Moalɛ Maa Mraalɛ Mɔɔ Bɛyɛ Bɛ Basabasa La

Kɛ edwɛkɛ “Mraalɛ Nwo Banebɔlɛ—Mɔɔ Baebolo Ne Ka La” mɔɔ wɔ jw.org la bɔ ɔ bo la ɛne. Link bie mɔɔ wɔ zɔhane edwɛkɛ ne awieleɛ la maa ɛkola ɛtwe zɔhane edwɛkɛ ne PDF mɔɔ ɛbahola wɔapelente na wɔabubu kɛlata ne anu nna wɔamaa yeayɛ kɛ trate la. Adiema raalɛ bie mɔɔ bɛfɛlɛ ye Stacy mɔɔ de United States la hanle kɛ: “Mempelentenle bie na me nee adiema raalɛ ko vale hɔle yɛ asafo ne azɛlɛsinli ne anu ɛleka bie mɔɔ bɛnea mraalɛ mɔɔ bɛyɛ bɛ basabasa la.”

Gyimayɛvo bie mɔɔ wɔ ɛkɛ ne la bizale ye kɛ saa ɔbanyia mɔɔ bɛpelente la bie dɔɔnwo amaa yeava yeamaa menli mɔɔ de sua nu ɛkɛ la a. Ɔlua ɛhye ati, mediema mraalɛ nwiɔ pelentenle trate zɔhane 40 na bɛvale jw.org ngitanwolilɛ kaade ne 30 bɛbokale nwo bɛhɔmaanle ye. Nzinlii, ɛnee bɛ kpanyinli ne mɔɔ nea ɛkɛ ne la kpondɛ kɛ Alasevolɛ ne mɔ ba ɛkɛ na bɛkile mraalɛ ne mɔ mɔɔ wɔ ɛkɛ ne la kɛzi bɛsukoa Baebolo ne la.

Stacy nee mediema mraalɛ nwiɔ hɔle sua fofolɛ nu na bɛliele trate zɔhane nnu na bɛhanle kɛ bɛva bie dɔɔnwo bɛraboka nwolɛ. Gyimayɛvoma ne anu ko hanle kɛ: “Kɛlata ɛhye baboa mraalɛ mɔɔ wɔ ɛke la.” Eza ɔhanle kɛ, “Yɛhyia ɛhye anwo.” Mɔɔ bɛziale bɛhɔle ɛkɛ ne bieko la, ɛnee mraalɛ ne mɔ anu dɔɔnwo kpondɛ kɛ bɛnwu kɛzi Alasevolɛ ne mɔ yɛ bɛ Baebolo ɛzukoalɛ ne la, na bɛ nuhua nwiɔ liele dole nu kɛ bɛbahɔ debiezukoalɛ bieko mɔɔ bɛbayɛ wɔ Belemgbunlililɛ Asalo wɔ zɔhane dapɛne ne awieleɛ la bie.

Stacy hanle kɛ: “Kɛzi bɛ nye liele edwɛkɛ ɛhye anwo la zinle yɛ nwo. Saa ɛpelente na ɛbubu a, ɔle adenle kɛnlɛma mɔɔ ɛbahola wɔalua zo wɔabɔ Belemgbunlililɛ edwɛkɛ ne nolo wɔahile menli titili ɛhye a. Kɛzi bɛhilele nwolɛ anyelielɛ la hanle yɛ ahonle kpalɛ, na yɛ nye la kɛ Gyihova bayila yɛ mɔdenlebɔlɛ zo amaa yɛahɔ zo yɛaha edwɛkpa ne yɛahile menli ɛhye mɔ.”