Ɔfese Kɛlata

Belemgbunlililɛ Nolobɔlɛma:

Ɛvolɛ dɔɔnwo mɔɔ ɛze ɛhɔ la anu, mediema dɔɔnwo ɛnyia nvasoɛ ɛvi sukulu mɔɔ Gyihova, yɛ Kilehilevolɛ Kpole ne ɛlua ye ahyehyɛdeɛ ne azo ɛde kɛ ɔfa yeatete edwɛkpa ne anwo nolobɔlɛma la azo. (Aye. 48:17, 18) Kɛ neazo la, bɛyɛ Teokelase Ɛzonlenlɛ Sukulu nee sukulu mɔɔ bɛfa bɛsukoa ɛgengalɛ nee ɛhɛlɛlɛ la bɛva bɛboa menli mɔɔ bɛle fofolɛ nee bɛdabɛ mɔɔ bɛngola kenga anzɛɛ bɛnze debie kɛlɛ la.

Bieko, Adekpakyelɛ Ɛzonlenlɛ Sukulu, Azonvolɛ Ndetelɛ Sukulu, Belemgbunlililɛ Ɛzonlenlɛ Sukulu, yɛɛ Neavolɛ Adenduvoma Sukulu ɛhɔ zo ɛva ndetelɛ mɔɔ baboa asafo ne mɔ la ɛmaa. Akee yɛfa anyelielɛ yɛabɔ bɛ amaneɛ kɛ bɛbɔ sukulu fofolɛ bie abo wɔ United States.

Edwɛkɛ mɔɔ bɛhanle ye wɔ Brooklyn Bɛtɛle wɔ Kenlenzile nwonlomɔ, February 4, 2008, la manle bɛvale anyelielɛ bɛbɔle bɛ sa nu. Edwɛkɛ ne kenga ye kɛ, “Wɔ dapɛne awieleɛ mɔɔ ɛze ɛhɔ la anu, ebianutɛnlavolɛma mɔɔ vi asafo ngakyile mɔɔ wɔ United States la ɛra . . . kɛ bɛkɔ Asafo Mgbanyima Sukulu mɔɔ lumua la.” Debie mɔɔ bɛsukoa wɔ sukulu ne anu kɛkala la ka ebianutɛnlavolɛma gyima ngakyile mɔɔ bɛyɛ la anwo edwɛkɛ na ɔbaboa bɛ yeamaa bɛali bɛ asafo ne ngyianlɛ nwo gyima kpalɛ.—Gyi. 20:28.

Sukoavoma ne nee Bɛtɛle abusua ne nyia agɔnwolɛvalɛ, bɛkɔ alehyenlɛ ne anu tɛkese ne mɔɔ bɛyɛ la bie yɛɛ Bɛtɛle abusua ne Watchtower Ɛzukoalɛ mɔɔ bɛyɛ ye Kenlenzile nɔsolɛ biala la. Wɔ sukulu ne kenle mɔɔ li awieleɛ la anu, United States Ɔfese Kɔmatii ne nee Neazo Eku ne anu sonla ko maa ɛdendɛlɛ titile bie mɔ. Yɛ nye die ngyehyɛleɛ ɛhye mɔɔ vi ɛlɔlɛ nu la anwo na yɛ nye la kɛ wɔ mekɛ mɔɔ fɛta la anu bɛbayɛ bie wɔ yɛ maanle ye anu.

Bɛ mediema,

Ghana Ɔfese