Yɛ Nwo Mɔɔ Yɛka Yɛabɔ nu wɔ Ewiade Amuala Yɛabɔ “Bɛdoa Kelaese!” Maangyeba Nyianu ne Nolo La
Nolobɔlɛma Bazia Ahyɛ Ɛsalɛdolɛ Kɛlata Titile Bie
1 Wɔ ɛkenle ɛvolɛ ne, gyima mɔɔ yɛyɛle ye ewiade amuala yɛbɔle “Yɛ Ngoanelielɛ Ɛbikye!” Maangyeba Nyianu ne nolo la boale anyelielɛma kpalɛ. Bɛdabɛ mɔɔ bɛliele ɛvɛlɛlɛ ne azo na bɛrale la ranwunle sunsum nu aleɛ kpalɛ dɔɔnwo mɔɔ Gyihova Alasevolɛ di la. (Aye. 65:13) Bɛ nye liele ɛlɔlɛ nee koyɛlɛ mɔɔ wɔ Gyihova Alasevolɛ avinli la anwo. (Edw. 133:1) Amaa yɛahola yɛaboa menli dɔɔnwo yɛamaa bɛara “Bɛdoa Kelaese!” Maangyeba Nyianu ne la, eza yɛbahyɛ ɛsalɛdolɛ kɛlata bieko wɔ ewiade amuala.
2 Mɔɔ Vi nu Rale Ɛkenle Ɛvolɛ Ne: Edwɛkɛ mɔɔ yɛde yɛvi ewiade amuala la kile kɛ nvasoɛ kpole vi “Yɛ Ngoanelielɛ Ɛbikye!” Maangyeba Nyianu mɔɔ yɛbɔle ye nolo la anu rale. Wɔ ɛleka dɔɔnwo ne ala, bɛhanle yɛ nwo edwɛkɛ dɔɔnwo. Kɛ neazo la, wɔ sua ko azo, adwelie kɛlata bie hanle yɛ gyima ne anwo edwɛkɛ dɔɔnwo, na ɔhanle kɛ: “Amaa awie biala asa aha bie wɔ ye mekɛ nloa la, Alasevolɛ ne mɔ ɛlɛbɔ mɔdenle kpalɛ wɔ ɛleka mɔɔ bɛde la—bɛlɛfa dɔnehwele dɔɔnwo bɛayɛ, bɛlɛpɛ adenle tendenle, yɛɛ bɛlɛtendɛ ndɛndɛ.” Wɔ sua ko azo, menli mɔɔ kɛlɛ adwelie ngɛlata la anye raliele ɛsalɛdolɛ kɛlata ne mɔɔ bɛhyɛle la anwo, na bɛhɛlɛle nwolɛ edwɛkɛ dɔɔnwo. Yeanyɛ boɛ fee la, adwelie ngɛlata ngakyile nsa hanle gyima mɔɔ mediema ne yɛle kolaa na nyianu ne adwu zo la anwo edwɛkɛ kpalɛ. Adwelie kɛlata kɛlɛvolɛ ko hɛlɛle yɛ nwo edwɛkɛ ngakyile mɔɔ bo mukelɛ nwiɔ la wɔ adwelie kɛlata ko anu wɔ Molɛ. Ɔhanle yɛ diedi, yɛ mediemayɛlɛ, ɛsalɛdolɛ kɛlata ne mɔɔ bɛhyɛle, yɛɛ nyianu ne anwo edwɛkɛ dɔɔnwo. Mekɛ mɔɔ nolobɔlɛnli ko vale ɛsalɛdolɛ kɛlata ne hɔle awuke bie anu la, suamenle ne hanle kɛ: “Ɛhɛe. Yemɔ anwo edwɛkɛ a melɛkenga wɔ kɛlata ye anu la!” Suamenle fofolɛ noko hanle kɛ: “Melɛkenga bɛ nwo edwɛkɛ ala ɛne, yemɔ a bɛravinde ɛke la! Me ɛsalɛdolɛ kɛlata ɛdeɛ a le ɛhye ɔ?” Ɔvale ɔzɔle zolɛ kɛ, “Ɛhye le debie kɛnlɛma mɔɔ Gyihova Alasevolɛ ɛlɛyɛ a.”
3 Bɛnwunle anyelielɛma dɔɔnwo mɔɔ ɛnee ɛlɛba nyianu ne la kɛ bɛdedɛ bɛ ɛsalɛdolɛ kɛlata ne mɔ. Anyelielɛma bie mɔ pɛle adenle tendenle amaa bɛahɔ nyianu ne foa bie. Mɔdenle mɔɔ yɛbɔle yɛdole ɛsalɛ yɛvɛlɛle menli la manle menli dɔɔnwo rale nyianu ne, na wɔ sua ko azo menli mɔɔ hɔle nyianu ne la anwo zonle dɛlale menli mɔɔ hɔle 2005 ɛdeɛ ne la ɛya ko ngyɛnu mɔɔ bo 27.
4 Azɛlɛsinli ne anu Gyimayɛlɛ: Saa ɔka dapɛne nsa na nyianu ne adwu zo a, bɛbahola bɛabɔ ɔ bo bɛahyɛ ɛsalɛdolɛ kɛlata ne. Ɔwɔ kɛ bɛbɔ mɔdenle kɛ awie biala mɔɔ wɔ asafo ne azɛlɛsinli ne anu la asa baha bie. Wɔ asafo mɔɔ lɛ azɛlɛsinli kpole la anu, nolobɔlɛma bahola ava nrɛlɛbɛ adenle zo agyakyi ɛsalɛdolɛ kɛlata ne wɔ awuke mɔɔ bɛando awie wɔ nu la anu wɔ dapɛne ne mɔɔ li awieleɛ kolaa na nyianu ne adwu zo la anu. Ɔwɔ kɛ asafo biala bɔ mɔdenle kɛ ɔbahyɛ ɛsalɛdolɛ kɛlata dodo biala mɔɔ ɔlɛ la na yeamaa menli dɔɔnwo asa aha bie. Adekpakyelɛma mɔɔ wɔ asafo ne anu la bahola ava mɔɔ baha la ali gyima.
5 Mɔɔ Yɛbaha: Ɛbahola wɔaha debie zɛhae: “Yɛkyehyɛ kɛlata ɛhye yɛado ɛsalɛ yɛavɛlɛ menli mɔɔ wɔ ewiade amuala la amaa bɛara gyimalilɛ bie mɔɔ anwo hyia mɔɔ bɛbayɛ ye kenle nsa ye la abo. Wɔ ɛdeɛ ɛne. Ɛbanwu nwolɛ edwɛkɛ dɔɔnwo wɔ kɛlata ne azo.” Yɛ edwɛkɛ ne mɔɔ yɛbamaa yɛayɛ sikalɛ la baboa amaa yɛadwu menli dɔɔnwo ɛkɛ. Noko, saa suamenle bie lɛ kpuyia bie a, nyia mekɛ kilehile ye nu. Saa awie kile nwolɛ anyelielɛ a, yɛ nwolɛ kɛlɛtokɛ na bɔ mɔdenle kɔkpɔla ye bieko ndɛndɛ.
6 Nea kɛzi nwolɛ hyia kpalɛ kɛ yɛbabɔ mɔdenle yɛadoa Kelaese a! (Dw. 3:36) Yɛ maangyeba nyianu ne mɔɔ ɛlɛba la baboa awie biala mɔɔ bahɔ bie la amaa yeayɛ zɔ. Nɔhalɛ nu, yɛlɛ anyelazo kɛ mɔdenle mɔɔ yɛbabɔ ye ewiade amuala yɛabɔ “Bɛdoa Kelaese!” Maangyeba Nyianu ne nolo la, bayɛ daselɛ kpole bieko. Ɛhye ati, maa ɛ nye ɛbolo kɛ ɛbado ɛsalɛ wɔavɛlɛ menli dɔɔnwo wɔamaa bɛara nyianu ɛhye. Gyihova ɛyila mɔdenle mɔɔ ɛlɛbɔ wɔava ɛ nwo wɔawula ewiade amuala nolobɔlɛ ɛhye mɔɔ yɛbabɔ nu yɛayɛ la azo.