“Bɛyɛ Gyima Ɛsesebɛ Wɔ Sunsum Nu”
1. Subane boni a ɔwɔ kɛ ɔda ali wɔ yɛ daselɛlilɛ ne anwo a?
1 Ɔnle kɛ yɛ Keleseɛne ɛzonlenlɛ gyima ne foa biala gyinla ɛleka ko. Emomu, bɛmaa yɛ anwosesebɛ kɛ: ‘bɛyɛ gyima ɛsesebɛ wɔ sunsum nu’ na ‘bɛzonle Gyihova.’ (Wulo. 12:11) Noko akee, ninyɛne dɔɔnwo ne ala wɔ ɛkɛ mɔɔ bahola amaa mɔdenle mɔɔ yɛlɛfa yɛayɛ yɛ ɛzonlenlɛ gyima ne la aha aze a. Kɛ ɔkɛyɛ na yɛava mɔdenlebɔlɛ nee anyelielɛ mɔɔ yɛlɛ wɔ Belemgbunlililɛ ɛzonlenlɛ ne anwo la yɛayɛ “gyima” ɛ?—2 Tem. 1:6, 7.
2. Koyɛlɛ boni a wɔ bɛ ti anwo Baebolo ɛzukoalɛ nee mɔdenlebɔlɛ mɔɔ bɛfa bɛyɛ ɛzonlenlɛ gyima ne la avinli a?
2 Bɛ Ti Anwo Baebolo Ɛzukoalɛ: Belemgbunlililɛ nolobɔlɛnli mɔɔ bɔ mɔdenle la a le awie mɔɔ kulo Nyamenle mɛla ne, na nɔhalɛ ne mɔɔ wɔ nu la ka ye ahonle la. (Edw. 119:97) Saa yɛlɛyɛ yɛ ti anwo debiezukoalɛ na yɛnwu Baebolo ne anu ninyɛne mɔɔ sonle bolɛ la a, ɔka yɛ ahonle na ɔmaa yɛ mɔdenlebɔlɛ ne anu mia. Ɛhulolɛ mɔɔ yɛlɛ yɛmaa Ahenle mɔɔ ɛva nɔhalɛ ɛhye mɔ ɛmaa yɛ nee ɛhulolɛ mɔɔ yɛlɛ kɛ yɛbɔ edwɛkpa ne nolo yɛahile awie mɔ la maa yɛye Nyamenle ayɛlɛ na yɛbɔ ye duma wɔ bagua nu. (Hib. 13:15) Ɔda ali wienyi kɛ, saa yɛfa mɔdenlebɔlɛ yɛbɔ edwɛkpa ne nolo a, ɔda anyezɔlɛ mɔɔ yɛlɛ yɛmaa nvasoɛ mɔɔ wɔ zo la ali.
3. Kɛzi Nyamenle sunsum ne bahola aboa wɔ yɛ ɛzonlenlɛ gyima ne anu ɛ?
3 Biza Nyamenle Sunsum Ne: Mɔdenlebɔlɛ mɔɔ yɛbava yɛayɛ ɛzonlenlɛ gyima ne la ɛngyi yɛ anwosesebɛ zo. Mɔdenlebɔlɛ kpalɛ vi Nyamenle sunsum ne ɛkɛ. (1 Pita 4:11) Saa yɛbikye Ahenle ne mɔɔ “tumi kpole” ne vi ye la a, ɔbamaa yɛanyia sunsum nu anwosesebɛ yɛava yɛali daselɛ akɛnrasesebɛ zo. (Aye. 40:26, 29-31) Mekɛ mɔɔ ɛzoanvolɛ Pɔɔlo yiale ngyegyelɛ wɔ ye ɛzonlenlɛ gyima ne anu la, ɔnyianle “Nyamenle moalɛ.” (Gyi. 26:21, 22) Gyihova sunsum nwuanzanwuanza ne mɔɔ maa anwosesebɛ la bahola aboa yeamaa yɛayɛ gyima ɛsesebɛ wɔ sunsum nu, yemɔti ɔwɔ kɛ yɛyɛ nwolɛ asɔne.—Luku 11:9-13.
4. Debie kpalɛ boni a mɔdenlebɔlɛ kola fa ba a, na kɛzi ɔwɔ kɛ yɛnea boɛ wɔ nwolɛ ɛ?
4 Saa yɛfa mɔdenlebɔlɛ yɛbɔ Belemgbunlililɛ ne nolo a, ɔta ɔka yɛ gɔnwo mɔ Keleseɛnema ɔmaa bɛdabɛ noko bɛbɔ mɔdenle kpalɛ. (2 Kɔl. 9:2) Wɔ azɛlɛsinli ne anu, menli ta tie edwɛkɛ mɔɔ bɛfa anyelielɛ bɛka ye wɔ anyebolo zo la. Noko akee, ɔwɔ kɛ dahuu yɛfa bɛtɛɛyɛlɛ yɛboka yɛ mɔdenlebɔlɛ ne anwo. (Tae. 3:2) Ɔwɔ kɛ dahuu yɛbɔ mɔdenle yɛbu edwɛkɛ mɔɔ suamenle kɛha la na yɛdi ye eni.
5. Folɛdulɛ mɔɔ vi sunsum nu la boni a ɔwɔ kɛ yɛbɔ mɔdenle yɛfa yɛdi gyima a?
5 Kɛ Belemgbunlililɛ nolobɔlɛma la, ɔrɛla ye kɛ dahuu ‘yɛbayɛ gyima ɛsesebɛ wɔ sunsum nu.’ Bɛmaa yɛlua bɛ ti anwo Baebolo ɛzukoalɛ zo yɛzɛlɛ Gyihova mɔɔ maa yɛnyia sunsum nwuanzanwuanza ne tumi la na yɛva yɛzukoa mɔdenlebɔlɛ. Saa yɛyɛ zɔ a, yɛbahola yɛava “sunsum nwuanzanwuanza ne nee ye nɔhalɛ ne anwo adwenle mɔɔ si pi” la yɛabɔ mɔdenle yɛayɛ yɛ ɛzonlenlɛ gyima ne.—1 Tɛs. 1:5.