Mekɛ Boni A Ɔwɔ Kɛ Yɛyɛ Sia Kɔkpɔla A?
1. Duzu a ɛdoavolɛyɛlɛ kile a?
1 Menli mɔɔ yɛyɛ bɛ ɛdoavolɛma la kile kɛ ɔwɔ kɛ yɛsia yɛkɔ awie biala mɔɔ lɛ ɛhulolɛ kɛ ɔbazukoa Gyihova Belemgbunlililɛ ne anwo ngyehyɛleɛ ne la. (Mat. 28:19, 20) Mekɛ kpalɛ mɔɔ yɛbahola yɛahɔyɛ sia kɔkpɔla la gyi yɛ nee ahenle mɔɔ hilele nwolɛ anyelielɛ la ngyehyɛleɛ zo. Kɛmɔti a ɔwɔ kɛ yɛsia yɛkɔ ndɛndɛ wɔ mekɛ mɔɔ lumua mɔɔ yɛhɔle ɛkɛ la anzi ɛ?
2, 3. Duzu ati a ɔwɔ kɛ yɛbɔ mɔdenle yɛyɛ sia kɔkpɔla ndɛndɛ ɛ?
2 Kɛmɔti A Ɔwɔ Kɛ Yɛsia Yɛkɔ Ndɛndɛ Ɛ? ‘Belemgbunlililɛ ne anwo edwɛkpa nolobɔlɛ gyima ne’ awieleɛ ɛbikye, yɛɛ ɔnrɛhyɛ na ewiade ɛtane ɛhye ara awieleɛ. (Mat. 24:14; 1 Pita 4:7) Yemɔti, mekɛ mɔɔ “ngoanelielɛ kenle ne” tɛbɔ ɛkɛ maa menli mɔɔ anye die nɔhalɛ ne anwo la, ɔwɔ kɛ yɛtie folɛdulɛ ne mɔɔ se ‘yɛbɔ edwɛkɛ ne nolo na yɛzi zolɛ’ la, na mɔɔ boka ɛhye anwo la a le kɛ ɔwɔ kɛ yɛsia yɛkɔ ndɛndɛ na yɛmaa anyelielɛ ne mɔɔ bɛnyianle la nyia anyuhɔlɛ.—2 Kɔl. 6:1, 2; 2 Tem. 4:2.
3 Seetan anye ɛbolo kɛ ɔbazɛkye Belemgbunlililɛ ma biala mɔɔ yɛbalua wɔ anyelielɛnli bie ahonle nu la. (Mak. 4:14, 15) Menli mɔɔ kɛhile edwɛkɛ ne anwo anyelielɛ la abusua nu amra, bɛ gɔnwo mɔ gyimayɛvoma nee awie mɔ ta golo bɛ nwo. Saa yɛsia yɛkɔ bɛ ɛkɛ ndɛndɛ a, ɔboa ɔmaa yɛtoa adwelie mɔɔ yɛ nee bɛ lile la azo kolaa na awie mɔ azɛkye ye.
4. Kɛ ɔkɛyɛ na yɛayɛ sia kɔkpɔla nwo ngyehyɛleɛ wɔ kenle ne mɔɔ lumua la anu ɛ?
4 Yɛ Nwolɛ Ngyehyɛleɛ: Ɔle kpalɛ kɛ ɛbayɛ ngyehyɛleɛ fɔɔnwo mɔɔ bamaa wɔazia wɔahɔ ɛkɛ la kolaa na wɔavi ɛkɛ. Biza kpuyia mɔɔ ɛbabua wɔ sia kɔkpɔla ne anu la. Ɔwɔ kɛ yɛbɔ mɔdenle yɛkɛlɛ mekɛ ne nee ngyehyɛleɛ ne yɛto ɛkɛ. Saa wɔ ngyehyɛleɛ ne bamaa adenle a, biza ye saa aleɛ kye a ɛbahola wɔazia anzɛɛ ɔnle kɛ ɛkyɛ na wɔara a. Saa kenle mɔɔ ɛlumua ɛhɔle ɛkɛ la le dapɛne awieleɛ na ahenle yɛ gyima wɔ dapɛne ne anu a, bie a ɔ nye balie nwo kɛ ɛbarakpɔla ye wɔ dapɛne bieko awieleɛ. Saa ɛyɛ ngyehyɛleɛ bie a, nea kɛ ɛbali zolɛ.—Mat. 5:37.
5. Kɛzi yɛsia yɛkɔ ndɛndɛ a ɔbaboa yeamaa yɛayɛ gyima mɔɔ Gyisɛse ɛva ɛwula yɛ sa nu kɛ yɛyɛ menli ɛdoavolɛma la ɛ?
5 Yɛlɛ ndelebɛbo kpalɛ mɔɔ ɔti ɔwɔ kɛ yɛsia yɛkɔkpɔla menli mɔɔ kɛhile edwɛkpa ne anwo anyelielɛ la ndɛndɛ a. Yemɔti yɛ ngyehyɛleɛ na sia kɔ ndɛndɛ, ɔluakɛ “mekɛ ne ɛwie.” (1 Kɔl. 7:29) Saa yɛsia yɛkɔkpɔla menli mɔɔ kɛhile Belemgbunlililɛ nrɛlaleɛ ne anwo anyelielɛ la ndɛndɛ a, ɔbamaa yɛ mɔdenlebɔlɛ ne azo ma dɔɔnwo.