Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu​—Telefonu Zo Daselɛlilɛ

DEƐMƆTI ƆHYIA LA: Telefonu zo daselɛlilɛ le adenle ko mɔɔ yɛdua zo yɛdi “edwɛkpa ne anwo daselɛ” bɔkɔɔ a. (Gyi 20:24)a Ɔmaa yɛkola yɛdi menli mɔɔ tɛnlabelɛ bie ati yɛngola yɛngɔ bɛ ɛkɛ la daselɛ.

KƐZI BƐYƐ YE LA:

• 

  Siezie ɛ nwo. Kpa edwɛkɛtile mɔɔ fɛta la. Kɛlɛ edwɛkɛ titili mɔɔ ɛkulo kɛ ɛka la. Eza siezie edwɛkɛ sikalɛ bie amaa saa ahenle anva na ɔwɔ kɛ ɛ nee milahyinli tendɛ a, wɔava wɔahilehile deɛmɔti ɛvɛlɛle la anu. Tɛnla ɛkponle nwo na fa kɛlata mɔɔ wɔ edwɛkɛ titili ne mɔ wɔ zo la nee ninyɛne mɔɔ ɛbahyia nwo le kɛ wɔ fonu anzɛɛ tabelɛte. Kolaa na wɔavɛlɛ la, dimoa buke kɔ JW Library^® anzɛɛ jw.org^® azo

• 

  Mmakyengye ɛ nwo. Fi ahonle nu tendɛ. Sele na keha ɛ nwo kɛ asɛɛ ahenle nwu wɔ la. Maa wɔ edwɛkɛ ne ɛdoa nu. Ɔbayɛ kpalɛ kɛ ɛ nee sonla ko anzɛɛ menli nwiɔ babɔ nu ayɛ. Saa suamenle ne biza wɔ kpuya a, si zo amaa ahenle mɔɔ boka ɛ nwo la ade na yeaboa wɔ wɔ mualɛ ne anu

• 

  Yɛ sia kɔkpɔla nwo ngyehyɛleɛ. Saa ahenle kile edwɛkɛ ne anwo anyelielɛ a, gyakyi ye kpuya amaa wɔaye ɔ nloa kenle fofolɛ. Ɛbahola wɔalua ɛlɛtɔlɔneke ninyɛne zo wɔanwa ye buluku bie anzɛɛ ɛbahola wɔava wɔahɔmaa ye wɔ ye sua nu. Anzɛɛ ɛbahola wɔava yɛ vidio ne mɔ ko wɔanwa ye. Saa nwolɛ bakyia a, ka yɛ Online Bible Study Lessons ne anwo edwɛkɛ anzɛɛ twe ye adwenle kɔ yɛ wɛbsaete ne azo