“Boɔboa Menli Ne Anloa”
1. Adenle boni azo a Yizilayɛma nyianu mɔɔ hyia mɔɔ bɛyɛle wɔ mekɛ mɔɔ bɛvile Yigyibiti la anzi mekɛ ekyi anu la nee maangyeba yɛɛ maanle maanle avinli nyianu ne mɔ le ko ɛ?
1 Bɛvile Yigyibiti la anzi mekɛ ekyi bie anu, Gyihova hanle hilele Mosisi kɛ ‘ɔboɔboa menli ne anloa’ wɔ Saenae Boka ne anwo ɔmaa bɛdie Ye edwɛkɛ amaa bɛazulo Ye na bɛava bɛahilehile bɛ mra. (Mɛla 4:10-13) Nea kɛzi ɔbayɛ kɛ bɛhakyele zɔhane mekɛ ne mɔɔ manle bɛnyianle diedi kpole la! Siane ekyi mɔɔ ɛlɛba la anu, Gyihova menli bayia wɔ maangyeba nee maanle maanle avinli nyianu bo bɛamaa Gyihova ahilehile bɛ. Duzu a ɔwɔ kɛ yɛyɛ na yeaboa yɛ kpalɛ a?
2. Duzu a ɔwɔ kɛ yɛyɛ na ‘yɛaboɔboa yɛ nwo’ yɛamaa yɛ nyianu ne a?
2 “Bɛboɔboa Bɛ Nwo”: Gyihova hanle hilele Yizilayɛma kɛ “bɛboɔboa bɛ nwo” bɛmaa zɔhane nyianu titile ne wɔ Saenae Boka ne abo. (Ade. 19:10, 11) Zɔhane ala a, ɔhyia kɛ awie biala mɔɔ bahɔ nyianu ne mɔ bie la siezie ɔ nwo a, na tɛ menli mɔɔ lɛ gyimalilɛ la angome. Kɛ neazo la, ɔhyia kɛ menli dɔɔnwo yɛ ngyehyɛleɛ na bɛsɛlɛ mekɛ bɛfi gyima nu. Bie a wɔ edwɛkɛ ɛdeɛ ne le kɛ Nihɛmaya ɛdeɛ ne la. Ɛnee ɔkpondɛ kɛ ɔgyakyi ye gyima mɔɔ ɔyɛ kɛ awie mɔɔ su nza maa Belemgbunli Atazɛzɛse la amaa yeahɔ Gyɛlusalɛm na yeaboa yeamaa bɛayɛ bane ne boɛ, noko ɛnee ɔze kɛ bie a belemgbunli ne ɛnrɛkponle zo. Nihɛmaya yɛle asɔne na ɔvale ye edwɛkɛ ne mɔɔ yeziezie ye kɛnlɛma la ɔdole ɔ nyunlu. Belemgbunli ne manle ɔhɔle na bɔbɔ ɔboale gyima mɔɔ bɛlɛyɛ la! (Nih. 2:1-9) Saa wɔzɛlɛ mekɛ wɔvi wɔ gyimamenle ɛkɛ a, eza wɔyɛ wɔ adendulɛ nee dabelɛ nwo ngyehyɛleɛ wɔwie ɔ? Mgbanyima ne mɔ bava anyelielɛ aboa awie biala mɔɔ ɔhyia moalɛ la. Siezie ɛ nwo kɛ ɛbadwu ɛkɛ ne ndɛ na bɛabɔ foa biala abo, na nea kɛ ‘ɛbava wɔ adwenle wɔazie edwɛkɛ’ mɔɔ ɛbade la azo kpalɛ.—Hib. 2:1.
3. Duzu a baboa yeamaa yɛaziezie yɛ ahonle yɛamaa nyianu ne a?
3 Debie bieko mɔɔ hyia mɔɔ yɛyɛ a ɔkile kɛ yɛboɔboa yɛ nwo la a le kɛ yɛbaziezie yɛ ahonle amaa yɛadie na yɛazukoa. (Ɛzela 7:10) Bɛbalumua bɛava nyianu ngyehyɛleɛ ne bɛado jw.org Intanɛte gyimalilɛleka ne na ɔbahile edwɛkɛtile ne amuala nee ko biala anwo ngɛlɛlera titile ko anzɛɛ nwiɔ. Ɛhye bamaa yɛanyia debie kpalɛ mɔɔ yɛbava yɛayɛ yɛ Abusua Ɛzonlenlɛ wɔ dapɛne ne mɔ mɔɔ li yɛ nyianu ne anyunlu la anu. Nolobɔlɛma bie mɔ printe nyianu ngyehyɛleɛ ne na bɛkɛlɛ debie wɔ zolɛ wɔ nyianu mekɛ ne anu.
4. Kɛzi awovolɛ bahola ava nyianu ne ahilehile bɛ mra ɛ?
4 ‘Bɛhilehile Bɛ Mra’: Nyianu ne mɔɔ bɛyɛle ye wɔ Saenae Boka ne abo la bodane ko a le kɛ ɔbamaa Yizilayɛ awovolɛ ‘ahilehile bɛ mra.’ (Mɛla 4:10) Nyianu ne maa awovolɛ nyia adenle kɛnlɛma yɛ zɔhane ala. Ɔwɔ kɛ awovolɛ maa bɛ mra tɛnla bɛ nwo ɛkɛ wɔ foa biala anu na bɛboa bɛ bɛmaa bɛtie edwɛkɛ ne. Yɛkpɔne kenle ko biala yɛɛ nzinlii bɛlɛyɛ abusua ɛzonlenlɛ a, mbusua bahola abɔ nu azuzu nyianu ne anwo.
5. Kɛzi yɛkɔ nyianu ne mɔɔ ɛlɛba la bie a, ɔbaboa yɛ ɛ?
5 Nyianu mɔɔ hyia mɔɔ bɛyɛle wɔ Saenae Boka ne abo la boale Yizilayɛma manle bɛnyianle anyezɔlɛ wɔ adenle kɛnlɛma mɔɔ bɛlɛ kɛ Nyamenle menli la anwo. (Mɛla 4:7, 8) Bɛziezie yɛ nyianu ne mɔɔ ɛlɛba la kɛ ɔboa yɛ wɔ adenle ko ne ala azo. Yɛbava kenle nsa yɛavi Seetan ewiade ɛsɛlɛ ɛsesebɛ ne azo na yɛanyia sunsum nu anyelielɛ nee agɔnwolɛvalɛ mɔɔ maa anwosesebɛ la wɔ yɛ sunsum nu paladaese ne anu. (Aye. 35:7-9) Mekɛ mɔɔ Gyihova kenle ne ɛlɛbikye la, ɔrɛla ye kɛ yɛnrɛgyakyi kɛ yɛbayia nu na yɛamaa yɛ nwo anwosesebɛ!—Hib. 10:24, 25.