Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Yɛ Sia Kɔkpɔla Nwo Ngyehyɛleɛ

Deɛmɔti Ɔhyia La: Saa yɛyia awie mɔɔ ɔ nye die edwɛkɛ ne anwo la a, yɛkpondɛ kɛ yɛkɔkpɔla ye ndɛndɛ wɔ mekɛ mɔɔ yɛbado ye wɔ sua nu la amaa yɛahola yɛagugua nɔhalɛ ma ne mɔɔ yɛluale la azo nzule. (1 Kɔl. 3:6) Ɛhye kile kɛ, fane dɔɔnwo ne ala saa yɛlɛfi ɛkɛ a, ɔwɔ kɛ yɛbiza ye mekɛ mɔɔ yɛzia yɛrɛla la yɛfa yɛyɛ sia kɔkpɔla nwo ngyehyɛleɛ. Eza ɔle kpalɛ kɛ yɛbaha kpuyia mɔɔ yɛba bieko a yɛbazuzu nwolɛ la yɛahile ye. Ɛhye bamaa suamenle ne anye ala kɛ yɛbara, na saa kpuyia ne anwo mualɛ wɔ buluku ne mɔɔ yɛvale yɛmanle ye la anu a, ɔ nye balie kɛ ɔbagenga. Saa ɛyɛ adawu bieko mɔɔ bɛbabɔ la anwo ngyehyɛleɛ a, ɔnrɛyɛ se kɛ ɛbazia wɔahɔ ɔluakɛ ɛze debie mɔɔ ɛkɔ wɔahɔha nwolɛ edwɛkɛ a, yɛɛ suamenle ne noko ze mɔɔ ɛ nee ye ɛlɛba a. Saa yɛkɔto ye a, yɛbahola yɛaha kɛ, yɛra kɛ yɛba yɛarabua kpuyia ne mɔɔ yɛbizale la na akee toa zo.

Kɛzi Bɛyɛ Ye La:

Saa ɛlɛsiezie edwɛkɛ mɔɔ ɛbaha wɔ azua nu la a, eza siezie kpuyia mɔɔ ɛba bieko a ɛbabua la. Kpuyia ne bahola agyinla buluku mɔɔ ɛlɛfa wɔamaa kenle zɔhane la azo, anzɛɛ kpuyia mɔɔ nwolɛ mualɛ ne wɔ mbuluku mɔɔ yɛfa yɛyɛ debiezukoalɛ mɔɔ saa ɛsia ɛkɔ a ɛbahola wɔava wɔahile ye la anu.
Saa ɛ ne awie mɔɔ ɔ nye liele edwɛkɛ ne anwo la tendɛ na ɛlɛdwula wɔ edwɛkɛ ne a, maa ɔnwu ye kɛ ɛkulo kɛ ɛsia ɛba na akee ka kpuyia ne mɔɔ wɔziezie kɛ ɛba bieko a ɛ nee ye bazuzu nwolɛ la kile ye. Wɔ azɛlɛsinli bie mɔ anu, menli ɛnlɛ alagye fee yemɔti bɛnrɛhulo kɛ bɛ nee wɔ bayɛ ngyehyɛleɛ kɛ ɛzia ɛrɛla. Saa ɔba ye zɔ a, ɛbahola wɔabiza ye kɛ: “Meba mekɛ zɛhae biala a mebado wɔ wɔ sua nu ɔ? [Maa ɔbua.] Mebahulo kɛ saa meba ɛke dapɛne bieko a, mefa wɔ ɛke na mebua kpuyia ɛhye . . . Saa meba na ɛnrɛnyia alagye a, ɛbahola wɔaha.”
Saa ɛkile suamenle ne mekɛ fɔɔnwo bie kɛ ɛbazia wɔara a, kɔ. (Mat. 5:37) Saa ɛwie wɔ ɛkpɔlalɛ ne a, maa ɔnwu debie bieko mɔɔ ɛba a bɛbazukoa la.

Sɔ Ɛhye Nea Wɔ Siane Ɛhye Anu:

Saa ɛlɛsiezie edwɛkɛ mɔɔ ɛbaha la a, eza siezie kpuyia mɔɔ ɛba bieko a ɛbabua la. Ka nwolɛ edwɛkɛ kile nolobɔlɛma mɔɔ ɛ nee bɛ lua la.