Anwoziezielɛ—Maa Yɛyɛ Sia Kɔkpɔla Kpalɛ
1. Adenle boni azo a ɛnee alumua Keleseɛnema daselɛlilɛ ne anu badɛlɛ a?
1 Gyisɛse tetele ye ɛdoavolɛma ne kpalɛ, amaa bɛayɛ ‘Belemgbunlililɛ ne anwo edwɛkpa ne’ nolobɔlɛma mɔɔ bɔ mɔdenle a. (Mat. 4:23; 9:35) Gyisɛse hilehilele bɛ wɔ mekɛ mɔɔ ɛnee ɔwɔ Palestine la. Noko akee, kolaa na Gyisɛse ahɔ anwuma la ɔlale ye ali kɛ bɛbadɛlɛ Keleseɛnema daselɛlilɛ gyima ne anu ‘bɛahɔ maanle ti nee maanle bo bamaa menli arayɛ ɛdoavolɛma.’—Mat. 28:19, 20.
2. Gyisɛse edwɛkɛ ne mɔɔ se ‘bɛmaa menli ɛrayɛ ɛdoavolɛma’ mɔɔ yɛtie la kile duzu?
2 Ɛnee zɔhane gyima ne kile kɛ bɛbazia bɛahɔ menli mɔɔ kɛhile Nyamenle Belemgbunlililɛ ne anwo edwɛkpa ne anwo anyelielɛ la ɛkɛ na bɛahilehile bɛ bɛamaa bɛali debie biala mɔɔ Kelaese ɛha ɛhile bɛ la azo. Amaa yɛahola yɛayɛ sia kɔkpɔla kpalɛ zɛhae la, ɔhyia kɛ yɛsiezie yɛ nwo kpalɛ.
3. Mekɛ mɔɔ lumua bɔbɔ la anu, kɛzi ɛbahola wɔabuke sia kɔkpɔla nwo adenle ɛ?
3 Dumua Yɛ Ngyehyɛleɛ: Nolobɔlɛma bie mɔ bɔ mɔdenle biza kpuyia wɔ mekɛ mɔɔ lumua mɔɔ bɛkɛhɔ awie ɛkɛ la anu na bɛbɔ ɛwɔkɛ kɛ bɛbazia bɛara na bɛazuzu mualɛ ne anwo. Bɛnwu kɛ bɛtwe adwenle bɛkɔ edwɛkɛ mɔɔ wɔ Baebolo ne Kilehile buluku ne anu la azo wɔ mekɛ mɔɔ bɛkɛyɛ sia kɔkpɔla la a ɔboa bɛ ɔmaa bɛyɛ Baebolo ɛzukoalɛ ndɛndɛ.
4. Duzu ati a ɔnle kɛ yɛmaa ɔkyɛ toonwo magazine fofolɛ ba na yɛayɛ sia kɔkpɔla ɛ?
4 Saa magazine ko ne ala a yɛvale yɛmanle ye wɔ siane ne anu a ɔngile kɛ ɔwɔ kɛ yɛkendɛ toonwo siane bieko ɛdeɛ ba na yeayɛ sia kɔkpɔla. Yɛbahola yɛ nee ye azuzu edwɛkɛ mɔɔ wɔ magazine mɔɔ ɔlɛ la anu la anwo na yɛamaa ɔ nye alie kpole.
5. Nvasoɛ boni a wɔ zo kɛ ɛkɛva bodane ɛkɛzie ɛ nye zo a?
5 Nyia Bodane: Kolaa na wɔazia wɔahɔ ɛkɛ la, fa mekɛ ekyi neɛnlea wɔ kɛlɛtokɛ ne anu na nwu mɔɔ ɛkulo kɛ ɛyɛ la. Kɛ neazo la, ɛ nee ye ɛzuzu edwɛkɛ mɔɔ wɔ buluku mɔɔ ɛvale ɛmanle ye la anwo. Anzɛɛ maa ye buluku mɔɔ fane edwɛkɛ mɔɔ bɛlumua bɛhanle la anwo. Saa ɛbizale ye kpuyia wɔ mekɛ mɔɔ ɛhɔle ɛkɛ la anu a, wɔ bodane a le kɛ ɛkɛye zɔhane kpuyia ne anloa. Ɛlɛsi ngɛlɛlera mɔɔ si edwɛkɛ bie azo la azo a bɔ mɔdenle kenga fi Baebolo ne anu fɔɔnwo.
6. Yɛlɛyɛ sia kɔkpɔla a, mɔɔ gyi yɛ nye zo la a le boni?
6 Mɔɔ Gyi Yɛ Nye zo: Nɔhalɛ nu, mɔɔ gyi yɛ nye zo la a le kɛ yɛbɔ Baebolo ɛzukoalɛ bo. Adiema nrenya ko yɛle sia kɔkpɔla kɛ ɔfa yeabɔ Baebolo ɛzukoalɛ bo, noko nrenya ne ammaa ye adenle. Adiema nrenya ne vale magazine fofolɛ ne ziale hɔle ɛkɛ na ɔhanle kɛ, “Kɛkala mɔɔ yɛwɔ ɛke la, yɛlɛye Baebolo kpuyia ko anloa yɛamaa menli ɛnɛ.” Ɔdiele nrenya ne edwɛkɛ ne ɔwiele la, adiema nrenya ne gengale ngɛlɛlera nee ɛdendɛkpunli ko mɔɔ fɛta la vile buluku mɔɔ bɛfa bɛyɛ Baebolo ɛzukoalɛ la anu. Ɛhye manle ɔ nee ye yɛle Baebolo ɛzukoalɛ dahuu.
7. Kɛzi ɛ nwo mɔɔ ɛsiezie ye kpalɛ la ɛboa ɛmaa wɔbɔ Baebolo ɛzukoalɛ bo ɛ?
7 Yɛnyia mekɛ yɛsiezie yɛ nwo na yɛkɔyɛ sia kɔkpɔla a ɔfɛta bɔkɔɔ. Yɛ nye balie kpole na yɛbanyia nwolɛ adenle yɛaboa ‘nuhua ne mɔɔ fɛta ngoane’ la yɛamaa balua ngoane adenle ne azo.—Gyi. 13:48.