Ndenle Nnu Mɔɔ Bɛdua Zo Bɛkpondɛ Baebolo Ɛzukoalɛ La
1. Saa ɔyɛ se kɛ yɛkɛnyia Baebolo ɛzukoalɛ wɔ yɛ azɛlɛsinli ne anu a, boni a ɔwɔ kɛ yɛyɛ a, na duzu ati ɔ?
1 Ɔyɛ se kɛ ɛbanyia awie mɔɔ ɛ nee ye bazukoa Baebolo ne la ɔ? Kɔ zo bɔ mɔdenle. Gyihova yila menli mɔɔ bɛngyakyi ye ɛhulolɛdeɛ ɛyɛlɛ la. (Gal. 6:9) Nzuzulɛ nnu mɔɔ doa zo la baboa wɔ.
2. Kɛzi yɛbahola yɛabiza menli na yɛ nee bɛ abɔ Baebolo ɛzukoalɛ bo ɛ?
2 Biza Bɛ: Menli dɔɔnwo ze kɛ yɛfa Ɛzinzalɛ Arane nee Awake! yɛmaa, noko bie a bɛnze kɛ yɛ nee menli yɛ Baebolo ɛzukoalɛ. Duzu ati a ɛmbiza bɛ wɔ mekɛ mɔɔ ɛlɛkɔ azua nu la ɛ? Eza ɛbahola wɔabiza anyelielɛma mɔɔ ɛkɔ bɛ ɛkɛ la saa bɛ nye balie Baebolo ɛzukoalɛ nwo a. Saa bɛngulo a, ɛbahola wɔahɔ zo wɔamaa bɛ mbuluku na wɔamaa bɛ anyelielɛ ne ayɛ kpole. Ɛnee adiema nrenya ko kɔmaa agyalɛma bie magazine wɔ ɛvolɛ dɔɔnwo anu. Mekɛ bie mɔɔ ɔvale magazine fofolɛ mɔɔ ɛra ɔhɔmanle bɛ la, ɔyɛle kɛ ɔkɔ, noko ɔhakyele na ɔbizale bɛ kɛ: “Bɛkulo Baebolo ɛzukoalɛ ɔ?” Bɛbuale kɛ ɛhɛe la ɔzinle ɔ nwo. Kɛkala bɛzɔne bɛ.
3. Asoo ɔwɔ kɛ yɛnyia adwenle kɛ menli mɔɔ ba debiezukoalɛ la nee awie ɛlɛsukoa Baebolo ne? Kilehile nu.
3 Menli Mɔɔ Ba Debiezukoalɛ La: Mmadwenle kɛ anyelielɛma mɔɔ ba debiezukoalɛ la nee awie sukoa Baebolo ne. Adiema nrenya ko bɔ amaneɛ kɛ: “Menli mɔɔ me nee bɛ sukoa debie la anu foa ko le mɔɔ membizale bɛ wɔ debiezukoalɛ bo.” Adiema raalɛ ko zile kpɔkɛ kɛ ɔ nee raalɛ bie mɔɔ se nyiane mɔɔ bɛzɔne ɔ mra mraalɛ wɔ asafo ne anu la badendɛ. Ɛnee raalɛ ne ɛhɔ debiezukoalɛ kɛyɛ ɛvolɛ 15 na dahuu ɔba Belemgbunlililɛ Asalo ɛkɛ wɔ mekɛ mɔɔ bɛkɛbɔ debiezukoalɛ bo la noko kɛ bɛkpɔne la ɛnee yevi ɛkɛ. Raalɛ ne kponlenle zo kɛ bɛ nee ye ɛzukoa na ɔrale nɔhalɛ ne anu. Adiema raalɛ ne hɛlɛle kɛ: “Ɔyɛ me nyane kɛ mengendɛle ɛvolɛ 15 na meabiza kɛ ɔ nye balie debiezukoalɛ nwo a!”
4. Kɛ ɔkɛyɛ na bɛahanvo awie bɛamaa yɛ nee ye azukoa ɛ?
4 Menli Mɔɔ Bɛkanvo Bɛ Bɛkile: Adiema raalɛ ko bɔ mɔdenle nee awie mɔ kɔyɛ bɛ Baebolo ɛzukoalɛ. Bɛsukoa debie bɛwie a, ɔsɛlɛ kilehilevolɛ ne adenle na ɔbiza sukoavo ne saa ɔze awie mɔ mɔɔ bɛ nye balie kɛ bɛ nee bɛ bazukoa debie la a. Saa ɛlɛfa Baebolo ne Kilehile buluku ne wɔamaa awie mɔɔ ɛkɔkpɔla ye la a, ɛbahola wɔabiza ye kɛ: “Ɛze awie bieko mɔɔ ɔ nye balie kɛ ɔbanyia ko ɔ?” Ɔyɛ a tɛnlabelɛ bie ɛmmaa nolobɔlɛma nee adekpakyelɛma nee awie mɔɔ bɛ nee ye kɛyia wɔ azɛlɛsinli ne anu la ɛngola ɛnyɛ debiezukoalɛ. Yemɔti maa awie mɔ ɛnwu kɛ wɔziezie ɛ nwo kɛ ɛbayɛ Baebolo ɛzukoalɛ.
5. Duzu ati a yɛbahola yɛabiza asafo ne anu amra bokavolɛma mɔɔ bɛnle mediema la kɛ bɛbazukoa debie a?
5 Bokavolɛma Mɔɔ Bɛnle Mediema: Nolobɔlɛma mɔɔ bɛ bokavolɛma ɛnle mediema la wɔ asafo ne anu ɔ? Menli mɔɔ bɛnle mediema la bie mɔ kpo kɛ bɛ nee bɛ Keleseɛne bokavolɛ ne kɛha Baebolo ne anwo edwɛkɛ, noko bɛkponle zo na bɛmaa awie mɔɔ ɔnle abusua ne anu la nee bɛ sukoa. Ɔle kpalɛ kɛ ɛbalumua ɛ nee kunli anzɛɛ yelɛ ne mɔɔ le adiema la azuzu nwolɛ amaa wɔanwu adenle kpalɛ mɔɔ ɔwɔ kɛ ɛdua zo la.
6. Kɛzi asɔneyɛlɛ boa wɔ mekɛ mɔɔ yɛlɛkpondɛ Baebolo ɛzukoalɛ la ɛ?
6 Asɔneyɛlɛ: Mmabu tumi mɔɔ wɔ asɔneyɛlɛ nu la debie ekyi. (Gye. 5:16) Gyihova ɛbɔ ɛwɔkɛ kɛ yɛdua ye ɛhulolɛ zo yɛbiza ye debie biala a ɔbadie yɛ. (1 Dwɔn 5:14) Adiema nrenya ko mɔɔ ɔnlɛ alagye la bɔle ɔ bo yɛle Baebolo ɛzukoalɛ nwo asɔne. Ɛnee ɔsi ɔ ye anwo kɛ ɔ hu banyia mekɛ amaa sukoavo bie a, titile sukoavo mɔɔ lɛ ngyegyelɛ dɔɔnwo la. Ɛhye ati ɔvale ngyegyelɛ ɛhye ɔdole Gyihova anyunlu wɔ mekɛ mɔɔ ɛnee ɔlɛsɛlɛ kɛ ɔboa ɔmaa ɔ hu ɛnyia awie ɔ nee ye ɛzukoa debie la. Kɛyɛ dapɛne nwiɔ anzi bɛnyianle bɛ asɔneyɛlɛ ne nwo mualɛ wɔ mekɛ mɔɔ adekpakyelɛnli bie mɔɔ wɔ asafo ne anu la nyianle nrenya bie mɔɔ kulo kɛ ɔsukoa debie na ɔvale ɔmanle adiema nrenya ne la. Ɔ ye se: “Awie biala mɔɔ te nganeɛ kɛ Baebolo ɛzukoalɛ yɛ se maa ye la, meka meahile ye kɛ: Ka nwolɛ edwɛkɛ fɔɔnwo wɔ asɔneyɛlɛ nu, na mmagyakyi nwolɛ asɔneyɛlɛ. Yɛ nye ɛlie kpole ɛdɛla biala.” Saa ɛbɔ mɔdenle a, ɛdawɔ noko ɛbahola wɔanyia Baebolo ɛzukoalɛ na ɛ nye alie kɛ wɔboa awie wɔmaa yeva ‘adenle ne mɔɔ kɔ ngoane nu la azo a.’—Mat. 7:13, 14.