Ɛsalɛdolɛ Titile Bie
1. Mekɛ boni a 2014 nyianu ɛsalɛdolɛ ne babɔ ɔ bo a?
1 Saa ɛlɛyɛ ngyehyɛleɛ kɛ ɛto aleɛ wɔamaa agɔnwolɛ anzɛɛ mbusua, na ɔbahyia mɔdenlebɔlɛ nee ezukoa kpole na wɔava wɔayɛ a, ɔda ali kɛ ɛbava anyelielɛ wɔado ɛsalɛ wɔavɛlɛ menli. Zɔhane ala a bɛyɛ gyima dɔɔnwo bɛva bɛziezie sunsum nu aleɛ mɔɔ yɛbanyia wɔ 2014 maangyeba nee maanle maanle avinli nyianu ne mɔ anu la abo a. Ɔka dapɛne nsa na yɛ nyianu ne abɔ ɔ bo a, yɛbanyia adenle yɛado ɛsalɛ yɛavɛlɛ awie mɔ yɛamaa bɛahɔ bie. Duzu a baboa yɛ na yɛava anyelielɛ yɛado ɛsalɛ yɛavɛlɛ menli dɔɔnwo a?
2. Duzu a bamaa yɛayɛ dɔɔnwo wɔ ɛsalɛdolɛ ne anu a?
2 Saa yɛfa anyezɔlɛ yɛsuzu kɛzi yɛdayɛ mumua ne yɛnyia sunsum nu aleɛ mɔɔ Gyihova fa maa yɛ wɔ yɛ nyianu ne mɔ abo la azo nvasoɛ ne anwo a, ɔbaha yɛ yeamaa yɛado ɛsalɛ yɛavɛlɛ menli dɔɔnwo. (Aye. 65:13, 14) Ɔwɔ kɛ yɛkakye noko kɛ, yɛ ɛvolɛ biala ɛsalɛdolɛ ne so ma. Menli mɔɔ yɛbado ɛsalɛ yɛavɛlɛ bɛ la bie mɔ nee yɛ bahɔ nyianu ne. Noko akee, ɔnva nwo menli dodo mɔɔ bahɔ bie la, mɔdenle mɔɔ yɛbɔ yɛto ɛsalɛ yɛfɛlɛ menli la bawula Gyihova anyunlunyia na yeala ye kpalɛyɛlɛ ne ali.—Edw. 145:3, 7; Yek. 22:17.
3. Kɛzi yɛbava ɛsalɛdolɛ ngɛlata ne yɛamaa ɛ?
3 Ɔwɔ kɛ mgbanyima eku biala kola nwu kɛzi asafo ne bahola ava ɛsalɛdolɛ ngɛlata dɔɔnwo amaa, mɔɔ bie a ɔwɔ kɛ bɛgyakyi bie bɛmaa menli mɔɔ bɛnle sua nu anzɛɛ ɔwɔ kɛ bɛfa bie bɛmaa wɔ bagua nu daselɛlilɛ nu wɔ azɛlɛsinli ne anu boka nwo la. Ɔdwu dapɛne awieleɛ na ɔkɛyɛ boɛ a, ɔwɔ kɛ bɛfa magazine ne bɛboka ɛsalɛdolɛ ngɛlata ne anwo bɛmaa. Saa folɛ mɔɔ lumua wɔ siane ne anu la boka mekɛ mɔɔ bɛlɛfa ɛsalɛdolɛ ngɛlata ne bɛamaa la anwo a, bɛva bɛ adwenle bɛzie ɛsalɛdolɛ ngɛlata ne mɔɔ bɛlɛfa bɛamaa la azo bɛdɛla kɛ bɛbayɛ Baebolo ɛzukoalɛ la. Saa ɛsalɛdolɛ ne ba awieleɛ a, nea kɛzi yɛ nye balie kɛ yɛvale anyelielɛ yɛyɛle bie na yɛdole ɛsalɛ yɛvɛlɛle menli dɔɔnwo kɛ bɛrɛla sunsum nu ɛkponle mɔɔ Gyihova ɛdo ɛmaa yɛ la bie a!