Ɔfese Kɛlata

Belemgbunlililɛ Nolobɔlɛma Alɔvolɛ:

Yɛ nye die kɛ yɛnwu anyuhɔlɛ wɔ Ghana gyima ne anu wɔ 2007 ɛzonlenlɛ ɛvolɛ ne anu a! Yɛyɛle gyima dɔɔnwo wɔ April siane ne anu, na ɛhye manle yɛnyianle nolobɔlɛma mɔɔ tɛla biala 83,293, adekpakyelɛ boavolɛma 9,109 yɛɛ sua nu Baebolo ɛzukoalɛ 218,180. Menli dodo 284,245 mɔɔ rale Ngakyelɛlilɛ ne bie la noko ɛnee le mɔɔ tɛla biala.

Bɛyɛle Azonvolɛ Ndetelɛ Sukulu nsa mɔɔ sukoavoma mɔɔ vi Benin, Côte d’Ivoire, Ghana, Liberia, Sierra Leone, yɛɛ Togo la a hɔle la wɔ ɛzonlenlɛ ɛvolɛ ne anu. Mediema ɛhye mɔ ɛlɛbɔ mɔdenle kpalɛ wɔ azɛlɛsinli ne mɔ mɔɔ bɛlɛyɛ nuhua gyima la anu. Yɛwula mgbavolɛ kɔsɔɔti anwosesebɛ kɛ bɛva bɛ nwo bɛwula teokelase ndetelɛ kɛnlɛma ɛhye, mɔɔ tɛla ewiade ye anu ɛdeɛ anzɛɛ gyimayɛlɛ biala la anu. (Aye. 48:17; 1 Kɔl. 1:19-21) Yɛ nye sɔ ndoloboa mɔɔ bɛkɔ zo bɛye bɛboa ewiade amuala gyima ne mɔɔ eza boa maa bɛyɛ sukulu ɛhye wɔ Ghana la kpalɛ.

Asɛɛ bɛhyehyɛle Belemgbunlililɛ Nrɛlaleɛ Mɔɔ tɔ zo 37 “Adalɛ Ɛzonlenlɛ Awieleɛ Ɛbikye!” mgbe nsa wɔ Ghana. Ngakula nee mgbanyinli vale anyelielɛ hyehyɛle tract ne wɔ ɛleka biala. Gyima ɛhye mɔ bodane a le kɛ bɛboa ahonle kpalɛma bɛamaa bɛanwu mɔɔ Baebolo ne kilehile amgba la. (Mat. 28:19, 20) Mekɛ mɔɔ bɛlɛka edwɛkɛ ne la, bɛyɛ menli mɔɔ anye kɛlie nwolɛ la nzonlɛ na bɛzia bɛhɔkpɔla bɛ kɛ bɛ nee bɛ kayɛ Baebolo ɛzukoalɛ. Ɔyɛ yɛ fɛ kɛ yɛ nee bɛ ɛlɛbɔ nu ayɛ gyima ɛhye mɔɔ hyia la, na yɛfa yɛ Keleseɛne ɛlɔlɛ kpole yɛbiza bɛ.

Bɛ mediema,

Ghana Ɔfese