Nyia Gyihova Nziezielɛ Ne Mɔ Azo Nvasoɛ Bɔkɔɔ

1, 2. (a) Kɛzi Gyihova Alasevolɛ bu Baebolo ne ɛ? (b) Baebolo ne foa boni a ɛ nye die nwolɛ kpalɛ a?

KƐ Gyihova Alasevolɛ la, yɛkulo Baebolo ne ɛgengalɛ. Ɔmaa yɛnyia arɛlekyekyelɛ, anyelazo, nee adehilelɛ kpalɛ. (Wulomuma 15:4) Tɛ sonla adwenle a wɔ nu a, “ɔvi Nyamenle ɛkɛ.”​—1 Tɛsalonaekama 2:13.

² Yɛ muala yɛlɛ Baebolo ne foa bie mɔɔ yɛ nye die nwo a. Bie mɔ kulo Edwɛkpa ne ɔluakɛ ɔmaa bɛnwu Gyihova subane ngɛnlɛma ne mɔ mɔɔ Gyisɛse lale ye ali la. (Dwɔn 14:9) Bie mɔ noko kulo ngapezo mbuluku le kɛ Yekile mɔɔ maa yɛnwu “mɔɔ ɛnrɛhyɛ biala na yeazi la.” (Yekile 1:1) Saa bie mɔ kenga Edwɛndolɛ ne a, ɔkyekye bɛ rɛle, yɛɛ bie mɔ noko anye die folɛdulɛ kɛnlɛma ne mɔɔ wɔ Mrɛlɛbulɛ buluku ne anu la anwo. Ɔda ali kɛ, bɛhɛlɛle Baebolo ne bɛmaanle awie biala.

3, 4. (a) Kɛzi yɛbu yɛ mbuluku ne mɔ ɛ? (b) Mbuluku boni mɔ a bɛkɛlɛ bɛmaa menli ekpunli titili bie mɔ a?

³ Kɛmɔ yɛkulo Baebolo ne ɛgengalɛ la ati, eza yɛkulo yɛ mbuluku ne mɔ mɔɔ bɛgyi Baebolo ne azo la ɛgengalɛ. Mbuluku, brohyua, magazine, nee mbuluku gyɛne mɔɔ yɛnyia la amuala le nziezielɛ mɔɔ vi Gyihova ɛkɛ. Bɛboa yɛ bɛmaa yɛbeta ye na yɛmia yɛ diedi ne anu.​—Taetɛse 2:2.

⁴ Bɛkɛlɛ yɛ mbuluku ne mɔ dɔɔnwo bɛmaa Gyihova Alasevolɛ amuala. Noko bɛkɛlɛ mbuluku bie mɔ bɛmaa menli ekpunli titili bie le kɛ ngakula anzɛɛ awovolɛ. Edwɛkɛ nee vidio dɔɔnwo mɔɔ wɔ yɛ wɛbsaete ne azo la boa menli mɔɔ bɛnle Gyihova Alasevolɛ la titili. Edwɛkɛ ngakyile ɛhye mɔ kile kɛ Gyihova ɛlɛdi ɛwɔkɛ mɔɔ yebɔ kɛ ɔbamaa menli kɔsɔɔti anyia adehilelɛ dɔɔnwo la azo.​—Ayezaya 25:6.

5. Duzu a yɛze kɛ Gyihova anye die nwo a?

⁵ Yɛ nuhua dɔɔnwo kulo kɛ bɛfa mekɛ dɔɔnwo bɛkenga Baebolo ne nee yɛ mbuluku ne mɔ. Yemɔti yɛ muala yɛnrɛva mekɛ ko ne ala yɛnrɛzukoa buluku biala mɔɔ yɛ sa baha ye la. Yɛze kɛ saa yɛfa yɛ mekɛ yɛdi gyima nrɛlɛbɛ nu yɛkenga na yɛsukoa Baebolo ne nee yɛ mbuluku ne mɔ a, Gyihova anye die. (Ɛfɛsɛsema 5:15, 16) Noko esiane bie wɔ ɛkɛ mɔɔ ɔwɔ kɛ yɛnea boɛ wɔ nwo a. Yemɔ a le boni?

6. Duzu a bamaa nvasoɛ mɔɔ wɔ Gyihova nziezielɛ bie azo la akpa yɛ ti a?

⁶ Saa yɛannea boɛ a, yɛbadwenle kɛ Baebolo ne foa bie anzɛɛ mbuluku bie anu edwɛkɛ ɛnvale yɛ nwo. Kɛ neazo la, saa Baebolo ne foa bie anu edwɛkɛ ɛnvale yɛ tɛnlabelɛ ne anwo ɛ? Na saa yɛmboka menli titili mɔɔ bɛhɛlɛle edwɛkɛ bie bɛmaanle bɛ la anwo ɛ? Asoo yɛkenga edwɛkɛ ɛhye mɔ ndɛndɛ ndɛndɛ anzɛɛ yɛngenga bɛ fee? Saa ɔle zɔ a, ɛnee edwɛkɛ kpalɛ mɔɔ ɔbahola yeaboa yɛ la bakpa yɛ ti. Kɛ ɔkɛyɛ na yɛahoati ɛhye ɛ? Ɔwɔ kɛ yɛkakye kɛ edwɛkɛ mɔɔ yɛnyia la amuala vi Gyihova ɛkɛ. Yɛkenga wɔ Baebolo ne anu kɛ: “Medame a mele [Gyihova] bɛ Nyamenle ne, mɔɔ kilehile bɛ maa bɛyɛ kpalɛ” la. (Ayezaya 48:17) Yɛbazuzu ninyɛne nsa mɔɔ ɔbaboa yɛ yeamaa yɛanyia Baebolo ne kɔsɔɔti azo nvasoɛ la anwo wɔ edwɛkɛ ɛhye anu. Eza yɛbazuzu kɛzi yɛbanyia nziezielɛ mɔɔ Gyihova ɛyɛ kɔsɔɔti azo nvasoɛ la anwo.

BAEBOLO ƐGENGALƐ KPALƐ NWO NZUZULƐ

7. Duzu ati a ɔwɔ kɛ yɛfa adwenle kpalɛ yɛkenga Baebolo ne ɛ?

⁷ Fa adwenle kpalɛ kenga. Ɔle nɔhalɛ kɛ bɛhɛlɛle Baebolo ne foa bie mɔ bɛmaanle sonla ko anzɛɛ menli ekpunli titili bie. Noko Baebolo ne ka ye wienyi kɛ “bɛfa Nyamenle Sunsum a bɛkɛlɛ Nyamenle Edwɛkɛ ne a, na ɔle kpalɛ.” (2 Temɔte 3:16) Ɛhye ati a ɔwɔ kɛ yɛfa adwenle kpalɛ yɛkenga Baebolo ne la. Adiema nrenyia ko se ɛnee ɔkola ɔnyia ɛzukoalɛdeɛ dɔɔnwo ɔfi edwɛkɛ ko pɛ anu. Yemɔ boale ye ɔmaanle ɔnwunle ɛzukoalɛdeɛ mɔɔ ɔnla ali kpalɛ wɔ nu la. Yemɔti kolaa na yɛagenga Baebolo ne la, ɔwɔ kɛ yɛsɛlɛ Gyihova kɛ ɔbuke yɛ adwenle nu na ɔmaa yɛ nrɛlɛbɛ ɔmaa yɛde ɛzukoalɛdeɛ ne mɔɔ ɔkulo kɛ yɛnyia la abo.​—Ɛzela 7:10; kenga Gyemise 1:5.

8, 9. (a) Saa yɛlɛkenga Baebolo ne a, kpuya boni mɔ a ɔwɔ kɛ yɛbiza yɛ nwo a? (b) Duzu a ninyɛne mɔɔ ɔwɔ kɛ mgbanyima dwu nwo la maa yɛnwu ye wɔ Gyihova anwo a?

⁸ Biza kpuya. Saa ɛlɛkenga Baebolo ne a, gyinla na biza ɛ nwo kpuya ɛhye mɔ: ‘Duzu a ɛhye maa menwu ye wɔ Gyihova anwo a? Kɛzi mebava edwɛkɛ ɛhye meali gyima wɔ me ɛbɛlabɔlɛ nu ɛ? Kɛ ɔkɛyɛ na meava meaboa awie mɔ ɛ?’ Saa yɛdwenledwenle kpuya ɛhye mɔ anwo a, yɛbanyia yɛ Baebolo ɛgengalɛ ne azo nvasoɛ. Bɛmaa yɛnlea neazo ko. Baebolo ne ka ninyɛne bie mɔ mɔɔ ɔwɔ kɛ Asafo nu mgbanyima dwu nwo la. (Kenga 1 Temɔte 3:2-7.) Noko yɛ nuhua dɔɔnwo ɛnle mgbanyima, ɔti bie a yɛbadwenle kɛ edwɛkɛ ɛhye ɛnrɛboa yɛ. Noko bɛmaa yɛva kpuya nsa ne yɛnlea kɛzi edwɛkɛ zɔhane kola boa yɛ muala la.

⁹ “Duzu a ɛhye maa menwu ye wɔ Gyihova anwo a?” Gyihova a hilele ninyɛne mɔɔ ɔwɔ kɛ mgbanyima dwu nwo la a. Ɔkulo kɛ mrenyia mɔɔ nea ye asafo ne azo la fa ngyinlazo mɔɔ di munli la bɔ bɛ ɛbɛla. Ɛhye kile kɛ asafo ne hyia ye kpole kpalɛ. Baebolo ne se ɔvale “ɔ Ra ne mogya a” ɔdɔle a. (Gyima ne 20:28) Yemɔti Gyihova anye la kɛ mgbanyima bɛayɛ neazo kpalɛ, yɛɛ bɛbabu kɛzi bɛyɛ asafo ne anu amra la anwo mgbonda bɛahile ye. Ɔkulo kɛ bɛbɔ yɛ nwo bane. (Ayezaya 32:1, 2) Saa yɛkenga edwɛkɛ ɛhye mɔ a, yɛnwu kɛzi Gyihova dwenle yɛ nwo la.

10, 11. (a) Kɛ ɔkɛyɛ na yɛava ninyɛne mɔɔ ɔwɔ kɛ mgbanyima dwu nwo la yɛali gyima wɔ yɛ ɛbɛlabɔlɛ nu ɛ? (b) Kɛ ɔkɛyɛ na yɛava yɛaboa awie mɔ ɛ?

¹⁰ “Kɛzi mebava edwɛkɛ ɛhye meali gyima wɔ me ɛbɛlabɔlɛ nu ɛ?” Saa ɛle asafo nu kpanyinli a, ɔwɔ kɛ ɛta ɛneɛnlea edwɛkɛ ɛhye anu na ɛbɔ mɔdenle kɛ ɛbanyia anyuhɔlɛ. Saa ‘ɛ nye ɛbolo kɛ ɛyɛ asafo kpanyinli a,’ ɔwɔ kɛ ɛbɔ mɔdenle wɔ ninyɛne ɛhye mɔ anwo kɛ mɔɔ ɛbahola la. (1 Temɔte 3:1) Noko Kilisienema amuala bahola azukoa debie avi nu. Kɛ neazo la, Gyihova anye la kɛ yɛ nuhua biala bala abotane anzɛɛ ndelebɛbo ali na yeamaa ye adwenle nu ala ɛkɛ. (Felepaema 4:5; 1 Pita 4:7) Saa mgbanyima ne mɔ ‘pɛ kilemunli kpalɛ maa mboane ne’ a, yɛbahola ‘yɛazukoa bɛ diedi ne.’​—1 Pita 5:3; Hibuluma 13:7.

¹¹ “Kɛ ɔkɛyɛ na meava meaboa awie mɔ ɛ?” Yɛbahola yɛava edwɛkɛ zɔhane yɛaboa Baebolo sukoavoma nee anyelielɛma gyɛne yɛamaa bɛade kɛzi asafo nu mgbanyima le ngakyile fi ɛzonlenlɛ gyɛne nu mgbanyima anwo la abo. Eza ɔbahola yeaboa yɛ yeamaa yɛahakye gyima ɛsesebɛ mɔɔ mgbanyima ne mɔ yɛ wɔ asafo ne anu la. Na ɛhye bamaa yɛabu bɛ kpalɛ. (1 Tɛsalonaekama 5:12) Saa yɛbu bɛ kpalɛ a, ɔbamaa bɛ nye alie wɔ bɛ gyima ne ɛyɛlɛ nu.​—Hibuluma 13:17.

12, 13. (a) Neɛnleanu boni a yɛbahola yɛava ninyɛne mɔɔ yɛlɛ la yɛayɛ a? (b) Maa kɛzi mekɛ mɔɔ bɛhɛlɛle edwɛkɛ bie la maa yɛnwu ɛzukoalɛdeɛ mɔɔ bɛangɛlɛ la anwo neazo.

¹² Yɛ neɛnleanu. Saa yɛlɛsukoa Baebolo ne a, yɛbahola yɛakpondɛ kpuya ɛhye mɔ anwo mualɛ:

• Nwane a hɛlɛle Baebolo foa ɛhye a?

• Nienwu a bɛhɛlɛle ye a, na wɔ mekɛ boni anu?

• Edwɛkɛ titili boni a ɛnee ɛlɛsisi wɔ mekɛ mɔɔ bɛkɛlɛ buluku ɛhye la ɛ?

Bie a edwɛkɛ ɛhye bamaa yɛanwu ɛzukoalɛdeɛ mɔɔ yɛkenga ye ɛkɛ ne ala a yɛnrɛnwu ye la.

¹³ Kɛ neazo la, Yizikeɛle 14:13, 14 ka kɛ: “Saa maanle bie anu amra yɛ ɛtane tia me, bɛgyakyi me bɛkɔsonle nyamenle gyɛne, na meka kɛ metea maanle zɔhane, mefa ɛhɔne nee sane mebato maanle ne anu, na mɔɔ menli nee nane ɛlɛwu la, saa menli nsa ɛhye mɔ, Nowa, Daneɛle, yɛɛ Dwobu wɔ maanle ne anu bɔbɔ a, bɛ tenleneyɛlɛ kɛlie bɛdabɛ bɛ ngome ala ngoane. Medame Awulae Nyamenle a mese a.” Saa yɛyɛ nwolɛ neɛnleanu a, yɛbanwu kɛ Yizikeɛle hɛlɛle edwɛkɛ zɔhane kɛyɛ ɛvolɛ 612 kolaa na bɛawo Kelaese. Ɛnee Nowa nee Dwobu ɛwu dɛbadɛba, noko ɛnee Gyihova tɛkakye bɛ nɔhalɛlilɛ ne. Ɛnee Daneɛle tɛte aze. Mɔɔ Gyihova hanle kɛ ɔle tenlenenli kɛ Nowa nee Dwobu la, bie a ɛnee yeli ɛvolɛ kɛyɛ 20. Duzu a yɛsukoa yɛfi nu a? Gyihova nwu ye azonvolɛ mɔɔ di nɔhalɛ mɔɔ ngakula boka nwo la kɔsɔɔti, yɛɛ bɛsonle bolɛ bɛmaa ye.​—Edwɛndolɛ 148:12-14.

NYIA MBULUKU NGAKYILE ZO NVASOƐ

14. Kɛ ɔkɛyɛ na mbuluku mɔɔ bɛyɛle bɛmaanle ngakula la abo bɛ ɛ, na kɛ ɔkɛyɛ na yeaboa awie mɔ noko ɛ? (Nea mɔlebɛbo nvoninli ne.)

¹⁴ Mbuluku mɔɔ bɛyɛ bɛmaa ngakula. Yɛnwu ye kɛ yɛbahola yɛanyia Baebolo ne foa biala azo nvasoɛ. Zɔhane ala a yɛ mbuluku ne mɔ amuala bahola aboa yɛ a. Bɛmaa yɛnlea neazo bie mɔ. Gyihova ɛmaa ngakula asa ɛha ninyɛne dɔɔnwo kenlensa ye.^[1] (Nea awieleɛ edwɛkɛ ne.) Ninyɛne ɛhye mɔ boa bɛ maa bɛgyinla ngyegyelɛ mɔɔ bɛyia wɔ sukulu nu nee mekɛ mɔɔ bɛlɛnyi la anloa. Noko kɛ ɔkɛyɛ na edwɛkɛ nee mbuluku ɛhye mɔ aboa yɛ muala ɛ? Saa yɛkenga a, yɛnwu ngyegyelɛ mɔɔ ngakula yia la na yemɔ bamaa yɛanwu kɛzi ɔwɔ kɛ yɛboa bɛ la.

15. Duzu ati a ɔwɔ kɛ Kilisienema mɔɔ bɛnyi la kenga edwɛkɛ mɔɔ bɛkɛlɛ bɛmaa ngakula la ɛ?

¹⁵ Ɔnle kɛ Kilisienema mɔɔ bɛyɛ mgbanyinli la kpo kɛ bɛbagenga edwɛkɛ mɔɔ bɛhɛlɛle bɛmaanle ngakula la. Ngyegyelɛ dɔɔnwo mɔɔ bɛka nwolɛ edwɛkɛ wɔ nu la ka Kilisienema amuala. Kɛ neazo la, ɔwɔ kɛ yɛ muala yɛgyinla yɛ diedi ne anzi, yɛkomo yɛ nwo zo, yɛkoati atipɛnema ngyegyelɛ, agɔnwolɛ ɛtane nee anyelielɛ ninyɛne mɔɔ ɛnle kpalɛ. Yemɔti ɔnva nwo kɛ bɛhɛlɛle mbuluku zɔhane mɔ bɛmaanle ngakula la, edwɛkɛ ne gyi Baebolo ne azo na Kilisienema kɔsɔɔti bahola anyia zolɛ nvasoɛ.

16. Duzu bieko a yɛ mbuluku ne mɔ boa ngakula maa bɛyɛ a?

¹⁶ Mbuluku mɔɔ bɛkɛlɛ bɛmaa ngakula la boa bɛ maa bɛmia bɛ nee Gyihova agɔnwolɛvalɛ ne anu. (Kenga Nolobɔvo ne 12:1, 13.) Mgbanyinli noko kola nyia zolɛ nvasoɛ. Kɛ neazo la, ɛnee edwɛkɛ “Young People Ask . . . How Can I Make Bible Reading Enjoyable?” wɔ April 2009 Awake! ne anu. Nzuzulɛ ngakyile mɔɔ baboa nee ɛlɛka mɔɔ ɛbahola wɔapɛ wɔava wɔazie na wɔava wɔazukoa debie la boka nwo. Asoo ɔboale mgbanyinli? Yelɛ bie mɔɔ lɛ ngakula la hanle kɛ ɛnee Baebolo ɛgengalɛ yɛ ye se kpalɛ. Noko ɔvale nzuzulɛ mɔɔ wɔ edwɛkɛ ne anu la ɔlile gyima na kɛkala ɔ nye die Baebolo ɛgengalɛ nwo. Ɔse yenwu kɛzi mbuluku mɔɔ wɔ Baebolo ne anu la bɔ abusua na ɔle debie kɛnlɛma la, na ɔdoale zo kɛ: “Kɛkala me nye die Baebolo ɛgengalɛ nwo kpalɛ tɛla mekɛ biala.”

17, 18. Kɛzi maanlema mbuluku mɔɔ yɛkenga la boa yɛ ɛ? Maa neazo.

¹⁷ Mbuluku mɔɔ yɛfa yɛmaa maanlema. Ɔvi 2008 mɔɔ ba la, yɛ nye ɛlie Ɛzinzalɛ Arane, debiezukoalɛ ɛdeɛ ne anwo. Bɛkɛlɛ ɛhye bɛmaa Gyihova Alasevolɛ titili, noko yɛlɛ maanlema ɛdeɛ. Kɛ ɔkɛyɛ na yɛanyia ɛhye mɔ noko azo nvasoɛ ɛ? Neazo bie ɛne. Saa ɛto ɛsalɛ ɛfɛlɛ awie kɛ ɔrɛla Belemgbunlililɛ Asalo na ɔba a, ɛ nye die. Saa tendɛvolɛ ne ɛlɛmaa ɛdendɛlɛ ne a, ɛdwenle wɔ ɛyɛvolɛ ne anwo. Ɛdwenle kɛzi ɔbade nganeɛ wɔ edwɛkɛ ne anwo nee kɛzi edwɛkɛ ne bahola ahakyi ye ɛbɛlabɔlɛ la anwo. Ɛhye maa ɛ nye die na ɛkile edwɛkɛ ne anwo anyezɔlɛ.

¹⁸ Bie a yɛkenga maanlema mbuluku noko a zɔhane ala a ɔbayɛ yɛ a. Kɛ neazo la, maanlema Ɛzinzalɛ Arane ɛdeɛ ne nee jw.org ne azo edwɛkɛ dɔɔnwo fa edwɛkɛ agbɔkɛ mɔɔ ɔ bo ɛdelɛ ɛnyɛ se la kilehile Baebolo ne anu. Saa yɛkenga edwɛkɛ ɛhye a, ɔmaa yɛte Baebolo ne anu nɔhalɛ mɔɔ yɛze bɛ dɛba la abo kpalɛ na yɛnyia nwolɛ ɛhulolɛ. Eza yɛnwu ndenle fofolɛ dɔɔnwo mɔɔ yɛdua zo yɛkilehile yɛ diedi ne anu wɔ daselɛlilɛ nu la. Awake! ne noko maa yɛnyia diedi kpole kɛ Bɔvolɛ bie wɔ ɛkɛ. Eza ɔboa yɛ ɔmaa yɛkilehile yɛ diedi ne anu.​—Kenga 1 Pita 3:15, 16.

19. Kɛ ɔkɛyɛ na yɛahile ninyɛne mɔɔ Gyihova fa maa yɛ la anwo anyezɔlɛ ɛ?

¹⁹ Nɔhalɛ nu, Gyihova ɛmaa yɛ folɛdulɛ nee adehilelɛ dɔɔnwo mɔɔ boa yɛ a. (Mateyu 5:3) Bɛmaa yɛhɔ zo yɛgenga edwɛkɛ mɔɔ ɔfa ɔmaa yɛ la amuala na yɛva yɛli gyima. Saa yɛyɛ ye zɔ a, ɔbaboa yɛ na yɛamaa Gyihova anwu kɛ yɛ nye sɔ nziezielɛ mɔɔ yeyɛ yemaa yɛ la kɔsɔɔti.​—Ayezaya 48:17.