Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu​—Yɛdi Awie Biala Mɔɔ Wɔ Yɛ Azɛlɛsinli Ne Anu La Daselɛ

DEƐMƆTI ƆHYIA LA: Zɛkalaya hanle dole ɛkɛ ne kɛ menli mɔɔ vi maanle maanle kɔsɔɔti anu la badie edwɛkpa ne. (Zɛk 8:23) Noko nwane mɔ a bahilehile bɛ a? (Wlo 10:13-15) Ɔle nwolɛ adenle nee yɛ gyima kɛ yɛbabɔ edwɛkpa ne nolo yɛahile awie biala mɔɔ wɔ yɛ azɛlɛsinli ne anu la.—od 84 ¶10-11.

KƐZI BƐYƐ YE LA:

• Siezie ɛ nwo. Ɔyɛ a, ɛyia menli mɔɔ ka aneɛ gyɛne la ɔ? Ɛbahola wɔava JW Language app ne wɔazukoa kɛzi ɛ nee bɛ bali adwelie sikalɛ la. Anzɛɛ ɛbahola wɔava wɔ fonu ne wɔahile ahenle kɛzi ɔbanyia ye aneɛ ne anwo ninyɛne dɔɔnwo wɔ jw.org azo la

• Gua ɛ nye aze. Saa ɛlɛyɛ azua nu daselɛlilɛ a, fa nwolɛ adenle biala mɔɔ ɛbanyia la di menli mɔɔ ɛlɛpɛ nu anzɛɛ menli mɔɔ de kale nu la daselɛ. Saa ɛlɛyɛ bagua nu daselɛlilɛ a, fa sie ɛ nye zo kɛ ɛbali daselɛ

• Maa ɛ nye ɛbolo. Saa ɛkɔ sua bie anu na bɛnle ɛkɛ a, bɔ mɔdenle kɔ ɛkɛ ne mekɛ fofolɛ. Bɔ mɔdenle kɛ ɛ nee awie badendɛ wɔ awuke biala anu, bie a wɔ mekɛ ngakyile nu wɔ kenle ne anu anzɛɛ kenle ngakyile nu wɔ dapɛne ne anu. Bie a, nwolɛ bahyia kɛ ɛ nee suamenlema bie mɔ tendɛ wɔ telefonu zo, ɛkɛlɛ bɛ kɛlata anzɛɛ ɛ nee bɛ tendɛ wɔ awɔdenle zo

• Sia kɔ ɛkɛ. Saa awie kile edwɛkɛ ne anwo anyelielɛ a, sia kɔ ɛkɛ ne ndɛndɛ. Saa ahenle ne ka aneɛ gyɛne a, kpondɛ awie mɔɔ fɛta na ɔte aneɛ ne la maa ɔboa ye. Mmagyakyi ahenle ne ɛkpɔlalɛ kɔkpula kɛ ɛkɛnyia awie mɔɔ te ye aneɛ ne la.—od 94 ¶39-40

NEA BƐLI DASELƐ ‘BƐHƆDWU AZƐLƐ YE AZO ƐLEKA BIALA’ VIDIO NE NA SUZU KPUYA ƐHYE MƆ ANWO:

• 

  Kɛzi mediema ne mɔ zieziele bɛ nwo hɔlile daselɛ wɔ azɛlɛsinli mɔɔ wɔ moa la anu ɛ? (1Kɔ 9:22, 23)

• 

  Ngyegyelɛ boni mɔ a ɛnee ɔwɔ kɛ bɛdi nwolɛ gyima a?

• 

  Nyilalɛ boni a bɛnyianle a?

• Duzu a ɛbayɛ amaa wɔali menli mɔɔ wɔ wɔ azɛlɛsinli ne anu la anu dɔɔnwo daselɛ a?