Saa Ɛte Nganeɛ Kɛ Ɔwɔ Kɛ Ɛpɛ Zolɛ A

Adriana mɔɔ ɔvi Brazil la hanle kɛ, “Nganeɛdelɛ ɛhye mɔ angakyi ɛlɛ, yemɔti menzile kpɔkɛ kɛ saa meku me nwo bɔbɔ a nvasoɛ wɔ zo.”

ASOO WƆDE nganeɛ ɛlɛ kɛ asetɛnla ne ɛvonle wɔ ɔ? Ɛnee ɛbade Adriana edwɛkɛ bo. Adwenleadwenle mɔɔ anu yɛ se la dɔle ɔ nwo, ɛhye maanle ɔ rɛle bɔle na ɔdele nganeɛ kɛ ɔnlɛ anyelazo. Adriana nyianle ewule bie mɔɔ maa bɛ rɛle bɔ dahuu la.

Suzu Kaoru mɔɔ vi Japan na ɔlɛnea ye awovolɛ mɔɔ bɛnde kpɔkɛ na bɛyɛ mgbanyinli la anwo. Ɔhilele nu kɛ, “Zɔhane mekɛ ne ɛnee gyima nu ngyegyelɛ ɛlɛbu me kɔme. Ɔdwule mekɛ bie la ɛnee me ti akunlu ɛnle aleɛ zo yɛɛ ɛnee mengola da. Mendele nganeɛ kɛ saa menwule bɔbɔ a, anrɛɛ ɔle kpalɛ.”

Ojebode mɔɔ ɔvi Nigeria la hanle kɛ, “Me rɛle ta bɔ dedee mesu, yemɔti ɛnee mekulo kɛ meku me nwo.” Anyelielɛ edwɛkɛ a le kɛ, Ojebode, Kaoru, yɛɛ Adriana angu bɛ nwo. Noko ɛvolɛ biala menli apenle dɔɔnwo ku bɛ nwo.

NIENWU A ƐBANYIA MOALƐ A?

Menli mɔɔ ta ku bɛ nwo kpalɛ la a le mrenyia. Bɛ nuhua dɔɔnwo se nyiane kɛ bɛbabiza moalɛ. Gyisɛse hanle kɛ bɛdabɛ mɔɔ bɛnde kpɔkɛ la a hyia ayileyɛvolɛ a. (Luku 5:31) Yemɔti saa ɛlɛ ngyegyelɛ ɛhye bie a, mmase nyiane kɛ ɛbakpondɛ moalɛ. Menli mɔɔ lɛ adwenle nu ngyegyelɛ la anu dɔɔnwo ɛnwu ye kɛ ayileyɛlɛ kola boa bɛ maa bɛgyinla ɔ nloa. Ojebode, Kaoru, yɛɛ Adriana kpondɛle moalɛ vile Dɔketama ɛkɛ, na yeboa bɛ kpalɛ.

Dɔketama kola fa ayile boa menli mɔɔ lɛ adwenle nu ngyegyelɛ la anzɛɛ bɛtendɛ bɛkile bɛ. Ɔdwu mekɛ ne bie noko a bɛfa ɔ mu nwiɔ bɛboa bɛ. Ɔwɔ kɛ mbusuafoɔ nee agɔnwolɛma te menli ɛhye mɔ edwɛkɛ bo na bɛdwenle bɛ nwo. Agɔnwolɛ kpalɛ mɔɔ awie bahola anyia la a le Gyihova Nyamenle, ɔdua ye Edwɛkɛ Baebolo ne azo ɔboa yɛ.

ASOO YE SƆBELƐ BƆKƆƆ WƆ ƐKƐ Ɔ?

Bie a ɔbahyia kɛ menli mɔɔ lɛ adwenle nu ngyegyelɛ la kɔ zo kpondɛ moalɛ fi Dɔketama ɛkɛ na bɛkakyi bɛ subane bie mɔ amaa bɛahola bɛagyinla ɔ nloa. Noko, saa ɛlɛ adwenle nu ngyegyelɛ a, ɛbahola wɔapɛ kenle bie mɔɔ yɛ anyelielɛ la anwo nvoninli kɛ mɔɔ Ojebode yɛle la. Ɔka kɛ, “Me nye la mekɛ mɔɔ Ayezaya 33:24 bara nu la ade. Ɛkɛ ne maa yɛnwu kɛ mekɛ bie bara mɔɔ awie biala mɔɔ wɔ azɛlɛ ye azo la ɛnrɛha kɛ, ‘Me nwo ɛdo me.’” Maa “azɛlɛ fofolɛ” ne mɔɔ “nyane” ɛnle zo mɔɔ Nyamenle ɛbɔ nwolɛ ɛwɔkɛ la ɛkyekye ɛ rɛle kɛ Ojebode la. (Yekile 21:1, 4) Ɛwɔkɛ zɔhane kile kɛ adwenle nu nee nganeɛdelɛ nu ngyegyelɛ biala bavi ɛkɛ. Yemɔti wɔ nyanelilɛ ne mɔ “abo zo baminli mɔɔ . . . ɛnrɛhakye bɛ bieko a.”—Ayezaya 65:17.

Ngɛlɛlera Mɔɔ Baboa

Nyamenle te wɔ nganeɛdelɛ bo.

‘Medame Gyihova bɛ Nyamenle, melɛ bɛ sa fema ne anu, melɛka meahile bɛ kɛ: “Bɛmmasulo na mebaboa bɛ.”’—Ayezaya 41:13.

Gyihova te kɛzi yɛte nganeɛ la abo kpalɛ tɛla awie gyɛne biala, na ɔkulo kɛ ɔboa yɛ.

Dwenledwenle Nyamenle Edwɛkɛ ne anwo.

“[Yilaegya] zɛlɛle kɛ, ‘O Gyihova, . . . maa menwu.’”—1 Arelemgbunli 19:4.

Ojebode hanle kɛ, “Nyamenle Edwɛkɛ ne mɔɔ mendwenledwenlenle nwolɛ la boale me. Menwunle kɛ mekɛ bie ngapezonli Yilaegya dele me nganeɛ ne bie.”

Sukoa Baebolo nu neazo.

‘Mezɛlɛ memaa wɔmɔ Pita amaa wɔ diedi anwie.’—Luku 22:32.

Mɔɔ ɛzoanvolɛ Pita kpole Gyisɛse fane nsa la, ɛnee ɔyɛ se kɛ ɔbagyinla nganeɛdelɛ ne anloa na ɔzunle kpalɛ. Kaoru ka kɛ, “Pita anwubielɛ ne boale me maanle menwunle kɛ ɛnee Gyihova nee Gyisɛse te ye nganeɛdelɛ bo. Na ɛhye maanle me anwosesebɛ.”

Wɔ nyanelilɛ ne mɔ “abo zo baminli mɔɔ . . . ɛnrɛhakye bɛ bieko a.”—Ayezaya 65:17