Maanzinli Nyianu Mɔɔ Bamaa Yɛabɔ Yɛ Sunsum Nu Gyinlabelɛ Nwo Bane
1. Nziezielɛ ko mɔɔ Gyihova ɛyɛ kɛ ɔfa yeaboa yeamaa yɛabɔ edwɛkpa ne nolo la a le duzu?
1 Gyihova fi atiakunlukɛnlɛma nu maa yɛ sa ka edwɛkɛ nee anwosesebɛ mɔɔ yɛhyia na yɛayɛ gyima mɔɔ yeva yewula yɛ sa nu kɛ yɛbɔ edwɛkpa ne nolo la. (Mat. 24:14; 2 Tem. 4:17) Ɛvolɛ biala maanzinli nyianu ne le nziezielɛ ɛhye anu ko. Ngyehyɛleɛ fofolɛ maa 2010 ɛzonlenlɛ ɛvolɛ ne bahilehile edwɛkɛtile ne mɔɔ se “Bɔ Wɔ Sunsum Nu Gyinlabelɛ Nwo Bane,” mɔɔ gyi Wulomuma 8:5 nee Dwuudu 17-19 azo la anu. Ngyehyɛleɛ ne babɔ ɔ bo wɔ February 8, 2010 dapɛne ne anu.
2. (a) Ndenle boni azo a maanzinli nyianu ne baboa yɛ a? (b) Kɛzi maanzinli nyianu mɔɔ ɛhɔle ye dɛba la ɛboa wɔ wɔ daselɛlilɛ nu ɛ?
2 Kɛzi Ɔbaboa Yɛ La: Nyianu ne bamaa yɛanwu esiane ngakyile, mɔɔ le kɛ ninyɛne mɔɔ sɛkye yɛ mekɛ na ɔtwehwe yɛ adwenle ɔfi debie mɔɔ anwo hyia kpalɛ la azo la. Yɛbazukoa kɛzi yɛbaho yɛatia subane mɔɔ maa debie biala anwo adenle na yɛanwu subane mɔɔ kile kɛ awie le sunsum nu sonla la. Molɛ ne edwɛkɛ mɔɔ bɛhyehyɛ nuhua la bamaa mbusua nee yɛ nuhua ko biala anwu ndenle mɔɔ yɛbahola yɛalua zo yɛamaa yɛ sunsum nu gyinlabelɛ ne anu amia na yɛahola yɛagyinla ngyegyelɛ dɔɔnwo nee ninyɛne mɔɔ sɔ yɛ diedi nea anloa la. Nyianu ne bamaa yɛabɔ yɛ ahonle nee yɛ sunsum nu kpɔkɛdelɛ nwo bane na yeamaa nyilalɛ kpole mɔɔ menli mɔɔ bɔ bɛ sunsum nu gyinlabelɛ nwo bane asa baha la adɛnla yɛ adwenle nu wienyi.
3. Kenlenzu a bɛbayɛ maanzinli nyianu bieko a, na duzu a ɔwɔ kɛ ɛbɔ kpɔkɛ kɛ ɛkɛyɛ a?
3 Saa ɛnwu mekɛ nee ɛleka mɔɔ bɛbayɛ maanzinli nyianu bieko a, bɔ ɔ bo yɛ ngyehyɛleɛ mɔɔ bamaa wɔahɔ ɔ muala bie na wɔadie edwɛkɛ ne la. Nyia anwodozo kɛ Gyihova yila bɛdabɛ mɔɔ bɛ nye bolo bɛ gyima nwo la.—Mrɛ. 21:5.
4. Duzu a yɛ nye la kɛ yɛ sa baha wɔ maanzinli nyianu ne mɔɔ ɛlɛba la abo a?
4 Nɔhalɛ nu, Gyihova a ahyɛlɛdeɛ kpalɛ ɛhye vi Ye a. Ngyehyɛleɛ mɔɔ akɛlɛ nɔhavo eku ne ɛyɛ la bayɛ mɔɔ yɛhyia na yɛayɛ yɛ Keleseɛne azonvolɛ gyima ne la. Yɛ nye sɔ nziezielɛ biala mɔɔ Gyihova fi ɛlɔlɛ nu yɛ kɛ ɔfa yeaboa yeamaa ‘yɛazɔ anyelazo mɔɔ yɛlɛ la anu kpalɛ’ la.—Hib. 10:23-25; Gye. 1:17.