Kɔ Zo Sukoa Debie Fi Baebolo Nu Mɔlebɛbo Ngilehilelɛ Ne Anu

1. Mekɛ mɔɔ ɛlimoale ɛzukoale nɔhalɛ ne la, kɛzi Baebolo ne anu ngilehilelɛ ne hanle wɔ ɛ?

NINYƐNE mɔɔ yɛlimoale yɛzukoale wɔ Baebolo ne anu la ɛhakyi yɛ ɛbɛlabɔlɛ. Kɛ neazo la, mɔɔ yɛzukoale kɛ Nyamenle duma a le Gyihova la, yɛlimoale yɛdudule agyakɛ kɛ yɛbayɛ ɔ gɔnwo mɔ. (Aye. 42:8) Mɔɔ yɛnwunle tɛnlabelɛ mɔɔ amgba mowuamra wɔ nu la, ɔmmaa yɛndwenle nwolɛ bieko bɔbɔ kɛ saa yɛ alɔvolɛ mɔɔ bɛwu la ɛlɛnwu amaneɛ a. (Nol. 9:10) Eza mekɛ mɔɔ yɛzukoale ɛwɔkɛ mɔɔ Nyamenle ɛbɔ kɛ ɔbamaa azɛlɛ ne ayɛ Paladaese la anwo debie la, ɔmmaa yɛndwenledwenle yɛ kenle bie nwo bieko. Yɛnyianle anwodozo kɛ yɛbahola yɛadɛnla aze yɛahyɛ kpalɛ—tɛ ɛvolɛ 70 anzɛɛ 80 ala—emomu, dahuu.—Edw. 37:29; 90:10.

2. Kɛzi 2 Pita 1:​12, 13 kile kɛ Ngɛlɛlera ne anu mɔlebɛbo ngilehilelɛ ne boa Kilisienema mɔɔ bɛnyi sunsum nu bɔbɔ la ɛ?

² Ɔnle kɛ yɛbu yɛ nye yɛgua Baebolo ne anu mɔlebɛbo ngilehilelɛ ne azo ɛlɛ. Ɛzoanvolɛ Pita hɛlɛle ye kɛlata ne mɔɔ tɔ zo nwiɔ la hɔmaanle Kilisienema mɔɔ ɛnee ‘bɛgyi nɔhalɛ ne anu kpundii’ la. (Kenga 2 Pita 1:​12, 13.) Wɔ zɔhane mekɛ ne anu, ɛnee bɛlɛyia ngyegyelɛ wɔ asafo ne anu yɛɛ ɛnee adalɛ kilehilevolɛma nee amumuyɛma kpondɛ kɛ bɛtwe bɛ bɛfi nɔhalɛ ne anu. (2 Pita 2:​1-3) Pita bɔle mɔdenle kɛ ɔmaa ɔ mediema ne mɔ anwosesebɛ amaa bɛahola bɛagyinla ɛkpɔlɛ ɛhye mɔ anloa. Ɔti ɔhakyele bɛ ninyɛne mɔɔ ɛnee bɛlimoa bɛzukoa la bie mɔ. Ngilehilelɛ ɛhye mɔ boale bɛ maanle bɛhɔle zo bɛlile nɔhalɛ bɛhɔle awieleɛ.

3. Duzu ati a ɔwɔ kɛ Kilisienema kɔsɔɔti kɔ zo dwenledwenle Baebolo nu mɔlebɛbo ngilehilelɛ ne anwo a? Maa neazo.

³ Mekɛ mɔɔ yɛlɛnyi sunsum nu la, bie a yɛbanyia ɛzukoalɛdeɛ fofolɛ bie yɛavi Baebolo nu mɔlebɛbo ngilehilelɛ ne anu. Kɛ neazo la: Bie a awie mɔɔ ze aleɛ to la nee awie mɔɔ bo zo mɔɔ ɔlɛsukoa aleɛdonlɛ la bava ninyɛne ko ne ala a ado aleɛ a. Noko mekɛ ɛlɛkɔ la, ahenle ne mɔɔ ze aleɛ to la bava ninyɛne ko ne ala ado aleɛ fofolɛ ngakyile mɔɔ yɛ fɛ la. Zɔhane ala a Gyihova azonvolɛ mɔɔ bɛva mekɛ tendenle bɛzonle ye la nee Baebolo sukoavoma fofolɛ bahola anyia Baebolo nu mɔlebɛbo ngilehile bie azo nvasoɛ wɔ ndenle ngakyile zo a. Bie a ɔvi mekɛ mɔɔ bɛzɔnenle yɛ la, yɛ tɛnlabelɛ nee gyimalilɛ mɔɔ yɛlɛ la ɛhakyi. Saa yɛfa ngilehilelɛ mɔɔ yɛzukoale ye dɛba la yɛtoto tɛnlabelɛ mɔɔ yɛwɔ nu kɛkala la anwo a, bie a yɛbanyia ɛzukoalɛdeɛ bie mɔɔ ɔbaboa yɛ ɛnɛ la. Maa yɛnlea mɔɔ Kilisienema mɔɔ bɛnyi sunsum nu la bahola azukoa avi Baebolo nu mɔlebɛbo ngilehile nsa bie anu la.

GYIHOVA A LE BƆVOLƐ NE A

4. Kɛzi Gyihova mɔɔ yɛnwu kɛ yemɔ a le Bɔvolɛ ne la ɛboa yɛ ɛ?

⁴ “Ahenle mɔɔ yɛle ninyɛne kɔsɔɔti la a le Nyamenle.” (Hib. 3:4) Yɛze kɛ Bɔvolɛ bie mɔɔ ze nrɛlɛbɛ kpole na ɔlɛ tumi kpole la a bɔle azɛlɛ ne nee tease abɔdeɛ biala mɔɔ wɔ zo la a. Ɔdaye a ɔbɔle yɛ a, ɔti ɔze yɛ nwo edwɛkɛ biala. Mɔɔ tɛla biala la, ɔdwenle yɛ nwo. Ɔze mɔɔ le kpalɛ ɔmaa yɛ la. Kɛmɔ yɛze kɛ Gyihova a le yɛ Bɔvolɛ la ati, yenyia yɛ nwo zo tumi kpole na yemaa yɛnwu kɛzi yɛbabɔ yɛ ɛbɛla la.

5. Nɔhalɛ edwɛkɛ boni a ɔbaboa yɛ yeamaa yɛabɛlɛ yɛ nwo aze a? (Ayezaya 45:​9-12)

⁵ Kɛmɔ yɛze kɛ Gyihova a le Bɔvolɛ ne la ati, ɔkola ɔboa yɛ ɔmaa yɛbɛlɛ yɛ nwo aze. Kɛ neazo la, mekɛ bie Dwobu dwenlenle ɔ nee alesama gyɛne anwo somaa, ɔbɔle mɔdenle kɛ ɔbu ɔ nwo tenlene noko Gyihova maanle ɔhakyele kɛ Ɔdaye a ɔle Bɔvolɛ bedevinli ne a. (Dwobu 38:​1-4) Ngakyelɛ ɛhye boale Dwobu maanle ɔnwunle kɛ Nyamenle ndenle kpogya tɛla menli ɛdeɛ ne. Nzinlii ngapezonli Ayezaya hɛlɛle kɛ: “Asoo ɔwɔ kɛ ndɛtɛlɛ ka kile Nwovolɛ ne kɛ: ‘Duzu a ɛlɛyɛ a?’”—Kenga Ayezaya 45:​9-12.

6. Mekɛ titili boni a ɔhyia kɛ yɛbadwenledwenle kɛzi yɛ Bɔvolɛ ne ze nrɛlɛbɛ na ɔlɛ tumi la anwo a? (Eza nea nvoninli ne mɔ.)

⁶ Saa Kilisienenli bie ɛlɛnyia anwubielɛ dɔɔnwo a, ɔbahola yeabɔ ɔ bo yeava ɔ nwo yeado ɔdaye mumua ne ye nzuzulɛ zo, na ɔnrɛva ɔ nwo ɔnrɛdo Gyihova nee Ye Edwɛkɛ ne azo ɔnrɛmaa ɔnrɛhile ye adenle. (Dwobu 37:​23, 24) Noko saa awie dwenledwenle kɛzi ye Bɔvolɛ ne ze nrɛlɛbɛ na ɔlɛ tumi kpole la anwo kpalɛ a, kɛzi ɔbaboa ye ɛ? (Aye. 40:22; 55:​8, 9) Nɔhalɛ edwɛkɛ ɛhye baboa ye yeamaa yeahɔ zo yeabɛlɛ ɔ nwo aze yealie yeado nu kɛ Gyihova adwenle kpogya tɛla ye ɛdeɛ ne.

7. Duzu a Rahela yɛle amaa yealie adehilelɛ fofolɛ bie yeado nu a?

⁷ Adiema raalɛ Rahela, mɔɔ de Slovenia la ɛnwu ye kɛ ye Bɔvolɛ ne mɔɔ ɔdwenledwenle ɔ nwo la ɛboa ye ɛmaa yelie nzenzaleɛ mɔɔ ahyehyɛdeɛ ne yɛ wɔ adehilelɛ ngakyile nu la ɛdo nu. Ɔhanle kɛ: “Ɛnee ɔdwu mekɛ ne bie a ɔyɛ se ɔmaa me kɛ mebalie nzenzaleɛ mɔɔ menli mɔɔ li ahyehyɛdeɛ ne anyunlu la yɛ la meado nu. Kɛ neazo la, mɔɔ meneanle 2023 Neazo Eku Ne Amaneɛbɔlɛ #8 ne bɔbɔ la anzi, ɔzinle me nwo wɔ mekɛ mɔɔ menwunle kɛ adiema bie mɔɔ ɛzie ɔ kɛsa la ɛlɛmaa ɛdendɛlɛ la. Ɔti menzɛlɛle Gyihova kɛ ɔboa me ɔmaa menlie nzenzaleɛ ɛhye mendo nu.” Rahela dele ɔ bo kɛ kɛmɔ Gyihova a le anwuma nee aze Bɔvolɛ ne la ati, ɔdaye a ɔfɛta bɔkɔɔ kɛ ɔkile ye ahyehyɛdeɛ ne adenle kpalɛ a. Saa ɔyɛ se ɔmaa wɔ kɛ ɛbalie ndelebɛbo anzɛɛ adehilelɛ fofolɛ bie wɔado nu a, duzu ati a ɛndwenledwenle kɛzi yɛ Bɔvolɛ ne ze nrɛlɛbɛ na ɔlɛ tumi kpole la anwo a?—Wlo. 11:​33-36.

DEƐMƆTI NYAMENLE MAA AMANEƐNWUNLƐ NWO ADENLE LA

8. Kɛzi deɛmɔti Nyamenle maa amaneɛnwunlɛ nwo adenle nwo debie mɔɔ yɛzukoa la ɛboa yɛ ɛ?

⁸ Duzu ati a Nyamenle maa amaneɛnwunlɛ nwo adenle a? Menli mɔɔ bɛnze kpuya ɛhye anwo mualɛ la ɛva Nyamenle anwo ɛya anzɛɛ bɛka kɛ ɔnle ɛkɛ ne bɔbɔ fee! (Mrɛ. 19:3) Noko wɔmɔ, wɔzukoa kɛ ɛtane mɔɔ bɛvale bɛwole yɛ nee sinlidɔlɛ a maa yɛnwu amaneɛ a, na tɛ Gyihova ɔ. Eza wɔzukoa kɛ kɛmɔ Gyihova ɛzi alesama anwo abotane la ati, yemaa menli mgbe dɔɔnwo ɛranwu Ye na bɛnwu kɛzi ɔbaye amaneɛnwunlɛ yeavi ɛkɛ ne bɔkɔɔ la. (2 Pita 3:​9, 15) Nɔhalɛ edwɛkɛ ɛhye mɔ ɛkyekye ɛ rɛle na yemaa wɔbikye Nyamenle kpalɛ.

9. Tɛnlabelɛ boni mɔ anu a ɔwɔ kɛ yɛkakye deɛmɔti Gyihova maa amaneɛnwunlɛ nwo adenle la a?

⁹ Yɛze kɛ ɔhyia kɛ yɛsi abotane wɔ mekɛ mɔɔ yɛlɛkendɛ kɛ Gyihova bava amaneɛnwunlɛ kɔsɔɔti ara awieleɛ la. Noko saa yɛdayɛ mumua ne anzɛɛ yɛ alɔvolɛ ɛlɛyia ngyegyelɛ, nzisi anzɛɛ bɛ ninyɛne fi bɛ sa a, bie a yɛnrɛnwu deɛmɔti Gyihova ɛhyɛ nwolɛ zɔhane la. (Hab. 1:​2, 3) Wɔ tɛnlabelɛ zɛhae mɔ anu, nrɛlɛbɛ wɔ nu kɛ yɛbadwenledwenle deɛmɔti Gyihova maa adenle maa tenlenema nwu amaneɛ la anwo.a (Edw. 34:19) Eza yɛbahola yɛadwenledwenle kpɔkɛ mɔɔ yebɔ kɛ ɔbava amaneɛnwunlɛ yeara awieleɛ bɔkɔɔ la anwo.

10. Kɛzi Anne ɛhola ɛgyinla ye mame ewule ne anloa ɛ?

¹⁰ Kɛmɔ yɛze deɛmɔti Nyamenle maa amaneɛnwunlɛ nwo adenle la ati, ɔboa yɛ ɔmaa yɛgyinla kpundii. Anne mɔɔ de Indian Ocean bɔra bie mɔɔ bɛfɛlɛ ye Mayotte azo la hanle kɛ: “Me mame wule la, ɛvolɛ ekyii ɛpɛ nu na ɔmaanle menlile alɔbɔlɛ kpalɛ. Noko meta mekakye me nwo kɛ tɛ Gyihova a maa yɛnwu amaneɛ a. Ɔlɛ ɛhulolɛ kpole kɛ ɔbaye amaneɛnwunlɛ kɔsɔɔti yeavi ɛkɛ na yeadwazo yɛ alɔvolɛ mɔɔ bɛwu la yeara ngoane nu. Edwɛkɛ ɛhye mɔɔ mendwenledwenlenle nwolɛ la maanle menyianle anzodwolɛ mɔɔ fane dɔɔnwo ɔsi me nwo bɔbɔ a.”

11. Kɛmɔ yɛze deɛmɔti Gyihova maa amaneɛnwunlɛ nwo adenle la ati, kɛzi ɔboa yɛ ɔmaa yɛkɔ zo yɛka edwɛkpa ne ɛ?

¹¹ Kɛmɔ yɛze deɛmɔti Nyamenle maa amaneɛnwunlɛ nwo adenle la ati ɔkola ɔboa yɛ ɔmaa yɛkɔ zo yɛka edwɛkpa ne. Mɔɔ Pita hilehilele nu kɛ Gyihova abotanezilɛ ne bamaa menli mɔɔ bɛnlu bɛ nwo la anyia ngoane la wiele la, ɔhɛlɛle kɛ: “Bɛdwenle menli holɛ ko mɔɔ ɔwɔ kɛ bɛyɛ wɔ ɛbɛlabɔlɛ nwuanzanwuanza nee nyamenlezonlenlɛ kpalɛ nu la anwo.” (2 Pita 3:11) Yɛ daselɛlilɛ gyima ne boka “nyamenlezonlenlɛ kpalɛ” ɛhye anwo. Yɛkulo menli kɛ yɛ Ze ne ala la. Yɛkulo kɛ bɛtɛnla Nyamenle tenleneyɛlɛ ewiade fofolɛ ne anu. Gyihova ɛlɛsi menli mɔɔ de wɔ azɛlɛsinli ne anu la anwo abotane amaa bɛanyia nwolɛ adenle bɛazonle ye. Nea kɛzi ɔle nwolɛ adenle kpole kɛ ɛbayɛ Nyamenle agɔnwo gyimayɛvo na wɔaboa menli dodo biala mɔɔ ɛbahola la wɔamaa bɛazukoa ɔ nwo debie kolaa na awieleɛ ne ara a!—1 Kɔl. 3:9.

YƐDE “MEKƐ MƆƆ LI AWIELEƐ” LA ANU

12. Kɛmɔ yɛzukoa kɛ yɛde “mekɛ mɔɔ li awieleɛ” la anu la ati, kɛzi yeboa yɛ a?

¹² Baebolo ne hanle subane mɔɔ menli bala ye ali wɔ “mekɛ mɔɔ li awieleɛ” la anu la anwo edwɛkɛ wienyi. (2 Tim. 3:​1-5) Saa yɛnea kɛzi menli mɔɔ yɛ nee bɛ de la yɛ bɛ nyɛleɛ la, yɛkola yɛnwu kɛ ngapezo ɛhye ɛra nu. Kɛzi menli subane ɛlɛsɛkye bɔkɔɔ ɛnɛ la a, ɔmaa yɛnyia anwodozo kpole kɛ yɛkola yɛfa yɛ nwo yɛto Nyamenle Edwɛkɛ ne azo.—2 Tim. 3:​13-15.

13. Kɛzi ndonwo mɔɔ Gyisɛse yɛle ye wɔ Luku 12:​15-21 la bahola aboa yɛ ɛ?

¹³ Eza kɛmɔ yɛze kɛ yɛde mekɛ mɔɔ li awieleɛ la anu la ati, ɔmaa yɛfa ninyɛne mɔɔ hyia kpalɛ la yɛdimoa. Nea kɛzi ɔhyia kɛ yɛbayɛ zɔ la wɔ ndonwo bie mɔɔ Gyisɛse yɛle mɔɔ wɔ Luku 12:​15-21 anu la. (Kenga.) Duzu ati a bɛhanle kɛ nrenyia sukoavolɛ ne “ɛnlɛ adwenle” a? Tɛ kɛ ɛnee nrenyia ne lɛ ezukoa la ati ɔ, emomu kɛmɔ yeanva ninyɛne mɔɔ hyia kpalɛ la yeanlimoa la ati ɔ. ‘Ɔkpondɛle anwonyia ɔziele ɔmaanle ɔ nwo noko ɛnee ɔnle sukoavolɛ wɔ Nyamenle anyunlu.’ Duzu ati a ɛnee anyebolo wɔ edwɛkɛ ne anu a? Ɔluakɛ Nyamenle hanle hilele ye kɛ: “Ɛnɛ nɔe bɛbalie wɔ ngoane bɛavi ɛ sa nu.” Ɛnɛ noko, mekɛ mɔɔ ewiade ɛhye awieleɛ ne ɛlɛbikye kpalɛ la, ɔwɔ kɛ yɛbiza yɛ nwo kɛ: ‘Kɛzi bodane mɔɔ gyigyi me nye zo la maa menwu ninyɛne mɔɔ hyia me kpalɛ la ɛ? Bodane boni mɔ a meboa me mra memaa bɛfa bɛsiezie bɛ nye zo a? Asoo mefa me anwosesebɛ, me mekɛ nee me ezukoa mekpondɛ anwonyia memaa me nwo anzɛɛ mefa mekpondɛ anwonyia mesie anwuma?’

14. Kɛzi Miki anwubielɛ ne boa yɛ maa yɛnwu deɛmɔti ɔhyia kɛ yɛkakye kɛ yɛde mekɛ mɔɔ li awieleɛ la anu ɛ?

¹⁴ Saa yɛdwenle daselɛ mɔɔ kile kɛ yɛde mekɛ mɔɔ li awieleɛ la anu la anwo a, ɔbahola yeahakyi kɛzi yɛbɔ yɛ ɛbɛla la bɔkɔɔ. Ɛhye bie a dole adiema raalɛ bie mɔɔ bɛfɛlɛ ye Miki la a. Ɔhanle kɛ: “Mɔɔ menwiele sukunwiɔ la, ɛnee mekulo kɛ meyɛ gyima mɔɔ ɔbamaa meazukoa nane nane nwo debie la. Ɛnee eza mekulo kɛ meyɛ dahuu adekpakyelɛ gyima ne bie na mekɔsonle wɔ ɛleka mɔɔ bɛhyia moalɛ kpole la. Agɔnwolɛma mɔɔ bɛnyi sunsum nu la dule me folɛ kɛ mendwenle nwolɛ kpalɛ menea saa ɔbahola yeayɛ boɛ kɛ mebayɛ gyima mɔɔ mese mekulo la na mekɛ ko ne ala eza meadwu me sunsum nu bodane ne anwo a. Bɛhakyele me kɛ ɔnrɛhyɛ ewiade ɛhye bara awieleɛ. Noko wɔ ewiade fofolɛ ne anu, mebanyia mekɛ dɔɔnwo meazukoa nane dodo biala mɔɔ mekulo la anwo debie. Ɔti menzile kpɔkɛ kɛ mebazukoa debie mɔɔ ɔnrɛmaa menrɛva ɛvolɛ dɔɔnwo menrɛhɔ sukulu, emomu ɔbamaa meanyia me sa anloa gyima la. Ɛhye maanle menyianle gyima mɔɔ boale me ɔmaanle menyɛle dahuu adekpakyelɛ gyima ne bie na nzinlii mendule mengɔle Ecuador, ɛleka mɔɔ ɛnee bɛhyia moalɛ kpole la.” Kɛkala Miki nee ɔ hu yɛ maangyebakyi zo neavolɛ gyima ne bie wɔ Ecuador.

15. Kɛzi Gyemise neazo ne boa yɛ maa yɛkɔ zo yɛbɔ edwɛkpa ne nolo yɛkile bɛdabɛ mɔɔ bɛngile edwɛkɛ ne anwo anyelielɛ la ɛ? (Eza nea nvoninli ne mɔ.)

¹⁵ Saa menli andie edwɛkpa ne a, ɔnle kɛ ɔmaa yɛ sa nu to. Menli kola kakyi. Suzu Gyisɛse adiema Gyemise neazo ne anwo. Ɔnwunle Gyisɛse wɔ mekɛ mɔɔ ɔlɛnyi, mekɛ mɔɔ ɔrayɛle Mɛzaya ne, na ɔhilehilele wɔ adenle mɔɔ dasanli biala ɛtɛyɛle bie ɛlɛ la azo la. Noko wɔ ɛvolɛ dɔɔnwo anu, Gyemise anyɛ Gyisɛse ɛdoavolɛ. Mɔɔ bɛdwazole Gyisɛse la a ɔ diema Gyemise rayɛle ye ɛdoavolɛ a—na ɛnee ɔbɔ mɔdenle kpalɛ!b (Dwɔn 7:5; Gal. 2:9) Mmabu ye kɛ nwolɛ ɛngyia kɛ ɛbaha edwɛkɛ ne bie wɔahile wɔ mbusuafoɔ mɔɔ bɛtɛkilele nɔhalɛ ne anwo anyelielɛ la anzɛɛ ɛbazia wɔahɔ bɛdabɛ mɔɔ bɛanlie edwɛkpa ne bɛando nu la ɛkɛ ne bieko. Kakye kɛ yɛde mekɛ mɔɔ li awieleɛ la anu ɔti yɛ edwɛkɛhanlɛ gyima ne anwo hyia ndɛndɛ. Bie a mɔɔ ɛbaha wɔahile bɛ ɛnɛ la baha bɛ yeamaa bɛayɛ nwolɛ debie kenle bie, bie bɔbɔ a mekɛ mɔɔ anwongyelelɛ kpole ne babɔ ɔ bo la.c

KƆ ZO KILE GYIHOVA NGAKYELƐ NE MƆ ANWO ANYEZƆLƐ

16. Kɛzi wɔnyia Gyihova ngakyelɛ ne mɔ azo nvasoɛ ɛ? (Eza nea ɛlɛka, “Fa Boa Awie Mɔ.”)

¹⁶ Bɛyɛ sunsum nu aleɛ mɔɔ yɛ sa ka ye la bie mɔ bɛmaa bɛdabɛ mɔɔ bɛtɛtele Baebolo ne anu mɔlebɛbo ngilehilelɛ ne ɛlɛ la. Kɛ neazo la, bɛyɛ dapɛne biala bagua nu ɛdendɛlɛ ne mɔ, edwɛkɛ nee vidio bie mɔ mɔɔ wɔ jw.org yɛɛ maanlema Ɛzinzalɛ Arane ne nee Awake! ne titili bɛmaa menli mɔɔ bɛnle Gyihova Alasevolɛ la. Noko akee yɛnyia ngakyelɛ zɔhane mɔ azo nvasoɛ. Bɛmaa ɛlɔlɛ mɔɔ yɛlɛ yɛmaa Gyihova la anu yɛ se, bɛmia diedi mɔɔ yɛlɛ wɔ ye Edwɛkɛ ne anu la anu na bɛboa yɛ bɛmaa yɛkilehile Baebolo nu mɔlebɛbo nɔhalɛ ne anu kpalɛ yɛkile awie mɔ.—Edw. 19:7.

17. Tɛnlabelɛ boni mɔ anu a bie a ɔbamaa wɔahakye Baebolo nu mɔlebɛbo ngilehilelɛ ne a?

¹⁷ Kɛ Gyihova Alasevolɛ la, saa yɛnyia Ngɛlɛlera ne anu nɔhalɛ ne anwo ndelebɛbo fofolɛ a, ɔmaa yɛ nye die. Noko eza yɛ nye sɔ Baebolo nu mɔlebɛbo ngilehilelɛ ne mɔɔ limoale hwenle yɛ rale nɔhalɛ ne anu la kpalɛ. Saa ɔdwu mekɛ bie na yɛngulo kɛ yɛdi adehilelɛ mɔɔ Gyihova ahyehyɛdeɛ ne fa maa yɛ la azo, emomu mɔɔ wɔ yɛ adwenle nu ala a yɛkulo kɛ yɛyɛ a, ɔwɔ kɛ yɛbɛlɛ yɛ nwo aze na yɛkakye kɛ tumivolɛ bedevinli ne nee Bɔvolɛ ne mɔɔ ze nrɛlɛbɛ kpole la a ɛlɛkile ahyehyɛdeɛ zɔhane adenle a. Saa yɛdayɛ anzɛɛ yɛ kulovolɛ bie ɛlɛyia ngyegyelɛ a, yɛbahola yɛazi abotane na yɛadwenle deɛmɔti Gyihova maa amaneɛnwunlɛ nwo adenle la anwo. Yɛɛ saa yɛlɛsuzu mɔɔ ɔwɔ kɛ yɛfa yɛ mekɛ nee yɛ ninyɛne yɛyɛ la anwo a, yɛbahola yɛahakye ninyɛne mɔɔ hyia kpalɛ wɔ mekɛ ɛhye mɔɔ li awieleɛ la anu la. Ɔrɛla ye kɛ Gyihova ngakyelɛ ne mɔ bamaa yɛ anwosesebɛ, na yeamaa yɛayɛ yɛ ninyɛne nrɛlɛbɛ nu dahuu.