Kɛzi Asafo Ne Baboa Baebolo Sukoavoma Bɛamaa Bɛafɛta Ɛzɔnenlɛ La

1-2. Nwane a bahola aboa Baebolo sukoavo bie yeamaa yeafɛta ɛzɔnenlɛ a?

AMY mɔɔ de Fiji la hanle kɛ: “Ɛnee me nye die mɔɔ melɛsukoa ye wɔ Baebolo ne anu la anwo. Ɛnee meze kɛ nɔhalɛ ne ɛne. Noko mɔɔ membɔle ɔ bo kɛ me nee mediema ne mɔ tu la yɛɛ mengolale menyɛle nzenzaleɛ na bɛzɔnenle me a.” Amy anwubielɛ ne maa yɛnwu nɔhalɛ titili ɛhye: Saa Baebolo sukoavo bie nyia moalɛ fi menli gyɛne mɔɔ wɔ asafo ne anu la ɛkɛ a, ɔmaa ɔnyia anyuhɔlɛ ndɛndɛ na bɛsɔne ye.

² Nolobɔlɛnli biala bahola aboa awie mɔ yeamaa bɛara asafo ne anu. (Ɛfɛ. 4:16) Adiema raalɛ adekpakyelɛnli bie mɔɔ bɛfɛlɛ ye Leilani mɔɔ de Vanuatu la hanle kɛ: “Bɛbu ɛrɛlɛ bie kɛ, saa bɛwo kakula a, namule ne azo amra amuala a boa maa bɛtete ye a. Mesuzu kɛ zɔhane ala a ɔde wɔ ɛdoavolɛyɛlɛ gyima ne anu a; asafo ne anu amra amuala a boa maa awie ba nɔhalɛ ne anu a.” Kakula bie mbusuafoɔ nee bɛ gɔnwo mɔ yɛɛ ye sukulu kilehilevolɛma amuala a boa maa ɔnyi ɔyɛ kpanyinli kpalɛ a. Mɔɔ bɛyɛ la a le kɛ, bɛmaa kakula ne anwosesebɛ na bɛkilehile ye ninyɛne mɔɔ ɔhyia kɛ ɔyɛ la. Zɔhane ala a nolobɔlɛma bahola adu Baebolo sukoavoma folɛ, bɛamaa bɛ anwosesebɛ, bɛayɛ neazo kpalɛ bɛamaa bɛ na bɛaboa bɛ bɛamaa bɛafɛta ɛzɔnenlɛ a.​—Mrɛ. 15:22.

3. Duzu a yɛsukoa yɛfi edwɛkɛ mɔɔ Ana, David nee Leilani hanle la anu a?

³ Duzu ati a ɔwɔ kɛ nolobɔlɛnli ne mɔɔ ɛlɛyɛ Baebolo ɛzukoalɛ ne la anye die moalɛ mɔɔ nolobɔlɛma gyɛne fa maa ye Baebolo sukoavo ne la anwo a? Yɛ edwɛkɛ bie mɔɔ Ana, adekpakyelɛ titilinli bie mɔɔ wɔ Moldova la hanle la nzonlɛ, “Saa Baebolo sukoavo bie bɔ ɔ bo kɛ ɔnyia anyuhɔlɛ a, ɔyɛ se kɛ sonla ko bahola ali ye ngyianlɛ kɔsɔɔti anwo gyima.” Davidb mɔɔ le adekpakyelɛ titilinli wɔ maanle ko ne ala anu la noko hanle kɛ, “Fane dɔɔnwo ne ala nolobɔlɛma gyɛne ka edwɛkɛ bie mɔɔ ɔka Baebolo sukoavo ne ahonle a, debie mɔɔ bie a anrɛɛ ɔnrɛra me adwenle nu ɛlɛ bɔbɔ la.” Leilani noko hanle kɛ, “Ɛlɔlɛ nee agɔnwolɛvalɛ subane mɔɔ bɛda ye ali bɛkile sukoavo ne la boa maa ɔnwu Gyihova menli ne.”​—Dwɔn 13:35.

4. Duzu a yɛbazuzu nwo wɔ edwɛkɛ ɛhye anu a?

⁴ Noko bie a ɛbabiza kɛ, ‘Kɛ ɔkɛyɛ na meaboa Baebolo sukoavo bie meamaa yeanyia anyuhɔlɛ wɔ mekɛ mɔɔ tɛ medame a me nee ye a sukoa debie la ɛ?’ Maa yɛzuzu mɔɔ ɔwɔ kɛ yɛyɛ wɔ mekɛ mɔɔ awie se yɛhɔzɔho ye yɛmaa ɔyɛ Baebolo ɛzukoalɛ anzɛɛ wɔ mekɛ mɔɔ Baebolo sukoavo ne kɛbɔ ɔ bo kɛ ɔba debiezukoalɛ la anwo. Eza yɛbanwu kɛzi mgbanyima bahola aboa Baebolo sukoavoma bɛamaa bɛanyia anyuhɔlɛ na bɛazɔne bɛ la anwo.

SAA AWIE KA KƐ ƐHƆZƆHO YE ƐMAA ƆYƐ BAEBOLO ƐZUKOALƐ A

5. Saa ɛbahɔzɔho awie wɔamaa yeayɛ Baebolo ɛzukoalɛ a, duzu a ɔwɔ kɛ ɛyɛ a?

⁵ Ɔle kilehilevolɛ ne gyima kɛ ɔbaboa sukoavo ne yeamaa yeade Nyamenle Edwɛkɛ ne abo kpalɛ. Saa kilehilevolɛ ne ka kɛ ɛhɔzɔho ye ɛmaa ɔyɛ a, ɔwɔ kɛ ɛte ɔ bo kɛ ɛkaboa ye. (Nol. 4:9, 10) Saa bɛlɛyɛ Baebolo ɛzukoalɛ ne a, duzu a ɛbahola wɔayɛ wɔaboa a?

6. Saa ɛkazɔho awie wɔamaa yeayɛ ye Baebolo ɛzukoalɛ a, kɛ ɔkɛyɛ na wɔava ngyinlazo mɔɔ wɔ Mrɛlɛbulɛ 20:18 la wɔali gyima ɛ?

⁶ Siezie ɛ nwo maa Baebolo ɛzukoalɛ ne. Mɔɔ limoa, biza kilehilevolɛ ne maa ɔha Baebolo sukoavo ne anwo edwɛkɛ ekyi ɔhile wɔ. (Kenga Mrɛlɛbulɛ 20:18.) Ɛbahola wɔabiza ye kɛ: “Duzu a ɛze ye wɔ Baebolo sukoavo ne anwo a? Edwɛkɛtile boni a bɛbazukoa a? Duzu a ɛkulo kɛ ɔsukoa ɔfi edwɛkɛtile ɛhye anu a? Saa yɛlɛyɛ debiezukoalɛ ne a, ninyɛne bie mɔ wɔ ɛkɛ mɔɔ ɔnle kɛ meyɛ anzɛɛ ɔnle kɛ meka nwolɛ edwɛkɛ ɔ? Moalɛ boni a mebahola meava meamaa sukoavo ne amaa yeamaa ye anwosesebɛ na yeanyia anyuhɔlɛ a?” Nɔhalɛ nu, kilehilevolɛ ne ɛnrɛha sukoavo ne fealeranu edwɛkɛ ɛnrɛhile wɔ, noko mɔɔ ɔbaha yeahile wɔ la baboa kpalɛ. Edwɛkpatɛlɛvolɛ bie mɔɔ bɛfɛlɛ ye Joy la ka ninyɛne ɛhye mɔ anwo edwɛkɛ kile menli mɔɔ kɔsɔho ye maa ɔyɛ Baebolo ɛzukoalɛ la. Ɔhanle kɛ: “Edwɛkɛ ɛhye mɔɔ meka mekile ahenle mɔɔ kazɔho me la maa ɔnyia ɛhulolɛ kɛ ɔbaboa sukoavo ne, na ɔmaa ɔsuzu mɔɔ yɛkɔ a ɔbaha la anwo.”

7. Saa ɛkazɔho awie wɔamaa yeayɛ Baebolo ɛzukoalɛ a, duzu ati a ɔwɔ kɛ ɛdawɔ noko ɛsiezie ɛ nwo a?

⁷ Saa ɛkazɔho awie wɔamaa yeayɛ ye Baebolo ɛzukoalɛ a, ɔbayɛ kpalɛ kɛ ɛbalimoa wɔazukoa edwɛkɛtile ne mɔɔ bɛkazuzu nwo la. (Ɛzela 7:10) Adiema David mɔɔ yɛlimoa yɛha ɔ nwo edwɛkɛ la hanle kɛ: “Saa ahenle mɔɔ kazɔho me la dimoa siezie ɔ nwo maa debiezukoalɛ ne a, me nye die nwo kpalɛ. Yemɔ maa ɔka edwɛkɛ mɔɔ ɔbaboa sukoavo ne la.” Bieko, sukoavo ne banwu kɛ bɛ mu nwiɔ bɛzieziele bɛ nwo kpalɛ na ɛhye bayɛ neazo kpalɛ amaa ye. Saa wɔangola wɔanziezie ɛ nwo kpalɛ wɔammaa edwɛkɛtile ne amuala bɔbɔ a, bɔ mɔdenle kɛ ɛbanwu edwɛkɛ titili mɔɔ wɔ debiezukoalɛ ne anu la.

8. Kɛ ɔkɛyɛ na wɔayɛ asɔne mɔɔ ka ahonle la wɔ Baebolo ɛzukoalɛ bo ɛ?

⁸ Asɔneyɛlɛ hyia kpalɛ wɔ Baebolo ɛzukoalɛ nu, ɔti saa nolobɔlɛnli ne ka kɛ ɛbayɛ asɔne a, dimoa dwenle mɔɔ ɛbaha la anwo amaa wɔahola wɔayɛ asɔne mɔɔ ka ahonle. (Edw. 141:2) Hanae mɔɔ de Japan la tɛkakye asɔne mɔɔ adiema raalɛ bie mɔɔ nee ye Baebolo kilehilevolɛ ne rale ye ɛkɛ la yɛle la. Ɔhanle kɛ: “Menwunle kɛ ɔ nee Gyihova lɛ agɔnwolɛvalɛ kyengye na ɛnee mekpondɛ kɛ meyɛ kɛ ɔdaye la. Eza mekɛ mɔɔ ɔbɔle me duma wɔ ye asɔneyɛlɛ ne anu la, mendele nganeɛ kɛ ɔkulo me edwɛkɛ kpalɛ.”

9. Kɛ mɔɔ Gyemise 1:19 kile la, saa bɛlɛyɛ Baebolo ɛzukoalɛ a, duzu a ɛbahola wɔayɛ amaa wɔayɛ boavolɛ kpalɛ a?

⁹ Boa Baebolo kilehilevolɛ ne wɔ mekɛ mɔɔ bɛlɛsukoa debie la. Adiema raalɛ Omamuyovbi mɔɔ le adekpakyelɛ titilinli wɔ Nigeria la hanle kɛ: “Boavolɛ kpalɛ fa ye adwenle di debiezukoalɛ ne anzi. Boavolɛ kpalɛ fa nzuzulɛ mɔɔ baboa sukoavo ne la maa, noko ɔndendɛ dɔɔnwo. Ɔluakɛ ɔze kɛ ɔle kilehilevolɛ ne gyima kɛ ɔbayɛ Baebolo ɛzukoalɛ ne.” Kɛ ɔkɛyɛ na wɔanwu mekɛ mɔɔ ɔwɔ kɛ ɛtendɛ nee mɔɔ ɔwɔ kɛ ɛka la ɛ? (Mrɛ. 25:11) Saa kilehilevolɛ ne nee sukoavo ne ɛlɛtendɛ a tie ye kpalɛ. (Kenga Gyemise 1:19.) Yemɔ a bamaa wɔanwu mekɛ mɔɔ ɔfɛta kɛ ɛtendɛ la a. Noko ɔwɔ kɛ ɛdwenle mɔɔ ɛbaha la anwo kpalɛ kolaa na wɔadendɛ. Kɛ neazo la, ɔnle kɛ ɛtendɛ dɔɔnwo, saa kilehilevolɛ ne ɛlɛkilehile debie bie anu a, ɔnle kɛ ɛpɛ ɔ nloa azo yɛɛ ɔnle kɛ ɛka debie gyɛne anwo edwɛkɛ. Emomu ɛbahola wɔaha edwɛkɛ sikalɛ, wɔayɛ ndonwo anzɛɛ wɔabiza kpuya amaa wɔaboa wɔamaa edwɛkɛ bie mɔɔ ɔlɛkilehile nu la anu ala ɛkɛ ne kpalɛ. Ɔdwu mekɛ ne bie a, ɛbade nganeɛ kɛ ɛnlɛ ɛhwee ɛnga. Noko saa ɛkanvo sukoavo ne na ɛkile ɔ nwo anyelielɛ a, yemɔ baboa ye yeamaa yeanyia anyuhɔlɛ.

10. Kɛzi wɔ anwubielɛ bahola aboa Baebolo sukoavo bie ɛ?

¹⁰ Ka wɔ anwubielɛ kile ye. Saa ɔkɛyɛ boɛ a, ka kɛzi ɛrale nɔhalɛ ne anu, kɛzi ɛholale ɛlile ngyegyelɛ bie azo anzɛɛ kɛzi ɛnwunle Gyihova asa wɔ wɔ ɛbɛlabɔlɛ nu la anwo edwɛkɛ sikalɛ kile sukoavo ne. (Edw. 78:4, 7) Bie a wɔ anwubielɛ ne a le debie mɔɔ sukoavo ne hyia nwolɛ kpalɛ a. Ɔbahola yeamaa ye diedi ne anu ayɛ se anzɛɛ ɔbamaa ye anwosesebɛ yeamaa yeahɔ zo yeanyia anyuhɔlɛ na yeafɛta ɛzɔnenlɛ. Na bie a ɛhye baboa ye yeamaa yeanwu kɛzi ɔbali sɔnea bie mɔɔ ɔlɛyia la azo la. (1 Pita 5:9) Gabriel mɔɔ de Brazil na ɛnɛ ɔle adekpakyelɛnli la kakye mɔɔ boale ye wɔ mekɛ mɔɔ ɔlɛsukoa Baebolo ne la. Ɔhanle kɛ: “Mɔɔ mendele mediema ne mɔ anwubielɛ la, mendele ɔ bo kɛ Gyihova nwu ngyegyelɛ mɔɔ yɛyia la. Na saa bɛholale bɛlile zo a, ɛnee medame noko mebahola meayɛ zɔ.”

SAA BAEBOLO SUKOAVO NE BA DEBIEZUKOALƐ A

11-12. Duzu ati a ɔwɔ kɛ yɛdie Baebolo sukoavo bie mɔɔ ɔbara debiezukoalɛ la kɛnlɛma ɛ?

¹¹ Amaa Baebolo sukoavo bie anyia anyuhɔlɛ na bɛazɔne ye la, ɔwɔ kɛ ɔba debiezukoalɛ dahuu amaa yeanyia zolɛ nvasoɛ. (Hib. 10:24, 25) Bie a ye Baebolo kilehilevolɛ ne a balimoa aha ahile ye yeamaa yeara debiezukoalɛ a. Saa ɔba a, yɛ muala yɛbahola yɛamaa ye anwosesebɛ kɛ ɔhɔ zo ɔrɛla debiezukoalɛ. Kɛ ɔkɛyɛ na yɛahola yɛayɛ zɔ ɛ?

¹² Die sukoavo ne kɛnlɛma. (Wlo. 15:7) Saa sukoavo ne ba debiezukoalɛ na yɛdie ye kɛnlɛma a, bie a ɔbamaa yeahɔ zo yeara. Amaa yeanze nyiane la, soma ye na fa ye kile awie mɔ gyɛne. Mmanyia adwenle kɛ ɔ nee awie a rale a, bie a ye kilehilevolɛ ne ɛtɛbale anzɛɛ ɔlɛyɛ gyima gyɛne wɔ Belemgbunlililɛ Asalo ɛkɛ. Tie edwɛkɛ biala mɔɔ sukoavo ne baha la kpalɛ na maa ɔnwu ye kɛ ɛdwenle ɔ nwo. Saa ɛdie sukoavo bie kɛnlɛma a, kɛzi ɔbaboa ye ɛ? Fa Dmitrii mɔɔ bɛzɔnenle ye la ɛtɛkyɛle na kɛkala ɔsonle kɛ asafo nu sonvolɛ la edwɛkɛ ne kɛ neazo. Ɔhanle mekɛ mɔɔ limoa mɔɔ ɔhɔle debiezukoalɛ la anwo edwɛkɛ kɛ: “Kɛ mɔɔ ɛnee mese nyiane la ati, ɛnee megyi Belemgbunlililɛ Asalo ne anzi, na adiema bie nwunle me na ɔvale me ɔwolole. Menli dɔɔnwo razomanle me. Ɔzinle me nwo kpole. Me nye liele nwo kpalɛ, ɔti ɛnee me kunlu anu a anrɛɛ kenle ko biala yɛbara debiezukoalɛ. Metɛnwunle ɛhye bie ɛlɛ.”

13. Kɛzi wɔ subane kpalɛ bahola aboa Baebolo sukoavo bie ɛ?

¹³ Yɛ neazo kpalɛ. Wɔ subane kpalɛ bahola aboa Baebolo sukoavo bie yeamaa yeanwu kɛ yenwu nɔhalɛ ne. (Mat. 5:16) Adiema nrenyia bie mɔɔ bɛfɛlɛ ye Vitalii mɔɔ kɛkala le adekpakyelɛnli wɔ Moldova la hanle kɛ: “Meneanle kɛzi asafo ne anu amra bɔ bɛ ɛbɛla, kɛzi bɛdwenle ninyɛne nwo nee kɛzi bɛyɛ bɛ nyɛleɛ la. Ɛhye maanle menwunle ye bɔkɔɔ kɛ Gyihova Alasevolɛ a sonle Nyamenle nɔhalɛ nu a.”

14. Kɛzi wɔ neazo bahola aboa awie yeamaa yeahɔ zo yeanyia anyuhɔlɛ ɛ?

¹⁴ Amaa sukoavo ne afɛta ɛzɔnenlɛ la, ɔhyia kɛ ɔfa mɔɔ ɔlɛsukoa la ɔdi gyima. Ɔyɛ a ɛhye ɛyɛlɛ ɛnla aze. Noko saa sukoavo ne nwu kɛzi Baebolo ngyinlazo mɔɔ ɛfa ɛbɔ wɔ ɛbɛla la boa wɔ la a, bie a ɔbahulo kɛ ɔbayɛ mɔɔ ɛlɛyɛ la bie. (1 Kɔl. 11:1) Suzu Hanae mɔɔ yɛlimoa yɛha ɔ nwo edwɛkɛ la anwubielɛ ne anwo. Ɔhanle kɛ: “Ɛnee mediema ne mɔ ɛlɛyɛ ninyɛne mɔɔ ɔwɔ kɛ meyɛ la anwo neazo kpalɛ amaa me. Menwunle kɛzi mebahola meamaa awie mɔ anwosesebɛ, meava ɛtane meahyɛ na meala ɛlɔlɛ ali la. Ɛnee dahuu bɛka awie mɔ anwo edwɛkɛ kpalɛ. Na ɛnee mekpondɛ kɛ mesukoa bɛ.”

15. Kɛzi Mrɛlɛbulɛ 27:17 boa yɛ maa yɛnwu deɛmɔti ɔwɔ kɛ yɛfa Baebolo sukoavo mɔɔ ba debiezukoalɛ dahuu la agɔnwolɛ ɛ?

¹⁵ Fa Baebolo sukoavo ne agɔnwolɛ. Saa Baebolo sukoavo ne ba debiezukoalɛ dahuu a, kɔ zo maa ɔnwu kɛ ɛdwenle ɔ nwo. (Fel. 2:4) Bɔ mɔdenle kɛ ɛbanwu ye kpalɛ. Ɛbahola wɔaha kɛzi ɛ nye die nzenzaleɛ mɔɔ ɔlɛyɛ la anwo edwɛkɛ wɔahile ye. Eza ɛbahola wɔabiza kɛzi ye Baebolo ɛzukoalɛ ne ɛlɛkɔ ye, ye abusua ne nee ye gyima nwo edwɛkɛ. Noko nea boɛ na wɔambiza ye kpuya mɔɔ ɔbamaa ɔ ti azi aze la. Ninyɛne ɛhye mɔ mɔɔ ɛ nee ye babɔ nwolɛ adawu la bamaa bɛabikye bɛ nwo kpalɛ. Saa ɛfa sukoavo ne agɔnwolɛ a, ɛbaboa ye wɔamaa yeanyia anyuhɔlɛ na bɛazɔne ye. (Kenga Mrɛlɛbulɛ 27:17.) Kɛkala Hanae le dahuu adekpakyelɛnli. Ɔhanle mekɛ mɔɔ ɔbɔle ɔ bo kɛ ɔba debiezukoalɛ la anwo edwɛkɛ kɛ: “Mɔɔ melɛnyia agɔnwolɛma wɔ asafo ne anu la, ɛnee me nye ɛlɛdie debiezukoalɛ ɛhɔlɛ nwo, na saa mete nganeɛ kɛ mevɛ bɔbɔ a mekɔ. Saa me nee agɔnwolɛma fofolɛ ɛhye mɔ mɔɔ menyia bɛ la wɔ a, me nye die, na ɛhye boale me maanle mempɛle agɔnwolɛvalɛ mɔɔ me nee menli mɔɔ ɛnzonle Gyihova lɛ la anu. Ɛnee mekpondɛ kɛ mebikye Gyihova nee mediema ne mɔ kpalɛ. Ɔti menzile kpɔkɛ kɛ memaa bɛazɔne me.”

16. Duzu bieko a ɛbahola wɔayɛ wɔaboa Baebolo sukoavo bie wɔamaa ɔ nye alie asafo ne anu a?

¹⁶ Mekɛ mɔɔ sukoavo ne ɛlɛkɔ zo anyia anyuhɔlɛ na ɔlɛyɛ nzenzaleɛ wɔ ye ɛbɛlabɔlɛ nu la, boa ye maa ɔde nganeɛ kɛ ɔboka asafo ne anwo. Amaa wɔahola wɔayɛ ɛhye la, ɛbahola wɔalie ye ɛyɛvolɛ. (Hib. 13:2) Denis mɔɔ ɛlɛsonle wɔ Moldova la hanle mekɛ mɔɔ ɛnee ɔlɛsukoa Baebolo ne la anwo edwɛkɛ kɛ: “Fane dɔɔnwo ne ala, mediema ne mɔ to ɛsalɛ fɛlɛ me nee me ye kɛ yɛrɛla yɛmaa yɛbɔ nu yɛlielie yɛ nye. Bɛhanle kɛzi Gyihova boale bɛ la anwo edwɛkɛ bɛhilele yɛ. Yemɔ maanle yɛ anwosesebɛ. Mekɛ zɔhane mɔ maanle yɛliele yɛdole nu kɛ yɛkpondɛ kɛ yɛsonle Gyihova na saa yɛyɛ zɔ a yɛbanyia asetɛnla kpalɛ kenle bie.” Saa Baebolo sukoavo ne bayɛ nolobɔlɛnli a ɛbahola ɛ nee ye ahɔ daselɛlilɛ. Nolobɔlɛnli bie mɔɔ bɛfɛlɛ ye Diego mɔɔ vi Brazil la hanle kɛ: “Ɛnee mediema dɔɔnwo ka kile me kɛ memaa yɛhɔ daselɛlilɛ. Ɛhye le adenle titili mɔɔ menluale zo menwunle bɛ kpalɛ a. Saa me nee bɛ kɔ a, mesukoa ninyɛne dɔɔnwo na yemɔ maa mebikye Gyihova nee Gyisɛse kpalɛ.”

KƐZI MGBANYIMA BAHOLA ABOA Ɛ?

17. Kɛzi asafo nu mgbanyima bahola aboa Baebolo sukoavoma ɛ?

¹⁷ Bɛnyia mekɛ bɛmaa Baebolo sukoavoma. Asafo nu mgbanyima, saa bɛda ɛlɔlɛ ali bɛkile Baebolo sukoavoma na bɛmaa bɛnwu kɛ bɛdwenle bɛ nwo a, ɔbaboa bɛ yeamaa bɛanyia anyuhɔlɛ na bɛafɛta ɛzɔnenlɛ. Saa Baebolo sukoavoma ba debiezukoalɛ a, bɛbahola bɛ nee bɛ abɔ adawu dahuu ɔ? Saa bɛkakye bɛ duma, titili wɔ mekɛ mɔɔ bɛbabɔ ɔ bo kɛ bɛmaa mualɛ la a, ɔbamaa bɛade nganeɛ kɛ bɛdwenle bɛ nwo. Ɔyɛ a bɛbahola bɛahyehyɛ bɛ mekɛ ne kpalɛ amaa bɛahɔzɔho nolobɔlɛnli bie bɛamaa yeayɛ Baebolo ɛzukoalɛ ɔ? Bie a ɛbahola wɔaboa sukoavo ne kpalɛ wɔadɛla kɛzi ɛsuzu la. Adekpakyelɛnli bie mɔɔ bɛfɛlɛ ye Jackie mɔɔ ɔde Nigeria la hanle kɛ: “Saa me Baebolo sukoavoma dɔɔnwo nwu kɛ adiema nrenyia ne mɔɔ me nee ye rayɛle Baebolo ɛzukoalɛ ne la le asafo nu kpanyinli a, ɔsi bɛ nwo. Me Baebolo sukoavo ko hanle kɛ: ‘Me ɛsɔfo ne ɛnrɛyɛ zɔ ɛlɛ. Sukoavolɛma ala a ɔkpɔla bɛ a, na yemɔ bɔbɔ kyesɛ bɛmaa ye ezukoa!’” Kɛkala sukoavo zɔhane ba debiezukoalɛ.

18. Kɛ ɔkɛyɛ na asafo nu mgbanyima ava Gyima ne 20:28 ali gyima ɛ?

¹⁸ Bɛtete Baebolo kilehilevolɛma na bɛmaa bɛ anwosesebɛ. Mgbanyima, bɛlɛ ɛzonlelilɛ bie mɔɔ ɔhyia kpalɛ. Yemɔ a le kɛ, bɛbaboa nolobɔlɛma bɛamaa bɛayɛ edwɛkɛhanlɛ nee ngilehilelɛ gyima ne kpalɛ. (Kenga Gyima ne 20:28.) Saa nolobɔlɛnli bie se nyiane kɛ ɔbayɛ Baebolo ɛzukoalɛ ne wɔ mekɛ mɔɔ ɛwɔ ɛkɛ la a, ɛbahola wɔaha wɔahile ye kɛ ɔmaa ɛyɛ. Jackie mɔɔ yɛlimoa yɛha ɔ nwo edwɛkɛ la hanle kɛ: “Mgbanyima ne mɔ ta biza me Baebolo sukoavoma ne anwo edwɛkɛ. Saa meyia ngyegyelɛ wɔ kɛzi mebayɛ Baebolo ɛzukoalɛ bie la anwo a, bɛmaa me nzuzulɛ mɔɔ baboa la.” Mgbanyima bahola ayɛ ninyɛne dɔɔnwo mɔɔ bamaa Baebolo kilehilevolɛma anwosesebɛ yeamaa bɛahɔ zo bɛayɛ gyima ne la. (1 Tɛs. 5:11) Jackie vale zɔle zolɛ kɛ: “Saa mgbanyima maa me anwosesebɛ na bɛka bɛkile me kɛ bɛ nye sɔ gyima ɛsesebɛ mɔɔ melɛyɛ la a, me nye die nwo kpalɛ. Edwɛkɛ ɛhye mɔ maa me ahonle tɔ me azule nu kɛ awie mɔɔ nzuhɔne ɛlɛku ye ewiazo bie na yenyia nzule weɛlɛkɔkɔ bie yenlo la. Bɛ nganvolɛ ne boa me maa menwu kɛ melɛbɔ mɔdenle wɔ Baebolo ɛzukoalɛ ne ɛyɛlɛ nu na yemɔ maa me nye die kpole.”​—Mrɛ. 25:25.

19. Duzu a bahola amaa yɛ muala yɛ nye alie a?

¹⁹ Saa yɛnyɛ Baebolo ɛzukoalɛ kɛkala bɔbɔ a, yɛbahola yɛaboa awie yɛamaa yeanyi sunsum nu. Saa yɛlɛkɔ yɛahɔzɔho awie yɛamaa yeayɛ ye Baebolo ɛzukoalɛ a, yɛnrɛdendɛ dɔɔnwo ɛdeɛ, noko yɛbahola yɛava yɛ mualɛ mɔɔ yɛziezie ye kpalɛ la yɛaboa ye. Saa Baebolo sukoavoma ba debiezukoalɛ a, yɛbahola yɛava bɛ agɔnwolɛ yɛɛ yɛbahola yɛayɛ neazo kpalɛ yɛamaa bɛ. Mgbanyima bahola anyia mekɛ amaa sukoavoma yɛɛ bɛbahola bɛatete kilehilevolɛma na bɛahanvo bɛ bɛava bɛamaa bɛ muala anwosesebɛ. Saa yɛnwu kɛ yɛyɛle yɛ afoa nu ɛdeɛ ekyi yɛboale awie yɛmaanle ɔhulole Gyihova na bɛzɔnenle ye a, nea kɛzi yɛ nye balie a!