Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Fa Edwɛkpa Mɔɔ Vi Nyamenle Ɛkɛ! Ne Bɔ Baebolo Ɛzukoalɛ Bo Wɔ Anlenkɛ Nloa
Deɛmɔti Ɔhyia La: Amaa yɛayɛ menli ɛdoavolɛma la, ɔwɔ kɛ yɛkilehile bɛ Nyamenle Edwɛkɛ ne. (Mat. 28:19, 20) Saa yɛ muala yɛfa mbuluku mɔɔ yɛnyia la yɛdi gyima a, yɛbahola yɛahilehile nɔhalɛ ne kpalɛ. Bɛyɛ Edwɛkpa Mɔɔ Vi Nyamenle Ɛkɛ! brohyua ne amaa yeaboa yɛ yeamaa yɛahilehile menli nɔhalɛ ne. Yɛbahola yɛava yɛabɔ Baebolo ɛzukoalɛ bo wɔ mekɛ mɔɔ limoa mɔɔ yɛ nee suamenle bie badendɛ la.
Sɔ Ɛhye Nea Wɔ Siane Ɛhye Anu:
Sɛlɛ Gyihova kɛ ɔmaa ɛnyia ɛhulolɛ kɛ ɛbayɛ Baebolo ɛzukoalɛ. Eza sɛlɛ ye kɛ ɔboa wɔ ɔmaa ɛbɔ Baebolo ɛzukoalɛ bo na ɛhola ɛhilehile nɔhalɛ ne kpalɛ.—Fel. 2:13.
Nyia mekɛ sukoa edwɛkɛ mɔɔ yɛbaha la anwo neazo ne kpalɛ wɔ bɛ abusua ɛzonlenlɛ bo anzɛɛ ɛ ti anwo debiezukoalɛ ne anu. Ɛhye bamaa wɔava anwodozo wɔadendɛ wɔ daselɛlilɛ nu na wɔabɔ Baebolo ɛzukoalɛ bo.