Ɛbayɛ Gyima Wɔ Azɛlɛsinli Mɔɔ Ɔnle Asafo Biala Ɛdeɛ La Anu Ɔ?

Wɔyɛ gyima wɔ azɛlɛsinli mɔɔ ɔnle asafo biala ɛdeɛ la anu na wɔnyia nyilalɛ dɔɔnwo ɔ? Ɛkenle ɛvolɛ ne, nolobɔlɛma 747 yɛle azɛlɛsinli 477 mɔɔ ɔnle asafo biala ɛdeɛ la anu gyima. Wɔ 2015 ɛzonlenlɛ ɛvolɛ ne mɔlebɛbo, ɛnee ɔhyia kɛ bɛyɛ gyima wɔ azua nee namunamu mɔɔ bo 8,000 la azo. Ɛbahola wɔaboa ɔ?

Bɛhanle ɛhye anwo edwɛkɛ bɛhilele asafo ne mɔ wɔ December 1, 2014 kɛlata ne anu. Saa ɛbahola wɔaboa wɔamaa bɛayɛ gyima wɔ azɛlɛsinli ɛhye mɔ anu a, ɛnee biza mgbanyima ne mɔ maa bɛhile wɔ ɛleka mɔɔ bɛhyia moalɛ la. Azɛlɛsinli dɔɔnwo wɔ Brong Ahafo, Northern, Upper East, nee Upper West, yɛɛ Volta maanzinli nu.

Nolobɔlɛma 2 kɔdwu 20 mɔɔ bɛfɛta la bahola abiza nwolɛ adenle avi Bɛtɛle. Bɛmaa bɛfa mekɛ ekyii mɔɔ ɔmbo siane nsa la bɛyɛ gyima wɔ azɛlɛsinli ne anu. Mekɛ mɔɔ bɛbava bɛayɛ gyima zɛhae la bamaa bɛ nye alie. Saa yɛyɛ gyima wɔ azɛlɛsinli mɔɔ ɔnle asafo biala ɛdeɛ la anu a, ɔboa bɛdabɛ mɔɔ bɛkulo nɔhalɛ ne la, ɔnva nwo kɛ bɛwɔ moa la, ɔmaa bɛbaboka menli mɔɔ ɛlɛye Gyihova ayɛlɛ wɔ ewiade amuala la anwo. Saa ɛkola ɛboa a ɛbanyia nyilalɛ dɔɔnwo!​—Nolo. 11:6; Aye. 54:13.