Nrenyia bie mɔɔ yenyia adwenle kɛ ɔhu ɔ nwo la

Mekulo Kɛ Mewu—Saa Menyia Adwenle Kɛ Mengu Me Nwo A, Asoo Baebolo Ne Bahola Aboa Me?

Baebolo ne bua kɛ

Ɛhɛe! Baebolo ne vi “Nyamenle mɔɔ kyekye bɛdabɛ mɔɔ bɛ rɛle ɛbɔ la arɛle” la ɛkɛ. (2 Kɔlentema 7:6) Ɔnva nwo kɛ Baebolo ne ɛnle adwenle nu kpɔkɛdelɛ nwo buluku la, yeboa menli dɔɔnwo yemaa bɛli adwenle mɔɔ bɛnyianle kɛ bɛhu bɛ nwo la azo konim. Folɛdulɛ kpalɛ mɔɔ wɔ nu la bahola aboa ɛdawɔ noko.

Folɛdulɛ kpalɛ boni a Baebolo ne fa maa a?

● Da wɔ nganeɛdelɛ ali.

Mɔɔ Baebolo ne ka la: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenyia a.”—Mrɛlɛbulɛ 17:17.

Mɔɔ ɔkile: Yɛhyia awie mɔ moalɛ wɔ mekɛ mɔɔ debie ɛlɛgyegye yɛ la.

Saa wɔanga kɛzi ɛte nganeɛ la wɔangile awie a, nganeɛdelɛ ɛtane ne bahola avo ɛ nwo zo. Noko, saa ɛka nwolɛ edwɛkɛ ɛkile awie mɔ a, bie a ɛ nwo badɔ wɔ ekyi na wɔanyia tɛnlabelɛ ne anwo adwenle fofolɛ.

Sɔ ɛhye nea: Ɛ nee busuanli bie anzɛɛ ɛ gɔnwo bie mɔɔ ɛdie ye ɛdi la ɛdendɛ ɛnɛ. Ɛbahola noko wɔahɛlɛ kɛzi ɛte nganeɛ la.
● Kpondɛ moalɛ wɔ dɔketa ɛkɛ.

Mɔɔ Baebolo ne ka la: “Menli mɔɔ te kpɔkɛ la ɛngyia ayileyɛvolɛ nwo, emomu menli mɔɔ ɛnde kpɔkɛ la a hyia bie a.”—Mateyu 9:12.

Mɔɔ ɔkile: Saa yɛnde kpɔkɛ a, ɔwɔ kɛ yɛmaa dɔketa boa yɛ.

Saa awie nyia adwenle kɛ ɔku ɔ nwo a, bie a ɔbayɛ adwenle nu anzɛɛ nganeɛdelɛ nu anwodolɛ nwo sɛkɛlɛneɛ. Mmase ɛhye anwo nyiane, ɔle kɛ nwonane nu anwodolɛ ala la. Bɛkola bɛyɛ adwenle nu nee nganeɛdelɛ nu anwodolɛ ayile.

Sɔ ɛhye nea: Kpondɛ moalɛ wɔ dɔketa mɔɔ fɛta la ɛkɛ ne ndɛndɛ.
● Kakye kɛ Nyamenle dwenle ɛ nwo.

Mɔɔ Baebolo ne ka la: “Bɛndɔne ngɛsanloma nnu ngapɛlɛ nwiɔ ɔ? Noko Nyamenle arɛle ɛnvi bɛ nuhua ko bɔbɔ. . . . Bɛmmasulo; bɛsonle bolɛ bɛtɛla ngɛsanloma dɔɔnwo.”—Luku 12:6, 7.

Mɔɔ ɔkile: Ɛsonle bolɛ ɛmaa Nyamenle.

Bie a, ɛbade nganeɛ kɛ yeha ɛ ngome, noko Nyamenle nwu mɔɔ ɛlɛfa nu la amuala. Ɔdwenle ɛ nwo—saa bɔbɔ ɛnlɛ ɛhulolɛ kɛ ɛbadɛnla aze bieko a. Edwɛndolɛ 51:17, New World Translation ne ka kɛ: “O Nyamenle, ahonle mɔɔ ɛbubu na yebɛtɛ la ɛnrɛkpo.” Nyamenle kulo kɛ ɛtɛnla ngoane nu ɔluakɛ ɔkulo wɔ.

Sɔ ɛhye nea: Kpondɛ daselɛ mɔɔ kile kɛ Nyamenle kulo wɔ la wɔ Baebolo ne anu. Kɛ neazo la, nea Ɛzinzalɛ Arane, July 15, 2017 mukelɛ 17-21.
● Sɛlɛ Nyamenle.

Mɔɔ Baebolo ne ka la: ‘Bɛvuandi bɛ adwenleadwenle muala bɛgua Nyamenle anwo zo ɔluakɛ ɔdwenle bɛ nwo.’—1 Pita 5:7.

Mɔɔ ɔkile: Nyamenle to ɛsalɛ fɛlɛ wɔ kɛ ɛvi wɔ ahonle nu ɛha mɔɔ gyegye wɔ la amuala ɛhile ye.

Nyamenle bahola amaa wɔ anzodwolɛ nee anwosesebɛ mɔɔ bamaa wɔagyinla tɛnlabelɛ ne anloa la. (Felepaema 4:6, 7, 13) Ɔdua adenle ɛhye azo ɔboa menli mɔɔ fi bɛ ahonle nu sɛlɛ ye la.—Edwɛndolɛ 55:22.

Sɔ ɛhye nea: Sɛlɛ Nyamenle ɛnɛ. Fa ye duma Gyihova ne di gyima na ka kɛzi ɛte nganeɛ la kile ye. (Edwɛndolɛ 83:18, New World Translation) Sɛlɛ ye kɛ ɔboa wɔ ɔmaa ɛgyinla ɔ nloa.
● Dwenledwenle kenle bie anyelazo mɔɔ wɔ Baebolo ne anu la anwo.

Mɔɔ Baebolo ne ka la: “Anyelazo ɛhye mɔɔ yɛlɛ la le kɛ sɛkɛ maa yɛ ngoane, ɔgyi ye pi yɛɛ ɔgyi ye kpundii.”—Hibuluma 6:19, ɔ bo ɛkɛ edwɛkɛ ne.

Mɔɔ ɔkile: Kɛ mɔɔ ahumu ɛlɛtu a ɛlɛne ɛngola ɛngyinla ɛleka ko la, zɔhane ala a wɔ nganeɛdelɛ ne bahola ayɛ a, noko anyelazo mɔɔ wɔ Baebolo ne anu la bahola amaa wɔagyinla.

Anyelazo zɔhane ɛnle ɛlalɛ bie ala, emomu ɔgyi ɛwɔkɛ mɔɔ Nyamenle ɛbɔ kɛ ɔbaye ninyɛne mɔɔ maa yɛnwu amaneɛ yeavi ɛkɛ la azo.—Yekile 21:4.

Sɔ ɛhye nea: Kenga Edwɛkpa Mɔɔ Vi Nyamenle Ɛkɛ! brohyua ne ɛzukoalɛdeɛ 5 fa sukoa anyelazo mɔɔ wɔ Baebolo ne anu la anwo debie dɔɔnwo
● Yɛ debie mɔɔ ɛ nye die nwo la.

Mɔɔ Baebolo ne ka la: “Anyelielɛ ahonle le ayile kpalɛ.”—Mrɛlɛbulɛ 17:22, New World Translation.

Mɔɔ ɔkile: Saa yɛyɛ ninyɛne mɔɔ maa yɛ nye die la a, yɛbanyia adwenle nu nee nganeɛdelɛ nu kpɔkɛdelɛ kpalɛ.

Sɔ ɛhye nea: Yɛ ninyɛne mɔɔ maa ɛ nye die la. Kɛ neazo la, tie edwɛne mɔɔ maa anwosesebɛ, kenga debie mɔɔ maa anwosesebɛ anzɛɛ nyia mekɛ yɛ ninyɛne mɔɔ ɛ nye die nwo la. Eza ɛ nye bahola alie kpalɛ saa ɛyɛ ninyɛne ngyikyi bɔbɔ ɛboa awie mɔ a.—Gyima ne 20:35.
● Nea wɔ nwonane nu kpɔkɛdelɛ kpalɛ.

Mɔɔ Baebolo ne ka la: ‘Agbɔkɛ nu ɛkpundilɛ zo lɛ nvasoɛ.’—1 Timote 4:8.

Mɔɔ ɔkile: Saa yɛkpundikpundi yɛ agbɔkɛ nu, yɛda yɛmaa ɔte yɛ na yɛdi aleɛ kpalɛ a, yɛnyia zolɛ nvasoɛ.

Sɔ ɛhye nea: Ɛbahola wɔadia ndɛndɛ kɛyɛ mitini 15 ala.
● Kakye kɛ, nganeɛdelɛ nee ɛbɛlabɔlɛ nu ninyɛne bie mɔ kakyi.

Mɔɔ Baebolo ne ka la: “Bɛnze mɔɔ bado bɛ ɛhyema la.”—Gyemise 4:14.

Mɔɔ ɔkile: Ngyegyelɛ bie—mɔɔ zɔho kɛ ɔnlɛ ye sɔbelɛ bɔbɔ la—bahola ayɛ mekɛ ezinra nu debie.

Ɔnva nwo kɛzi wɔ tɛnlabelɛ ne ɛzɛkye ɛnɛ la, ɔbahola yeahakyi ɛhyema. Ɔti, kpondɛ ndenle mɔɔ ɛbalua zo wɔagyinla ɔ nloa la. (2 Kɔlentema 4:8) Tɛnlabelɛ mɔɔ yɛ abodelɛ mɔɔ ɛwɔ nu la bahola ahakyi, noko saa ɛku ɛ nwo a, ɛnrɛhola ɛnrɛhakyi ye.

Sɔ ɛhye nea: Kenga Baebolo nu edwɛkɛ mɔɔ fale menli mɔɔ dele nganeɛ kɛ bɛ sa nu ɛdo somaa na ɛnee bɛkulo kɛ bɛwu anwo la, na nea kɛzi bɛ asetɛnla hakyile yɛle kpalɛ nzinlii la—fane dɔɔnwo ne ala wɔ ndenle mɔɔ ɛnee bɛnzuzu la azo. Suzu neazo bie mɔ anwo.

Asoo Baebolo ne ka menli mɔɔ ɛnee bɛkulo kɛ bɛwu la anwo edwɛkɛ kile yɛ?

Ɛhɛe. Baebolo ne ka menli bie mɔ mɔɔ ɛnee bɛkulo kɛ bɛwu la anwo edwɛkɛ kile yɛ. Nyamenle andea bɛ, emomu ɔboale bɛ. Ɔbahola yeaboa ɛdawɔ noko.

Yilaegya

● Yemɔ a le nwane? Ɛnee Yilaegya le ngapezonli mɔɔ lɛ akɛnrasesebɛ. Noko, ɛnee ɔdwu mekɛ ne bie a ɔdaye noko ɔ sa nu to. Gyemise 5:17 ka kɛ: “Ɛnee Yilaegya le sonla mɔɔ te nganeɛ kɛ yɛdayɛ ala la.”
● Duzu ati ɛnee ɔkulo kɛ ɔwu a? Mekɛ bie, Yilaegya dele nganeɛ kɛ yeha ɔ ngome, nvasoɛ ɛnle ɔ nwo zo yɛɛ ye ahonle dule. Ɔti, ɔzɛlɛle kɛ: ‘Gyihova, maa menwu.’—1 Arelemgbunli 19:4.
● Duzu a boale ye a? Yilaegya hanle kɛzi ɔte nganeɛ la ɔhilele Nyamenle. Kɛzi Nyamenle maanle ye anwosesebɛ ɛ? Nyamenle maanle Yilaegya nwunle ye kɛ ɔdwenle ɔ nwo na ɔhilele ye kɛzi Ye tumi ne le kpole la. Eza ɔmaanle Yilaegya nwunle kɛ ɔ nwo hyia na ɔvile ɛlɔlɛ nu ɔvale moalɛ mɔɔ Yilaegya hyia nwolɛ la ɔmaanle ye.
▸ Kenga Yilaegya anwo edwɛkɛ: 1 Arelemgbunli 19:2-18.

Dwobu

● Yemɔ a le nwane? Ɛnee Dwobu le sukoavolɛ mɔɔ lɛ abusua kpole, na ɛnee ɔsonle nɔhalɛ Nyamenle ne nɔhalɛ nu.
● Duzu ati ɛnee ɔkulo kɛ ɔwu a? Dwobu asetɛnla kpalɛ ne zɛkyele bɔkɔɔ. Ye agyapadeɛ muala vile ɔ sa. Esiane bie hunle ɔ mra ne mɔ amuala. Ɔnyianle ewule bie mɔɔ yɛ nyane la. Awieleɛ bɔkɔɔ ne, bɛdonle ye ɛzonle atisesebɛ nu kɛ ye amaneɛnwunlɛ ne vi ɔdaye mumua ne. Dwobu hanle: “Mekyi me ngoane; Mengulo kɛ mekɔ zo metɛnla ngoane nu bieko.”—Dwobu 7:16, New World Translation.
● Duzu a boale ye a? Dwobu yɛle asɔne na ɔhanle ye edwɛkɛ ɔhilele awie mɔ. (Dwobu 10:1-3) Ɔ gɔnwo Ɛlaehu mɔɔ se anwunvɔne la maanle ye anwosesebɛ na ɔboale ye ɔmaanle ɔnyianle ye tɛnlabelɛ ne anwo adwenle kpalɛ. Mɔɔ hyia kpalɛ la, Dwobu liele Nyamenle folɛdulɛ nee ye moalɛ dole nu.
▸ Kenga Dwobu anwo edwɛkɛ: Dwobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosisi

● Yemɔ a le nwane? Ɛnee Mosisi le tete Yizilayɛ adekilevolɛ yɛɛ ngapezonli nɔhavo.
● Duzu ati ɛnee ɔkulo kɛ ɔwu a? Ɛnee Mosisi gyima le kpole, bɛdendɛle bɛtiale ye dahuu yɛɛ ɔdele nganeɛ kɛ yevɛ. Ɔti ɔzunle ɔvɛlɛle Nyamenle kɛ: “Pɛ me [ngoane] zo ndɛndɛ.”—Ɛdianlɛ 11:11, 15.
● Duzu a boale ye a? Mosisi hanle kɛzi ɔte nganeɛ la ɔhilele Nyamenle. Nyamenle boale Mosisi ɔmaanle ɔdele ye gyima ne azo amaa ye adwenleadwenle zo ade.
▸ Kenga Mosisi anwo edwɛkɛ: Ɛdianlɛ 11:4-6, 10-17.

Baebolo ngyehyɛnu boni mɔ a bahola aboa wɔ amaa wɔaho wɔatia adwenle mɔɔ ɛlɛ kɛ ɛhu ɛ nwo la ɛ?

Ngyehyɛnu mɔɔ kile kɛ Nyamenle dwenle ɛ nwo la:

“[Gyihova] bikye mɔɔ nyane ɛha ye la, na ɔdie mɔɔ ye anyelazo ɛwie la.”—Edwɛndolɛ 34:18.
“Saa adwenleadwenle bo me nwo zo a, ɛkyekye me rɛle ɛmaa medi fɛlɛko.”—Edwɛndolɛ 94:19.

(Eza nea Edwɛndolɛ 27:10; 103:12-14; 2 Kɔlentema 1:3, 4.)

Ngyehyɛnu mɔɔ kile kɛ Nyamenle te wɔ nyanelilɛ bo la:

“Wɔnwu me amaneɛnwunlɛ; wɔnwu munzule mɔɔ ɛdo me la.”—Edwɛndolɛ 31:7.
“Bɛ nyanelilɛ kɔsɔɔti yɛle ye nyanelilɛ. . . . Ɔluale ye ɛhulolɛ nee ye anwunvɔnezelɛ zo . . . , ɔdwule bɛ.”—Ayezaya 63:9.

Ngyehyɛnu mɔɔ kile kɛ Nyamenle kulo kɛ ɛbikye ye na ɛka wɔ ahonle nu edwɛkɛ ɛkile ye wɔ asɔneyɛlɛ nu la:

‘Bɛmmadwenle debie biala anwo, emomu wɔ debie biala anu bɛlua asɔneyɛlɛ zo bɛva bɛ nzɛlɛlɛ bɛdo Nyamenle anyunlu; na Nyamenle anzodwolɛ ne mɔɔ bo ndelebɛbo muala azo la babɔ bɛ ahonle nee bɛ adwenle nzuzulɛ nwo bane.’—Felepaema 4:6, 7.
“Bɛbikye Nyamenle, na ɔbabikye bɛ.”—Gyemise 4:8.

(Eza nea Edwɛndolɛ 34:4, 15; 55:22.)

Ngyehyɛnu mɔɔ kile kɛ Nyamenle bahola amaa wɔ anwosesebɛ la:

“Melɛ anwosesebɛ wɔ debie biala anu ɔlua ahenle mɔɔ maa me tumi la ati.”—Felepaema 4:13.
“Bɛmmasulo, ɔluakɛ me nee bɛ lua; bɛmmamaa bɛ ahonle tu, medame a mele bɛ Nyamenle a. Mebamaa bɛ anwosesebɛ, mebaboa bɛ.”—Ayezaya 41:10.

(Eza nea Edwɛndolɛ 138:3; Ayezaya 40:29-31.)

Na saa ɛ gɔnwo bie ka kɛ, “Mekulo kɛ mewu” ɛ?

Saa awie ka kɛ ɔkulo kɛ ɔwu a, mmabu ɛ nye ɛgua zo. Maa ɛ gɔnwo ne anwosesebɛ maa ɔdendɛ; biza ye kpuya maa ɔha kɛzi ɔte nganeɛ la. (Mrɛlɛbulɛ 20:5) Saa menli ka adwenle mɔɔ bɛnyia kɛ bɛku bɛ nwo la anwo edwɛkɛ a, ɔnda ɔnzi kɛ bɛbahu bɛ nwo.
Fi anwunvɔnezelɛ nu tie ye. ‘Yɛ ye ndɛ tie edwɛkɛ, mmapele ɛ nwo ɛtendɛ.’ (Gyemise 1:19) Nwu ye kɛ nyanelilɛ nee adwenleadwenle kola maa awie ka ‘mgbole.’ (Dwobu 6:2, 3) Yemɔti, saa ɛ gɔnwo bie ka edwɛkɛ mɔɔ nrɛlɛbɛ ɛnle nu anzɛɛ edwɛkɛ mɔɔ yɛ nyane la a, mmadi ɔ nzi ɛfa nwolɛ ɛya.
Kyekye ɔ rɛle. Baebolo ne tu yɛ folɛ kɛ: “Bɛkyekye menli mɔɔ arɛle ɛbɔ la arɛle.” (1 Tɛsalonaekama 5:14) Mmabu ɛ gɔnwo ne nganeɛdelɛ ne kɛ ndelebɛbo ɛnle nu. Die ye nganeɛdelɛ ne nee deɛmɔti ɔte nganeɛ zɔhane la to nu. Ka kile ɛ gɔnwo ne kɛ ɛdwenle ɔ nwo.
Maa ɛ gɔnwo ne anwosesebɛ maa ɔkpondɛ moalɛ. Mrɛlɛbulɛ 13:10 ka kɛ: “Mɔɔ te folɛ la ze nrɛlɛbɛ.” Saa nwonane nu anwodolɛ bie mɔɔ anu yɛ se la a hanle ɛ gɔnwo ne a, anrɛɛ ɛbamaa ye anwosesebɛ kɛ ɔhɔnwu dɔketa. Saa awie nyia adwenle kɛ ɔhu ɔ nwo a, bie a ɔbayɛ adwenle nu anzɛɛ nganeɛdelɛ nu anwodolɛ nwo sɛkɛlɛneɛ, ɔti maa ye anwosesebɛ maa ɔkpondɛ moalɛ ɔvi dɔketa bie ɛkɛ. Ɛ nee ye ɛhɔ bɔbɔ.
Da ɛlɔlɛ ali. Baebolo ne ka kɛ: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenyia a.” (Mrɛlɛbulɛ 17:17) Ɛnrɛhola ɛnrɛye ɛ gɔnwo ne ngyegyelɛ anzɛɛ adwenle mɔɔ ɔlɛ kɛ ɔku ɔ nwo la ɛnrɛvi ɛkɛ. Noko, saa ɛmaa ɔnwu ye kɛ ɛkulo ye na ɛkulo kɛ ɛboa ye a, bie a ɔbaboa ye yeamaa yeagyinla ɔ nloa—na yeade nganeɛ kɛ anyelazo wɔ ɛkɛ.

Na saa meyɛ kɛ meku me nwo ɛlɛ ɛ?

Bie a, wɔ adwenle babua wɔ fɔlɛ anzɛɛ wɔade nganeɛ kɛ wɔbɔ anyiemgba noko ndelebɛbo wɔ nu. Bie noko a, ɛbade nganeɛ kɛ awie biala ɛnde deɛmɔti ɛnee ɛkulo kɛ ɛku ɛ nwo anzɛɛ nganeɛdelɛ nu nyanelilɛ mɔɔ ɛlɛkɔ nu kɛkala la abo.

Baebolo ne maa ɔda ali kɛ yɛnrɛhola yɛnrɛde awie mɔ nganeɛdelɛ bo yɛnrɛwie. Baebolo ne ka kɛ: “Ahonle a ze ɔdaye ye nyane mɔɔ ɔdi la a.” (Mrɛlɛbulɛ 14:10; 1 Arelemgbunli 8:38) Ɔti, ɔwɔ nuhua kɛ wɔ alɔvolɛ bahola aboa wɔ ɛdeɛ, noko bɛnrɛhola bɛnrɛyɛ debie biala. Noko, kakye kɛ ɔtɛkale ɛ ngome.

Nyamenle ze sonla ahonle nu. (2 Edwɛkɛsisilɛ 6:30) Gyihova ze mɔɔ maanle ɛdele nganeɛ kɛ bie a wɔ ngyegyelɛ ne anloa ayile a le kɛ ɛbahu ɛ nwo la. Eza ɔte kɛzi ɛte nganeɛ kɛkala mɔɔ bie bahola ayɛ adwenle nu fɔlɛbualɛ anzɛɛ anyiemgba mɔɔ yɛha nwolɛ edwɛkɛ la abo.—Edwɛndolɛ 139:1.

Gyihova bu ngoane kɛ ɔsonle bolɛ ɛdeɛ, noko ɔlɛ ɛhulolɛ kɛ ɔbava menli mɔɔ nyianle adwenle kɛ bɛku bɛ nwo la ɛtane yeahyɛ bɛ. (Edwɛndolɛ 86:5) Ɔze kɛ, menli dɔɔnwo mɔɔ yɛle kɛ bɛku bɛ nwo la ɛngulo kɛ bɛwu—bɛkulo kɛ bɛpɛ bɛ amaneɛnwunlɛ zo ala. Ɔti, Gyihova bahola aboa, saa bɔbɔ ‘yɛ ahonle bua yɛ fɔlɛ a, ɔluakɛ Nyamenle le kpole tɛla yɛ ahonle yɛɛ ɔze ninyɛne muala.’ (1 Dwɔn 3:19, 20) Ɛhɛe, ɔkulo kɛ ɔyɛ “anwunvɔnezelɛ Selɛ nee arɛlekyekyelɛ muala Nyamenle” ɔmaa wɔ.—2 Kɔlentema 1:3.

Mekulo Kɛ Mewu—Saa Menyia Adwenle Kɛ Mengu Me Nwo A, Asoo Baebolo Ne Bahola Aboa Me?

Baebolo ne bua kɛ

Folɛdulɛ kpalɛ boni a Baebolo ne fa maa a?

● Da wɔ nganeɛdelɛ ali.

● Kpondɛ moalɛ wɔ dɔketa ɛkɛ.

● Kakye kɛ Nyamenle dwenle ɛ nwo.

● Sɛlɛ Nyamenle.

● Dwenledwenle kenle bie anyelazo mɔɔ wɔ Baebolo ne anu la anwo.

● Yɛ debie mɔɔ ɛ nye die nwo la.

● Nea wɔ nwonane nu kpɔkɛdelɛ kpalɛ.

● Kakye kɛ, nganeɛdelɛ nee ɛbɛlabɔlɛ nu ninyɛne bie mɔ kakyi.

Asoo Baebolo ne ka menli mɔɔ ɛnee bɛkulo kɛ bɛwu la anwo edwɛkɛ kile yɛ?

Yilaegya

Dwobu

Mosisi