Duzu A Bɛyɛ Ye Wɔ Ɔfese Ɛkɛ A?

Bɛtɛle abusua ne anu amra yɛ gyima ngakyile, na bɛnea edwɛkɛhanlɛ gyima ne azo wɔ maanle ko anzɛɛ dɔɔnwo anu. Bie a bɛkile edwɛkɛ bo, bɛpelente magazine, bɛsiezie mbuluku, bɛwɔ ɛleka mɔɔ bɛfa mbuluku bɛsie, bɛyɛ gyima wɔ ɔdio/vidio anzɛɛ bɛyɛ ninyɛne gyɛne bɛfa bɛboa wɔ ɛleka mɔɔ bɛwɔ la.

Ɔfese Kɔmatii a nea gyima ne azo a. Neazo Eku ne fa ɔfese biala gyimayɛlɛ wula Ɔfese Kɔmatii mɔɔ mediema mgbanyima nsa anzɛɛ dɔɔnwo mɔɔ bɔ mɔdenle a wɔ nu la asa anu. Kɔmatii ne ka kɛzi gyima ne ɛlɛkɔ zo wɔ ɛleka biala mɔɔ ɔnea zolɛ nee ngyegyelɛ biala mɔɔ kɛra la anwo edwɛkɛ kile Neazo Eku ne. Amaneɛbɔlɛ zɛhae boa Neazo Eku ne maa ɔsi debie mɔɔ ɔwɔ kɛ bɛka nwolɛ edwɛkɛ kenle bie wɔ mbuluku nu, na bɛsukoa ye wɔ debiezukoalɛ nee nyianu bo la anwo kpɔkɛ. Bɛsoa menli mɔɔ gyi Neazo Eku ne agyakɛ anu la bɛmaa bɛkɔkpɔla ɔfese ne mɔ na bɛfa adehilelɛ bɛmaa Ɔfese Kɔmatii ne mɔ wɔ kɛzi bɛbayɛ bɛ gyima ne la anwo. (Mrɛlɛbulɛ 11:14) Bɛyɛ ngyehyɛleɛ titili bɛmaa menli mɔɔ wɔ ɔfese ne azɛlɛsinli ne anu la tie ɛdendɛlɛ mɔɔ gyima ne ati agyakɛnugyinlavolɛ ne maa la na ɔdua zo ɔmaa bɛ anwosesebɛ.

Bɛboa asafo ne mɔ mɔɔ wɔ bɛ ɛkɛ ne la. Mediema mɔɔ di ninyɛne nwo gyima wɔ ɔfese ɛkɛ la nea maa bɛte asafo fofolɛ. Mediema mɔɔ wɔ ɛkɛ la nea adekpakyelɛma, edwɛkpatɛlɛvolɛma yɛɛ maangyebakyi zo neavolɛma mɔɔ sonle wɔ bɛ azɛlɛsinli ne anu la gyima zo. Bɛyɛ nyianu ngakyile nwo ngyehyɛleɛ, bɛnea bɛmaa bɛsi Belemgbunlililɛ Asalo fofolɛ, na bɛnea kɛ asafo ne mɔ asa baha mbuluku mɔɔ bɛhyia la. Gyima mɔɔ bɛyɛ wɔ Bɛtɛle la kɔsɔɔti boa maa edwɛkɛhanlɛ gyima ne kɔ zo pɛpɛɛpɛ.​—1 Kɔlentema 14:33, 40.

• Kɛzi Ɔfese Kɔmatii ne mɔ boa Neazo Eku ne ɛ?

• Gyima boni a bɛyɛ wɔ Bɛtɛle a?