Kɛ Ɔkɛyɛ Na Wɔazukoa Baebolo Ne Kpalɛ Na Yeayɛ Anyelielɛ La
BƐMAANLE Dwɔhyua gyima kpole bie. Ɛnee ɔwɔ kɛ ɔdi Yizilayɛ maanle ne anyunlu bɛkɔ Ɛwɔkɛ Azɛlɛ ne azo ɔnva nwo ngyegyelɛ mgbole mɔɔ bɛbayia la. Gyihova maanle ye anwosesebɛ kɛ: ‘Mmasulo, gyinla kpundii na di me mɛla ne azo. Kenga ye nɔɔzo nee ewiazo, na di mɔɔ bɛhɛlɛ ye nuhua la amuala azo. Mmabu ɛ nye ɛgua zolɛ ɛkɔ bɛne anzɛɛ fema zo, amaa ɛleka biala mɔɔ ɛkɛhɔ la wɔali konim. Ɛhye bamaa wɔ ɛbɛlabɔlɛ ne adenrɛ.’—Dwɔh. 1:7, 8.
Wɔ ‘mekɛ ɛhye mɔɔ anu yɛ se’ la anu, yɛdayɛ noko yɛyia ngyegyelɛ mɔɔ anu se. (2 Tim. 3:1) Saa yɛdi folɛ mɔɔ Gyihova dule Dwɔhyua la azo a, ɔbawie yɛ boɛ. Yɛbahola yɛagenga Baebolo ne dahuu, na yɛava nuhua ngyinlazo ne mɔ yɛali sɔnea mɔɔ yɛyia la anwo gyima.
Noko, yɛ nuhua dɔɔnwo balie ado nu kɛ yɛnle sukoavoma kpalɛ yɛɛ debiezukoalɛ yɛ se maa yɛ. Noko, kɛmɔ Baebolo ne ɛzukoalɛ anwo hyia la ati, nea ɛlɛka “Sɔ Nzuzulɛ Ɛhye Mɔ Nea” mɔɔ fa nzuzulɛ kpalɛ mɔɔ bamaa wɔazukoa debie kpalɛ na yeayɛ anyelielɛ la.
Edwɛndolɛnli ne dole edwɛne kɛ, “Fa me dua wɔ mɛla adenle ne anu, ɔluakɛ me nye die nwolɛ.” (Edw. 119:35) Ɛdawɔ noko ɛ nye balie Nyamenle Edwɛkɛ ne ɛzukoalɛ nwo. Ɛbanwu edwɛkɛ ngɛnlɛma wɔ mekɛ mɔɔ ɛlɛkɔ zo wɔazukoa Baebolo ne la.
Bɛtɛkanle kɛ ɛli maanle bie anyunlu kɛ Dwɔhyua la, noko ɛdawɔ noko ɛlɛ wɔ ngyegyelɛ mɔɔ ɛlɛyia a. Ɔti kɛ mɔɔ Dwɔhyua yɛle la, sukoa na di Nyamenle Edwɛkɛ ne azo. Saa ɛyɛ zɔ a, ɛdawɔ noko ɔbawie wɔ boɛ na wɔ ɛbɛlabɔlɛ ne adenrɛ.