Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Awie Mɔɔ Ɔka Aneɛ Gyɛne Mɔɔ Yɛdi Ye Daselɛ

Deɛmɔti Ɔhyia La: Menli mɔɔ bɛvi “maanle” ngakyile nu la sunsum nu gyinlabelɛ hyia Gyihova. (Gyi. 10:34, 35) Ɛhye ati Gyisɛse hanle kɛ bɛbabɔ edwɛkpa ne nolo “wɔ aleɛabo amuala.” (Mat. 24:14) Zɛkalaya hanle dole ɛkɛ kɛ menli mɔɔ bɛvi “maanle maanle ne mɔ nee aneɛ ngakyile ne mɔ anu” la badie edwɛkɛ ne. (Zɛk. 8:23) Kɛmɔ ɛzoanvolɛ Dwɔn ɛnyelɛzodeɛnwunlɛ ne kile la, menli mɔɔ “bɛvi mbusua, maanle, aneɛ nee menli ngakyile kɔsɔɔti anu” la banyia bɛ ti wɔ anwongyelelɛ kpole ne anu. (Yek. 7:9, 13, 14) Ɔlua mɔɔ yɛlimoa yɛha nwolɛ edwɛkɛ la ati, saa yɛyia awie na ɔka aneɛ gyɛne a, ɔwɔ kɛ yɛdi ye daselɛ.

Kɛzi Bɛyɛ Ye La:

Siezie ɛ nwo. Fa Good News for People of All Nations ne wula wɔ daselɛlilɛ baage ne anu. Nwu adehilelɛ mɔɔ se “How to Help Those Who Speak Another Language” mɔɔ wɔ buluku ne mɔlebɛbo la kpalɛ. Maa ɛ nye ɛla aneɛ mɔɔ bie a ɛbayia bɛ la ade na twe zɔhane aneɛ ne mɔ anu video anzɛɛ mbuluku wɔ jw.org ne azo gua wɔ fonu anzɛɛ kɔmpita ne azo. Dua JW Language ɛleka ne azo sukoa zɔhane aneɛ ne mɔ anu edwɛkɛ ngyikyi bie mɔ. Saa asafo mɔɔ bɛka aneɛ gyɛne la yɛ gyima wɔ azɛlɛsinli ko ne ala anu na ɛlɛyɛ azua nu daselɛlilɛ a, fa aneɛ mɔɔ wɔ asafo ɛdeɛ ne ka la ala anu mbuluku maa wɔ daselɛlilɛ nu. Noko saa ɛlɛdi daselɛ wɔ bagua nu wɔ ɛleka mɔɔ bɛka aneɛ dɔɔnwo la a, fa zɔhane aneɛ ne mɔ anu mbuluku maa.
Saa ɛyia awie mɔɔ ɔnga wɔ aneɛ ne bie a, bɔ mɔdenle ka “ninyɛne mgbole mɔɔ Nyamenle ɛyɛ la” anwo edwɛkɛ kile ye wɔ ye aneɛ nu. (Gyi. 2:11) Maa ɔnwu ye kɛ ɔbanyia nwolɛ edwɛkɛ dɔɔnwo wɔ jw.org ne azo wɔ ye aneɛ nu. Saa ɔ nye die nwolɛ a, hyehyɛ Please Follow Up (S-43) kɛlata ne ndɛndɛ fa maa kɛlɛhɛlɛvolɛ ne. Kɔ ahenle ne ɛkɛ kɔkpula kɛ nolobɔlɛma mɔɔ bɛka ye aneɛ ne bie bara ye ɛkɛ la.

Sɔ Ɛhye Nea Wɔ Siane Ɛhye Anu:

Bɛyɛ mekɛ mɔɔ bɛlɛdi awie mɔɔ ɔnga bɛ aneɛ ne bie daselɛ la anwo yɛkile bɛnlea wɔ bɛ nɔsolɛ Abusua Ɛzonlenlɛ ne abo.