Video Fofolɛ Mɔɔ Yɛbava Yɛabɔ Baebolo Ɛzukoalɛ Bo
Menli dɔɔnwo ɛlɛnea video sikalɛ bie mɔɔ ati se, Duzu Ati A Ɔwɔ Kɛ Ɛsukoa Baebolo Ne A? wɔ jw.org. Bɛyɛ video ne kɛ bɛmaa yeaha anyelielɛma ahonle na bɛalie bɛado nu kɛ yɛ nee bɛ ɛyɛ Baebolo ɛzukoalɛ mɔɔ bɛndua ɛhwee a. Saa awie kɔ “Biza Baebolo Ɛzukoalɛ” mɔɔ wɔ ɔ nyunlu ɛkɛ la abo anzɛɛ ɔdua sɛkɛlɛneɛ ne mɔɔ wɔ yɛ trate fofolɛ ne mɔ anzi la azo a ɔbahola yeanlea bie. Ndenle mɔɔ yɛbahola yɛalua zo yɛava video ne yɛali gyima kpalɛ la bie mɔ a wɔ ɛke la.
Saa ɛlɛyɛ sia kɔkpɔla a, ka kile suamenle kɛ: “Menva video ezinra bie mɔɔ kilehile kɛzi ɛbahola wɔanyia wɔ Baebolo kpuyia mualɛ la mengile wɔ ɔ?” Saa ɔkponle zo a, maa ɔnlea video ne wɔ wɔ moba ne azo anzɛɛ ye kɔmputa ne azo.
Saa yɛfa trate fofolɛ ne ko yɛmaa wɔ mekɛ mɔɔ yɛnle daselɛlilɛ nu anzɛɛ yɛlɛyɛ bagua nu daselɛlilɛ la a, kile ahenle Intanɛte sɛkɛlɛneɛ ne na ka kile ye kɛ ɔva ye moba ne ɔpɛ sɛkɛlɛneɛ ne nvoninli. Kɛmɔ aneɛ dɔɔnwo anu sɛkɛlɛneɛ ne maa bɛbuke video ne anzɛɛ bɛkɔ yɛ Intanɛte gyimalilɛleka la ati, ɔbahola yeayɛ boɛ kɛ ɛbava wɔ moba ne wɔabuke video ne ɛkɛ ne ala.
Ka video ne anwo edwɛkɛ kile ɛ gɔnwo gyimayɛvoma, sukuluma, ɛ nwo amra yɛɛ ɛ gɔnwo mɔ gyɛne kɛ ɛmaa bɛanlea bie. Anzɛɛ fa debie mɔɔ bamaa bɛahola bɛabuke video ne la nwa bɛ na maa bɛdabɛ mumua ne bɛbuke.
Saa yɛfa deɛ fofolɛ ɛhye yɛdi gyima a, yɛbahola yɛabɔ Baebolo ɛzukoalɛ dɔɔnwo abo, na yɛaboa menli mɔɔ bɛkulo “ngoane mɔɔ ɛnlɛ awieleɛ la” wɔ sunsum nu.—Gyi. 13:48.