Kenle Ko Nyianu Titile Ngyehyɛleɛ Fofolɛ

Kenle ko nyianu titile mɔɔ bɛbayɛ ye 2008 ɛzonlenlɛ ɛvolɛ ne anu la edwɛkɛtile ne se ‘Yɛmɛ Yɛle Ndɛtɛlɛ—Gyihova A Le Yɛ Nwovolɛ A,’ mɔɔ gyi Ayezaya 64:8 azo la. Ngɛlɛlera folɛdulɛ mɔɔ bɛbalua ngyehyɛleɛ ɛhye azo bɛava bɛamaa yɛ la bamaa yɛanwu Gyihova nrɛlɛbɛ, pɛlepɛlelilɛ, tumi nee ɛlɔlɛ kɛ Nwovolɛ Kpole ne la na yɛade ɔ bo kpalɛ.

Maanzinli zo neavolɛ ne ɛdendɛlɛ ne mɔɔ se “Kɛzi Yɛsonle kɛ Debie Mɔɔ Le Kɛnlɛma wɔ Ɛzonlenlɛ Gyima ne Anu” la bahile kɛzi menli dɔɔnwo mɔɔ bɛnwu nɔhalɛ ne na bɛlɛka bɛahile awie mɔ la ɛlɛnyia nyilalɛ dɔɔnwo avi nu la. Ɛdendɛlɛ ne mɔɔ se “Edwɛkɛ Nwo Ɛzuzulɛ Babɔ Ɛ Nwo Bane” bahile kɛzi Gyihova tenlene ngyinlazo ne mɔ anwo ɛzuzulɛ kpalɛ bɔ yɛ nwo bane la. Tendɛvolɛ ne mɔɔ bara la baha edwɛkɛtile ne mɔ mɔɔ se “‘Bɛmmamaa ewiade ɛtane ɛhye di Bɛ Adwenle’” yɛɛ “Maa Nwovolɛ Kpole ne Ɛva Wɔ Ɛyɛ Debie Mɔɔ Ɔkulo la” anwo edwɛkɛ. Awovolɛ nee ngakula banyia anwosesebɛwulalɛ avi foa ne mɔ mɔɔ se “Ngakula Mɔɔ Anwo Lɛ Nvasoɛ Maa Gyihova” yɛɛ “Kɛzi Awovolɛ Moalɛ Hyia wɔ Ɛziezielɛ Gyima ne Anu la.” Ɔlua yɛkile nee edwɛkɛbizebizalɛ zo, yɛ nye balie kɛ yɛbade na yɛanwu mɔɔ yɛ mediema mrenya nee mraalɛ ɛlɛyɛ wɔ bɛ ɛzonlenlɛ gyima ne anu la. Menli mɔɔ kulo kɛ fa nzule nu ɛzɔnenlɛ yɛ bɛ nwo zo mɔɔ bɛyila bɛmaa Nyamenle anwo sɛkɛlɛneɛ la ɔwɔ kɛ ka nwolɛ edwɛkɛ kile ebianutɛnlavolɛ ne ndɛndɛ. Nea kɛ ɛbava The Watchtower ne mɔɔ bɛbazukoa wɔ kenle ko nyianu titile dapɛne ne anu la wɔahɔ.

Debie biala mɔɔ Nwovolɛ Kpole ne kɛbɔ nwolɛ kpɔkɛ la ɔyɛ. Yɛdayɛ yɛɛ ɔwɔ kɛ yɛsi kɛzi yɛbamaa yeaziezie yɛ la anwo kpɔkɛ a. Menli mɔɔ fi nrɛlɛbɛ nu die Gyihova ngyinlazo nee nziezielɛ to nu la le kɛ ndɛtɛlɛ ɛdɔkɛ mɔɔ nwovolɛ kola siezie ye kpalɛ ɔfa ɔyɛ debie kɛnlɛma la. Saa yɛ nee Gyihova yɛ ko a, ɔmaa yɛwula ye tumililɛ ne anyunlunyia na yɛnyia nyilalɛ dɔɔnwo.