Boa Baebolo Sukoavoma Maa Bɛkpo Agɔnwolɛ Ɛtane

Amaa Baebolo sukoavoma ahola ava Gyihova agɔnwolɛ la ɔwɔ kɛ bɛkpa agɔnwolɛma kpalɛ. (Ed 15:1, 4) Agɔnwolɛma kpalɛ baboa bɛ yeamaa bɛayɛ mɔɔ tenrɛ la.​—Mrɛ 13:20; lff ɛzukoalɛdeɛ 48.

Saa ɛlɛboa wɔ Baebolo sukoavoma wɔamaa bɛakpo agɔnwolɛ ɛtane a, te bɛ edwɛkɛ bo. Bie a ɔbayɛ se kɛ bɛbakpo ewiade agɔnwolɛ. Ɛhye ati, kile bɛ nwo anyelielɛ mekɛ biala. Ɛbahola wɔahɛlɛ edwɛkɛ wɔanwa bɛ, wɔavɛlɛ bɛ wɔ fonu zo anzɛɛ wɔakpɔla bɛ. Wɔ mekɛ mɔɔ bɛlɛnyia anyuhɔlɛ la, ɛbahola wɔado ɛsalɛ wɔavɛlɛ bɛ nee mediema gyɛne na bɛalielie bɛ nye. Ɛhye bamaa bɛanwu kɛ bɛnyia dɔɔnwo bɛdɛla mɔɔ bɛminli ye la. (Mk 10:29, 30) Saa ɛnwu ye kɛ Gyihova abusua ne ɛlɛyɛ kpole a ɛdawɔ noko ɛ nye balie.

NEA BOA WƆ BAEBOLO SUKOAVOMA MAA BƐKPO AGƆNWOLƐ ƐTANE VIDIO NE NA BUA KPUYA ƐHYE MƆ:

• Duzu a le agɔnwolɛ ɛtane?​—1Kɔ 15:33

• Kɛzi Rose zuzule kɛ Kilisiene ɛkponledolɛ bo bayɛ ɛ?

• Kɛzi Manzakyi boale Rose maanle ɔnyianle agɔnwolɛma kpalɛ ɛ?