◼ Gyimalilɛ Mekɛ: Kenle nsa ne amuala, bɛbabɔ gyimalilɛ ne abo nwonlomɔ 9:20. Zɔhane mekɛ ne, ɔwɔ kɛ yɛ kɔsɔɔti yɛtɛnla aze, amaa bɛahola bɛabɔ gyimalilɛ ne abo wɔ enililɛ nu. Wɔ Yalɛ nee Folɛ, yɛbado edwɛne na yɛayɛ asɔne yɛava yɛakpɔne wɔ nɔsolɛ 4:55 na Molɛ noko yɛakpɔne ewiazo 3:50.
◼ Maanle Maanle Avinli Nyianu: Bɛbayɛ maanle maanle avinli nyianu wɔ ɛleka bie mɔ. Kakye kɛ ɔfese ne ɛdo ɛsalɛ ɛvɛlɛ asafo yɛɛ menli bie mɔɔ bahɔ bie wɔ maanle gyɛne zo la ɔluakɛ bɛzuzu mbia mɔɔ bɛbadɛnla zo, ɛleka mɔɔ bɛfa kale bɛsie yɛɛ hotɛle azua mɔɔ wɔ ɛkɛ la anwo kpalɛ la ati ɔ. Saa menli dɔɔnwo kɔ maanle maanle avinli nyianu mɔɔ bɛangile kɛ bɛhɔ la bie a menli ne bahyele zolɛ. Saa edwɛkɛ bie ati ɛnrɛhola ɛnrɛhɔ nyianu mɔɔ bɛhile kɛ ɛhɔ la bie a, mmayɛ wɔ adwenle kɛ ɛkɔ maanle maanle avinli nyianu.
◼ Kale Agyinlaleɛ: Kyesɛ awie ɛnde kpɔkɛ anzɛɛ arɛlevilɛ nu edwɛkɛ bie si, tɛ ye zɔhane a dahuu ɔle kpalɛ kɛ yɛbadɛnla ɛleka mɔɔ yɛbahola yɛadie gyimalilɛ ne la tɛla kɛ yɛbadɛnla kale nu mɔɔ bamaa debie ahwehwe yɛ adwenle anzɛɛ yɛbahola yɛala la. Yɛtɛnla menli ne anu yɛtie edwɛkɛ ne a ɔle adenle mɔɔ yɛdua zo yɛkile anyezɔlɛ yɛmaa sunsum nu ngyehyɛleɛ kɛnlɛma mɔɔ Gyihova ɛyɛ ɛmaa yɛ la. Kɛmɔ kale agyinlaleɛ ne ɛnle kpole la ati, ɔbayɛ kpalɛ kɛ menli dɔɔnwo babɔ nu ava kale ko.
◼ Ebia Mɔɔ Bɛkpondɛ Bɛsie Awie: Ɛbahola wɔakpondɛ mbia wɔamaa menli mɔɔ ɛ nee bɛ vi sua nu anzɛɛ vole wɔ kale ne bie anzɛɛ wɔ Baebolo sukoavoma mɔɔ bɛle fofolɛ la ala. Bɛgyakyi mbia titile bie bɛmaa menli mɔɔ bɛyɛ mgbanyinli anzɛɛ bɛnde kpɔkɛ la. Kɛmɔ mbia ɛhye anzo la ati, sonla ko anzɛɛ menli nwiɔ mɔɔ bɛlɛboa ahenle mɔɔ ɛyɛ kpanyinli anzɛɛ ɛnde kpɔkɛ ala a bahola adɛnla ɔ nwo ɛkɛ a.
◼ Ewiazo Aleɛ: Yɛsɛlɛ wɔ fa ewiazo aleɛ bɛla tɛla kɛ ɛkɛvi nyianu ɛleka ne kɛ ɛkadɔ aleɛ wɔ ewiazo ɛnwomenlelielɛ mekɛ ne anu. Bɛbahola bɛava debie ekyi mɔɔ bɛfa aleɛ bɛgua nu a ɔndwe la bɛazie ebia ne abo. Bɛmmaa awie adenle kɛ ɔva debie kpole mɔɔ bɛfa menli dɔɔnwo aleɛ bɛgua nu nee debie mɔɔ kola bɔ la ɔrɛla nyianu ne abo.
◼ Ndoboa: Yɛbahola yɛaye ndoboa wɔ yɛ nyianu ne abo yɛava yɛaboa ewiade amuala gyima ne yɛava yɛahile kɛzi yɛ nye sɔ nyianu ngyehyɛleɛ ne la. Ɔwɔ kɛ bɛtua kyɛɛke biala mɔɔ bɛye wɔ nyianu ne abo la bɛmaa “Watch Tower.”
◼ Esiane Nee Edwɛkɛ Mɔɔ Hyia Ndɛndɛ: Saa awie hyia ayileyɛlɛ ndɛndɛ wɔ nyianu ne abo a, yɛsɛlɛ kɛ bɛnwu menli mɔɔ die nyɛvolɛ la anu ko mɔɔ bikye bɛ la na ɔbamaa Ayilelielɛ Ɛleka ne anzo ade ye ndɛndɛ amaa yɛ menli mɔɔ bɔ mɔdenle mɔɔ bɛwɔ ɛkɛ la ahola anlea kɛzi ye gyinlabelɛ ne de la na bɛava nwolɛ moalɛ mɔɔ fɛta la bɛamaa ye.
◼ Bɔkɔbɔkɔyɛlɛ: Ɔwɔ kɛ menli mɔɔ bahɔ nyianu ne kɔsɔɔti la siezie mbia mɔɔ bɛkɛli debie wɔ zo la azo. Kɛmɔ bɛfa ninyɛne mɔɔ bɛgua ewula nu bɛsiezie nyianu biala abo la ati, bɛnlea kɛ bɛkɛva ngɛlata, aleɛ, nzule wolɔba nee ninyɛne gyɛne bɛkɛgua nu. Saa yɛyɛ ɛhye a ɔkile kɛ yɛle menli mɔɔ yɛyɛ yɛ nwo bɔkɔbɔkɔ la.
◼ Nvoninli Ɛpɛlɛ: Kɛmɔ yɛmkpondɛ kɛ yɛsi kongo wɔ teokelase nyianu bo la ati, yɛngulo kɛ yɛka yɛkile menli mɔɔ pɛ nvoninli die ezukoa la kɛ bɛrapɛ mediema nvoninli anzɛɛ video wɔ nyianu ne abo bɛva bɛkpondɛ ezukoa.—w84-E 7/1 m. 25; eza nea Organized, mukelɛ 142, ɛdendɛkpunli 3.
◼ Bɛbɔ Nu Bɛdɛnla Kɛ Abusua: Ɔwɔ kɛ awovolɛ nee bɛ mra tɛnla ɛleka ko wɔ nyianu ne abo tɛla kɛ bɛkɛgyakyi bɛ mra, mɔɔ bɛdabɛ mɔɔ bɛtɛnyianle ɛvolɛ abulanwiɔ boka nwo la bɛkɛmaa bɛ nee bɛ gɔnwo mɔ ngakula gyɛne kɛdɛnla. Saa bɛ nee bɛ tɛnla a, bɛbahola bɛamaa bɛ anwosesebɛ bɛamaa bɛahɛlɛ nyianu ne anu edwɛkɛ mɔɔ bɛ nye die nwo la.
◼ Ayileyɛlɛ: Saa ɛlɛ ayile bie mɔɔ ɛfa a, ɛnee nea kɛ ɛbava dɔɔnwo wɔara, ɔluakɛ ɛnrɛnyia bie wɔ nyianu ne abo.
◼ Banebɔlɛ Nwo Boɛnleanlɛ: Yɛsɛlɛ wɔ bɔ mɔdenle nea kɛ ɛbabɔ ɛ nwo bane wɔ ninyɛne mɔɔ bamaa wɔahola wɔatele na wɔadɔ aze la anwo. Ɛvolɛ biala mgbɔlaboa mɔɔ menli wula la maa bɛboda, titile mɔɔ abo wale la. Ɔle kpalɛ kɛ ɛwula mgbɔlaboa mɔɔ ɛfo debie zo a ɔnrɛmaa ɛnrɛdɔ aze la.
◼ Buluku Fofolɛ Mɔɔ Bɛkɛye: Nyamenle Edwɛkɛ ne tu yɛ folɛ kɛ ‘yɛva ɛhulolɛ yɛyɛ debie biala mɔɔ yɛyɛ la.’ (1 Kɔl. 16:14) Saa bɛye buluku bie wɔ nyianu ne abo a, ɛlɔlɛ nee awie mɔ mɔɔ yɛdwenle bɛ nwo la ɛnrɛmaa yɛnrɛnriandi yɛnrɛzuhuzuhu awie mɔ kɛ yɛdumua yɛalie buluku ne mɔɔ bɛye la bie. Saa yɛto yɛ rɛle aze na yɛsi abotane zɛhae a, ɔkile kɛ yɛle Keleseɛnema mɔɔ yɛnyi, na ɔda yɛ mediemalɔlɛ mɔɔ yɛlɛ yɛmaa awie ko biala la ali.—Dwɔn 13:35.
◼ Tiefi: Yɛsɛlɛ kɛ nyianu ne ɛlɛkɔ zo a mmamaa ɛ mra adenle ɛmaa bɛduolua nu mgbane mgbane bɛkɔ tiefi ne azo. Saa ɔwɔ kɛ ngakula kɔ tiefi ne azo a, bɔ mɔdenle nea kɛ bɛ nee kpanyinli anzɛɛ bɛ diema kpanyinli bahɔ.
◼ Please Follow Up Kɛlata: Saa bɛdi awie daselɛ wɔ nyianu mekɛ ne anu na ɔ nye die nwolɛ a, bɛva Please Follow Up (S-43) ne na bɛli nwolɛ gyima bɛmaa ye. Bɛbahola bɛava ngɛlata ne mɔɔ bɛhɛlɛ zolɛ bɛwie la bɛahɔ Bulukulielɛ Ɛleka ne anzɛɛ bɛava bɛamaa bɛ asafo ne anu kɛlɛhɛlɛvolɛ ne wɔ mekɛ mɔɔ bɛkɛzia bɛkɛhɔ sua nu la.
◼ Aleɛlilɛleka: Da subane kpalɛ ali wɔ aleɛlilɛleka fa wula Gyihova anyunlunyia. Siezie ɛ nwo kɛ ɛle Keleseɛnenli la. Saa ɔwɔ kɛ ɛkyɛ awie debie a yɛ zɔ.
◼ Dabelɛ:
Saa ɛwɔ sua mɔɔ ɛbadua nwolɛ kakɛ la anu a, ɛ nee menli dodo mɔɔ bo zolɛ la mmada nu.
Saa ɛwɔ awie mɔ sua nu a, suzu ninyɛne nwo ɔlua ɛ nwo mɔɔ ɛbayɛ ye bɔkɔbɔkɔ, wɔayɛ wɔ ninyɛne pɛpɛɛpɛ na wɔahile debie biala mɔɔ bɛbava bɛamaa wɔ la anwo anyezɔlɛ la azo.
Ɔnle kɛ mediema mrenya nee mraalɛ da sua ko anu kyesɛ bɛle abusua ko.
Mmato aleɛ wɔ sua mɔɔ bɛndo aleɛ wɔ nu la anu.
Amaa wɔali ɛ nwo eni la, ɔnle kɛ ɛbia alie nwo.Saa ɔkɛyɛ boɛ a ɔwɔ kɛ bɛfa ɛkpa anzɛɛ ɛdanlɛ bɛyɛ abialeɛ.
Kɛmɔ yɛle Keleseɛnema la ati, yɛngulo kɛ yɛfa ngyehyɛleɛ biala mɔɔ bɛyɛ bɛmaa nyɛvolɛ la yɛdi gyima wɔ adenle ɛtane zo.
Da sunsum ne ma ne ali wɔ kɛzi ɛ nee menli mɔɔ yɛ gyima wɔ hotɛle anzɛɛ mbusua mɔɔ ɛ nee bɛ de bayɛ ninyɛne la anu.
Ɔwɔ kɛ awovolɛ maa bɛ nye kɔ bɛ mra nwo zo mekɛ biala wɔ hotɛle ɛkɛ anzɛɛ ɛleka mɔɔ bɛnyianle dabelɛ la.
Saa edwɛkɛ ba wɔ dabelɛ anzɛɛ hotɛle sua ne anwo a, nea kɛ ɛbabɔ Rooming Department ne amaneɛ wɔ nyianu ne abo.
◼ Tunwomaa Gyima: Saa awie kulo kɛ ɔtu ɔ nwo ɔmaa a ɔwɔ kɛ ɔkɔ Tunwomaa Gyima Ɛleka ne mɔɔ wɔ nyianu ne abo la. Ngakula mɔɔ bɛtɛdwule ɛvolɛ 16 la noko bahola ayɛ gyima kɛnlɛma wɔ mekɛ mɔɔ bɛ awovolɛ anzɛɛ awie mɔɔ nea bɛ anzɛɛ kpanyinli bie mɔɔ bɛkpa ye ɛlɛnea bɛ nwo zo la. Ɔwɔ kɛ menli mɔɔ nea gyima ngakyile ne mɔ azo la dua maanzinli ne tunwomaa ngyehyɛleɛ ne azo kpondɛ menli mɔɔ baboa bɛ la kolaa na nyianu ne abɔ ɔ bo.