Ɛlɛsukoa Mɔɔ Ɛbahola Biala La Wɔavi Gyihova Ɛkɛ Ɔ?

1. Kɛzi Gyihova te nganeɛ wɔ ngilehilelɛ nwo ɛ?

¹ Gyihova, yɛ ‘Kilehilevolɛ Kpole’ ne kulo kɛ bɛkilehile yɛ. (Aye. 30:20) Ɔbɔle ɔ bo kɛ ɔkilehile wɔ mekɛ mɔɔ ɔbɔle ye belamunli Ralɛ ne la. (Dwɔn 8:28) Adam atuadelɛ ne anzi, Gyihova angyakyi kɛ ɔkɛhile debie, emomu, ɔvile ɛlɔlɛ nu ɔvale adehilelɛ ɔmanle alesama mɔɔ bɛtɔ sinli la.—Aye. 48:17, 18; 2 Tem. 3:14, 15.

2. Ngilehilelɛ gyima boni a ɛlɛkɔ zo a?

² Ɛnɛ, Gyihova ɛlɛnea ngilehilelɛ gyima kpole mɔɔ ɛlɛkɔ zo wɔ tetedwɛkɛ nu la azo. Kɛmɔ Ayezaya hanle dole ɛkɛ la, ewiade ye anu menli mgbe dɔɔnwo ɛlɛnriandi ahɔ “Gyihova sua nu boka ne” azo. (Aye. 2:2, NW) Duzu ati a bɛlɛnriandi bɛahɔ ɛkɛ a? Amaa bahilehile bɛ Nyamenle ndenle ne mɔ, ɛhɛe, amaa Gyihova ahilehile bɛ! (Aye. 2:3) Wɔ 2010 ɛzonlenlɛ ɛvolɛ ne anu, Gyihova Alasevolɛ vale dɔnehwele mɔɔ bo mgbe mgbe 1.6 la lile menli daselɛ na bɛhilehilele bɛ Baebolo ne anu nɔhalɛ ne. Bieko, dapɛne biala bɛfa sunsum nu adehilelɛ bɛmaa asafo mɔɔ bo 105,000 mɔɔ wɔ ewiade amuala la, yɛɛ akɛlɛ nɔhavo nee nrɛlɛbɛvolɛ ne yɛ Keleseɛne mbuluku mɔɔ bɛfa bɛkilehile la wɔ aneɛ mɔɔ bo 500 la anu.

3. Kɛzi Gyihova ngilehilelɛ ne ɛboa wɔ ɛ?

³ Nyia Zolɛ Nvasoɛ: Nea kɛzi anwuma ngilehilelɛ ɛboa yɛ a! Yɛzukoa kɛ Nyamenle lɛ duma yɛɛ ɔdwenle yɛ nwo. (Edw. 83:18; 1 Pita 5:6, 7) Yɛzukoa asetɛnla nu kpuyia mɔɔ hyia kpalɛ la bie mɔ mualɛ: Duzu ati a menli nwu amaneɛ na bɛwu a? Kɛ ɔkɛyɛ na meanyia nɔhalɛ anyelielɛ ɛ? Asetɛnla bodane a le duzu? Gyihova ɛmaa yɛnyia ɛbɛlabɔlɛ nwo adehilelɛ mɔɔ ‘bamaa yɛ ɛbɛlabɔlɛ ne adenrɛ’ la.—Dwɔ. 1:8.

4. Sukulu mɔɔ Nyamenle azonvolɛ lɛ nwolɛ adenle la bie mɔ a le boni, na duzu ati a ɔwɔ kɛ yɛsukoa mɔɔ yɛbahola biala la yɛfi Gyihova ɛkɛ a?

⁴ Bieko, Gyihova buke ngilehilelɛ titile nwo adenle kɛ ɔfa yeaboa ye azonvolɛ dɔɔnwo yeamaa bɛadɛlɛ bɛ ɛzonlenlɛ ne anu. Mukelɛ 4-6 kile adenlenyianlɛ mɔɔ wɔ ɛkɛ maa bie mɔ la. Saa yɛ gyinlabelɛ ne ɛnrɛmaa yɛnrɛnyia ndetelɛ ne mɔɔ bɛhile la bɔbɔ a, asoo yɛlɛnyia anwuma ngilehilelɛ ne mɔɔ nwolɛ adenle wɔ ɛkɛ ne maa yɛ la anu nvasoɛ kpalɛ ɔ? Asoo yɛlɛboa ngakula, mɔɔ sukulu kilehilevolɛma nee awie mɔ ka kile bɛ kɛ bɛzukoa ewiade nwoma kpole la, yɛamaa bɛava sunsum nu bodane bɛazie bɛ nye zo na bɛali ngilehilelɛ mɔɔ tɛla biala, mɔɔ le anwuma ngilehilelɛ la anzi ɔ? Saa yɛsukoa mɔɔ yɛbahola biala la yɛfi Gyihova ɛkɛ a, ɔbamaa yɛanyia asetɛnla mɔɔ anyelielɛ wɔ nu la ɛnɛ nee dahuu.—Edw. 119:105; Dwɔn 17:3.

Gyihova Ahyehyɛdeɛ Ne Anu Sukulu Bie Mɔ Adenlenyianlɛ

Ɛgengalɛ Nee Ɛhɛlɛlɛ Sukulu

• Bodane: Bɛfa bɛkile menli kɛzi bɛkenga na bɛkɛlɛ debie la amaa bɛahola bɛayɛ bɛtianwo Baebolo ɛzukoalɛ na bɛahilehile awie mɔ Baebolo ne anu nɔhalɛ ne.

• Mekɛ: Ɔgyi bɛ ngyianlɛ ne azo.

• Ɛleka: Bɛ Belemgbunlililɛ Asalo ne anu.

• Menli Mɔɔ Bahola Ahɔ Bie La: Nolobɔlɛma nee anyelielɛma kɔsɔɔti.

• Kɛzi Bɛbiza Nwolɛ Adenle La: Asafo mgbanyima nea bɛ ɛkɛ ne ngyianlɛ na bɛyɛ ɛgengalɛ nee ɛhɛlɛlɛ nwo ngyehyɛleɛ, na bɛsi menli kɔsɔɔti mɔɔ bahola la adua kɛ bɛhɔ bie.

Teokelase Ɛzonlenlɛ Sukulu

• Bodane: Bɛfa bɛtete nolobɔlɛma amaa bɛahola bɛabɔ edwɛkpa ne nolo na bɛahilehile awie mɔ kpalɛ.

• Mekɛ: Bɛyɛ bɛtoɔdoa zo.

• Ɛleka: Bɛ Belemgbunlililɛ Asalo ne anu.

• Menli Mɔɔ Bahola Ayɛ Bie La: Nolobɔlɛma kɔsɔɔti. Menli noko mɔɔ ta kɔ debiezukoalɛ, mɔɔ die Baebolo ne anu ngilehilelɛ ne to nu, na bɛ ɛbɛlabɔlɛ nee Keleseɛnema ngyinlazo le ko la.

• Kɛzi Bɛbiza Nwolɛ Adenle La: Ka nwolɛ edwɛkɛ kile Teokelase Ɛzonlenlɛ Sukulu zo neavolɛ ne.

Aneɛ Gyɛne Sukulu

• Bodane: Bɛfa bɛkile nolobɔlɛma kɛzi bɛfa aneɛ gyɛne bɛbɔ edwɛkpa ne nolo la.

• Mekɛ: Siane nna anzɛɛ nnu. Bɛta bɛyɛ sukulu ne Folɛ nwonlomɔ wɔ dɔnehwele ko anzɛɛ nwiɔ anu.

• Ɛleka: Bɛta bɛyɛ ye wɔ Belemgbunlililɛ Asalo mɔɔ bikye la anu.

• Menli Mɔɔ Bahola Ahɔ Bie La: Nolobɔlɛma mɔɔ yɛ neazo kpalɛ na bɛkulo kɛ bɛfa aneɛ gyɛne bɛdi daselɛ la.

• Kɛzi Bɛbiza Nwolɛ Adenle La: Ɔfese ne nea ngyianlɛ ne na ɔyɛ nwolɛ sukulu.

Belemgbunlililɛ Asalo Ɛsisilɛ

• Bodane: Bɛsisi Belemgbunlililɛ Asalo na bɛyɛ mɔɔ ɛzɛkye la boɛ. Ɛhye ɛnle sukulu, noko bɛfa ngyehyɛleɛ ɛhye bɛkile menli mɔɔ tu bɛ nwo maa la ninyɛne ngakyile amaa bɛahola bɛaboa suazilɛ gyima.

• Mekɛ: Ahenle mɔɔ ɛdu ɔ nwo ɛmaa la mekɛ a bahile a.

• Ɛleka: Ɛleka biala mɔɔ Suazilɛ Kɔmatii ne nea zolɛ la anu. Bɛto ɛsalɛ bɛfɛlɛ menli mɔɔ kɔ la bie mɔ bɛmaa bɛkɔboa wɔ ɛleka bie mɔɔ esiane kɛzi ɛkɛ la.

• Mɔɔ Bɛnea: Mediema mrenya nee mraalɛ mɔɔ bɛzɔne bɛ na mgbanyima eku ne ɛlie bɛ ɛdo nu la. Bɛbahola bɛayɛ menli mɔɔ bɛze debie boɛ yɛ anzɛɛ ɔnle zɔ la.

• Kɛzi Bɛbiza Nwolɛ Adenle La: Die Kingdom Hall Volunteer Worker Questionnaire (S-82) ne bie fi mgbanyima ne mɔ ɛkɛ na di nwolɛ gyima.

Adekpakyelɛ Ɛzonlenlɛ Sukulu

• Bodane: Bɛfa bɛboa adekpakyelɛma amaa bɛahola bɛayɛ ‘bɛ gyima ne’ kpalɛ.—2 Tem. 4:5.

• Mekɛ: Dapɛne nwiɔ.

• Ɛleka: Ɔfese ne a kile a; bɛta bɛyɛ ye wɔ Belemgbunlililɛ Asalo mɔɔ bikye la anu.

• Mɔɔ Bɛnea: Menli mɔɔ ɛva ɛvolɛ ko mɔɔ kɔ ɛyɛ dahuu adekpakyelɛ gyima la.

• Kɛzi Bɛfa Bɛ La: Maanzinli zo neavolɛ ne kpa adekpakyelɛma mɔɔ fɛta la na ɔbɔ bɛ amaneɛ.

Bɛtɛlema Fofolɛ Sukulu

• Bodane: Bɛyɛ sukulu ɛhye kɛ bɛfa bɛaboa menli fofolɛ mɔɔ bɛra ɛkɛ la amaa bɛayɛ bɛ Bɛtɛle gyima ne boɛ.

• Mekɛ: Bɛyɛ ye dɔnehwele ko dapɛne biala toonwo dapɛne bulu nee nsia.

• Ɛleka: Bɛtɛle.

• Mɔɔ Bɛnea: Menli mɔɔ boka Bɛtɛle abusua ne anwo anzɛɛ menli mɔɔ bɛva bɛ mekɛ ezinra nu mɔɔ bɛbayɛ gyima bɛahyɛ (ɛvolɛ ko anzɛɛ mɔɔ bo zɔ la).

• Kɛzi Bɛfa Bɛ La: Bɛmaa Bɛtɛlema abusua ne anu amra mɔɔ fɛta la kɔ bie.

Belemgbunlililɛ Gyima Sukulu

• Bodane: Bɛfa bɛboa mgbanyima nee azonvolɛ amaa bɛayɛ bɛ gyima ne boɛ. (Gyi. 20:28) Bɛyɛ ye ɛvolɛ biala mɔɔ Neazo Eku ne kɛhile la anu.

• Mekɛ: Kenlensa ye bɛyɛ ye kenle ko nee foa bɛmaa mgbanyima yɛɛ bɛyɛ ye kenle ko bɛmaa azonvolɛ.

• Ɛleka: Bɛta bɛyɛ ye wɔ Belemgbunlililɛ Asalo anzɛɛ Nyianu Asalo mɔɔ bikye la anu.

• Mɔɔ Bɛnea: Ɔwɔ kɛ bɛyɛ mgbanyima anzɛɛ azonvolɛ.

• Kɛzi Bɛfa Bɛ La: Maanzinli zo neavolɛ ne to ɛsalɛ fɛlɛ mgbanyima nee azonvolɛ mɔɔ fɛta la.

Asafo Mgbanyima Sukulua

• Bodane: Bɛfa bɛboa mgbanyima bɛmaa bɛdi bɛ ɛzonlelilɛ nwo gyima wɔ asafo ne anu.

• Mekɛ: Kenle nnu.

• Ɛleka: Ɔfese ne a kile a; bɛta bɛyɛ ye wɔ Belemgbunlililɛ Asalo anzɛɛ Nyianu Asalo mɔɔ bikye la anu.

• Mɔɔ Bɛnea: Ɔwɔ kɛ bɛyɛ mgbanyima.

• Kɛzi Bɛfa Bɛ La: Ɔfese ne to ɛsalɛ fɛlɛ mgbanyima mɔɔ fɛta la.

Neavolɛ Adenduvoma Nee Bɛ Ye Mɔ Sukulub

• Bodane: Bɛfa bɛboa maanzinli nee maangyeba zo neavolɛma bɛmaa bɛkola bɛboa asafo ne mɔ kpalɛ na bɛbɔ mɔdenle wɔ ɛdendɛlɛ nee ‘ngilehilelɛ’ nu, amaa bɛanlea menli mɔɔ wɔ bɛ sa nu la anwo zo.—1 Tem. 5:17; 1 Pita 5:2, 3.

• Mekɛ: Siane nwiɔ.

• Ɛleka: Ɔfese ne a kile a.

• Mɔɔ Bɛnea: Ɔwɔ kɛ bɛyɛ maanzinli anzɛɛ maangyeba zo neavolɛma.

• Kɛzi Bɛfa Bɛ La: Ɔfese ne to ɛsalɛ fɛlɛ neavolɛ adenduvoma mɔɔ fɛta la nee bɛ ye mɔ.

Mediema Mrenya Mɔɔ Bɛtɛgyale Baebolo Sukuluc

• Bodane: Bɛfa bɛsiezie mgbanyima nee azonvolɛ mɔɔ bɛtɛgyale la bɛmaa bɛyɛ gyima dɔɔnwo. Bɛfa menli mɔɔ kɔ la anu dɔɔnwo bɛkɔ bɛ maanle ne anu ɛleka mɔɔ bɛhyia moalɛ nwo la. Bɛmaa bɛ nuhua ekyi mɔɔ bahola la kɔyɛ gyima wɔ maanle gyɛne nu.

• Mekɛ: Siane nwiɔ.

• Ɛleka: Ɔfese ne a kile a; bɛta bɛyɛ ye wɔ Nyianu Asalo anzɛɛ Belemgbunlililɛ Asalo mɔɔ bikye la anu.

• Mɔɔ Bɛnea: Mediema mrenya mɔɔ bɛtɛgyale na bɛli ɛvolɛ 23 kɔdwu 62 mɔɔ bɛte kpɔkɛ na bɛkulo kɛ bɛsonle mediema na bɛyɛ Belemgbunlililɛ ne anwo gyima wɔ ɛleka biala mɔɔ bɛhyia moalɛ la. (Mak. 10:29, 30) Ɔwɔ kɛ bɛyɛ menli mɔɔ bɛva ɛvolɛ nwiɔ bɛzonle ɔvi mekɛ mɔɔ bɛkpale bɛ la.

• Kɛzi Bɛbiza Nwolɛ Adenle La: Saa bɛyɛ sukulu ɛhye wɔ ɛleka mɔɔ bɛwɔ la a, bɛbayɛ nwolɛ nyianu bɛamaa menli mɔɔ anye die kɛ bɛbahɔ bie la wɔ maanzinli nyianu ne anu. Bɛka nwolɛ edwɛkɛ dɔɔnwo wɔ zɔhane nyianu ne abo.

Keleseɛne Agyalɛma Baebolo Sukulud

• Bodane: Bɛfa ndetelɛ titile bɛmaa agyalɛma amaa Gyihova nee ye ahyehyɛdeɛ ne ahola ava bɛ ali gyima kpalɛ. Bɛbamaa menli mɔɔ bahɔ la anu dɔɔnwo azonle wɔ bɛ maanle ne anu ɛleka mɔɔ bɛhyia moalɛ la. Bɛbamaa bɛ nuhua ekyi mɔɔ bɛahola la ahɔyɛ gyima wɔ maanle gyɛne nu.

• Mekɛ: Siane nwiɔ.

• Ɛleka: Bɛlɛyɛ sukulu ne ekyi mɔɔ lumua la wɔ Watchtower Educational Center, wɔ Patterson, New York, U.S.A. Bɛwie a, bɛbayɛ sukulu ɛhye bie wɔ ɛleka mɔɔ ɔfese ne kɛhile la, bɛbayɛ dɔɔnwo ne ala wɔ Nyianu Asalo anzɛɛ Belemgbunlililɛ Asalo nu.

• Mɔɔ Bɛnea: Agyalɛma mɔɔ bɛli ɛvolɛ 25 kɔdwu 50 mɔɔ bɛte kpɔkɛ na bɛbahola bɛazonle wɔ ɛleka mɔɔ bɛhyia moalɛ na bɛ subane kile kɛ: “Mewɔ ɛke! Soa me” la. (Aye. 6:8) Bieko, ɔwɔ kɛ bɛyɛ menli mɔɔ bɛgya ɛvolɛ nwiɔ na kɛkala bɛva ɛvolɛ nwiɔ bɛdoa zo bɛyɛ dahuu ɛzonlenlɛ gyima ne la.

• Kɛzi Bɛbiza Nwolɛ Adenle La: Saa bɛyɛ sukulu ɛhye wɔ ɛleka mɔɔ ɛwɔ la a, bɛbayɛ nwolɛ nyianu bɛamaa menli mɔɔ anye die kɛ bɛbahɔ bie la wɔ kenle ko nyianu titile ne anu. Bɛka nwolɛ edwɛkɛ dɔɔnwo wɔ zɔhane nyianu ne abo.

Ɛzinzalɛ Arane Gilead Baebolo Sukulu

• Bodane: Bɛfa bɛtete adekpakyelɛma nee dahuu azonvolɛ gyɛne bɛmaa bɛyɛ edwɛkpatɛlɛvolɛ gyima.

• Mekɛ: Siane nnu.

• Ɛleka: Watchtower Educational Center, Patterson, New York, U.S.A.

• Mɔɔ Bɛnea: Agyalɛma mɔɔ ɔkadwu mekɛ mɔɔ bɛbiza nwolɛ adenle la bɛzɔne bɛ ɛvolɛ nsa na bɛli ɛvolɛ 21 kɔdwu 38 la. Ɔwɔ kɛ bɛyɛ menli mɔɔ ka Nrelenza, mɔɔ bɛgya ɛvolɛ nwiɔ na kɛkala bɛva ɛvolɛ nwiɔ bɛdoa zo bɛyɛ dahuu ɛzonlenlɛ gyima ne la. Ɔwɔ kɛ bɛyɛ menli mɔɔ bɛte kpɔkɛ. Adekpakyelɛma mɔɔ ɛlɛsonle wɔ maanle gyɛne nu (menli mɔɔ bɛbu bɛ kɛ bɛle edwɛkpatɛlɛvolɛma la boka nwo); neavolɛ adenduvoma; Bɛtɛle abusua ne anu amra; menli mɔɔ bɛwie Azonvolɛ Ndetelɛ Sukulu, Mediema Mrenya Mɔɔ Bɛtɛgyale Baebolo Sukulu yɛɛ Keleseɛne Agyalɛma Baebolo Sukulu, na bɛfɛta la noko bɛahola abiza nwolɛ adenle.

• Kɛzi Bɛbiza Nwolɛ Adenle La: Wɔ ɔfese bie mɔ anu, bɛyɛ sukulu ɛhye anwo nyianu bɛmaa menli mɔɔ anye die nwolɛ la wɔ maangyeba nyianu ne anu. Bɛka nwolɛ edwɛkɛ dɔɔnwo wɔ zɔhane nyianu ne abo. Saa bɛnyɛ nyianu ɛhye bie wɔ bɛ ɛkɛ ne maangyeba nyianu bo na ɛkulo kɛ ɛbiza nwolɛ adenle a, ɛbahola wɔahɛlɛ ɔfese ne wɔabiza nwolɛ edwɛkɛ dɔɔnwo.

Ɔfese Kɔmatii Nu Amra Nee Bɛ Ye Mɔ Sukulu

• Bodane: Bɛfa bɛboa menli mɔɔ wɔ Ɔfese Kɔmatii ne anu la bɛmaa bɛnea Bɛtɛle azua ne mɔ anu gyima zo kpalɛ, bɛdi asafo ne mɔ edwɛkɛ nwo gyima, na bɛnea maanzinli nee maangyeba ngakyile mɔɔ wɔ bɛ azɛlɛsinli ne anu la azo, yɛɛ edwɛkɛ mɔɔ bɛkile ɔ bo bɛkɔ aneɛ gyɛne nu, mbulukuyɛlɛ nee mbuluku mɔɔ bɛfa bɛkɔ ɛleka ngakyile la na bɛnea gyimayɛlɛleka ne mɔ azo.—Luku 12:48b.

• Mekɛ: Siane nwiɔ.

• Ɛleka: Watchtower Educational Center, Patterson, New York, U.S.A.

• Mɔɔ Bɛnea: Ɔfese Kɔmatii anzɛɛ Maanle Kɔmatii nu amra anzɛɛ menli mɔɔ bɛye bɛ kɛ bɛhɔ bie la.

• Kɛzi Bɛfa Bɛ La: Neazo Eku ne to ɛsalɛ fɛlɛ mediema mɔɔ fɛta la nee bɛ ye mɔ.

[Ɔ bo ɛkɛ ne edwɛkɛ ne mɔ]