Ɔwɔ kɛ Yɛyɛ Dɔɔnwo wɔ Yɛ Ɛzonlenlɛ Gyima ne Anu
1 Ɛzoanvolɛ Pɔɔlo dule Keleseɛnema folɛ kɛ bɛlua Nyamenle adenle ne anu na “[bɛhɔ zo] bɛyɛ ye molozo.” (1 Tɛs. 4:1) Duzu a ɛhye kile maa yɛ a? Debie ko a le kɛ ɔwɔ kɛ yɛkɔ zo yɛkpondɛ ndenle yɛdua zo yɛyɛ sunsum nu gyima dɔɔnwo na yɛbɔ mɔdenle kɛ dahuu yɛbayɛ ‘yɛ Nyamenle gyima ne bɔkɔɔ.’—2 Tem. 4:5.
2 Bodane: Ɛhulolɛ mɔɔ yɛlɛ kɛ yɛsonle yɛ Bɔvolɛ ne kpalɛ la a baha yɛ amaa yɛayɛ dɔɔnwo wɔ yɛ ɛzonlenlɛ gyima ne anu a. Yɛkulo kɛ yɛnyi wɔ sunsum nu na yɛkpondɛ ndenle yɛdua zo yɛmaa yɛ ɛzonlenlɛ gyima ne nyia anyuhɔlɛ. Ngyehyɛleɛ nee bodane kpalɛ baboa yɛ amaa yɛadwu teokelase ninyɛne mɔɔ yɛfa yɛsie yɛ nyunlu la anwo.—Edw. 1:1, 2; Fel. 4:6; Hib. 10:24, 25.
3 Saa yɛbahola yɛayɛ dɔɔnwo wɔ yɛ ɛzonlenlɛ gyima ne anu a, ɔhyia kɛ yɛnyia tunwomaa sunsum. Yɛbahola yɛanyia sunsum zɛhae, ɔlua Gyisɛse neazo kɛnlɛma ne mɔɔ yɛbava asɔneyɛlɛ yɛazuzu nwolɛ la azo. (Mat. 20:28) Gyisɛse anye liele kpole kɛ ɔzonlenle awie mɔ wɔ ye ɛzonlenlɛ gyima ne kɔsɔɔti anu la. (Gyi. 20:35) Yɛbahola yɛazukoa Gyisɛse, ɔlua menli mɔɔ yɛbamaa yɛ nye alie bɛ nwo na yɛamaa yɛ nye ala kɛ yɛkɛlua adenle ngakyile zo yɛkɛyɛ dɔɔnwo wɔ yɛ ɛzonlenlɛ gyima ne anu la azo.—Aye. 6:8.
4 Awovolɛ Gyima: Bɛkola bɛfa ɛhulolɛ mɔɔ maa yɛsonle awie mɔ na yɛbuke yɛ ɛzonlenlɛ gyima ne anu la bɛwula ngakula adwenle nu wɔ mɔlebɛbo ne ala. Ngakula bayɛ mɔdenle mɔɔ abusua ne anu amra bɔ nee kɛzi bɛyɛ dɔɔnwo wɔ bɛ ɛzonlenlɛ gyima ne anu la nzonlɛ. Bɛwulale adiema nrenya ko anwosesebɛ bɛmanle ɔyɛle dɔɔnwo wɔ mekɛ mɔɔ ɔle kpavolɛ la, ɔlua ye nenya mɔɔ ɔ nee ye yɛle asafo gyima ngakyile la azo. Ye nenya ne mɔdenlebɔlɛ nee anyelielɛ mɔɔ ɛnee ɔlɛ la hanle ye manle ɔkpondɛle adenle ɔluale zo ɔzonlenle ɔ mediema. Kɛkala ɔle sonvolɛ.
5 Bɛhyia Mediema Mrenya Nwo: “Saa awie anye bolo kɛ ɔyɛ [dɔɔnwo a] . . . , ɛnee yeva gyima kpalɛ.” (1 Tem. 3:1) Edwɛkɛ ɛhye wula mediema mrenya anwosesebɛ kɛ, ɔwɔ kɛ bɛmaa bɛ nye bolo kɛ bɛkɛfɛta ɛzonlenlɛ nwo adenle dɔɔnwo wɔ Gyihova ahyehyɛdeɛ ne anu. Ɛhye ɛyɛlɛ ɛngile kɛ ɔwɔ kɛ bɛnwu debie bie yɛ anzɛɛ bɛnyia mɔdenlebɔlɛ titile bie. Adiema nrenya mɔɔ kpondɛ kɛ yɛ dɔɔnwo la balumua akpondɛ Belemgbunlililɛ ne na yeabɔ mɔdenle yeayɛ dɔɔnwo wɔ ɛzonlenlɛ gyima ne anu. (Mat. 6:33; 2 Tem. 4:5) Ɔbabɔ mɔdenle yeayɛ neazo kpalɛ yeamaa awie mɔ.
6 Ewiade Amuala: Gyihova ɛlɛmaa anloaboɔboalɛ gyima ne ayɛ ndɛndɛ. (Aye. 60:22) Ɔhyia ndɛndɛ kɛ menli kɔsɔɔti mɔɔ ɛlɛdi Gyisɛse neazo ne anzi la, yɛ dɔɔnwo wɔ bɛ ɛzonlenlɛ gyima ne anu. Ewiade amuala mgbondabulɛ wɔ 2006 anu kile kɛ bɛzɔnenle menli 248,327. Ɛhye kile kɛ saa bɛkyehyɛ nu a, bɛnyia menli fofolɛ mɔɔ bo 680 la alehyenlɛ biala! Ɔrɛla ye kɛ yɛ kɔsɔɔti yɛbakpondɛ ndenle yɛalua zo yɛayɛ dɔɔnwo wɔ yɛ ɛzonlenlɛ gyima ne anu!