Maangyeba Nyianu Ngakyelɛ
◼ Gyimalilɛ Mekɛ: Kenle nsa ne amuala bɛbabɔ gyimalilɛ ne abo nwonlomɔ 9:20. Saa bɛbɔ mukenye Belemgbunlililɛ edwɛnebɔlɛ ne abo a, ɔwɔ kɛ yɛ kɔsɔɔti yɛtɛnla aze, amaa bɛahola bɛabɔ gyimalilɛ ne abo wɔ enililɛ nu. Wɔ Yalɛ nee Folɛ, yɛbakpɔne nɔsolɛ 5:05 na Molɛ noko yɛakpɔne 4:10.
◼ Ɛleka Mɔɔ Bɛfa Kale Bɛsie: Kyesɛ awie ɛnde kpɔkɛ anzɛɛ arɛlevilɛ nu edwɛkɛ bie si, tɛ ye zɔhane a dahuu ɔle kpalɛ kɛ yɛkɛdɛnla ɛleka mɔɔ yɛbahola yɛadie gyimalilɛ ne tɛla kɛ yɛkɛdɛnla kale nu ɛleka mɔɔ maa yɛ adwenle kola fi edwɛkɛ ne azo anzɛɛ yɛdafe la. Saa yɛtɛnla menli ne anu yɛtie edwɛkɛ ne mɔɔ debie ɛndwehwe yɛ adwenle la a, ɔle adenle mɔɔ yɛdua zo yɛkile anyezɔlɛ yɛmaa sunsum nu nziezielɛ mɔɔ vi Gyihova ɛkɛ ne la.
◼ Ebia Mɔɔ Bɛkpondɛ Bɛsie Awie: Ɛbahola wɔakpondɛ mbia wɔamaa menli mɔɔ ɛ nee bɛ vole kale anzɛɛ ɛ nee bɛ a wɔ sua ko anu la ala.
◼ Ewiazo Aleɛ: Yɛsɛlɛ wɔ fa ewiazo aleɛ bɛla tɛla kɛ ɛkɛvi nyianu ɛleka ne kɛ ɛkadɔ aleɛ wɔ ewiazo ɛnwomenlelielɛ mekɛ ne anu. Ɛbahola wɔava debie ekyi mɔɔ bɛgua aleɛ nu a ɔkola ɔkɔ ebia bo la wɔara. Bɛmmaa awie adenle kɛ ɔva debie kpole mɔɔ bɛfa menli dɔɔnwo aleɛ bɛgua nu, debie mɔɔ kola bɔ nee nza ɔrɛla nyianu ne abo.
◼ Buluku Fofolɛ Mɔɔ Bɛye: Nyamenle edwɛkɛ ne tu yɛ folɛ kɛ ‘yɛva ɛhulolɛ yɛyɛ debie biala mɔɔ yɛyɛ la.’ (1 Kɔl. 16:14) Saa bɛye buluku bie wɔ nyianu ne abo a, ɛlɔlɛ nee awie mɔ mɔɔ yɛsuzu bɛ nwo la ɛnrɛmaa yɛnrɛnriandi yɛnrɛzuhuzuhu awie mɔ kɛ yɛdumua yɛalie buluku ne mɔɔ bɛye la bie. Ɔnle kɛ yɛgyakyi yɛ mbia ne mɔ ɛkɛ kɛ yɛkasolo kolaa na edwɛne nee asɔneyɛlɛ ne mɔɔ li awieleɛ la. Saa bɛyɛ asɔne bɛwie a, ɔwɔ kɛ yɛ kɔsɔɔti yɛyɛ yɛ ninyɛne pɛpɛɛpɛ na yɛto ɛlɔnwɔne yɛdie buluku ne mɔɔ bɛye la. Saa yɛto yɛ rɛle aze na yɛsi abotane zɛhae a, ɔkile kɛ yɛle Keleseɛnema mɔɔ yɛnyi, na ɔda yɛ mediema ɛlɔlɛ mɔɔ yɛlɛ yɛmaa awie ko biala la ali.—Dwɔn 13:35.
◼ Ndoloboa: Bɛbɔ kakɛ kpole na bɛahola bɛayɛ maangyeba nyianu nwo ngyehyɛleɛ. Yɛbahola yɛaye ndoloboa wɔ yɛ Belemgbunlililɛ Asalo ɛkɛ anzɛɛ nyianu ne abo yɛava yɛaboa ewiade amuala gyima ne yɛava yɛahile nwolɛ anyezɔlɛ. Ɔwɔ kɛ bɛtua Kyɛɛke biala mɔɔ bɛye wɔ nyianu ne abo la bɛmaa “Watch Tower Convention.”
◼ Esiane nee Edwɛkɛ Mɔɔ Hyia Ndɛndɛ: Saa awie hyia ayileyɛlɛ ndɛndɛ wɔ nyianu ne abo a, yɛsɛlɛ kɛ bɛnwu menli mɔɔ die nyɛvolɛ ne mɔ anu ko mɔɔ bikye bɛ la na ɔbamaa Ayilelielɛ Ɛleka ne anzo ade ye ndɛndɛ amaa yɛ menli mɔɔ bɔ mɔdenle mɔɔ bɛwɔ ayilelielɛ ɛleka ne la ahola anlea kɛzi ye gyinlabelɛ ne de la na bɛava nwolɛ moalɛ mɔɔ fɛta la bɛamaa.
◼ Edwɛkɛ Mɔɔ Bɛkye: Ɔnle kɛ bɛfa debie biala mɔɔ bɛfa bɛkye debie la bɛsɔ lateleke anzɛɛ ninyɛne mɔɔ bɛtendɛ nuhua wɔ nyianu ne abo la, bɛbahola bɛava ninyɛne ɛhye mɔ bɛali gyima wɔ adenle mɔɔ ɔnrɛgyegye awie mɔ la azo ala.
◼ Bɔkɔbɔkɔyɛlɛ: Ɔwɔ kɛ menli mɔɔ bahɔ nyianu ne kɔsɔɔti la siezie mbia mɔɔ bɛkɛli debie wɔ zo la azo. Kɛmɔ bɛfa ninyɛne mɔɔ bɛgua ewula nu bɛsiezie nyianu biala abo la ati, bɛnlea kɛ bɛkɛva ngɛlata, aleɛ, nzule wolɔba nee ninyɛne gyɛne bɛkɛgua nu. Saa yɛyɛ ɛhye a ɔkile kɛ yɛle menli mɔɔ yɛyɛ yɛ nwo bɔkɔbɔkɔ a.
◼ Ninyɛne Evuanlɛ: Ɔbayɛ atiakunlukɛnlɛma kɛ yɛbade ninyɛne evuanlɛ nee anatele mɔɔ yɛfa yɛgua yɛ nwo mɔɔ bahola agyegye menli mɔ bɔ ɛdahonlɛ anzɛɛ bɛlɛ etile ewule la azo.—1 Kɔl. 10:24.
◼ Nvoninli Ɛpɛlɛ: Saa nyianu ne ɛlɛkɔ zo na ɛpɛ nvoninli a, mmafa flash ɛdi gyima. Kɛmɔ yɛmkpondɛ kɛ yɛsi kongo wɔ teokelase nyianu bo la ati, yɛnrɛhulo kɛ yɛpɛ nvoninli yɛdie ezukoa. Eza noko yɛnrɛhulo kɛ yɛkɛha yɛkɛhile menli mɔɔ pɛ nvoninli die ezukoa la kɛ bɛrapɛ mediema nvoninli wɔ nyianu ne abo bɛva bɛkpondɛ ezukoa.—w84 7/1 m. 25; eza nea Organized, mukelɛ 142, ɛdendɛkpunli 3.
◼ Bɛbɔ nu Bɛdɛnla kɛ Abusua: Ɔwɔ kɛ awovolɛ nee bɛ mra tɛnla ɛleka ko wɔ nyianu ne abo tɛla kɛ bɛkɛgyakyi bɛ mra, mɔɔ bɛdabɛ mɔɔ bɛtɛnyianle ɛvolɛ abulanwiɔ boka nwo la bɛkɛmaa bɛ nee bɛ gɔnwo mɔ ngakula gyɛne kɛdɛnla. Saa bɛ nee bɛ tɛnla a, bɛbahola bɛawula bɛ anwosesebɛ bɛamaa bɛahɛlɛ nyianu ne anu debie mɔɔ bɛbava bɛali gyima la.
◼ Follow-Up Kɛlata: Saa bɛdi awie mgbemgbe nu daselɛ wɔ nyianu mekɛ ne anu na ɔkile nwolɛ anyelielɛ a, bɛva Please Follow Up (S-43) ne na bɛli nwolɛ gyima bɛmaa ye. Bɛbanyia ngɛlata ne mɔ bie wɔ Bulukulielɛ Ɛleka ne wɔ nyianu ne abo. Bɛbahola bɛava ngɛlata ne mɔɔ bɛhɛlɛ zolɛ bɛwie la bɛahɔ Bulukulielɛ Ɛleka ne anzɛɛ bɛava bɛamaa bɛ asafo ne anu kɛlɛhɛlɛvolɛ ne bɛamaa yeali nwolɛ gyima.—Nea March 2005 Our Kingdom Ministry, m. 4.
◼ Dabelɛ: (1) Saa ɛwɔ sua mɔɔ ɛbadua nwolɛ kakɛ la anu a, ɛ nee menli dodo mɔɔ bo zolɛ la mmatɛnla. (2) Saa ɛwɔ mediema sua nu a, suzu ninyɛne nwo ɔlua ɛ nwo mɔɔ ɛbayɛ ye bɔkɔbɔkɔ, wɔayɛ wɔ ninyɛne pɛpɛɛpɛ na wɔahile nwolɛ anyezɔlɛ la azo. (3) Ɔnle kɛ mediema mrenya nee mraalɛ da sua ko anu kyesɛ bɛle abusua ko. (4) Mmato aleɛ wɔ sua mɔɔ bɛndo aleɛ wɔ nu la anu. (5) Amaa wɔ ɛbɛlabɔlɛ ayɛ mɔɔ fɛta la, ɔnle kɛ ebia alie nwo. Saa ɔkɛyɛ boɛ a ɔwɔ kɛ ɛfa ɛkpa anzɛɛ ɛdanlɛ ɛyɛ abialeɛ. (6) Kɛmɔ yɛle Keleseɛnema la ati, yɛngulo kɛ yɛkɛva ngyehyɛleɛ biala mɔɔ bɛyɛ bɛmaa nyɛvolɛ la yɛkɛli gyima wɔ adenle ɛtane zo. (7) Da sunsum ma ne ali wɔ kɛzi ɛ nee menli mɔɔ yɛ gyima wɔ hotɛle anzɛɛ mbusua mɔɔ ɛ nee bɛ de di la anu.