Fa Wɔ Adwenle Sie Ɛdoavolɛyɛlɛ Zo
1. Duzu a anwo hyia na menli anyia ngoane a?
1 Ɛvolɛ 2014 mgbondabulɛ ne maa yɛnwu mɔdenle mɔɔ Nyamenle menli bɔle hanle Belemgbunlililɛ ne anwo edwɛkpa ne la. (Mat. 24:14) Ɔlua azua nu daselɛlilɛ gyima ne nee nolobɔlɛ titili mɔɔ yɛdua zo yɛkyehyɛ ɛsalɛdolɛ ngɛlata nee trate yɛɛ yɛ bagua nu daselɛlilɛ ne azo, yɛlɛka Baebolo ne anu edwɛkɛ ne yɛahile menli dɔɔnwo kpalɛ. Noko saa menli bahola anyia ngoane a, ɔwɔ kɛ yɛboa bɛ yɛmaa bɛbayɛ Gyisɛse ɛdoavolɛma ɔlua Baebolo ne mɔɔ yɛ nee bɛ bazukoa la azo.—1 Tem. 2:4.
2. Kpuya boni mɔ a saa yɛbiza yɛ nwo a ɔbaboa yɛ yeamaa yɛaziezie yɛ nwo yɛayɛ Baebolo ɛzukoalɛ a?
2 Siezie Ɛ Nwo Dahuu Kɛ Ɛbayɛ Baebolo Ɛzukoalɛ: Saa awie kile edwɛkɛ ne anwo anyelielɛ a, ɛkɛlɛ ɛleka mɔɔ ɔde la nee ye telefuu nɔma na ɛsia ɛkɔ ye ɛkɛ ne ndɛ kɛ ɛ nee ye kabɔ Baebolo ɛzukoalɛ bo ɔ? Ɛkakye mekɛ mɔɔ li amozi mɔɔ ɛhɔle awie ɛkɛ wɔ mekɛ mɔɔ limoa na ɛbɔle mɔdenle kɛ ɛbahile ye kɛzi bɛyɛ Baebolo ɛzukoalɛ la ɔ? Mekɛ mɔɔ li amozi la boni a ɛhanle ɛhilele awie mɔɔ ɛmaa ye magazine dahuu la kɛ ɛkpondɛ kɛ ɛ nee ye sukoa Baebolo ne a? Asoo wɔye Duzu Ati A Ɔwɔ Kɛ Ɛsukoa Baebolo Ne A? nee Kɛzi Bɛyɛ Baebolo Ɛzukoalɛ Ɛ? vidio ne wɔhile menli mɔɔ ɛ nee bɛ wɔ gyima nu, sukulu nu, wɔ kpalɛzoamra, wɔ mbusuafoɔ nee menli gyɛne mɔɔ ɛze bɛ la ɔ? Saa ɛlɛfa mbuluku mɔɔ bɛfa bɛgua debie zo la wɔali daselɛ a, asoo ɛka ɛkile menli mɔɔ bɛbafa bie la kɛ yɛ nee bɛ sukoa Baebolo ne mɔɔ bɛndua ɛhwee ɔ?
3. Nzɔne a hyia na yɛahilehile nɔhalɛ ne kpalɛ a?
3 Gyihova Nee Gyisɛse Baboa Wɔ: Kɛmɔ Gyisɛse vale edwɛkɛkpɔkɛ “bɛhɔ,” bɔle ye edwɛkɛ “bɛmaa menli ɛrayɛ me ɛdoavolɛma” abo la ati, ɛnee ɔlɛkile kɛ ɔwɔ kɛ yɛtu nwolɛ agyakɛ na yɛmia yɛ nwo. Noko yeangyakyi yɛ zɔ, emomu ɔbɔle ɛwɔkɛ kɛ ɔ nee yɛ balua. (Mat. 28:19, 20) Eza Gyihova ɛva ye sunsum nwuanzanwuanza ne, ninyɛne nee ndetelɛ mɔɔ yɛhyia na yɛahilehile menli nɔhalɛ ne la ɛmaa yɛ. (Zɛk. 4:6; 2 Kɔl. 4:7) Yɛbahola yɛazɛlɛ ye kɛ ɔmaa ‘yɛnyia ɛhulolɛ na yɛahola yɛayɛ mɔɔ ɔkpondɛ la’ wɔ gyima ɛhye mɔɔ hyia la anu.—Fel. 2:13.
4. Nzɔne ati a ɔwɔ kɛ yɛfa yɛ adwenle yɛsie ɛdoavolɛyɛlɛ zo ɛ?
4 Saa yɛbɔ edwɛkpa ne nolo a, ɔmaa yɛ nye die kpole. Noko saa yɛkilehile awie nɔhalɛ ne na yɛboa ye yɛmaa ɔfa “anuhɔlɛ ne mɔɔ kɔ ngoane mɔɔ ɛnlɛ awieleɛ” anu la azo a, yɛ anyelielɛ ne yɛ kpole kpalɛ. (Mat. 7:14; 1 Tɛs. 2:19, 20) Mɔɔ hyia kpalɛ la, saa yɛfa yɛ adwenle yɛsie ɛdoavolɛyɛlɛ zo a, yɛmaa Gyihova mɔɔ “ɔngulo kɛ bɛsɛkye awie biala” na “ɔkpondɛ kɛ awie biala nu ɔ nwo na ɔtwe ɔ nwo ɔfi ye ɛtane ne mɔ anwo” la anye die.—2 Pita 3:9.