Kɛzi Wɔ Daselɛlilɛ Ekpunli Ne Baboa Wɔ La
1. Asafo Buluku Ɛzukoalɛ ngyehyɛleɛ ne azo nvasoɛ boni mɔ a tɛbɔ ɛkɛ wɔ yɛ daselɛlilɛ ekpunli ne anu a?
1 Asoo ɛkakye Asafo Buluku Ɛzukoalɛ ne anu ninyɛne bie mɔ? Ɛnee ekpunli ne mɔ le ngyikyi mɔɔ ɔmmaa bɛ ahonle ɛndu a. Ɛnee ɛhye ɛmmaa ɔnyɛ se kɛ yɛbanyia agɔnwolɛvalɛ mɔɔ maa diedi nu mia la. (Mrɛ. 18:24) Ɛnee buluku ɛzukoalɛ zo neavolɛ ne nwu yɛ nuhua ko biala ngyegyelɛ na ɔmaa yɛ anwosesebɛ. (Mrɛ. 27:23; 1 Pita 5:2, 3) Nvasoɛ ɛhye mɔ tɛbɔ ɛkɛ wɔ yɛ daselɛlilɛ ekpunli ne anu.
2. Kɛ ɔkɛyɛ na yɛalumua yɛanyia agɔnwolɛvalɛ mɔɔ maa sunsum nu anwosesebɛ la wɔ yɛ daselɛlilɛ ekpunli ne anu ɛ?
2 Dumua Boa Bɛ: Bɛyɛ daselɛlilɛ ekpunli ne ekyi kɛmɔ ɛnee bɛyɛ buluku ɛzukoalɛ ne la. Saa yɛ nee awie mɔ kɔ daselɛlilɛ “kɛ menli mɔɔ wɔ afoa” la a, yɛbahola yɛanyia agɔnwolɛvalɛ mɔɔ anu yɛ se la. (Fel. 1:27) Menli nyɛ a ɛ nee bɛ ɛhɔ daselɛlilɛ wɔ wɔ ekpunli ne anu a? Ɛbahola ‘wɔabuke wɔ munli nu’ wɔ ɛhye anwo ɔ? (2 Kɔl. 6:13) Bieko, ɔyɛ a yɛbahola yɛado ɛsalɛ yɛavɛlɛ awie mɔɔ wɔ yɛ ekpunli ne anu la yɛamaa yeaboka yɛ nɔsolɛ Abusua Ɛzonlenlɛ ne anwo anzɛɛ yɛ nee ye ali debie. Wɔ Asafo bie mɔ anu, daselɛlilɛ ekpunli mɔɔ ɔkɛdwu ɔ nwo zo la to aleɛ maa tendɛvolɛ mɔɔ barakpɔla bɛ asafo ne la. Wɔ zɔhane dapɛne ne mɔɔ ɔkɛdwu bɛ nwo zo la anu, saa tendɛvolɛ ne ɛnrɛhola bie kɔ bɔbɔ a, ekpunli ne bɔ nu di debie na bɛmaa bɛ nwo anwosesebɛ.
3. Adenlenyianlɛ boni mɔ a bamaa yɛanyia anwosesebɛmanlɛ wɔ yɛ daselɛlilɛ ekpunli ne anu a?
3 Ɔwɔ nuhua kɛ ɛnɛ yɛyia nu fane nwiɔ wɔ dapɛne biala anu ɛdeɛ, noko ɛhye ɛngile kɛ ɔwɔ kɛ bɛgyakyi nolobɔlɛma ɛkpɔlalɛ. Bɛkpa ekpunli zo neavolɛma wɔ ekpunli biala anu kɛ bɛva anwosesebɛmanlɛ bɛmaa awie biala na bɛtete bɛ wɔ daselɛlilɛ nu. Saa wɔ ekpunli zo neavolɛ ne ɛtɛyɛle ngyehyɛleɛ kɛ ɔ nee wɔ bahɔ daselɛlilɛ a, duzu ati a ɛnga nwolɛ edwɛkɛ ɛngile ye a? Bieko, ɛzonlenlɛ gyima zo neavolɛ ne yɛ ngyehyɛleɛ na ɔ nee ekpunli ko kɔ daselɛlilɛ dapɛne awieleɛ wɔ siane biala anu. Wɔ asafo ekyi mɔɔ bɛnlɛ daselɛlilɛ ekpunli dɔɔnwo la anu, ɔbahola yeayɛ ngyehyɛleɛ na yeakpɔla ekpunli ko biala fane nwiɔ wɔ ɛvolɛ ne anu. Ɛyɛ ngyehyɛleɛ ɛkɔ daselɛlilɛ wɔ mekɛ mɔɔ ɔbarakpɔla bɛ ekpunli ne la ɔ?
4. (a) Kɛzi bɛyɛ daselɛlilɛ nyianu ne anwo ngyehyɛleɛ ɛ? (b) Kɛmɔti a ɔwɔ kɛ yɛsuzu nwo kɛ yɛbamaa bɛayɛ daselɛlilɛ nyianu wɔ yɛ sua nu ɛ?
4 Ɔle kpalɛ kɛ ekpunli ko biala bayia wɔ ɛleka gyɛne ahɔ daselɛlilɛ dapɛne awieleɛ. Saa bɛyia ɛleka ngakyile wɔ mekɛ ko ne ala a, ɔbamaa nolobɔlɛma mɔɔ vi moa la ahola ahɔ ɛleka mɔɔ bɛbayia la na bɛahɔ azɛlɛsinli ne anu. Ɔwɔ kɛ bɛkyɛ nolobɔlɛma ndɛndɛ bɛmaa bɛkɔ azɛlɛsinli ne anu mɔɔ bɛnzɛkye mekɛ a. Eza ɔnyɛ se kɛ ekpunli zo neavolɛ ne bamaa ɔ nye ahɔ bɛdabɛ mɔɔ bɛwɔ ye ekpunli ne anu la anwo zo. Noko akee, tɛnlabelɛ bie bahola amaa ekpunli nwiɔ anzɛɛ mɔɔ bo zɔ la ahola abɔ nu ayia. Saa asafo ne amuala yia nu kɛ bɛkɔ daselɛlilɛ wɔ Folɛ mɔɔ lumua wɔ siane ne anu anzɛɛ bɛyɛ Ɛzinzalɛ Arane Ɛzukoalɛ ne bɛwie a, ɔle kpalɛ kɛ bɛmaa ekpunli ko biala anu amra tɛnla ɛleka ko na bɛmaa ekpunli zo neavolɛ ne mekɛ ekyi ɔfa ɔkyehyɛ menli mɔɔ wɔ ye ekpunli ne anu la kolaa na bɛayɛ asɔne.—Nea ɛlɛka ne mɔɔ se, “Ɛbamaa Bɛayia Wɔ Sua Nu Ɔ?”
5. Asafo Buluku Ɛzukoalɛ ngyehyɛleɛ ne ɛpɛ nu ɛdeɛ, noko duzu a yɛbahola yɛanyia anwodozo wɔ nu a?
5 Asafo Buluku Ɛzukoalɛ ngyehyɛleɛ ne ɛpɛ nu ɛdeɛ, noko Gyihova kɔ zo maa yɛ sa ka debie biala mɔɔ yɛhyia na yɛayɛ ye ɛhulolɛdeɛ la. (Hib. 13:20, 21) Gyihova nea yɛ la ati, yɛngyia ɛhwee. (Edw. 23:1) Yɛnyia nyilalɛ dɔɔnwo wɔ yɛ daselɛlilɛ ekpunli ne azo. Saa yɛbɔ mɔdenle ‘yɛdua dɔɔnwo a, yɛbabu dɔɔnwo.’—2 Kɔl. 9:6.
[Ɛlɛka wɔ mukelɛ 6]
Ɛbamaa Bɛayia Wɔ Sua Nu Ɔ?
Asafo bie mɔ ka bɛ ekpunli ne mɔ bɔ nu ɔluakɛ bɛnlɛ ɛleka dɔɔnwo mɔɔ bɛyia la ati. Daselɛlilɛ nyianu boka asafo ngyehyɛleɛ ne anwo, yemɔti saa yɛmaa bɛyɛ ye wɔ yɛ sua nu a ɔle nwolɛ adenle kpole. Ɛbahola wɔamaa bɛayɛ ye wɔ wɔ sua nu ɔ? Mmadwenle kɛ wɔ sua nu ɛnle kɛnlɛma la ati ɛnrɛmaa bɛnrɛyia ɛkɛ. Mgbanyima ne mɔ bazuzu ninyɛne bie mɔ anwo kolaa na bɛamaa adenle kɛmɔ ɛnee bɛyɛ buluku ɛzukoalɛ ne wɔ ɛleka ngakyile la. Saa ɛkulo kɛ ɛmaa bɛyia wɔ sua nu a, ka kile wɔ ekpunli zo neavolɛ ne.