Kɛzi Bɛtete Gyihova Alasevolɛ Bɛmaa Bɛyɛ Bɛ Ɛzonlenlɛ Gyima Ne Ɛ?

Bɛkɔ zo bɛtete Gyihova Alasevolɛ bɛmaa bɛnwu kɛzi bɛbabɔ bɛ ɛbɛla kɛ Kilisienema la yɛɛ eza bɛtete bɛ bɛmaa bɛbɔ edwɛkpa ne nolo. Gyisɛse hanle kɛ ye ɛdoavolɛma ɛyɛ gyima ɛhye, bɛbɔ Nyamenle Belemgbunlililɛ ne anwo edwɛkpa ne nolo na bɛhilehile menli. (Mateyu 24:14; 28:19, 20) Yɛ sa ka ndetelɛ ɛhye wɔ yɛ debiezukoalɛ nee yɛ nyianu ne mɔ abo. Gyihova Alasevolɛ mɔɔ bɛlɛ ɛzonlelilɛ wɔ asafo ne nee ahyehyɛdeɛ ne anu la eza nyia ndetelɛ bieko wɔ sukulu bie mɔ anu.

Wɔ edwɛkɛ ɛhye anu

Ndetelɛ boni a bɛfa bɛmaa Gyihova Alasevolɛ a?

Asafo debiezukoalɛ. Dapɛne biala, yɛyia nuhua fane nwiɔ wɔ yɛ Belemgbunlililɛ Asalo. Yɛyɛ ko wɔ dapɛne avinli; yɛɛ yɛyɛ ko wɔ dapɛne awieleɛ. Awie biala kola ba bie yɛɛ bɛnlielie ezukoa wɔ ɔ bo.

Dapɛne avinli debiezukoalɛ. Bɛkile yɛ kɛzi yɛbagenga kpalɛ, yɛali adwelie kpalɛ, yɛadendɛ wɔ bagua nu, yɛabɔ edwɛkpa ne nolo na yɛahilehile kpalɛ la. Bɛdua ɛdendɛlɛ mɔɔ bɛmaa, adawubɔlɛ, yɛkile nee vidio zo bɛkilehile yɛ. Ndetelɛ ɛhye mɔ boa yɛ maa yɛka Baebolo ne anu edwɛkɛ ne yɛkile awie mɔ na yɛ nee menli mɔɔ anye die nwo la sukoa Baebolo ne. Menli mɔɔ ba debiezukoalɛ ne bie la amuala nyia ndetelɛ ɛhye azo nvasoɛ. Mɔɔ hyia kpalɛ la, yɛ debiezukoalɛ ne mɔ maa diedi mɔɔ yɛlɛ ye wɔ Nyamenle anu la yɛ kpole, na yɛkulo ye nee yɛ mediema diedima kpalɛ.
Dapɛne awieleɛ debiezukoalɛ. Bɛmaa Baebolo ɛdendɛlɛ mɔɔ bɛziezie ye titili bɛmaa menli mɔɔ ɛnle Alasevolɛ la wɔ foa mɔɔ limoa la anu. Wɔ foa mɔɔ tɔ zo nwiɔ la anu, yɛfa kpuya nee mualɛ yɛsukoa edwɛkɛ mɔɔ wɔ Ɛzinzalɛ Aranea debiezukoalɛ ɛdeɛ ne anu la. Yɛsuzu Baebolo nu edwɛkɛ nee ngyinlazo mɔɔ boa yɛ wɔ yɛ ɛzonlenlɛ gyima ne nee ɛbɛlabɔlɛ nu la anwo.

Nyianu. Ɛvolɛ biala yɛyɛ nyianu mgbole nsa, na asafo dɔɔnwo a bɔ nu kɔ a. Bɛkilehile Baebolo nu edwɛkɛtile bie anu, bɛmaa ɛdendɛlɛ, bɛbizebiza awie mɔ edwɛkɛ yɛɛ bɛye vidio wɔ nyianu ɛhye mɔ mɔɔ maa yɛ nye die la abo. Yɛ debiezukoalɛ nee yɛ nyianu ne mɔ boa yɛ maa yɛte Baebolo ne abo kpalɛ na yɛbɔ edwɛkpa ne nolo. Awie biala kola ba nyianu ɛhye mɔ bie yɛɛ bɛnlielie ezukoa wɔ ɔ bo.

Sukulu bie mɔ mɔɔ bɛyɛ bɛmaa Gyihova Alasevolɛ la

Bɛmaa Gyihova Alasevolɛ bie mɔ kɔ Baebolo nwo sukulu ngakyile amaa bɛatete bɛ dɔɔnwo. Bie mɔ a le boni? Sukulu ɛhye mɔ bodane a le boni yɛɛ ɔdi mekɛ tendenle nyɛ? Nwane a kola kɔ bie a?

Adekpakyelɛma Ɛzonlenlɛ Sukulu

Bodane: Bɛfa bɛtete dahuu ɛzonlenlɛ gyima ne anu amra mɔɔ bɛfɛlɛ bɛ adekpakyelɛmab la amaa bɛayɛ edwɛkɛhanlɛ nee ngilehilelɛ gyima ne kpalɛ. Bɛsuzu edwɛkɛ nwo, bɛmaa ɛdendɛlɛ yɛɛ bɛyɛ gyimalilɛ ngakyile wɔ ɔ bo.
Mekɛ tendenle: Kenle nsia.
Menli mɔɔ kɔ: Bɛto ɛsalɛ bɛfɛlɛ menli mɔɔ bɛva ɛvolɛ ko bɛyɛ adekpakyelɛ gyima ne la. Ɔyɛ a bɛmaa menli mɔɔ hɔle sukulu ne bie la yebo ɛvolɛ nnu la kɔ bieko.

Sukoavo nwiɔ ɛlɛyɛ yɛkile wɔ Adekpakyelɛ Ɛzonlenlɛ Sukulu bo. Sukoavoma mɔɔ ɛha la ɛlɛtie bɛ kpalɛ.

Belemgbunlililɛ Edwɛkpakavolɛma Sukulu

Bodane: Bɛfa ndetelɛ titili bie bɛmaa dahuu ɛzonlenlɛ gyima ne anu amra mɔɔ bɔ mɔdenle la. Ɔboa sukoavoma ɔmaa bɛnyia anyuhɔlɛ wɔ edwɛkɛhanlɛ nee ngilehilelɛ gyima ne anu, yɛɛ bɛsukoa Baebolo ne bɛkɔ moa. Bɛmaa menli mɔɔ kɛwie sukulu ne la kɔ ɛleka mɔɔ bɛhyia moalɛ dɔɔnwo la.
Mekɛ tendenle: Siane nwiɔ.
Menli mɔɔ kɔ: Adekpakyelɛma mɔɔ dwu ninyɛne mɔɔ bɛkpondɛ la anwo na bɛ tɛnlabelɛ ne bamaa bazonle ɛleka mɔɔ bɛhyia moalɛ nwo la bahola abiza nwolɛ adenle.

Asafo Mgbanyima Sukulu

Bodane: Bɛfa bɛboa mgbanyimac bɛmaa bɛyɛ gyima mɔɔ bɛyɛ wɔ asafo ne anu la, bɛsukoa kɛzi bɛkilehile nee kɛzi bɛnea bɛdabɛ mɔɔ bɛwɔ asafo ne anu la, yɛɛ ɔboa ɔmaa bɛnyia ɛlɔlɛ kpole bɛmaa Nyamenle nee bɛ gɔnwo mɔ diedima.—1 Pita 5:2, 3.
Mekɛ tendenle: Kenle nnu.
Menli mɔɔ kɔ: Mgbanyima mɔɔ bɛkpa bɛ fofolɛ nee mgbanyima dɛba mɔɔ bɛhɔle sukulu ne bie la ɛvolɛ nnu ɛdwu la.

Maangyebakyi Zo Neavolɛma Nee Bɛ Ye Mɔ Sukulu

Bodane: Bɛfa bɛtete neavolɛ adenduvoma mɔɔ bɛfɛlɛ bɛ maangyebakyi zo neavolɛmad la amaa bɛayɛ bɛ gyima ne kpalɛ. (1 Timote 5:17) Ninyɛne mɔɔ bɛsukoa la boa Kilisiene mgbanyima ɛhye mɔ nee bɛ ye mɔ ɔmaa bɛte Ngɛlɛlera ne abo kpalɛ.
Mekɛ tendenle: Siane ko.
Menli mɔɔ kɔ: Maangyebakyi zo neavolɛma nee bɛ ye mɔ mɔɔ bɛzonle ɛvolɛ ko la. Yemɔ anzi, bɛsia bɛkɔ bieko ɛvolɛ nnu biala.

Belemgbunlililɛ Gyima Sukulu

Bodane: Bɛfa bɛboa mgbanyima nee azonvolɛe bɛmaa bɛdi bɛ ɛzonlelilɛ nwo gyima kɛmɔ asafo ne anu tɛnlabelɛ nee ngyianlɛ de la. (2 Timote 3:1) Bɛyɛ sukulu ɛhye wɔ ɛvolɛ bie mɔ anu.
Mekɛ tendenle: Ɔkakyihakyi, bɛta bɛyɛ ye kenle ko.
Menli mɔɔ kɔ: Maangyebakyi zo neavolɛma, mgbanyima nee azonvolɛ.

Bɛtɛle Ɛzonlenlɛ Sukulu

Bodane: Bɛfa bɛboa menli mɔɔ sonle wɔ Bɛtɛlef la amaa bɛahola bɛayɛ bɛ gyima ne kpalɛ na bɛahulo Nyamenle nee bɛ gɔnwo mɔ.
Mekɛ tendenle: Kenle nnu nee foa.
Menli mɔɔ kɔ: Bɛdabɛ mɔɔ bɛra Bɛtɛle fofolɛ la. Bie a bɛbado ɛsalɛ bɛavɛlɛ menli mɔɔ ɛva ɛvolɛ dɔɔnwo ɛzonle na bɛhɔle sukulu ne bie la yebo ɛvolɛ nnu la bɛamaa bɛahɔ bieko.

Ɛzinzalɛ Arane Geleade Baebolo Sukulu

Bodane: Bɛfa bɛboa sukoavoma bɛmaa bɛnyia anyezɔlɛ kpole bɛmaa Nyamenle Edwɛkɛ ne na bɛfa mɔɔ bɛzukoa la bɛyɛ gyima. (1 Tɛsalonaekama 2:13) Kilisiene mrenyia nee mraalɛ mɔɔ bɛnyi sunsum nu mɔɔ bɛkɔ Geleade la yɛ moalɛ kpole maa Gyihova ahyehyɛdeɛ ne nee Baebolo ngilehilelɛ gyima ne. Bie a bɛbamaa menli mɔɔ ɛwie sukulu ne la azia ahɔ bɛ maanle ne azɛlɛsinli nu anzɛɛ Bɛtɛle anzɛɛ bɛahɔzonle wɔ maanle gyɛne zo.
Mekɛ tendenle: Siane nnu.
Menli mɔɔ kɔ: Bɛtɛle to ɛsalɛ fɛlɛ dahuu ɛzonlenlɛ gyima ne anu amra mɔɔ bɛfɛta la bɛmaa bɛkɔ bie. Bɛyɛ sukulu ne wɔ Watchtower Educational Center mɔɔ wɔ Patterson, New York mɔɔ wɔ United States la.

Ɔfese Kɔmatii Nu Amra Nee Bɛ Ye Mɔ Sukulu

Bodane: Bɛfa bɛtete Ɔfese Kɔmatiig ne anu amra bɛmaa bɛnea gyima mɔɔ bɛyɛ wɔ Bɛtɛle la azo na bɛfa moalɛ bɛmaa Gyihova Alasevolɛ mɔɔ wɔ bɛ maanle ne anzɛɛ maanle ngakyile mɔɔ bɛnea zo la anu.
Mekɛ tendenle: Siane nwiɔ.
Menli mɔɔ kɔ: Gyihova Alasevolɛ Ewiade Amuala Gyima Ne Ati ne to ɛsalɛ fɛlɛ Ɔfese Kɔmatii ne anu amra mɔɔ bɛkpa bɛ la nee bɛ ye mɔ bɛmaa bɛkɔ sukulu ne wɔ Watchtower Educational Center mɔɔ wɔ Patterson, New York la.

Duzu a bɛgyinla zo bɛtete Alasevolɛ ne mɔ a?

Baebolo ne a le buluku titili mɔɔ bɛfa bɛtete Gyihova Alasevolɛ a. Yɛdie yɛdi kɛ Nyamenle a maanle bɛhɛlɛle Baebolo ne a na edwɛkɛ mɔɔ wɔ nu la bahola aboa Kilisienema wɔ bɛ ɛbɛlabɔlɛ kɔsɔɔti anu.—2 Timote 3:16, 17.

Asoo Gyihova Alasevolɛ tua ndetelɛ mɔɔ bɛfa bɛmaa bɛ la anwo ezukoa ɔ?

Kyɛkyɛ. Bɛndua ezukoa biala. Ndoboa mɔɔ bɛfi bɛ ɛhulolɛ nu bɛye la a bɛfa bɛboa gyima mɔɔ Gyihova Alasevolɛ yɛ la amuala a.—2 Kɔlentema 9:7.

a Baebolo ne nee ninyɛne mɔɔ yɛfa yɛsukoa Baebolo ne mɔɔ vidio boka nwo la wɔ yɛ jw.org wɛbsaete ne azo.

b Adekpakyelɛnli a le Dasevolɛ nrenyia anzɛɛ raalɛ mɔɔ bɛzɔne ye, ɔyɛ neazo kpalɛ na ɔlɛ ɛhulolɛ kɛ ɔbava dɔnehwele fɔɔnwo bie yeaha Baebolo ne anu edwɛkɛ yeahile awie mɔ siane biala la.

c Mgbanyima le Kilisiene mrenyia mɔɔ bɛnyi sunsum nu mɔɔ bɛkilehile Ngɛlɛlera ne anu na bɛnea Gyihova menli ɔlua moalɛ mɔɔ bɛfa bɛmaa bɛ na bɛmaa bɛ anwosesebɛ la azo. Bɛndua bɛ kakɛ.

d Maangyebakyi zo neavolɛ le adiema nrenyia mɔɔ ɔfa ye mekɛ muala ɔyɛ ɛzonlenlɛ gyima ne yɛɛ dapɛne biala ɔkɔkpɔla asafo mɔɔ wɔ ye maangyebakyi ne anu la. Ɔmaa ɛdendɛlɛ mɔɔ ɔgyi Baebolo ne azo ɔfa ɔmaa ye sunsum nu mediema ne mɔ anwosesebɛ yɛɛ ɔ nee bɛ yɛ edwɛkɛhanlɛ gyima ne.

e Asafo nu azonvolɛ fa moalɛ mɔɔ fɛta la maa bɛ mediema mrenyia nee mraalɛ. Ɛhye maa mgbanyima ne mɔ nyia mekɛ kilehile na bɛkpɔla asafo ne anu amra.

f Bɛtɛle le duma mɔɔ bɛfa bɛfɛlɛ Gyihova Alasevolɛ ɔfese ne mɔ. Dahuu ɛzonlenlɛ gyima ne anu amra mɔɔ bɛyɛ gyima wɔ ɛkɛ ne la boa gyima mɔɔ Gyihova Alasevolɛ yɛ ye wɔ ɔfese ne azɛlɛsinli ne anu la.

g Mrenyia nsa anzɛɛ mɔɔ bo zɔ mɔɔ bɛnyi wɔ sunsum nu la a ka bɔ nu yɛ Ɔfese Kɔmatii a.

Nvasoɛ boni mɔ a Gyihova Alasevolɛ ɛnyia wɔ ndetelɛ ɛhye mɔ azo a?

“Mese nyiane, ɔti ɔyɛ se ɔmaa me kɛ mebaha Baebolo ne anu edwɛkɛ meahile nyɛvolɛ. Noko ndetelɛ mɔɔ menyia ye wɔ dapɛne avinli debiezukoalɛ ne abo la ɛboa me ɛmaa menyia anwodozo na meyɛ kilehilevolɛ kpalɛ. Eza mekola me nee menli mɔɔ ba debiezukoalɛ la nee me gyima nu amra di adwelie kpalɛ.”—Natasha, United States.
“Belemgbunlililɛ Edwɛkpakavolɛma Sukulu ne ɛboa me ɛmaa menyia Gyihova subane ne mɔ mɔɔ bie a le ɛlɔlɛ, abotane nee atiakunlukɛnlɛma la. Ɔti menwu ye kɛ meyɛ Kilisienenli nee agɔnwolɛ kpalɛ. Menzukoale kɛzi bɛyɛ neɛnleanu wɔ Baebolo nu edwɛkɛ bie anwo nee kɛzi bɛkilehile Nyamenle Edwɛkɛ ne anu bɛmaa ɔka menli ahonle la wɔ sukulu ne abo.”—Stephen, Nigeria.
“Asafo Mgbanyima Sukulu ne ɛboa me ɛmaa mebɛlɛ me nwo aze amaa meayɛ asafo nu kpanyinli kpalɛ. Ɛdendɛlɛ ne mɔ maanle menwunle deɛmɔti ɔhyia kɛ mesukoa Gyisɛse neazo ne la.”—Luca, Italy.
“Belemgbunlililɛ Gyima Sukulu ne maanle menwunle deɛmɔti ɔhyia kɛ meyɛ atiakunlukɛnlɛma, bɛkola bɛbikye me na me nye die menli nwo la. Menzukoale kɛ ɔwɔ kɛ ɛlɔlɛ a ka me maa meyɛ debie memaa awie mɔ a na tɛ kɛ ɔwɔ kɛ meyɛ la ati ɔ.”—Samuel, United Kingdom.
“Geleade sukulu ne boale yɛ maanle yɛvale Nyamenle Edwɛkɛ ne yɛnleɛnleanle yɛ nu. (Gyemise 1:22-25) Yɛnwunle ɛleka mɔɔ ɔwɔ kɛ yɛyɛ nzenzaleɛ wɔ yɛ ɛbɛlabɔlɛ nu nee Gyihova ɛzonlenlɛ nu la. Eza yɛzukoale kɛ ɔwɔ kɛ yɛdwenle awie mɔ anwo yɛtɛla yɛ nwo na yɛda ɛlɔlɛ ali wɔ yɛ edwɛkɛhanlɛ nee yɛ nyɛleɛ nu.”—Elnathan nee Princess, Philippines.