Tract Nolobɔlɛ Titile wɔ October 20 Kɔdwu November 16!
1 Ɔvi Kenlenzile, October 20, yɛɛ dapɛne nna mɔɔ doa zo la anu, yɛbalua nolobɔlɛ titile zo yɛava tract fofolɛ ne mɔɔ ati se, Ɛkulo kɛ Ɛnwu Nɔhalɛ ne Ɔ? la yɛamaa. Yɛ nye la kɛ nolobɔlɛ titile ɛhye mɔɔ bahɔ zo wɔ ewiade amuala la bamaa menli dɔɔnwo anye alie ɛleka kokye mɔɔ nɔhalɛ ne vi ba la anwo.—Dwɔn 17:17.
2 Tract ne fa Baebolo ne anu mualɛ sikalɛ maa wɔ kpuyia nsia ɛhye mɔɔ hyia la anwo: “Asoo Nyamenle dwenle yɛ nwo amgba?” “Asoo konle nee amaneɛnwunlɛ bo bapɛ?” “Saa yɛwu a yɛkɔ ni?” “Asoo anyelazo bie wɔ ɛkɛ maa mɔwuamra?” “Kɛzi ɔwɔ kɛ meyɛ asɔne na Nyamenle adie ɛ?” yɛɛ “Kɛzi mebanyia anyelielɛ wɔ ɛbɛlabɔlɛ nu ɛ?” Keleseɛnemaanle ne anu asɔne ne mɔ ɛtɛfale kpuyia ɛhye mɔ anwo mualɛ mɔɔ ahunlundwolɛ wɔ nu la ɛtɛmanle. Menli bɔbɔ mɔɔ bɛnle Keleseɛnema la anu dɔɔnwo ɛzuzu edwɛkɛ ɛhye mɔ anwo, noko bie a bɛnze kɛ nwolɛ mualɛ wienyi wɔ Baebolo ne anu. Ɛhye ati, ɔwɔ kɛ edwɛkɛ ɛhye maa bɛ nye die.
3 Yɛ Wɔ Azɛlɛsinli nu Gyima Bɔkɔɔ: Bɔ mɔdenle yɛ wɔ azɛlɛsinli ne anu sua nu nee sua nu gyima dɔɔnwo mɔɔ ɛkɛhola la. Saa ɛlɛ azɛlɛsinli kpole a, mgbanyima ne mɔ bahola amaa wɔ anwosesebɛ kɛ ɛgyakyi tract ne ko ɛmaa menli mɔɔ wɔando bɛ wɔ sua nu wɔ mekɛ mɔɔ lumua la anu. Kakye kɛ ɛbava tract fofolɛ ne ko wɔamaa ɛ gɔnwo mɔ, ɛ nwo amra, sukulu nu anzɛɛ menli mɔɔ ɛta ɛ nee bɛ bɔ adawu la. Bie a ɛbahola wɔayɛ wɔ ngyehyɛleɛ boɛ na wɔayɛ adekpakyelɛ boavolɛ wɔ October anzɛɛ November anu. Ɛlɛ kakula anzɛɛ Baebolo sukoavo mɔɔ ɛlɛnyia sunsum nu anyunluhɔlɛ mɔɔ bahola aboka yɛ nwo yeamaa yɛayɛ gyima ɛhye kɛ nolobɔlɛnli mɔɔ bɛtɛsɔnenle ye la ɔ? Saa ɔle zɔ a, bɔ mgbanyima ne mɔ amaneɛ.
4 Mɔɔ Ɛbaha: Amaa menli dɔɔnwo ade edwɛkɛ ne bie la, ɔle kpalɛ kɛ ɛkɛha edwɛkɛ sikalɛ. Biza suamenle ne mɔ kpuyia nsia ne mɔɔ wɔ kɛlata ne anzi la anu ko ala na kile bɛ nwolɛ mualɛ mɔɔ wɔ tract ne anu la. Ɛhye kile kɛ ɔwɔ kɛ nolobɔlɛma kɔsɔɔti maa bɛ edwɛkɛ ne di bɛ azɛlɛsinli ne anu ngyianlɛ nwo gyima. Saa awie kile nwolɛ anyelielɛ a, yɛ ye nzonlɛ na sia kɔkpɔla ye. Wɔ dapɛne awieleɛ, yɛbava tract ne yɛaboka magazine fofolɛ mɔɔ wɔ ɛkɛ la anwo yɛamaa. Saa nolobɔlɛ ne ba awieleɛ wɔ November 16 a, yɛbava Baebolo ne Kilehile buluku ne yɛamaa. Yɛbava tract biala mɔɔ kɛha la yɛali gyima kɛ tract gyɛne mɔɔ wɔ ɛkɛ la.
5 Bɔ Baebolo Ɛzukoalɛ Bo: Bɛyɛ tract ɛhye kɛ bɛfa bɛaboa yɛ amaa yɛava yɛabɔ Baebolo ɛzukoalɛ bo. Saa ɛlɛkɔ wɔahɔkpɔla awie mɔɔ hilele nwolɛ anyelielɛ la a, ɛbahola wɔabiza ye kɛ, Baebolo ne anu nɔhalɛ boni a kyekyele ɔ rɛle anzɛɛ manle ɔ nwo dɔle ye a. Fa tract ne anzi ɛleka mɔɔ bɛyɛ Baebolo ɛzukoalɛ nwo ngyehyɛleɛ wɔ ɛkɛ la ko kile ye na maa ye Baebolo ne Kilehile buluku ne ko. Saa ɔkɛyɛ boɛ a, ɛ nee ye ɛzuzu tile mɔɔ ɔkɛkpa la anu ɛdendɛkpunli ko anzɛɛ nwiɔ anwo sikalɛ.
6 Gyihova ɛlɛkpondɛ menli mɔɔ bazonle ye wɔ “sunsum nu nee nɔhalɛ nu” la. (Dwɔn 4:23) Ɔrɛla ye kɛ yɛ muala yɛbava yɛ nwo yɛawula nolobɔlɛ titile ɛhye anu yɛaboa awie mɔ yɛamaa bɛanwu nɔhalɛ ne!