Siezie Ɛ Nwo Kɛ Ɛbayɛ Baebolo Ɛzukoalɛ Dahuu
1. Duzu a gyima mɔɔ Gyisɛse vale manle yɛ wɔ Mateyu 28:19, 20 la ɛyɛlɛ kile a?
1 Gyisɛse manle yɛ gyima kɛ yɛmaa ‘menli ɛrayɛ ɛdoavolɛma na yɛhilehile bɛ.’ (Mat. 28:19, 20) Ɛhye ati, yɛkulo kɛ yɛsiezie yɛ nwo kɛ yɛbayɛ Baebolo ɛzukoalɛ mekɛ biala, na tɛ dapɛne awieleɛ kenle ko titile ne mɔɔ bɛye bɛzie ɛkɛ kɛ bɛfa bɛayɛ Baebolo ɛzukoalɛ la anu ala ɔ. Nzuzulɛ mɔɔ doɔdoa zo la baboa.
2. Nwane mɔ a yɛbahola yɛamaa bɛ Baebolo ɛzukoalɛ nwo adenle a?
2 Maa Nwolɛ Adenle: Yɛmaa Baebolo ɛzukoalɛ nwo adenle dɔɔnwo a, yɛɛ yɛbahola yɛayɛ bie a. (Nolo. 11:6) Wɔzɔ adenle sikalɛ ne wɔnlea ɔ? Asafo ko mɔɔ wɔ United States la anu amra bɔle nu kɛ bɛyɛ ɛhye bɛanlea wɔ siane ko anu. Nea kɛzi bɛ nye liele kɛ bɛholale bɛbɔle Baebolo ɛzukoalɛ fofolɛ 42 abo a! Mmasuzu kɛ anyelielɛma mɔɔ ɛkɔ bɛ ɛkɛ la ze kɛ ɛkulo kɛ ɛ nee bɛ sukoa Baebolo ne. Saa ɛkɔ bɛ ɛkɛ kenle fofolɛ a, kɛmɔti a ɛmmaa bɛ debiezukoalɛ nwo adenle ɛ? Saa bɛanyɛ a ɔnzɛkye debie. Ɛbahola wɔahɔ zo wɔamaa bɛ nye alie edwɛkɛ ne anwo. Asoo wɔbiza wɔ kpalɛzoamra, wɔ mbusua, ɛ gɔnwo mɔ gyimayɛvoma yɛɛ ɛ gɔnwo mɔ sukuluma saa bɛkulo kɛ bɛ nee wɔ sukoa Baebolo ne a? Ɛbahola noko wɔabiza wɔ Baebolo sukoavoma saa bɛlɛ bɛ gɔnwo mɔ anzɛɛ bɛ mbusua mɔɔ bɛ nye balie Baebolo ne ɛzukoalɛ nwo la a.
3. Debie mɔɔ boa la boni a yɛlɛ a, na kɛ ɔkɛyɛ na yɛava yɛali gyima ɛ?
3 Debie Mɔɔ Boa: Debie mɔɔ nvasoɛ wɔ zo mɔɔ yɛbahola yɛava yɛabɔ Baebolo ɛzukoalɛ bo la a le trate ne mɔɔ se Ɛkulo kɛ Ɛnwu Nɔhalɛ ne Ɔ? Saa suamenle ne mɔ die buluku anzɛɛ bɛanlie a ɛbahola wɔava wɔamaa bɛ. Ɛbahola wɔava wɔali gyima wɔ mekɛ mɔɔ ɛlɛdi daselɛ wɔ azɛlɛsinli mɔɔ gyima ngakyile wɔ nu, mekɛ mɔɔ ɛlɛdi daselɛ wɔ gua zo, mekɛ mɔɔ ɛlɛkɛlɛ kɛlata yɛɛ mekɛ mɔɔ ɛlɛyɛ sia kɔkpɔla la. Ɛbahola wɔagyakyi bie wɔamaa menli mɔɔ ɛnle sua nu la. Kɛmɔti a ɛnva bie ɛnzie ɛ nwo wɔ mekɛ mɔɔ ɛde kale nu, mekɛ mɔɔ ɛlɛdi gua yɛɛ mekɛ mɔɔ ɛwɔ gyima nu la ɛ? Ɔ nzi mukelɛ ne kilehile yɛ Baebolo ɛzukoalɛ ngyehyɛleɛ ne anu sikalɛ na ɔka Baebolo ne Kilehile buluku ne anwo edwɛkɛ.
4. Kɛzi yɛbahola yɛava Nwu Nɔhalɛ ne trate ne yɛabɔ debiezukoalɛ bo ɛ?
4 Ɛfa trate ne ɛmaa ahenle a, ɛbahola wɔahile ye kpuyia ne mɔ mɔɔ wɔ ɔ nyunlu mukelɛ ne azo la na wɔabiza ye kɛ, “Kpuyia ɛhye mɔ boni a ɛ nye die nwolɛ kpalɛ a?” Akee ɛ nee ye ɛzuzu mualɛ mɔɔ wɔ trate ne anu la anwo, na kenga anzɛɛ ka edwɛkɛ mɔɔ wɔ ɔ nzi mukelɛ ne mɔɔ kilehile yɛ Baebolo ɛzukoalɛ ngyehyɛleɛ ne anu la. Ɛbahola wɔahile ye ɛleka mɔɔ nwolɛ edwɛkɛ dɔɔnwo wɔ la wɔ Baebolo ne Kilehile buluku ne anu, fa buluku ne maa ye na yɛ ngyehyɛleɛ sia kɔkpɔla ye na bɛdoa debiezukoalɛ ne azo.
5. Kɛmɔti a ɔwɔ kɛ yɛsiezie yɛ nwo kɛ yɛbayɛ Baebolo ɛzukoalɛ dahuu ɛ?
5 Menli mɔɔ anye la kɛ bɛkɛnwu mɔɔ Baebolo ne kilehile amgba la tɛbɔ yɛ azɛlɛsinli ne anu. Saa yɛsiezie yɛ nwo kɛ yɛbayɛ Baebolo ɛzukoalɛ dahuu a yɛbalua adenle dɔɔnwo azo yɛanyia anyelielɛ kɛ yɛlɛboa awie mɔ yɛamaa bɛalua ngoane adenle ne azo la.—Mat. 7:13, 14.