Kpuya Mɔɔ Vi Kengavolɛma Ɛkɛ
Duzu “nzuzulɛ” a Gyihova bava awula maanle maanle ne mɔ ahonle nu kenlensa ye ala a?
Yekile 17:16, 17 ka anwongyelelɛ kpole ne mɔlebɛbo anwo edwɛkɛ kɛ: “Mɛne bulu ne mɔɔ ɛnwunle bɛ nee nane anwo ɛzulolɛ ne la, ɛhye mɔ bakpɔ tuutuunli ne na bɛalie ɔ nwo ninyɛne bɛamaa yealɛ ɔ nwo zɔ, na bɛbali ye nwonane na bɛava senle bayela ye bɔkɔɔ. Ɔluakɛ Nyamenle ɛva ɛwula bɛ ahonle nu kɛ bɛmaa ye nzuzulɛ ɛrɛla nu, ɛhɛe, kɛ bɛyɛ adwenle ko na bɛva bɛ belemgbunlililɛ ne bɛmaa nane anwo ɛzulolɛ ne, kɔkpula kɛ Nyamenle edwɛkɛ ne bara nu la.” Yɛhanle ye wɔ yɛ mbuluku ne mɔ anu kɛ, “nzuzulɛ” mɔɔ Gyihova bava awula maanle maanle ne mɔ ahonle nu la a le kɛ ɔbamaa bɛazɛkye adalɛ ɛzonlenlɛ.
Noko akee, ɔhyia kɛ yɛyɛ nzenzaleɛ bie wɔ nu. “Nzuzulɛ” mɔɔ Gyihova bava awula maanle maanle ne mɔ ahonle nu la bamaa ‘bɛava bɛ belemgbunlililɛ ne bɛamaa nane anwo ɛzulolɛ ne.’ Amaa yɛade kɛzi edwɛkɛ ɛhye bara nu la abo la, maa yɛzuzu kpuya ɛhye mɔ anwo.
Nwane mɔ titili a bɛha bɛ nwo edwɛkɛ wɔ ngapezo ɛhye anu a? “Tuutuunli ne” a eza bɛfɛlɛ ye “Babelɔn Kpole” ne la; ɔgyi ɛkɛ ne ɔmaa ewiade amuala adalɛ ɛzonlenlɛ ne. “Nane kɔkɔlɛ anwo ɛzulolɛ” ne gyi ɛkɛ ne maa Maamgbole Koyɛlɛ Eku ne. Bɛlimoale bɛdele eku ɛhye wɔ 1919 kɛ ɔnlea ɔmaa anzodwolɛ ɛrɛla ewiade amuala, na ɛnee bɛfɛlɛ ye Maanle Maanle Ngyekyeleɛ. (Yek. 17:3-5) “Mɛne bulu” ne gyi ɛkɛ ne maa arane mɔɔ wɔ ewiade amuala mɔɔ bɛboa nane anwo ɛzulolɛ ne la.
Agɔnwolɛvalɛ boni a wɔ tuutuunli ne nee nane kɔkɔlɛ anwo ɛzulolɛ ne avinli a? Tuutuunli ne ‘de’ nane anwo ɛzulolɛ ne anwo zo, mɔɔ kile kɛ ɔboa nane ne yɛɛ ɔbɔ mɔdenle bɔbɔ kɛ ɔdi ɔ nwo zo tumi.
Duzu a bado tuutuunli ne a? Nane anwo ɛzulolɛ ne nee mɛne bulu ne mɔɔ gyi ɔ nzi la “bakpɔ tuutuunli ne” ɛsesebɛ kpalɛ, ɔti bɛbalie debie biala mɔɔ ɔlɛ la na bɛamaa awie biala anwu ninyɛndane mɔɔ ɔyɛ la. Akee bɛbava ndɛnebualɛ mɔɔ Gyihova kulo kɛ ɔfa ɔba ɔ nwo zo la bɛara, yemɔ a le kɛ bɛbazɛkye ye bɔkɔɔ. (Yek. 17:1; 18:8) Ɛhye a bayɛ adalɛ ɛzonlenlɛ awieleɛ a. Noko kolaa na edwɛkɛ ɛhye azi la, Gyihova bamaa maanle maanle ne mɔ ayɛ debie mɔɔ bie ɛtɛsile ɛlɛ wɔ alesama tetedwɛkɛ nu la.
Duzu a Gyihova bamaa maanle maanle ne mɔ ayɛ a? Ɔbava “ye nzuzulɛ” yeawula mɛne bulu ne ahonle nu, mɔɔ kile kɛ ‘bɛbava bɛ tumi nee bɛ anwosesebɛ bɛamaa nane [kɔkɔlɛ] anwo ɛzulolɛ ne,’ mɔɔ yemɔ a le Maamgbole Koyɛlɛ Eku ne la. (Yek. 17:13) Dwenle mɔɔ ɛhye kile la anwo. Asoo alesama arane ne mɔ badwazo ala azi kpɔkɛ kɛ bɛfa bɛ tumi ne bɛamaa nane anwo ɛzulolɛ ne ɔ? Kyɛkyɛ! Ngapezo ne kile kɛ Nyamenle mumua ne a bamaa bɛayɛ ye zɔ a. (Mrɛ. 21:1; fa toto Ayezaya 44:28 anwo.) Asoo bɛbayɛ ye ngyikyi ngyikyi bɛava bɛ tumi ne bɛamaa nane ne ɔ? Kyɛkyɛ! Ɔda ali kɛ edwɛkɛ ɛhye bazi arɛlevilɛ nu yɛɛ ɔbayɛ ndɛndɛ. Akee nane anwo ɛzulolɛ ne mɔɔ bɛmaa ye tumi fofolɛ la bava Gyihova ndɛnebualɛ ara adalɛ ɛzonlenlɛ nwo zo, kile kɛ ɔbazɛkye ye bɔkɔɔ.
Duzu a ɔwɔ kɛ yɛmaa yɛ nye da ye ade a? Ɔnle kɛ yɛmaa yɛ nye da kɛ yɛbade amaneɛbɔlɛ mɔɔ kile kɛ akee arane ne mɔ ɛlɛyɛ ye ngyikyi ngyikyi aboa Maamgbole Koyɛlɛ Eku ne. Mɔɔ yɛ nye bahola ala ye ade la a le ɛhye: Gyihova bava awula maanle maanle ne mɔ ahonle nu arɛlevilɛ nu yeamaa bɛava bɛ tumi ne bɛamaa nane anwo ɛzulolɛ ne, mɔɔ le Maamgbole Koyɛlɛ Eku ne. Saa ɛhye si a, yɛbanwu kɛ ɔnrɛhyɛ na anwongyelelɛ kpole ne abɔ ɔ bo. Ɛhye ati, “bɛmaa yɛzinza na yɛ nye ɛla ɛkɛ” ɔluakɛ ɔnrɛhyɛ, ninyɛne bahakyi arɛlevilɛ nu!—1 Tɛs. 5:6.