Trate Fofolɛ Mɔɔ Bɛyɛ Ye Ngɛnlɛma!
1. Ninyɛne mɔɔ yɛbava yɛahɔ daselɛlilɛ la boni a bɛyɛ ye fofolɛ a?
1 Wɔ 2013 Maangyeba Nyianu ne mɔɔ se, “Nyamenle Edwɛkɛ Le Nɔhalɛ!” la abo, bɛyele trate fofolɛ nnu. Bieko, bɛva Belemgbunlililɛ Edwɛkɛ 38 ne mɔɔ se, “Mɔwuamra Badɛnla Aze Bieko Amgba Ɔ?” la bɛboka trate mɔɔ wɔ ɛkɛ ne la anwo. Bɛyɛ trate nsia ɛhye mɔ kɔsɔɔti fofolɛ. Adwenle boni ati a bɛyɛ ye fofolɛ a? Saa yɛlɛfa yɛamaa wɔ azua nu a, kɛzi yɛbahola yɛava ninyɛne fofolɛ mɔɔ wɔ zo la yɛali gyima kpalɛ ɛ?
2. Bodane boni ati a bɛyɛ ye fofolɛ a?
2 Duzu Ati A Bɛyɛ Ye Fofolɛ A?: Ndenle nna ɛhye mɔ a bɛdua zo bɛyɛ azua nu daselɛlilɛ kpalɛ a: (1) Biza edwɛkɛ mɔɔ bamaa wɔanwu ahenle adwenle la fa bɔ adwelielilɛ bo. (2) Ka Ngɛlɛlera ne anu edwɛkɛ kile ye. (3) Maa suamenle ne buluku maa ɔgenga. (4) Gyakyi ye kpuyia mɔɔ ɛbabua ye kenle fofolɛ la na yɛ ngyehyɛleɛ kɛ ɛbazia wɔahɔ ɛkɛ. Trate ne mɔɔ bɛyɛ ye fofolɛ la maa yɛkola yɛdua ndenle nna ɛhye azo mɔɔ ɔnyɛ se a.
3. Kɛzi yɛbahola yɛava trate fofolɛ ne ko yɛamaa wɔ daselɛlilɛ nu ɛ?
3 Kɛzi Bɛfa Bɛmaa La: (1) Saa ɛbiza ahye ɛwie a, fa kpuyia ne mɔ mɔɔ wɔ trate ne azo la kile suamenle ne na maa ɔhile ye adwenle. (2) Buke trate ne anu, na bɛzuzu “Mɔɔ Baebolo Ne Ka La” anwo. Saa ɔbayɛ boɛ a, buke Baebolo ne na kenga. Saa suamenle ne lɛ alagye a, bɛzuzu “Mɔɔ Ɔbahola Yeahile Yeamaa Wɔ La” anwo. (3) Fa trate ne maa ye, na ka kile ye kɛ ɔnyia mekɛ a ɔgenga mɔɔ ɛha la. (4) Kolaa na wɔavi ɛkɛ ne la, fa kpuyia ne mɔɔ wɔ ɔ nzi mɔɔ se, “Dwenle Ɛhye Anwo” la kile ye na yɛ ngyehyɛleɛ kɛ ɛbara na bɛazuzu kɛzi Baebolo ne bua la kenle fofolɛ.
4. Saa yɛsia yɛkɔkpɔla awie a kɛzi yɛbava trate fofolɛ ne yɛali gyima ɛ?
4 Sia kɔkpɔla ne noko ɛnyɛ se. Fa ngɛlɛlera mɔɔ wɔ trate ne anzi la bua kpuyia mɔɔ ɛbizale ye ɛkenle la. Ɛlɛfi ɛkɛ a, fa Edwɛkpa brohyua nvoninli ne kile ye, fa brohyua ne nee ɛzukoalɛdeɛ mɔɔ ka mɔɔ bɛzukoale la anwo edwɛkɛ dɔɔnwo la kile suamenle ne na fa brohyua ne maa ye. Saa ɔdie a, yɛ ngyehyɛleɛ kɛ bɛbazuzu brohyua ne anwo mekɛ bieko mɔɔ ɛbara la. Wɔbɔ Baebolo ɛzukoalɛ bo ala ɛne! Anzɛɛ kɛ anrɛɛ ɛbava brohyua ne wɔamaa ye la, ɛbahola wɔamaa ye trate fofolɛ na wɔayɛ ngyehyɛleɛ kɛ ɛbara na ɛ nee suamenle ne azuzu nwolɛ.
5. Kɛzi trate boa yɛ wɔ daselɛlilɛ nu ɛ?
5 Yɛva trate yɛli gyima wɔ daselɛlilɛ nu wɔ ɛvolɛ mɔɔ bo 130 la anu. Bɛhakyi kɛzi bɛ mgbole de nee kɛzi bɛyɛ bɛ la ɛdeɛ, noko yɛfa yɛdi daselɛ kpalɛ. Bɛmaa yɛva kɛzi bɛyɛ ye ngɛnlɛma la yɛli gyima kpalɛ na yɛhɔ zo yɛbɔ Baebolo ne anu nrɛlɛbɛ ne nolo wɔ ewiade amuala.—Mrɛ. 15:7a.