Fa Enililɛ Toa Kelaese
1 Baebolo ne ka Gyihova, Maanzaleɛ Belemgbunli ne anwo edwɛkɛ kɛ enililɛ ɛyi ye tɛkɛɛ. (Edw. 104:1) Gyisɛse vale ye ɛdendɛlɛ nee ye nyɛleɛ wulale ɔ Ze nee ɔ Ze nziezielɛ ne mɔ anyunlunyia dahuu. (Dw. 17:4) Yɛ nuhua ko biala banyia adenle azukuezukoa Gyisɛse na yeawula Gyihova anyunlunyia wɔ “Bɛdoa Kelaese!” Maangyeba Nyianu ne mɔɔ ɛlɛba la mekɛ ne anu.
2 Ɛzonlenlɛ Mɔɔ Enililɛ wɔ Nu: Yɛbahola yɛali Gyihova eni ɔlua sunsum nu ɛkponle mɔɔ yedo yɛ mɔɔ yɛbahɔ ɔ bo la azo. Amaneɛbɔlɛ kile kɛ menli dɔɔnwo ɛngɔ Yalɛ gyimalilɛ ne. Asoo wɔzɛlɛ adenle wɔvi wɔ gyimamenle ɛkɛ na wɔyɛ ngyehyɛleɛ mɔɔ bamaa wɔahɔ kenle nsa ne amuala, mɔɔ ɛnrɛdo Yalɛ bɔbɔ nu ɔ? Wɔziezie ɛ nwo kɛ ɛbahɔ nyianu ne abo ndɛ, wɔakpondɛ ebia na wɔava ɛ nwo wɔawula mɔlebɛbo edwɛne ɛdolɛ nee asɔneyɛlɛ ne anu ɔ? Asoo wɔyɛ aleɛ mɔɔ ɛbali ye ewiazo la anwo ngyehyɛleɛ mɔɔ bamaa ɛ nee ɛ mediema ali aleɛ wɔ nyianu ne abo ɔ? Wɔ foa biala mɔlebɛbo, saa ebianutɛnlavolɛ ne ka kɛ awie biala ɛkpondɛ ɛleka ɛdɛnla kolaa na edwɛne ne abɔ ɔ bo a, ɔwɔ kɛ yɛgyakyi adawu mɔɔ yɛlɛbɔ la ndɛndɛ na yɛkpondɛ ɛleka yɛtɛnla yɛmaa gyimalilɛ ne bɔ ɔ bo.
3 Yɛ nzo mɔɔ yɛbagyele yɛadie edwɛkɛ ne kpalɛ la noko wula yɛ anwuma Selɛ ne anyunlunyia. Mekɛ mɔɔ amaneɛbɔvo bie nwunle kɛzi bɛyɛle maangyeba nyianu bie la ɔhɛlɛle kɛ awie biala anye balie, “subane kpalɛ mɔɔ ayiama ne da ye ali la anwo, ɔluakɛ bɛfa ɛbulɛ bɛyɛ ngongoonwu bɛtie edwɛkɛ mɔɔ bɛlɛka na bɛkile kɛ bɛkulo sunsum nu ninyɛne.” Eza ɔhanle “ngakula dɔɔnwo . . . , mɔɔ bɛ muala bɛda subane kpalɛ ali anzɛɛ ɛnee bɛ nye ɛbolo bɛlɛneɛnlea Ngɛlɛlera Nwuanzanwuanza ne anu” la anwo edwɛkɛ. Mekɛ mɔɔ gyimalilɛ ne ɛlɛkɔ zo la, ɔnle kɛ yɛbɔ adawu, yɛdua telefuu zo yɛ nee awie mɔ di ngitanwo, yɛdi aleɛ, yɛda anzɛɛ yɛduolua nu. Ɔwɔ kɛ ngakula nee bɛ awovolɛ tɛnla amaa bɛ awovolɛ aboa bɛ amaa bɛanyia gyimalilɛ ne anu nvasoɛ. (Mɛla 31:12; Mrɛ. 29:15) Mɔdenlebɔlɛ ɛhye kile kɛ yɛbu menli gyɛne na yɛ nye sɔ sunsum nu aleɛ kpalɛ mɔɔ bɛziezie bɛmaa yɛ la.
4 Anwoziezielɛ Mɔɔ Enililɛ wɔ Nu: Menli dɔɔnwo hilele kɛ bɛ nye zɔle ngakyelɛ mɔɔ ɛnee wɔ ɛkenle ɛvolɛ ne maangyeba nyianu ɛdendɛlɛ “Da Keleseɛnema Enililɛ Ali Mekɛ Biala,” anu la. Ɛdendɛlɛ ne zile zolɛ kɛ ɔwɔ kɛ Nyamenle azonvolɛ da Keleseɛnema enililɛ ali wɔ bɛ tɛladeɛ ɛwulalɛ nee bɛ anwoziezielɛ nu. Ɛvolɛ ɛhye, eza ɔwɔ kɛ yɛmaa edwɛkɛ ɛhye kyia yɛ. Tɛladeɛ mɔɔ yɛwula la maa menli nwu mɔɔ wɔ yɛ ahonle nu la. (Mat. 6:21) Yɛ anwoziezielɛ ne da nganeɛdelɛ mɔɔ yɛlɛ yɛmaa Gyihova yɛɛ kɛzi yɛte nganeɛ wɔ nwolɛ adenle mɔɔ yɛnyia ye kɛ ye Alasevolɛ la ali. Ɔwɔ kɛ yɛsiezie yɛ nwo dahuu kɛ menli mɔɔ “sonle Nyamenle la.”—1 Tem. 2:9, 10.
5 Asoo mekɛ mɔɔ yɛlɛkɔ nyianu ne la ala a ɔwɔ kɛ yɛda enililɛ wɔ yɛ anwoziezielɛ nu a? Kakye kɛ saa yɛkpɔne a menli dɔɔnwo banwu kɛ yɛbɔ yɛ nyianu baagye ne wɔ mekɛ mɔɔ yɛlua sua zo la. Ɔwɔ kɛ yɛ anwoziezielɛ maa yɛyɛ ngakyile yɛfi menli mɔɔ ɛnle Alasevolɛ la anwo. Ɛhye ati, wɔ mekɛ mɔɔ yɛlɛdie yɛ menle, bie a yɛlɛfinde yɛahɔli aleɛ la, ɔwɔ kɛ yɛsiezie yɛ nwo kɛ azonvolɛ mɔɔ yɛhɔ Keleseɛne nyianu wɔ sua ne azo na ɔnle kɛ yɛwula adɛladeɛ mɔɔ bie a le jeans, nika, anzɛɛ T-Hyɛɛte mɔɔ bɛhɛlɛhɛlɛ nu a. Nea kɛ ɛhye bazi ayɛ daselɛ kpole wɔ sua ne azo a! Saa yɛ anwoziezielɛ ne da gyima mɔɔ yɛyɛ kɛ azonvolɛ la ali a, Gyihova anye die.
6 Nvasoɛ Kpalɛ Mɔɔ Vi nu Ba: Keleseɛnema enililɛ mɔɔ yɛda ye ali la maa yɛnyia adenle yɛyɛ mgbemgbɛnenu daselɛlilɛ na ɔka menli mɔɔ nwu yɛ la ahonle. Mekɛ mɔɔ bɛwiele nyianu bie la, arane kpanyinli ko hanle kɛ: “Yɛtɛnwunle menli mɔɔ di bɛ nwo eni zɛhae la bie ɛlɛ. Bɛmɛ a bɛyɛ mɔɔ Nyamenle kpondɛ kɛ yɛyɛ la.” Saa yɛda enililɛ ali a, ɔkile kɛ yɛlɛ ɛbulɛ yɛɛ ɛlɔlɛ yɛmaa yɛ nwo ngoko ngoko na ɔwula Gyihova anyunlunyia. (1 Pit. 2:12) Ɔda ye ali kɛ yɛsulo Nyamenle na yɛ nye sɔ nwolɛ adenle mɔɔ yɛnyia ye kɛ yemɔ mɔɔ ɔle yɛ Ze la a ɔkilehile yɛ a. (Hib. 12:28) Ɔrɛla ye kɛ yɛbahɔ zo yɛala enililɛ ali wɔ mekɛ mɔɔ yɛlɛkendɛ ɛvolɛ ɛhye “Bɛdoa Kelaese!” Maangyeba Nyianu ne la.
[Debiezukoalɛ kpuyia ne mɔ]
1. Adenle boni azo a ɛvolɛ ɛhye nyianu edwɛkɛtile ne nee enililɛ mɔɔ yɛda ye ali la bɔ abusua a?
2. Ngyehyɛleɛ mɔɔ yɛbayɛ yɛahɔ nyianu ne foa biala la boni a di Gyihova eni ɛ?
3. (a) Kɛzi gyimalilɛ ne mɔɔ yɛbagyele yɛ nzo yɛadie la di yɛ ɛzonlenlɛ ne eni ɛ? (b) Duzu a ɔwɔ kɛ yɛyɛ wɔ mekɛ mɔɔ gyimalilɛ ne ɛlɛkɔ zo la ɛ?
4. Duzu ati a ɔwɔ kɛ yɛ anwoziezielɛ da enililɛ ali wɔ mekɛ mɔɔ yɛwɔ nyianu ne abo la ɛ?
5. Adenle boni azo a yɛbahola yɛahɔ zo yɛala enililɛ ali wɔ yɛ anwoziezielɛ nu wɔ mekɛ mɔɔ yɛlɛdie yɛ menle wɔ sua ne mɔɔ bɛlɛyɛ nyianu ne wɔ zo la azo ɛ?
6. Nvasoɛ kpalɛ boni a vi Keleseɛnema enililɛ mɔɔ yɛda ye ali la anu ba a?