Maanzinli Nyianu Ngyehyɛleɛ Fofolɛ

Gyihova fɛta anyunlunyia ɛwulalɛ. Kɛzi yɛwula Gyihova anyunlunyia ɛ? Duzu a maa ɔyɛ se ɔmaa bie mɔ kɛ bɛkɛyɛ zɔ a? Nyilalɛ boni a menli mɔɔ wula Nyamenle anyunlunyia la nyia a? 2008 Ɛzonlenlɛ ɛvolɛ ne anu maanzinli nyianu ne bamaa yɛanyia kpuyia ɛhye mɔ anwo mualɛ mɔɔ yɛ ahunlundwolɛ la. Ɔ ti ne se “Bɛyɛ [Debie Biala] Bɛde Nyamenle Anyunlu.” (1 Kɔl. 10:31) Suzu Sunsum nu ngilehilelɛ dɔɔnwo mɔɔ yɛ sa baha ye wɔ kenle nwiɔ ne mɔɔ ɛlɛba anu la anwo nea.

Maangyeba zo neavolɛ ne baha edwɛkɛtile ne mɔɔ se “Duzu Ati a Ɔwɔ Kɛ Ɛwula Nyamenle Anyunlunyia A?” yɛɛ “Yɛ Neazo Kpalɛ wɔ Mɔɔ Nyamenle Kpondɛ la Anu” anwo edwɛkɛ. Ɔbamaa bagua nu ɛdendɛlɛ ne mɔɔ se, “Menli Boni mɔ a Wula Nyamenle Anyunlunyia A?” yɛɛ ɛdendɛlɛ mɔɔ li awieleɛ mɔɔ se, “Koyɛlɛ Mɔɔ Yɛlɛfa Yɛawula Nyamenle Anyunlunyia wɔ Ewiade Amuala” la. Eza ɔbayɛ Teokelase Ɛzonlenlɛ Sukulu ne. Maanzinli zo neavolɛ ne baha edwɛkɛtile ne mɔɔ se “Fa Anyelielɛ Da Nyamenle Anyunlunyia ne Ali,” “Maanzinli ne Ngyianlɛ nwo Edwɛkɛ,” yɛɛ “Bɛmaa ‘Bɛ Ti Ɛmi Nɔhalɛ ne Mɔɔ Bɛnyia Ye la Anu Kpalɛ,’” mɔɔ gyi 2 Pita 1:12 azo la anwo edwɛkɛ. Bieko, yɛbanwu kɛzi “Adekpakyelɛ Gyima ne Wula Nyamenle Anyunlunyia La.” Edwɛkɛtile ne mɔɔ se, “Nyamenle Mɔɔ Yɛwula Ye Anyunlunyia wɔ Yɛ Ɛbɛlabɔlɛ Afoa Biala Anu,” mɔɔ le ɛdendɛlɛ nwiɔ mɔɔ yɛ anyelielɛ mɔɔ bɛhyehyɛ nu mɔɔ lumua la, bazuzu sunsum nu edwɛkɛ mɔɔ wɔ 1 Kɔlentema 10:31 anu ndelebɛbo mɔɔ kɔ moa la anwo. Ɛdendɛlɛ mɔɔ bɛhyehyɛ nu mɔɔ se “Fa Ɛzonlenlɛ Nwuanzanwuanza Ye Gyihova Ayɛlɛ” la, baha yɛ ɛzonlenlɛ ne afoa ngakyile nwo edwɛkɛ. Yɛ nye balie The Watchtower ne sikalɛpɛlɛ nee Molɛ ne alehyenlɛ ne anu Tɛkese ne mɔɔ bɛbazuzu nwolɛ la anwo. Eza bɛbazɔne menli mɔɔ le fofolɛ la.

Alesama dɔɔnwo ɛnlie Nyamenle ɛndo nu. Bɛ nuhua dɔɔnwo wɔ ɛkɛ mɔɔ menli ngyehyɛleɛ ɛli bɛ adwenle mɔɔ ɔmmaa bɛnzuzu Gyihova kpoleyɛlɛ ne anwo a. (Dwɔn 5:44) Noko yɛmɛ yɛze nvasoɛ mɔɔ wɔ zo kɛ yɛnyia mekɛ yɛfa yɛsuzu kɛzi ɔwɔ kɛ ‘Yɛyɛ Debie Biala Yɛte Nyamenle Anyunlu’ la. Yɛ ngyehyɛleɛ kɔ bie, na nyia nvasoɛ kpole fi foa nna ne amuala anu.