Nyia Wɔ Ngyegyelɛ Ne Mɔ Anwo Adwenle Kpalɛ

1-2. Duzu a ɔwɔ kɛ yɛyɛ amaa yɛahola yɛagyinla yɛ ngyegyelɛ ne mɔ anloa a? (Eza nea nvoninli ne.)

ASOO wɔ diedi ne ati ɛlɛyia nzisi, wɔ abusua ne ɛlɛdwazo atia wɔ anzɛɛ bɛlɛyɛ wɔ kpɔdekpɔde ɔ? Asoo ɛlɛyia kpɔkɛdelɛ anzɛɛ kpanyinliyɛlɛ nwo ngyegyelɛ ɔ? Anzɛɛ esiane bie ɛdo wɔ, bie a wɔ dɔvolɛ bie ɛwu ɔ? Kɛ mɔɔ ɔto Gyihova azonvolɛ dɔɔnwo la, bie a ɛdawɔ noko wɔ ɛbɛlabɔlɛ nu “le ngyegyelɛ nee alɔbɔlɛ ngome.”—Edw. 90:10.

² Amaa yɛahola yɛagyinla yɛ ngyegyelɛ ne mɔ anloa kpalɛ la, ɔwɔ kɛ yɛnyia nwolɛ adwenle mɔɔ ɔfɛta la. Duzu ati a ɛhye anwo hyia a? Maa yɛyɛ neazo bie: Yɛbahola yɛava yɛ ngyegyelɛ ne mɔ yɛatoto delava mɔɔ ɛlɛka kale la anwo. Saa ye neanleɛ ne anu yɛ evinli a ɔnrɛnwu aze kpalɛ. Noko saa ɔkyikyi ye neanleɛ ne anu a, bie a ɔbanwu kɛ ɔwɔ kɛ ɔfa fema zo anzɛɛ bɛne zo, ɔkɔ bɛtɛɛ anzɛɛ ɔgyinla ekyii. Zɔhane ala a saa yɛbu yɛ ngyegyelɛ ne mɔ kɛ mɔɔ Gyihova kulo kɛ yɛbu bɛ la a, ɔbamaa yɛanwu adenle kpalɛ mɔɔ yɛbalua zo yɛali nwolɛ gyima la. Wɔ edwɛkɛ ɛhye anu, yɛbazuzu (1) kɛzi yɛbanyia ngyegyelɛ nwo adwenle kpalɛ, (2) kɛzi yɛ tɛnlabelɛ ne anwo adwenle mɔɔ ɛnfɛta la kola gyegye yɛ yɛɛ (3) kɛ ɔkɛyɛ na yɛanyia adwenle kpalɛ wɔ mekɛ mɔɔ edwɛkɛ bie bado yɛ la anwo.

NYIA NGYEGYELƐ NWO ADWENLE KPALƐ

3. Duzu ati a yɛyia ngyegyelɛ wɔ ewiade ɛhye anu a?

³ Ɛyɛ ye biala a yɛbayia ngyegyelɛ wɔ ɛtane ewiade ɛhye anu. Mekɛ ala mɔɔ yɛnli munli na Seetan tɛdi ewiade ɛhye azo tumi la, yɛbayia ngyegyelɛ. Eza kɛmɔ ewiade ɛhye awieleɛ ne ɛlɛbikye kpalɛ la ati, akee bɔbɔ yɛbayia ngyegyelɛ dɔɔnwo. Bie a esiane le kɛ azɛlɛkpusulɛ nee azuyilɛ bado yɛ anzɛɛ awie mɔ ninyɛndane bamaa yɛayia ngyegyelɛ. (Mat. 24:8; 2 Tim. 3:13) Saa Gyihova yɛ ninyɛne ɛhye mɔ amuala boɛ kɛkala a, ɔbayɛ kɛ asɛɛ ɔlɛboa Seetan yeamaa yeanlea ewiade ɛhye azo. Wɔ ewiade ɛhye anu ɛdeɛ, ɛyɛ ye biala a “munzule” bado yɛ.—Nol. 9:​12, ɔbdw.

4. Debie bieko mɔɔ ɔti yɛnwu amaneɛ la a le boni?

⁴ Ngyegyelɛ gyɛne mɔɔ Kilisienema yia la. Ɛnee Gyisɛse ta ka kile ye ɛdoavolɛma kɛ ɔlua bɛ diedi ne ati bɛbayɛ bɛ kpɔdekpɔde. (Mat. 24:9; Dwɔn 16:2) Ɔti saa sɔnea zɛhae mɔ bie to yɛ a, ɔmmaa yɛmkpo aze wɔ diedi ne anu. (1 Tɛs. 3:​3, 4) Saa yɛfa diedi kpole yɛgyinla sɔnea ngakyile nloa a, ɔbamaa yɛanyia anwodozo kɛ yɛtɛdua adenle ne mɔɔ kɔ dahuu ngoane nu la anu. Eza ɔmaa yɛnwu afoa mɔɔ yɛgyi wɔ edwɛkɛ titili mɔɔ la Gyihova nee Seetan avinli la anu. Adalɛ mɔɔ Seetan bɔ sɛkye Nyamenle duma la anu ko a le kɛ angomedi ti a alesama sonle Nyamenle a. Ɔti amaa yeahile kɛ ye edwɛkɛ ne le nɔhalɛ la, yedu ɔ nye yezie Gyihova menli nwo ɛsesebɛ. (Dwobu 1:​9-11) Saa ɛlɔlɛ mɔɔ yɛlɛ yɛmaa Gyihova la maa yɛgyinla kpundii a, ɔmaa Gyihova anye die kpalɛ.—Mrɛ. 27:11.

5. Duzu a yɛbahola yɛazukoa yɛavi Nolobɔvo 7:​13, 14 anu a? (Eza nea nvoninli ne mɔ.)

⁵ Tɛ Gyihova a maa yɛyia ngyegyelɛ a, ɔmaa nwolɛ adenle ala. Gyihova ɛnyɛ amumuyɛ fee anzɛɛ ɛnva ninyɛndane ɛnzɔ yɛ ɛnnea. (Gye. 1:13) Noko Belemgbunli Sɔlɔmɔn hɛlɛle kɛ “amaneɛnwunlɛ mekɛ” le “nɔhalɛ Nyamenle ne gyima.” (Kenga Nolobɔvo 7:​13, 14.) Wɔ ɛke, ɔngile kɛ Gyihova a maa ninyɛndane sisi a, emomu bie a ɔbamaa nwolɛ adenle yeamaa bɛasisi. Ɔti ɛnee Sɔlɔmɔn ɛlɛtu yɛ folɛ kpalɛ mɔɔ ɔbamaa yɛanyia yɛ sɔnea ne mɔ anwo adwenle kpalɛ la. Mɔɔ limoa, ɔhyia kɛ yɛdie yɛto nu kɛ, kɛ alesama mɔɔ yɛnli munli mɔɔ yɛde Seetan ewiade ye anu la, ɔyɛ a ninyɛne bahɔ boɛ yɛɛ ɔyɛ a ninyɛne nu bayɛ se. Saa yɛwɔ mekɛ kpalɛ nu a, yɛbahola yɛahile Nyamenle kpalɛyɛlɛ ɛhye anwo anyezɔlɛ na yɛabu ye kɛ ɔle ahyɛlɛdeɛ mɔɔ vi ye ɛkɛ a. Mɔɔ tɔ zo nwiɔ, Sɔlɔmɔn hakyele yɛ kɛ, ‘yɛnrɛnwu mɔɔ bazi,’ saa ninyɛne bahɔ boɛ wɔ kenle ne anu o, saa yɛbayia ngyegyelɛ o. Tenlenema nee bɛdabɛ mɔɔ bɛnle tenlenema la amuala yia ngyegyelɛ mɔɔ bɛ nye ɛnla.

6. Ninyɛne mɔɔ ɔti Gyihova maa adenle maa yɛyia sɔnea la bie mɔ a le boni? (Hibuluma 12:​7, 11)

⁶ Saa yɛnyia yɛ sɔnea ne mɔ anwo adwenle mɔɔ fɛta la a, yɛbanwu kɛ Gyihova ɛlɛdua zo ahilehile yɛ kɛ ɔwɔ kɛ yɛfa yɛ nwo yɛto ɔ nwo zo yɛmaa ɔboa yɛ na ɔnle kɛ yɛbɔ mɔdenle kɛ yɛdayɛ mumua ne yɛbali nwolɛ gyima. Gyihova nwu sɔnea biala mɔɔ yɛyia la yɛɛ ɔdwenle yɛ amaneɛnwunlɛ nwo. Saa ɔmaa adenle ɔmaa yɛkɔ “awozinli kabii bɔnza nu bɔbɔ a,” ɔbahɔ zo yeahile yɛ adenle, yeamaa yɛanwu kɛ ɔkulo yɛ na yeamaa yɛ anwosesebɛ mɔɔ yɛhyia nwo amaa yɛagyinla kpundii la. (Edw. 23:4) Eza ngyegyelɛ kola boa yɛ maa yɛnwu subane mɔɔ yɛtɔ sinli wɔ nu la na Nyamenle boa yɛ maa yɛnyia subane kpalɛ. (Kenga Hibuluma 12:​7, 11.) Kɛ neazo la, ɛnee ɔhyia kɛ Dwobu bɛlɛ ɔ nwo aze. Tɛ Gyihova a vale sɔnea ne rale Dwobu anwo zo ɛdeɛ, noko ɔmaanle nwolɛ adenle na ɔluale zo ɔboale Dwobu ɔmaanle ɔzukoale ninyɛne dɔɔnwo mɔɔ hyia la. (Dwobu 42:​1-6) Noko ɔnva nwo biala mɔɔ bazi la, yɛze kɛ debie biala mɔɔ Gyihova bamaa nwolɛ adenle la ɛnrɛzɛkye yɛ nee ye avinli ɛlɛ. Saa yɛfa nɔhalɛlilɛ yɛgyinla yɛ sɔnea ne mɔ anloa a, yɛbali “konim bɔkɔɔ.”—Wlo. 8:​35-39.

7. Saa wɔ diedi ne ati bɛlɛyɛ wɔ kpɔdekpɔde bɔbɔ a, duzu ati a ɛ nye bahola alie a?

⁷ Saa bɛlɛyɛ yɛ kpɔdekpɔde bɔbɔ a yɛ nye bahola alie. Saa wɔ diedi ne ati bɛlɛyɛ wɔ kpɔdekpɔde a, mmanyia adwenle kɛ Gyihova ɛkpo wɔ. Emomu, ɔkile kɛ Gyihova die wɔ to nu. (Mat. 5:​10-12) Kɛmɔ ɛle Kilisienenli la ati saa bɛlɛyɛ wɔ kpɔdekpɔde na ɛnyia nwolɛ adwenle kpalɛ a, ɔbamaa ɛ nye alie kɛ ɛzoanvolɛma ne la. (Gyi. 5:​40-42) Bieko, bie a ɛbaboa bɛdabɛ mɔɔ bɛnle Gyihova Alasevolɛ la wɔamaa bɛazukoa nɔhalɛ ne na “bɛawula Nyamenle anyunlunyia.” (1 Pita 2:12) Kɛ mɔɔ ɔdole Dwosefi la, saa ɛlɛyia ngyegyelɛ o, anzɛɛ ɛnyia ngyegyelɛ o, Gyihova bahola aboa wɔ yeamaa ɛ nye alie.—Gyn. 39:​3, 23.

8. Duzu bieko a bahola aboa yɛ yeamaa yɛagyinla yɛ sɔnea ne mɔ anloa kpundii a?

⁸ Yɛ ngyegyelɛ ne mɔ bara awieleɛ. Dwobu anwubielɛ ne maa yɛkakye kɛ yɛ ngyegyelɛ ne mɔ bara awieleɛ. Nɔhalɛ nu, “Gyihova yilale Dwobu wɔ ye ngoane mekɛ mɔɔ li awieleɛ la anu dɛlale ye mɔlebɛbo.” (Dwobu 42:12) Zɔhane ala a Gyihova ɛbɔ ɛwɔkɛ kɛ ɔbayila wɔ kpole kenle bie yeadɛla mekɛ ɛhye mɔɔ yɛ ngoane mekɛ ne le ezinra na nuhua le ngyegyelɛ ngome la. Ɛhye le debie bieko mɔɔ ɔti ɔwɔ kɛ yɛ nuhua ko biala gyinla kpundii kɔdwu awieleɛ na ɔnyia ɛwɔkɛ ne mɔɔ Gyihova ɛbɔ yɛ la bie a!—Mat. 24:13.

KƐZI ADWENLE MƆƆ ƐNFƐTA LA KOLA GYEGYE YƐ LA

9. Saa yɛanyia yɛ ngyegyelɛ ne mɔ anwo adwenle kpalɛ a, kɛzi ɔbahola yeaha yɛ nee Gyihova agɔnwolɛvalɛ ne ɛ?

⁹ Ɔnva nwo ngyegyelɛ biala mɔɔ yɛbayia la, ɔwɔ kɛ yɛnyia nwolɛ adwenle kpalɛ amaa yɛandwe ngyegyelɛ gyɛne yɛamba yɛ nwo zo. Kɛ neazo la, bie a yɛbade nganeɛ kɛ Gyihova a ɛlɛmaa yɛayia ngyegyelɛ a. Wɔ mekɛ bie anu, Dwobu dele nganeɛ kɛ Gyihova a ɛlɛmaa yeayia ngyegyelɛ a, na adwenle ɛhye mɔɔ ɛnfɛta la maanle ‘ɔbɔle mɔdenle kɛ ɔbua ɔ nwo benle yeadɛla Nyamenle.’ (Dwobu 32:2) Zɔhane ala a mɔlebɛbo ne Nawome bɔle Gyihova somolɛ wɔ ye amaneɛnwunlɛ ne mɔ anwo a. (Wut. 1:​13, 20, 21) Saa Dwobu nee Nawome anye adwenle ɛhye mɔɔ ɛndenrɛ la anvi bɛ ti anu a, anrɛɛ ɔbazɛkye bɛ nee Gyihova agɔnwolɛvalɛ ne. (Mrɛ. 19:3) Noko Gyihova boale bɛ maanle bɛnyianle bɛ ngyegyelɛ ne mɔ anwo adwenle kpalɛ na ɔyilale bɛ wɔ bɛ nɔhalɛlilɛ nwo.

10. Saa yɛlɛyia sɔnea bie a, adwenle boni a bahola ara yɛ ti anu a?

¹⁰ Saa bɔbɔ yɛdie yɛdi bɔkɔɔ kɛ tɛ Gyihova a fa sɔnea ba yɛ nwo zo a, bie a yɛ adwenle nu babɔ ɔ bo ayɛ yɛ kesee kɛ saa amgba ɔdwenle yɛ nwo a. Adwenle zɛhae mɔɔ ɛndenrɛ la bahola amaa yɛ sa nu ado. (Mrɛ. 24:10) Belemgbunli Devidi nee ngapezonli Habakɛke anu ko biala yiale ngyegyelɛ na ɔyɛ a bɛbiza Gyihova kɛ saa ɔtie bɛ asɔneyɛlɛ a. (Edw. 10:1; Hab. 1:2) Noko bɛangyakyi asɔneyɛlɛ ɛlɛ. Gyihova maanle nɔhavoma zɔhane mɔ nwunle kɛ ɔbaboa bɛ, na Gyihova baboa ɛdawɔ noko.—Edw. 10:17.

11. Saa yɛnlɛ sɔnea nwo adwenle kpalɛ a, duzu a bahola ado yɛ a?

¹¹ Saa yɛnlɛ sɔnea nwo adwenle kpalɛ a, bie to yɛ a ɔbayɛ yɛ azibɛnwo na bie a yɛade nganeɛ kɛ ɔnle kɛ ninyɛne zɛhae mɔ to yɛ. (1 Pita 4:12) Ɛnee ɔyɛ se ɔmaa Gyisɛse ɛdoavolɛma ne kɛ bɛbade ɔ bo kɛ ɔbayia kpɔdekpɔdeyɛlɛ mɔɔ anu yɛ se la. (Luku 18:​33, 34) Ɔnva nwo kɛ Gyisɛse hilehilele kɛzi ɔbanwu amaneɛ la anu wienyi hilele bɛ la, ɛnee ɛzoanvolɛ Pita ɛnlie ɛndo nu kɛ Gyihova bamaa Gyisɛse ayia ngyegyelɛ zɔhane. Ɛnee Gyisɛse ze kɛ adwenle zɛhae bahola azi ye adenle kɛ ɔbayɛ Gyihova ɛhulolɛdeɛ, ɔti ɔdeanle Pita. (Maake 8:​31-33) Na mɔɔ Gyisɛse wule bɔbɔ la anzi, ɛnee ɔtɛyɛ se ɔtɛmaa ye ɛdoavolɛma ne kɛ bɛbade edwɛkɛ mɔɔ sisile la abo. Noko Gyisɛse anye ye adwenle anvi bɛ nwo zo. Mɔɔ ɔ nee bɛ ɛlɛtendɛ wɔ ye ewudwazo ne anzi la, “ɔbukele bɛ adwenle nu kpalɛ ɔmaanle bɛdele Ngɛlɛlera ne abo” na yemɔ boale bɛ maanle bɛnyianle ye amaneɛnwunlɛ ne anwo adwenle kpalɛ. (Luku 24:​25-27, 32, 44-48) Ɛnee saa ye ɛdoavolɛma ne dwenledwenle mɔɔ Gyisɛse ɛlɛkilehile bɛ la anwo a, ɔbaboa bɛ yeamaa bɛaziezie bɛ nwo bɛamaa dwazotia mɔɔ ɔnrɛhyɛ bɛbayia la. Saa yɛdayɛ noko yɛsuzu mɔɔ Baebolo ne ka ye wɔ ngyegyelɛ nwo la anwo a, ɔbamaa yɛaziezie yɛ nwo na saa bie to yɛ a, yɛahola ɔ nloa gyinla.

12. Saa yɛnyia yɛ tɛnlabelɛ ne anwo adwenle mɔɔ ɛndenrɛ a, kɛzi ɔbahola yeaha yɛ ɛ?

¹² Saa yɛnyia yɛ tɛnlabelɛ ne anwo adwenle mɔɔ ɛndenrɛ a, ɔbamaa yɛade nganeɛ kɛ ninyɛne nu ɛnle kpalɛ fee noko bie a ɔnle zɔ. Gyisɛse hanle kɛzi ɛhye bahola azi la anu ko anwo edwɛkɛ wɔ vanye egyinli nu gyimayɛvoma ne anwo ndonwo ne anu. Gyimayɛvoma ne mɔ bie nyianle adwenle kɛ bɛsisi bɛ, noko egyinli menle ne hanle hilele bɛ kɛ: ‘Ayi, metɛsisile bɛ.’ (Mat. 20:​10-13) Tɛ kɛ amgba bɛsisile gyimayɛvoma zɔhane mɔ la ati a bɛdendɛle bɛ nzo abo a, emomu, mɔɔ ɛnee bɛ nye la mɔɔ bɛannyia ye la ati ɔ. Ɛnɛ noko, zɔhane ala a mediema bie mɔ te nganeɛ a. Kɛ neazo la, saa bɛ sa anga ɛzonlenlɛ nwo adenle bie anzɛɛ ɔfi bɛ sa a. Duzu a yɛbahola yɛayɛ amaa yɛanyia tɛnlabelɛ mɔɔ anu yɛ se la anwo adwenle kpalɛ a?

MƆƆ YƐBAHOLA YƐAYƐ WƆ MEKƐ MƆƆ YƐHƆ NGYEGYELƐ BIE ANU LA

13. Saa ɛkɔ ngyegyelɛ bie anu a, duzu a bahola azi a?

¹³ Bie a ɛze mɔɔ Ngɛlɛlera ne ka wɔ ngyegyelɛ nwo la. Ɔbayɛ kɛ wɔha nwolɛ edwɛkɛ wɔhile awie mɔ bɔbɔ amaa yeaboa bɛ yeamaa bɛagyinla sɔnea ngakyile nloa. Noko saa bie to ɛdawɔ mumua ne a, wɔannea a ɔbayɛ se yeamaa wɔ kɛ ɛbanyia nwolɛ adwenle kpalɛ. Kɛ neazo la, bie a ɛbade nganeɛ kɛ Gyihova ɛlɛtwe ɛ nzo anzɛɛ ɔndie wɔ asɔneyɛlɛ. Duzu a ɛbahola wɔayɛ amaa wɔahɔ zo wɔanyia nwolɛ adwenle kpalɛ a?

14. Saa ɛlɛnwu amaneɛ a, duzu a ɛbahola wɔayɛ nwolɛ asɔne a? (Felepaema 4:13)

¹⁴ Sɛlɛ Gyihova kɛ ɔboa wɔ. Ka wɔ amaneɛnwunlɛ ne nee kɛzi ɔmaa ɛte nganeɛ la anwo edwɛkɛ kile Gyihova. Ɛbahola wɔaha mɔɔ ɛkulo kɛ Gyihova yɛ boa wɔ la anwo edwɛkɛ fɔɔnwo wɔahile ye. Sɛlɛ ye kɛ ɔva ye sunsum nwuanzanwuanza ne ɔboa wɔ ɔmaa ɛnyia anwosesebɛ nee nrɛlɛbɛ mɔɔ ɛbava wɔagyinla ɔ nloa la. Noko kakye kɛ, bie a Gyihova ɛnrɛbua wɔ asɔneyɛlɛ ne wɔ adenle mɔɔ ɛ nye la la azo. (Ɛfɛ. 3:20) Bie noko a ɔbalua anwumabɔvolɛma anzɛɛ ɛ mediema nwo zo yeaboa wɔ. (Edw. 34:7) Ɔti die adenle biala mɔɔ Gyihova balua zo aboa wɔ la to nu na yɛ ye mo. Ɔfi atiakunlukɛnlɛma nu ɔfa ye sunsum ne ɔmaa, na yemɔ bamaa wɔahola wɔagyinla ngyegyelɛ biala mɔɔ ɛbayia la anloa.—Kenga Felepaema 4:13.

15. Duzu a baboa wɔ yeamaa wɔagyinla ngyegyelɛ nloa a? (Eza nea nvoninli ne.)

¹⁵ Kɔ zo yɛ sunsum nu ninyɛne. Saa ɛwɔ “amaneɛnwunlɛ nee ngyegyelɛ” nu a, bie a ɔbayɛ se kɛ ɛbahola wɔali ngyehyɛleɛ dɛba mɔɔ ɛfa ɛyɛ sunsum nu ninyɛne la azo pɛpɛɛpɛ. (Edw. 119:143) Noko mekɛ ɛhye anu a ɔhyia kpalɛ kɛ ɛbayɛ biala mɔɔ ɛbahola la kɛ ɛbanyia Nyamenle adwenle wɔ ninyɛne nwo a. Kɔ zo kenga Baebolo ne, sukoa ye kpalɛ na dwenledwenle nwolɛ dahuu. Yɛ mɔɔ ɛbahola la wɔ daselɛlilɛ nu, kɔ debiezukoalɛ na fa ɛ nwo wula nu. Ɛ nee ɛ mediema ɛbɔ nu ɛyɛ ninyɛne. Mmatwe ɛ nwo ɛfi bɛ nwo ɛlɛ, saa bɔbɔ ɛte nganeɛ kɛ ɛyɛ zɔ a.—Mrɛ. 18:1.

16. Saa ɛkɔ ngyegyelɛ nu a, kɛzi wɔ adwenle nu bahola ayɛ wɔ kesee ɛ, na duzu a ɔwɔ kɛ ɛyɛ a? (2 Kɔlentema 10:​4, 5)

¹⁶ Ye adwenle nu keseeyɛlɛ fi ɛ ti anu. Saa ɛkɔ ngyegyelɛ nu a, bie a ɛbanyia ɛdawɔ mumua ne anzɛɛ Gyihova anwo adwenle mɔɔ ɛndenrɛ. Saa ɔba ye zɔ a, ɔhyia kɛ ɛtudu adwenle zɛhae mɔɔ “ɛsosɔ ndinli kpalɛ” la ɛfi ɛ ti anu. (Kenga 2 Kɔlentema 10:​4, 5.) Ɛbahola wɔalua “Nyamenle anwo ndelebɛbo” mɔɔ wɔ Baebolo ne anu nee mbuluku yɛɛ ninyɛne ngakyile mɔɔ ye ahyehyɛdeɛ ne ɛyɛ la azo wɔaye adwenle nu keseeyɛlɛ zɛhae mɔ wɔavi ɛ ti anu. Kɛ neazo la, asoo ɛlɛ adwenle kɛ Gyihova anye ɛnlie ɛ nwo bieko ɔ? Sukoa ɛzoanvolɛ Pɔɔlo anwubielɛ ne mɔ anwo debie. Mɔɔ ɔyɛ ye ɛzonlenlɛ gyima ne la, ɔyiale ngyegyelɛ mgbole dɔɔnwo; noko anwosesebɛ mɔɔ ɔnyianle ɔhanle edwɛkpa ne la maanle ɔnyianle anwodozo kpole kɛ Gyihova ɛlie ye ɛdo nu. (2 Kɔl. 11:​23-27) Asoo ɔyɛ a ɛngola ɛnnwu ye saa Gyihova ɛva ɛtane mɔɔ ɛyɛle ye dɛba la ɛhyɛ wɔ ɔ? Saa zɔhane a ɛte nganeɛ a, kɛlɛ ngɛlɛlera ngakyile mɔɔ kile kɛ Gyihova fa ɛtane kyɛ la to ɛkɛ. (Aye. 43:25) Akee kenga ngyehyɛnu ɛhye mɔ na dwenledwenle nwolɛ. (Edw. 119:97) Asoo esiane bie mɔɔ ɛdo wɔ la ɛmmaa ɛngola ɛnnwu ye saa Nyamenle bali ɛwɔkɛ mɔɔ yebɔ kɛ ɔbabɔ ye nɔhavoma anwo bane la azo ɔ? Yɛ deɛmɔti Nyamenle maa amaneɛnwunlɛ nwo adenle nee kɛzi ɔbɔ yɛ nwo bane amaa debie biala anzɛkye yɛ nee ye agɔnwolɛvalɛ ne ɔnva nwo biala mɔɔ bazi la anwo neɛnleanu. (Edw. 91:​9-12) Eza kenga mediema mɔɔ ɛhola ɛgyinla amaneɛnwunlɛ ngakyile nloa la anwubielɛ ne mɔ.a

17. Saa yɛkɔ ngyegyelɛ nu a, duzu a ɔwɔ kɛ yɛyɛ a?

¹⁷ Ɛwɔ mekɛ kpalɛ nu kɛkala, mɔɔ ɛnlɛ ngyegyelɛ kpole bie ɔ? Ɛnee yɛ Gyihova mo na fa nwolɛ adenle ɛhye di gyima kpalɛ fa dwenledwenle ye kpalɛyɛlɛ ne anwo. (Nol. 7:14) Noko saa ɛkɔ ngyegyelɛ nu a, kɔ zo nyia nwolɛ adwenle kpalɛ na sɔ anwodozo mɔɔ ɛlɛ wɔ Gyihova anu la anu kpundii. Saa ɛyɛ ye zɔ a, Gyihova bamaa ‘adenle ala nwolɛ amaa wɔahola wɔagyinla ɔ nloa.’ (1 Kɔl. 10:13) Na yɛ mediema alɔvolɛ noko ɛ? Saa bɛyia ngyegyelɛ a, kɛ ɔkɛyɛ na yɛaboa bɛ ɛ? Edwɛkɛ mɔɔ doa zo la bahilehile nu.