Subane Mɔɔ Wula Nyamenle Anyunlunyia
1. Duzu ati a Gyihova Alasevolɛ ɛlɛkɔ maangyeba nyianu a bɛnwu bɛ a?
1 Saa yɛlɛkɔ maangyeba nyianu a, menli nwu yɛ. Wɔ ɛleka dɔɔnwo mɔɔ bɛyɛ nyianu la, bɛka nwolɛ edwɛkɛ wɔ riledio nee TV zo. Menli mɔɔ kɛhɔ nyianu ne la kɔ hotɛle nee aleɛlilɛleka ngakyile, yɛɛ menli mɔɔ wɔ ɛkɛ la nwu kɛ nyɛvolɛ dɔɔnwo bɔ nyianu baagye. Ngakyelɛ mɔɔ doa zo la bie mɔ baboa yɛ yeamaa yɛawula Nyamenle anyunlunyia ɔlua subane kpalɛ mɔɔ yɛbala ye ali wɔ nyianu sua ne azo la.—1 Pita 2:12.
2. Kɛzi adɛladeɛ mɔɔ fɛta mɔɔ yɛbawula la bamaa yɛawula Nyamenle anyunlunyia wɔ nyianu sua ne azo ɛ?
2 Adɛladeɛ Mɔɔ Fɛta: Adɛladeɛ mɔɔ fɛta mɔɔ yɛfa yɛkɔ nyianu ne la maa menli ka yɛ nwo edwɛkɛ kpalɛ. Noko akee, ɔyɛ a yɛ adɛladeɛ—wɔ mekɛ mɔɔ yɛlɛkɔ hotɛle, yɛlɛdi aleɛ wɔ aleɛlilɛleka, yɛlɛkɔ gua nu nee mɔɔ bokɛboka nwo la kola maa menli nwu yɛ wɔ adenle ngakyile zo. Yɛnrɛva adɛladeɛ mɔɔ yɛbawula la yɛnrɛhɔ ɛleka ɛhye mɔ ɛdeɛ, noko ɔwɔ kɛ yɛwula tɛladeɛ kpalɛ mɔɔ fɛta enililɛ la. Ɔwɔ kɛ menli mɔɔ kɛnwu yɛ la kola nwu ngakyile mɔɔ la yɛ nee menli mɔɔ bɛnle mediema avinli la. (Wulo. 12:2) Bieko, ɔwɔ kɛ yɛbɔ yɛ nyianu baagye ne, ɔluakɛ ɛhye bamaa bɛanwu nyianu ne, yɛalua zo yɛali daselɛ, na yeamaa menli gyɛne mɔɔ ɛlɛkɔ nyianu ne bie la anwu yɛ.
3. Kɛ ɔkɛyɛ na yɛala abotane nee enililɛ ali ɛ?
3 Abotane Nee Enililɛ: Mekɛ mɔɔ ewiade menli dɔɔnwo ɛndwenle menli nwo na bɛnze ayɛlɛ la, nea kɛzi menli mɔɔ wɔ ɛleka le kɛ hotɛle nee aleɛlilɛleka mɔɔ nwu kɛzi yɛsi abotane na yɛdi bɛ eni la anye die nwolɛ la! (2 Tem. 3:1-5) Saa yɛlɛfa mbia yɛazie menli anzɛɛ yɛlɛkɔ yɛahɔlie mbuluku mɔɔ bɛkɛye la bie a, ɔnle kɛ yɛdwenle yɛ ngome yɛ boɛyɛlɛ nwo, ɔwɔ kɛ yɛdwenle yɛ gɔnwo mɔ ɛdeɛ nwo. (1 Kɔl. 10:23, 24) Nrenya anyelielɛnli ko mɔɔ hɔle ye nyianu mɔɔ lumua wiele la hanle kɛ, “Mengakye ɛdendɛlɛ mɔɔ bɛmanle ye kenle ko ne la anu biala, noko me rɛle ɛnrɛvi Alasevolɛ ne mɔ subane ne ɛlɛ.”
4. Kɛmɔti a saa ɔkɛyɛ boɛ a ɔwɔ kɛ yɛtu yɛ nwo yɛmaa wɔ nyianu ne abo ɛ?
4 Tunwomaa Sunsum: Tunwomaa sunsum le nɔhalɛ Keleseɛnema nzonlɛyɛlɛ. (Edw. 110:3) Ɛbahola wɔadu ɛ nwo wɔamaa na wɔaboa wɔ nyianu ne abo ɔ? Wɔ nyianu ko abo, mediema mrenya nee mraalɛ 600 dule bɛ nwo manle zieziele ɛkɛ kolaa na nyianu ne abɔ ɔ bo. Menli mɔɔ lɛ ɛleka ne la hanle kɛ: “Ɛhye a le debie mɔɔ yɛnwu kɛ ɔle nwanwane a! Ɔsi yɛ nwo kɛ menli ɛhye mɔ amuala ɛdu bɛ nwo ɛmaa la.” Yɛ nye la 2013 maangyeba nyianu ne kɛ ɔbamaa yɛanyia adenle yɛadie, yɛazukoa Nyamenle anwo debie na eza yɛawula ye anyunlunyia.
[Ɛlɛka wɔ mukelɛ ne mɔ 3-6]
Ɛvolɛ 2013 Maangyeba Nyianu Ngakyelɛ
◼ Gyimalilɛ Mekɛ: Kenle nsa ne amuala, mukenye edwɛne ne babɔ ɔ bo nwonlomɔ 9:20. Ɔwɔ kɛ yɛ kɔsɔɔti yɛtɛnla aze, amaa bɛahola bɛabɔ gyimalilɛ ne abo wɔ enililɛ nu. Wɔ Yalɛ nee Folɛ, yɛbakpɔne nɔsolɛ 4:50 na Molɛ noko yɛakpɔne nɔsolɛ 3:35.
◼ Kale Agyinlaleɛ: Kyesɛ awie ɛnde kpɔkɛ anzɛɛ arɛlevilɛ nu edwɛkɛ bie si, tɛ ye zɔhane a dahuu ɔle kpalɛ kɛ yɛkɛdɛnla ɛleka mɔɔ yɛbahola yɛadie gyimalilɛ ne la tɛla kɛ yɛkɛdɛnla kale nu ɛleka mɔɔ maa yɛ adwenle kola fi edwɛkɛ ne azo anzɛɛ yɛdafe la. Menli ne anu mɔɔ yɛtɛnla yɛadie edwɛkɛ ne la le adenle mɔɔ yɛdua zo yɛkile anyezɔlɛ yɛmaa sunsum nu ninyɛne mɔɔ vi Gyihova ɛkɛ ne la. Kɛmɔ ɛleka kpole ɛnle ɛkɛ la ati, ɔbayɛ kpalɛ kɛ menli dɔɔnwo babɔ nu ava kale ko.
◼ Ebia Mɔɔ Bɛkpondɛ Bɛsie Awie: Ɛbahola wɔakpondɛ mbia wɔamaa menli mɔɔ ɛ nee bɛ vole kale anzɛɛ ɛ nee bɛ a wɔ sua ko anu anzɛɛ awie mɔɔ ɛ nee ye gua zo ɛlɛsukoa Baebolo ne la ala.—1 Kɔl. 13:5.
◼ Ewiazo Aleɛ: Yɛsɛlɛ wɔ fa ewiazo aleɛ bɛla tɛla kɛ ɛkɛvi nyianu ɛleka ne kɛ ɛkadɔ aleɛ wɔ ewiazo ɛnwomenlelielɛ mekɛ ne anu. Ɛbahola wɔava debie ekyi mɔɔ bɛfa bɛsie ebia bo a ɔyɛ boɛ la wɔara. Bɛmmaa awie adenle kɛ ɔva debie kpole mɔɔ bɛfa menli dɔɔnwo aleɛ bɛgua nu nee debie mɔɔ kola bɔ la ɔrɛla nyianu ne abo.
◼ Buluku Fofolɛ Mɔɔ Bɛkɛye: Nyamenle Edwɛkɛ ne tu yɛ folɛ kɛ ‘yɛva ɛhulolɛ yɛyɛ debie biala mɔɔ yɛyɛ la.’ (1 Kɔl. 16:14) Saa bɛye buluku bie wɔ nyianu ne abo a, ɛlɔlɛ nee awie mɔ mɔɔ yɛdwenle bɛ nwo la ɛnrɛmaa yɛnrɛnriandi, yɛnrɛzuhuzuhu awie mɔ kɛ yɛdumua yɛalie buluku ne mɔɔ bɛye la bie. Saa yɛto yɛ rɛle aze na yɛsi abotane zɛhae a, ɔkile kɛ yɛle Keleseɛnema mɔɔ yɛnyi, na ɔda yɛ mediemalɔlɛ mɔɔ yɛlɛ yɛmaa awie ko biala la ali.—Dwɔn 13:35.
◼ Ndoboa: Yɛbahola yɛaye ndoboa wɔ yɛ nyianu ne abo yɛava yɛaboa ewiade amuala gyima ne yɛava yɛahile kɛzi yɛ nye sɔ nyianu ngyehyɛleɛ ne la. Ɔwɔ kɛ bɛtua kyɛɛke biala ezukoa ne bɛmaa “Watch Tower.”
◼ Esiane Nee Edwɛkɛ Mɔɔ Hyia Ndɛndɛ: Saa awie hyia ayileyɛlɛ ndɛndɛ wɔ nyianu ne abo a, yɛsɛlɛ kɛ bɛnwu menli mɔɔ die nyɛvolɛ la anu ko mɔɔ bikye bɛ la na ɔbamaa Ayilelielɛ Ɛleka ne anzo ade ye ndɛndɛ amaa yɛ menli mɔɔ bɔ mɔdenle mɔɔ bɛwɔ ɛkɛ la ahola anlea kɛzi ye gyinlabelɛ ne de la na bɛava nwolɛ moalɛ mɔɔ fɛta la bɛamaa ye.
◼ Bɔkɔbɔkɔyɛlɛ: Ɔwɔ kɛ menli mɔɔ bahɔ nyianu ne kɔsɔɔti la siezie mbia mɔɔ bɛkɛli debie wɔ zo la azo. Kɛmɔ bɛfa ninyɛne mɔɔ bɛgua ewula nu bɛsiezie nyianu biala abo la ati, bɛnlea kɛ bɛkɛva ngɛlata, aleɛ, nzule rɔba nee ninyɛne gyɛne bɛkɛgua nu. Saa yɛyɛ ɛhye a ɔkile kɛ yɛle menli mɔɔ yɛyɛ yɛ nwo bɔkɔbɔkɔ la.
◼ Nvoninli Ɛpɛlɛ: Kɛmɔ yɛmkpondɛ kɛ yɛsi kongo wɔ teokelase nyianu bo la ati, yɛngulo kɛ yɛpɛ nvoninli yɛdie ezukoa. Eza noko yɛngulo kɛ yɛka yɛkile menli mɔɔ pɛ nvoninli die ezukoa la kɛ bɛrapɛ mediema nvoninli wɔ nyianu ne abo bɛva bɛkpondɛ ezukoa.—w84-E 7/1 m. 25; eza nea Organized, mukelɛ 142, ɛdendɛkpunli 3.
◼ Bɛbɔ Nu Bɛdɛnla Kɛ Abusua: Ɔwɔ kɛ awovolɛ nee bɛ mra tɛnla ɛleka ko wɔ nyianu ne abo tɛla kɛ bɛkɛgyakyi bɛ mra mɔɔ bɛdabɛ mɔɔ bɛtɛnyianle ɛvolɛ abulanwiɔ boka nwo la bɛkɛmaa bɛ nee bɛ gɔnwo mɔ ngakula gyɛne kɛdɛnla. Saa bɛ nee bɛ tɛnla a, bɛbahola bɛamaa bɛ anwosesebɛ bɛamaa bɛahɛlɛ nyianu ne anu debie mɔɔ bɛ nye die nwo la.
◼ Ayileyɛlɛ: Saa bɛhile kɛ ɛva ayile bie a, fa dɔɔnwo bɛla nyianu ne abo, ɔluakɛ ɛnrɛnyia bie wɔ ɛkɛ.
◼ Mgbɔlaboa: Ɛvolɛ biala menli dɔɔnwo mgbɔlaboa maa bɛboda. Ɔle kpalɛ kɛ ɛbawula mgbɔlaboa mɔɔ saa ɛfo debie zo a ɔnrɛmaa ɛnrɛdɔ aze la.
◼ Ngakula Mbia: Ɔnle kɛ bɛfa ngakula mbia bɛba nyianu ne abo. Noko akee, bɛbahola bɛava ngakula mbia mɔɔ bɔ bɛ nwo bane na awovolɛ bahola ava azie bɛ nwo ɛkɛ la bɛara.
◼ Please Follow Up (S-43) Kɛlata: Saa bɛdi awie daselɛ wɔ nyianu mekɛ ne anu na ɔkile nwolɛ anyelielɛ a, bɛva Please Follow Up ne na bɛli nwolɛ gyima bɛmaa ye. Bɛbahola bɛava ngɛlata ne mɔɔ bɛhɛlɛ zolɛ bɛwie la bɛahɔ Bulukulielɛ Ɛleka ne anzɛɛ bɛava bɛamaa bɛ asafo ne anu kɛlɛhɛlɛvolɛ ne wɔ mekɛ mɔɔ bɛkɛzia bɛkɛhɔ la.
◼ Dabelɛ: (1) Saa ɛwɔ sua mɔɔ ɛbadua nwolɛ kakɛ la anu a, ɛ nee menli dodo mɔɔ bo zolɛ la mmada nu. (2) Saa ɛwɔ awie mɔ sua nu a, suzu ninyɛne nwo ɔlua ɛ nwo mɔɔ ɛbayɛ ye bɔkɔbɔkɔ, wɔayɛ wɔ ninyɛne pɛpɛɛpɛ na wɔahile debie biala mɔɔ bɛbava bɛamaa wɔ la anwo anyezɔlɛ la azo. (3) Ɔnle kɛ mediema mrenya nee mraalɛ da sua ko anu kyesɛ bɛle abusua ko. (4) Mmato aleɛ wɔ sua mɔɔ bɛndo aleɛ wɔ nu la anu. (5) Amaa wɔali ɛ nwo eni la, ɔnle kɛ ɛbia alie nwo. Saa ɔkɛyɛ boɛ a ɔwɔ kɛ bɛfa ɛkpa anzɛɛ ɛdanlɛ bɛyɛ abialeɛ. (6) Kɛmɔ yɛle Keleseɛnema la ati, yɛngulo kɛ yɛfa ngyehyɛleɛ biala mɔɔ bɛyɛ bɛmaa nyɛvolɛ la yɛdi gyima wɔ adenle ɛtane zo. (7) Da sunsum ne ma ne ali wɔ kɛzi ɛ nee menli mɔɔ yɛ gyima wɔ hotɛle anzɛɛ mbusua mɔɔ ɛ nee bɛ de la yɛ la anu. (8) Saa edwɛkɛ ba wɔ dabelɛ anzɛɛ hotɛle sua ne anwo a, nea kɛ ɛbabɔ Rooming Department ne amaneɛ wɔ nyianu ne abo.
◼ Tunwomaa Gyima: Awie biala mɔɔ kulo kɛ ɔyɛ gyima bie la ɔwɔ kɛ nwu Tunwomaa Gyimalilɛleka ne wɔ nyianu ne abo na ɔkɛlɛ ye duma. Ngakula mɔɔ ɛtɛdwule ɛvolɛ 16 la noko bahola ayɛ gyima kɛnlɛma wɔ mekɛ mɔɔ bɛ awovolɛ anzɛɛ awie mɔɔ nea bɛ anzɛɛ kpanyinli bie mɔɔ awovolɛ anzɛɛ awie mɔɔ nea bɛ ɛkpa ye ɛlɛnea bɛ nwo zo la. Ɔwɔ kɛ menli mɔɔ nea gyima ngakyile ne mɔ azo la kpondɛ menli mɔɔ baboa bɛ la wɔ maanzinli ne anu kolaa na nyianu ne abɔ ɔ bo.