Yɛ Bokavolɛ Mɔɔ Boa Wɔ Daselɛlilɛ Nu La
1. Kɛ ɔkɛyɛ na yɛazukoa ɛzoanvolɛ Pɔɔlo subane ne wɔ mekɛ mɔɔ yɛ nee awie mɔ lua wɔ daselɛlilɛ nu la ɛ?
1 Ɛzoanvolɛ Pɔɔlo bule mekɛ mɔɔ ɔnyianle na ɔ nee ɔ gɔnwo mɔ diedima luale la kɛ ‘bɛ diedi bamaa ye anwosesebɛ, yɛɛ ye diedi bamaa bɛ diedi anyi.’ (Wulo. 1:12) Saa ɛ nee awie kɔ daselɛlilɛ a, asoo ɛfa mekɛ ɛhye ɛmaa ye anwosesebɛ na ɛboa ye? Kɛ anrɛɛ ɛbayɛ koonwu ɛ nee ye alua la, duzu ati a ɛnga debie mɔɔ boa wɔ maa ɛbɔ mɔdenle wɔ daselɛlilɛ nu la anwo edwɛkɛ ɛngile ye a?
2. Duzu a yɛbahola yɛayɛ na ahenle mɔɔ yɛ nee ye lua wɔ daselɛlilɛ nu la anyia anwodozo a, na kɛmɔti a nwolɛ hyia ɛ?
2 Maa Ɔnyia Anwodozo: Nolobɔlɛma bie mɔ ɛnlɛ anwodozo, na ɛhye da ali wɔ bɛ nyunlu anzɛɛ bɛ ne mɔɔ bɛfa bɛtendɛ la anu. Yɛbahola yɛahanvo bɛ kɛnlɛma yeamaa bɛanyia anwodozo. Ndenle boni bieko a yɛbahola yɛalua zo yɛamaa bɛanyia anwodozo a? Neavolɛ adenduvo ko ka ɛzulolɛ mɔɔ ka ye nee kɛzi ɔta ɔyɛ nwolɛ asɔne amaa yeahola yeali zolɛ konim la anwo edwɛkɛ wienyi kile ahenle mɔɔ ɔ nee ye lua la. Adiema nrenya ko hanle mɔɔ boa ye maa ɔnyia anwodozo la anwo edwɛkɛ kɛ: “Mesele na meava meabɔ ɔ bo. Ɔdwu mekɛ ne bie a ɔwɔ kɛ meyɛ asɔne mesɛlɛ moalɛ amaa meahola meayɛ deɛ sikalɛ zɔhane.” Debie ɛboa wɔ ɛmaa wɔnyia anwodozo kpole wɔ daselɛlilɛ nu ɔ? Ka nwolɛ edwɛkɛ kile ahenle mɔɔ ɛ nee ye lua wɔ daselɛlilɛ nu la.
3. Duzu a yɛbahola yɛaha nwolɛ edwɛkɛ yɛahile yɛ bokavolɛ ne na yeaboa ye yeamaa yeabɔ mɔdenle wɔ daselɛlilɛ nu a?
3 Ka Kɛzi Ɛyɛ Wɔ Ɛdeɛ La Kile Ye: Ɛlɛ edwɛkɛ anzɛɛ kpuyia sikalɛ bie, mɔɔ fane edwɛkɛ bie mɔɔ ɛzi wɔ bɛ ɛkɛ ne, mɔɔ ɛfa ɛbuke edwɛkɛ nye a ɔboa kpalɛ ɔ? Wɔva edwɛkɛ bie wɔboka edwɛkɛ mɔɔ yɛbaha la neazo ne anwo na debie kpalɛ ɛvi nu ɛra ɔ? Ka nwolɛ edwɛkɛ kile wɔ bokavolɛ ne. (Mrɛ. 27:17) Saa ɛkayɛ sia kɔkpɔla a, ɛbahola wɔaha bodane mɔɔ ɔti ɛlɛkɔ nee kɛzi ɛbali nwolɛ gyima la anwo edwɛkɛ wɔahile ye. Ɛyɛ Baebolo ɛzukoalɛ bie ɛwie a, ɛbahola wɔahile ye deɛmɔti ɛvale edwɛkɛ bie, ngɛlɛlera anzɛɛ ɛluale adenle bie azo ɛlile sukoavo ne ngyianlɛ nwo gyima la wɔahile ye.
4. Duzu ati a ɔwɔ kɛ yɛfa anyelielɛ yɛboa yɛ gɔnwo mɔ wɔ daselɛlilɛ nu a?
4 Ɛvoya ne mɔɔ lumua la anu edwɛkpakavolɛma anyɛ kɛ bɛboa menli mɔɔ bɛnle diedima la ala. Bɛnwunle kɛ ɔhyia noko kɛ bɛmaa bɛ nwo anwosesebɛ. (Gyi. 11:23; 15:32) Ɛzoanvolɛ Pɔɔlo tetele kpavolɛ Temɔte na akee ɔmanle ye anwosesebɛ kɛ ɔha mɔɔ yezukoa la anwo edwɛkɛ ɔhile awie mɔ. (2 Tem. 2:2) Saa yɛ rɛle anvi kɛ yɛkɛyɛ yɛ mediema Keleseɛnema kpalɛ wɔ daselɛlilɛ nu a, ɔmaa bɛ nye die kpole na bɛbɔ mɔdenle na eza ɔmaa yɛ anwuma Selɛ ne anye die.—Hib. 13:15, 16.