ anzɛɛ bɛbayɛ debie mɔɔ akee ɔbamaa ɛ nwo abubu wɔ bɔkɔɔ a. Saa ɔba ye zɛhae a, nyia bɛ nwo abotane. (1 Kɔl. 13:​4, 7) Eza kakye edwɛkɛ mɔɔ wɔ Gyemise 3:2 la, ɔse: “Saa awie ɛnvo wɔ edwɛkɛhanlɛ nu a, ɛnee ɔle sonla mɔɔ di munli.” Fa wɔ adwenle sie ɛ nwo adwenle kpalɛ mɔɔ bɛlɛ la azo. Kakye kɛ “sunsum ne kulo, noko nwonane ne le bɛtɛɛ.”—Mat. 26:41.

17. Duzu a ɔwɔ kɛ yɛbɔ kpɔkɛ kɛ yɛbayɛ a?

¹⁷ Yɛ muala yɛhyia arɛlekyekyelɛ nee anwosesebɛmaanlɛ nwo, na yɛbahyia nwo kpalɛ wɔ mekɛ mɔɔ awieleɛ mekɛ ɛhye anu ɛlɛyɛ se kpalɛ na Nyamenle agbɔvolɛ ɛlɛdwazo atia yɛ ɛsesebɛ la. Bɛmaa yɛbɔ kpɔkɛ kɛ yɛbakyekye yɛ nuhua ko biala arɛle.