Gua Zo Daselɛlilɛ Mɔɔ Boa La
1. Adenle kpalɛ boni a yɛbahola yɛalua zo yɛazukoa Gyisɛse a?
1 Wɔ ye azɛlɛ ye azo ɛzonlenlɛ gyima ne anu, Gyisɛse andwehwe ɔ bo aze kɛ ɔ nee menli mɔɔ ɔkɛyia bɛ adenle zo nee ɛleka gyɛne la kɛdendɛ. (Luku 9:57-61; Dwɔn 4:7) Ɛnee ɔkulo kɛ ɔka ye edwɛkɛ ne mɔɔ nwolɛ hyia la ɔkile menli dodo biala mɔɔ ɔbahola la. Ɛnɛ, gua zo daselɛlilɛ le adenle kpalɛ mɔɔ tɛla biala mɔɔ yɛdua zo yɛboa menli yɛmaa bɛnyia Nyamenle anwo nrɛlɛbɛ a. (Mrɛ. 1:20) Saa yɛbikye menli na yɛfa nwunu yɛdi gyima a, ɔbamaa yɛahola yɛayɛ ye kpalɛ.
2. Duzu ati a ɛlɛdi daselɛ wɔ gua zo a ɔwɔ kɛ ɛbikye menli ɛ?
2 Bikye Menli: Ɔle kpalɛ kɛ ɛbabikye menli tɛla kɛ ɛbagyinla anzɛɛ ɛbadɛnla ɛleka ko wɔahendɛ kɛ menli mɔɔ ɛlɛse la babikye wɔ. Sele, nea bɛ nyunlu, na da agɔnwolɛvalɛ subane ali. Saa ɛ nee nolobɔlɛma fofolɛ a lua a, ɔbayɛ kpalɛ kɛ bɛ nuhua ko biala bahɔ awie gyɛne anwo. Eza ɔwɔ kɛ ɛbɔ mɔdenle kɛ ɛbakpondɛ nwolɛ adenle ɛ nee awie mɔɔ anye die edwɛkɛ ne anwo la adendɛ bieko. Saa ɔbayɛ boɛ a, bɛbɔ adawu bɛwie a biza ye kɛzi ɛbayɛ na ɛsa aha ye bieko la. Nolobɔlɛma bie mɔ ta yɛ gua zo daselɛlilɛ wɔ ɛleka ko ne ala, ɛhye maa bɛkola bɛ nee menli ko ne ala tendɛ fane dɔɔnwo na bɛmaa bɛ anyelielɛ ne yɛ kpole.
3. Saa yɛlɛdi daselɛ wɔ gua zo a, kɛzi yɛbahola yɛava nwunu yɛali gyima ɛ?
3 Fa Nwunu Di Gyima: Saa ɛlɛsuzu ɛleka mɔɔ ɛbagyinla wɔ gua ne azo nee menli mɔɔ ɛbabikye bɛ la anwo a, fa ndelebɛbo kpalɛ di gyima. Ɔngyia kɛ ɛbali awie biala mɔɔ ɛlɛse la daselɛ. Maa ɛ nye ɛla ɛkɛ. Kɛ neazo la, saa ahenle ne kpondɛ ye ndɛndɛ a, ɔbayɛ kpalɛ kɛ ɛbamaa yeaze yeahɔ. Saa ɛlɛdi daselɛ wɔ sotɔɔ nyunlu a, nea boɛ na wɔanyɛ debie mɔɔ bagyegye gyimamenle ne la. Ɔle kpalɛ kɛ ɛkɛli menli mɔɔ vi sotɔɔ ne anu ɛlɛfinde la daselɛ tɛla menli mɔɔ ɛlɛwolo nuhua la. Bikye menli wɔ adenle mɔɔ ɔnrɛmaa bɛ ahonle ɛnrɛdu la azo. Bieko, fa nwunu di gyima wɔ mekɛ mɔɔ ɛlɛfa buluku wɔamaa la. Saa ahenle ne anye anlie edwɛkɛ ne anwo kpalɛ a, kɛ anrɛɛ ɛbamaa ye magazine la, ɛbahola wɔamaa ye trate.
4. Duzu ati a nvasoɛ wɔ gua zo daselɛlilɛ zo na ɔyɛ anyelielɛ a?
4 Gua zo daselɛlilɛ maa yɛkola yɛfa mekɛ ezinra yɛkponde nɔhalɛ ma ne dɔɔnwo. (Nolo. 11:6) Menli mɔɔ yɛyia bɛ wɔ gua zo daselɛlilɛ nu la bie mɔ bahola ayɛ menli mɔɔ yɛndo bɛ wɔ sua nu wɔ mekɛ mɔɔ yɛlɛyɛ azua nu daselɛlilɛ gyima ne la. Duzu ati a ɛnyɛ ngyehyɛleɛ na ɛnva ɛ nwo ɛnwula gua zo daselɛlilɛ gyima ɛhye, mɔɔ yɛ anyelielɛ na ɔboa kpalɛ la anu a?