Ngakyelɛlilɛ ne Anwo Nolobɔlɛ Titile!
1. Ɔvi March 21, 2009, mɔɔ kɔ la, duzu a Belemgbunlililɛ nolobɔlɛma bɛayɛ a, na duzu ati ɔ?
1 Wɔ Kule, April 9, 2009, Gyihova Nyamenle azonvolɛ mɔɔ wɔ ewiade amuala la bayia nu ahakye ɛlɔlɛ kpole kpalɛ mɔɔ Nyamenle ɛhile ɛmaa alesama la. (Wulo. 5:6-8) Yɛ nye la ɛsesebɛ kɛ anyelielɛma mgbe mgbe dɔɔnwo baboka yɛ nwo wɔ mekɛ mɔɔ yɛlɛkakye Gyisɛse ewule ne la. Ɔvi March 21 mɔɔ kɔ la, yɛbava ɛsalɛdolɛ kɛlata titile yɛavɛlɛ menli wɔ ewiade amuala yɛamaa bɛara Ngakyelɛlilɛ ne bie.
2. Saa ɛlɛfa ɛsalɛdolɛ kɛlata ne wɔamaa a, duzu a ɔwɔ kɛ ɛkakye a?
2 Mɔɔ Ɔwɔ Kɛ Ɛkakye: Fa nvoninli, kpuyia nee ngɛlɛlera mɔɔ wɔ ɛsalɛdolɛ kɛlata ne anu la di gyima kpalɛ. Kɛ neazo la, ɛbahola wɔahwe adwenle wɔahɔ nvoninli mɔɔ wɔ kɛlata ne azo la azo na wɔaha kɛ: “Mekulo kɛ meto ɛsalɛ mefɛlɛ wɔ kɛ ɛrɛla ɛmaa yɛhakye Gyisɛse ewule ne mɔɔ bɛbayɛ ye Kule, April 9, 2009 la.” Akee twe adwenle kɔ ɛsalɛdolɛ kɛlata ne edwɛkɛtile ne nee kpuyia ne mɔ mɔɔ wɔ ɔ bo la azo. Maa suamenle ne ɛnwu ye kɛ ɔbahola yeado ɛsalɛ yɛavɛlɛ ye abusua nee menli mɔɔ ɔkulo kɛ ɔ nee bɛ ba la.
3. Kɛzi ɛbahola wɔadoa ɛsalɛ mɔɔ ɛdole wɔ nolobɔlɛ ne mɔlebɛbo la azo ɛ?
3 Saa bɛ asafo ne lɛ azɛlɛsinli kpole a, mgbanyima ne mɔ bahola aha kɛ bɛgyakyi kɛlata ne bie bɛmaa menli mɔɔ bɛnle sua nu la. Wɔ dapɛne awieleɛ, fa magazine ne boka ɛsalɛdolɛ kɛlata ne anwo maa. Fa sie ɛ nyunlu kɛ ɛbado ɛsalɛ wɔavɛlɛ awie mɔɔ ɛbazia wɔahɔkpɔla ye, Baebolo sukoavoma, ɛ nwo amra, ɛ gɔnwo mɔ sukuluma nee gyimayɛvoma, menli mɔɔ ɛ nee bɛ de nee awie mɔ gyɛne mɔɔ ɛze bɛ la. Ɛkenle ɛvolɛ ne, adiema raalɛ ko dole ɛsalɛ vɛlɛle ɔ nwo amra 30 na ɛnee ɔta ɔkakye bɛ nvasoɛ mɔɔ wɔ mekɛ ɛhye azo la. Nea kɛzi ɔ nye liele kɛ bɛ nuhua 25 rale bie na nzinlii nuhua 4 manle bɛ nee bɛ zukoale Baebolo ne la ɛ!
4. Duzu a ɔwɔ kɛ ɛsiezie ɛ nwo ɛnɛ kɛ ɛbayɛ a, na kɛmɔti ɛ?
4 Siezie Ɛ Nwo Ɛnɛ: Nolobɔlɛma dɔɔnwo bahola ahɔ daselɛlilɛ dɔɔnwo wɔ March nee April anu. Saa ɛlɛ ngakula anzɛɛ Baebolo sukoavoma mɔɔ ɛlɛnyia anyuhɔlɛ kpalɛ a, ɛhye le mekɛ kɛnlɛma mɔɔ bɛbahola bɛayɛ nolobɔlɛma mɔɔ bɛtɛsɔnenle bɛ a. Ɛnɛ a le mekɛ mɔɔ ɔwɔ kɛ ɛsiezie ɛ nwo kɛ ɛbayɛ dɔɔnwo wɔ nolo mɔɔ bɛlɛbɔ bɛava bɛahakye ɛlɔlɛ kpole mɔɔ bɛla ye ali la anu a.—Dwɔn 3:16; 15:13.