Ngakyelɛlilɛ Ne Anwo Nolobɔlɛ Ne Babɔ Ɔ Bo March 17
1. Nolobɔlɛ boni a babɔ ɔ bo wɔ March 17 a?
1 Ɛvolɛ biala Ngakyelɛlilɛ ɛvoyia ne maa yɛbɔ Gyisɛse ewule ne nolo. (1 Kɔl. 11:26) Ɛhye ati, yɛkpondɛ kɛ awie mɔ baboka yɛ nwo na yɛtie ɛkpɔnedeɛ ahyɛlɛdeɛ ne mɔɔ Gyihova vi ɛlɔlɛ nu vale manle la anwo edwɛkɛ. (Dwɔn 3:16) Ɛvolɛ ɛhye ɛsalɛ mɔɔ yɛbado yɛavɛlɛ menli kɛ bɛrɛla Ngakyelɛlilɛ ne bie la babɔ ɔ bo wɔ Folɛ, March 17. Ɛ nye la kɛ ɛbayɛ dɔɔnwo ɔ?
2. Duzu a yɛbaha na yɛava ɛsalɛdolɛ kɛlata ne yɛamaa a?
2 Mɔɔ Yɛbaha La: Ɔle kpalɛ kɛ yɛbaha edwɛkɛ sikalɛ. Yɛbahola yɛaha kɛ: “Ahye o. Yɛkulo kɛ yɛfa Ngakyelɛlilɛ mɔɔ bɛbayɛ ye ewiade amuala wɔ April 5 la anwo ɛsalɛdolɛ kɛlata yɛmaa wɔ abusua ne. Bɛbamaa Baebolo nu ɛdendɛlɛ mɔɔ bɛnlie nwolɛ ɛhwee la bɛava bɛahilehile mɔɔ Gyisɛse ewule ne yɛle nee mɔɔ ɔlɛyɛ ye ɛnɛ la anu. Ɛsalɛdolɛ kɛlata ɛhye bamaa wɔanwu mekɛ nee ɛleka mɔɔ yɛbayɛ ye la.” Saa yɛlɛfa ɛsalɛdolɛ kɛlata ne yɛamaa wɔ dapɛne awieleɛ a, ɔwɔ kɛ yɛfa magazine noko yɛmaa.
3. Kɛ ɔkɛyɛ na yɛado ɛsalɛ yɛavɛlɛ menli dɔɔnwo ɛ?
3 To Ɛsalɛ Fɛlɛ Menli Dɔɔnwo: Yɛ bodane a le kɛ yɛto ɛsalɛ yɛavɛlɛ menli dodo biala mɔɔ yɛkɛhola la. Yemɔti, bɔ mɔdenle to ɛsalɛ fɛlɛ wɔ Baebolo sukoavoma, menli mɔɔ ɛsia ɛkɔkpɔla bɛ, wɔ mbusua, ɛ gɔnwo mɔ gyimayɛvoma nee sukuluma, wɔ kpalɛzoamra yɛɛ menli gyɛne mɔɔ ɛze bɛ la. Asafo ne anu mgbanyima bahile kɛzi bɛbayɛ azɛlɛsinli ne anu gyima la. Ɛvolɛ biala Ngakyelɛlilɛ nolobɔlɛ ne so maa dɔɔnwo. Mekɛ mɔɔ raalɛ ko hɔle bie ɛkenle ɛvolɛ ne la, awie mɔɔ die nyɛvolɛ la yɛle kɛ ɔboa ye yeamaa yeanwu nolobɔlɛnli ne mɔɔ dole ɛsalɛ vɛlɛle ye la. Noko akee, raalɛ ne hanle kɛ ɔnze awie biala wɔ ɛkɛ na awie mɔɔ ɛnee ɔlɛkɔ daselɛlilɛ wɔ azua nu nwonlomɔ ne la a vale ɛsalɛdolɛ ne manle ye a.
4. Ninyɛne boni mɔ ati a ɛkulo kɛ ɛbɔ mɔdenle kpalɛ wɔ nolobɔlɛ ne anu a?
4 Bie a ɛsalɛdolɛ kɛlata mɔɔ ɛvale ɛmanle awie la bamaa yeara bɛ Ngakyelɛlilɛ ne bie. Saa awie die anzɛɛ yeanlie bɔbɔ a, wɔ mɔdenlebɔlɛ ne bali daselɛ. Ɛsalɛdolɛ kɛlata ne mɔɔ ɛbava wɔamaa la babɔ ye nolo kɛ kɛkala Gyisɛse le Belemgbunli mɔɔ lɛ tumi. Wɔ mɔdenlebɔlɛ ne bamaa awie biala—bɛdabɛ mɔɔ bɛwɔ wɔ azɛlɛsinli ne anu, ɛ gɔnwo mɔ nolobɔlɛma, yɛɛ mɔɔ hyia kpalɛ la, Gyihova—anwu kɛ ɛ nye sɔ ɛkpɔnedeɛ ahyɛlɛdeɛ ne kpole kpalɛ.—Kɔl. 3:15.