Ɔwɔ Kɛ Yɛbɔ Mɔdenle wɔ Daselɛlilɛ Nu
1 Ɔvi 1992 mɔɔ ba la, ɛvolɛ biala Gyihova Alasevolɛ ɛbɔ mɔdenle ɛva dɔnehwele mɔɔ bo mgbe mgbe ko la ɛyɛ ewiade amuala Belemgbunlililɛ nolobɔlɛ nee ɛdoavolɛyɛlɛ gyima ne. Nea kɛzi yɛ nye die kɛ yɛbɔ mɔdenle ekyi wɔ gyima kpole ɛhye mɔɔ bɛyɛ la anu a!—Mat. 28:19, 20.
2 Nɔhalɛ nu, nwolɛ nganvolɛ nee ayɛlɛyelɛ kɔsɔɔti le Gyihova, mɔɔ ɛwula yɛ anwosesebɛ wɔ yɛ ɛzonlenlɛ gyima ne anu wɔ “awieleɛ mekɛ” ɛhye anu la ɛdeɛ. (2 Tem. 3:1) Duzu a ɔwɔ kɛ yɛyɛ amaa yɛahola yɛahɔ zo yɛabɔ mɔdenle wɔ gyima ɛhye mɔɔ hyia la anu a?
3 Deɛmɔti Yɛbɔ Mɔdenle: Nyamenle nee yɛ gɔnwo sonla nwo ɛlɔlɛ kpole yɛɛ ɛhulolɛ mɔɔ yɛlɛ kɛ yɛfi ahonle nu yɛabɔ yɛ nwo zo mɔɔ yɛyila anwo ɛbɛla la a ka yɛ wɔ yɛ Belemgbunlililɛ gyima ne anu a. (Mat. 22:37-39; 1 Dwɔn 5:3) Ɛlɔlɛ ka yɛ maa yɛfa ninyɛne yɛbɔ afɔle amaa yɛahola yɛava yɛ nwo yɛawula nolobɔlɛ gyima ne anu kpalɛ.—Luku 9:23.
4 Kɔ zo Bɔ Mɔdenle: Yɛ kpɔvolɛ Abɔnsam bɔ mɔdenle biala kɛ ɔbamaa yɛ sa nu ado wɔ ɛzonlenlɛ gyima ne anu. Anyetele mɔɔ bɛyɛ wɔ azɛlɛsinli ne anu, ewiade ɛhye anu ninyɛne mɔɔ twehwe adwenle, alehyenlɛ biala anu ngyegyelɛ nee yɛ kpɔkɛdelɛ mɔɔ ɛlɛsɛkye la a le ninyɛne mɔɔ ɔbɔ mɔdenle ɔfa ɔdi gyima kɛ ɔmaa yɛ sa nu ado a.
5 Ɛhye ati, ɔwɔ kɛ yɛmaa yɛ mɔdenlebɔlɛ ne kɔ zo tɛnla ɛkɛ. Ɔhyia kɛ yɛnyia ‘alumua ɛhulolɛ ne’ mɔɔ ɛnee yɛlɛ la. Ɛhye kile kɛ ɔwɔ kɛ yɛkenga Nyamenle Edwɛkɛ, Baebolo ne dahuu, yɛdwenledwenle nwolɛ na yɛmaa sunsum nu nziezielɛ mɔɔ ‘akɛlɛ nɔhavo nee nrɛlɛbɛvolɛ ne’ ɛyɛ la boa yɛ.—Yek. 2:4; Mat. 24:45; Edw. 119:97.
6 Kɛmɔ Baebolo ne anu ngapezo ne mɔ ɛmaa yela ali wienyi la, Gyihova kenle ne mɔɔ ɔbava yeazɛkye ɛtanevolɛma la ɛlɛbikye ndɛndɛ. (2 Pit. 2:3; 3:10) Mekɛ mɔɔ ɛhye wɔ yɛ adwenle nu bɔkɔɔ la, bɛmaa yɛhɔ zo yɛbɔ mɔdenle wɔ ɛzonlenlɛ gyima ne anu, na yɛyɛ dɔɔnwo wɔ ewiade amuala Belemgbunlililɛ nolobɔlɛ nee ɛdoavolɛyɛlɛ gyima ne mɔɔ ɛlɛkɔ zo ɛnɛ la anu!