Mekɛ Mɔɔ Ɛnde Kpɔkɛ Fee La

“Mɔɔ menwunle kɛ menyia kansa wɔ me ɛvovoa ne yɛɛ me anyalɛ ne anu la, menwunle kɛ me ewule mekɛ ɛdwu. Menvile dɔketa ne anwo ɛkɛ membale sua nu la, ‘mendwenlenle nwolɛ kɛ, me nye ɛnla ɛhye ade noko ɔwɔ kɛ megyinla ɔ nloa.’”—Linda mɔɔ ɛli ɛvolɛ 71 la.

“Menyianle ewule bie mɔɔ maa mete nyane kpalɛ wɔ me nyunlu foa ko ndinli ne mɔ anu. Ɔyɛ a kɛzi mete nyane la maa adwenleadwenle tɔ me nwo. Fane dɔɔnwo ne ala mendele nganeɛ kɛ yeha me ngome na menyianle adwenle kɛ meku me nwo bɔbɔ.”—Elise, mɔɔ ɛli ɛvolɛ 49 la.

Kulovolɛma ɛbɔ ɛyia nrenyia bie mɔɔ ɛnde kpɔkɛ na ɔde abubura ebia nu la

SAA ɛnwu kɛ ɛdawɔ anzɛɛ wɔ kulovolɛ bie ɛnyia ewule bie mɔɔ kola ku sonla la a, ɛnee ɛze kɛzi ɔsi ɔgyegye adwenle kpalɛ la. Ɛye ewule ne ɛsie ahane a, eza ɔwɔ kɛ ɛgyinla adwenleadwenle mɔɔ doa ye la anloa. Saa ɔwɔ kɛ ɛnwu dɔketama ngakyile, ɛnnyia ayileyɛlɛ kpalɛ anzɛɛ ɛnnyia ezukoa ɛndɔ bie, anzɛɛ ayileyɛlɛ bie maa wɔ ngyegyelɛ fofolɛ a, ɔmaa wɔ ahonle tu na adwenleadwenle tɔ ɛ nwo. Saa adwenleadwenle nee anwodolɛ bɔ nu a, ɔnla aze.

Nienwu a yɛbahola yɛanyia moalɛ a? Menli dɔɔnwo ɛnwu ye kɛ saa bɛfa bɛ nwo bɛto Nyamenle anwo zo wɔ asɔneyɛlɛ nu, na bɛkenga arɛlekyekyelɛ edwɛkɛ mɔɔ wɔ Baebolo ne anu la a, ɔkyekye bɛ rɛle kpalɛ. Ɛleka bieko mɔɔ yɛbahola yɛanyia moalɛ la a le yɛ mbusuafoɔ nee yɛ gɔnwo mɔ ɛkɛ.

KƐZI MENLI BIE MƆ ƐGYINLA Ɔ NLOA LA

Robert mɔɔ ɛnyia ɛvolɛ 58 la tu folɛ kɛ, “Diedi mɔɔ ɛbanyia ye wɔ Nyamenle anu la baboa wɔ yeamaa wɔagyinla wɔ anwodolɛ ne anloa. Sɛlɛ Gyihova dahuu. Maa ɔnwu kɛzi ɛte nganeɛ la. Sɛlɛ ye sunsum nwuanzanwuanza ne. Sɛlɛ ye kɛ ɔmaa ɛnyia adwenle kpalɛ amaa wɔahola wɔamaa abusua ne anwosesebɛ na ɔboa wɔ ɔmaa ɛhola ɛgyinla anwodolɛ ne anloa.

“Saa wɔ abusua ne wɔ ɛkɛ ne maa wɔ na bɛboa wɔ bɛmaa ɛgyinla wɔ ngyegyelɛ nloa a, ɔboa kpalɛ. Ɛnee dahuu biala sonla ko anzɛɛ menli nwiɔ fɛlɛ me biza me akpɔkɛ nu. Ɛnee menyia anwosesebɛmaanlɛ mefi agɔnwolɛma ɛkɛ. Bɛmaa me nye die, na yemɔ maa megyinla kpundii.”

Saa ɛlɛkɔ wɔahɔkpɔla ɛ gɔnwo mɔɔ ɛnde kpɔkɛ la a, yɛ mɔɔ Linda hanle la nzonlɛ. Ɔse: “Ɔda ali kɛ ahenle mɔɔ anwo ɛdo ye la kulo kɛ ɔsia ɔba ye dɛba nu, yemɔti bie a ɔnrɛhulo kɛ bɛbaha ye anwodolɛ ne anwo edwɛkɛ. Zɔhane ati, bɛbɔ adawu kɛ mɔɔ bɛbɔ ye dɛba la ala.”

Saa yɛgyi anwodolɛ mɔɔ anu yɛ se bɔbɔ la anloa a, ɔlua Nyamenle moalɛ zo yɛɛ arɛlekyekyelɛ mɔɔ vi Ngɛlɛlera ne anu la azo, yɛbahola yɛanyia anwodozo kɛ nvasoɛ wɔ zo kɛ yɛbadɛnla aze. Zɔhane ala a moalɛ mɔɔ yɛ mbusuafoɔ nee yɛ gɔnwo mɔ fa maa yɛ la noko baboa yɛ a.

Ngɛlɛlera Mɔɔ Baboa

Bikye Nyamenle.

‘Menzɛlɛle Gyihova, na ɔliele zo, na ɔliele me ɔvile me ɛzulolɛ muala anu. Ehyianli ɛhye zunle, na Gyihova diele ye.’—Edwɛndolɛ 34:4, 6.

Linda mɔɔ yɛlimoa yɛha ɔ nwo edwɛkɛ la ka kɛ: “Meanyɛ asɔne ɛlɛ kɛ, ‘Maa mende kpɔkɛ.’ Emomu, dahuu mesɛlɛ kɛ, ‘Maa menyia anwosesebɛ mengyinla me anwodolɛ ne anloa.’”

Kenga Nyamenle Edwɛkɛ ne amaa ɛ nwo ayɛ se.

“Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”—Ayezaya 33:24.

Dwenledwenle Nyamenle ɛwɔkɛ ne mɔ anwo na ɛbanyia anyelazo wɔagyinla nu wɔahɔ awieleɛ.

Kpondɛ moalɛ fi wɔ mbusuafoɔ nee agɔnwolɛma ɛkɛ.

“Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenyia a.”—Mrɛlɛbulɛ 17:17.

Elise mɔɔ yɛlimoa yɛha ɔ nwo edwɛkɛ la tu folɛ kɛ, “Mmate ɛ nwo. Maa ɛ gɔnwo mɔ ɛboa wɔ. Ɔdwu mekɛ ne bie a ɛbade nganeɛ kɛ yeha ɛ ngome na wɔadwenle kɛ bie a Nyamenle bɔbɔ ɛndie wɔ, noko anrɛɛ mmate ɛ nwo.”